ᒐᓂᓯᔅ 6

ᑲ ᒥᒋᑥᑦ ᐃᔪᐤ

1ᐃᔅᐱ ᑲ ᒥᒐᑎᒡ ᐃᔪᒡ ᐅᑕ ᐊᔅᒋᒡ ᑭᔭ ᑲ ᐃᔪᔨᒋ ᐅᑕᓂᓱᐛᐛ, 2ᒋᓴᒪᓂᑐᐤ ᐅᑦ ᐃᔨᒪ ᒋ ᐛᐱᒪᔪᐛ ᐊᓂᔭ ᐃᔪᐛ ᐅᑕᓂᓯᔪᐛ ᐊᔅᐱᔅ ᒥᔪᔎᐎᔨᒋ ᑭᔭ ᒋ ᐅᑎᓇᒪᓱᐅᒡ ᒐ ᐎᐅᒡ᙮ 3ᐊᑯ ᑎᐸᔨᒋᒐᓱᐤ ᐊᔅᒋᔄᑦ, “ᓇᒪᔭᐤ ᓇᓂᑎᒻ ᒐ ᑕᔨᒋ ᓂᑦ ᐊᒐᒂ ᐊ ᑕᑦ ᐃᔪᐤ, ᐊ ᒪᔭᑎᓯᑦ, ᒥᒄ ᐸᐃᑯ ᒥᑕᓯᒥᑎᓄᐤ ᐊᓱ ᓂᓱᔪᐤ ᑕᑐᐳᓇ ᓂᑭ ᒥᔭᐤ ᐊᐛᓐ ᒐ ᐃᔅᐱᔅ ᐱᒪᑎᓯᑦ᙮”

4ᐃᔭᐱᒡ ᒋ ᑕᐅᒡ ᒥᔅᑕᐸᐅᒡ ᐅᑕ ᐊᔅᒋᒡ, ᒧᔭᒻ ᒋᓴᒪᓂᑐᐤ ᐅᑦ ᐃᔨᒪ ᑲ ᐎᒋᒪᔨᒋ ᐊᓂᔭ ᐃᔪᐛ ᐅᑕᓂᓯᔪᐛ ᑭᔭ ᒋ ᑕᔪᐛ ᐅᑦ ᐊᐛᓯᒧᐛᐛ, ᒋᒋᐛ ᒋᓴᐱᐅᒡ ᐅᒡ ᐎᐱᒡ ᐃᔪᒡ ᑭᔭ ᒋ ᐊᔭᐅᒡ ᒥᔅᑯᓯᐅᓂᔪᐤ᙮

5ᐊᑯ ᑎᐸᔨᒋᒐᓱᐤ ᒂ ᐛᐱᒪᑦ ᐃᔪᐛ ᓇᔅᒡ ᐊ ᒥᒋᑥᔨᒋ ᐅᑕ ᐊᔅᒋᒡ, ᑭᔭ ᐊᓯᑯᒻ ᒥᒋ ᐃᑕᔨᑎᒧᐅᓂᔪᐤ ᒥᒄ ᒋ ᑎᑯᓂᔪᐤ ᐅᑕᐃᐛᒡ᙮ 6ᑎᐸᔨᒋᒐᓱᐤ ᒋ ᒪᒋᔨᐛᓱᐤ ᑲᒋ ᐅᓯᐊᑦ ᐃᔪᐛ ᑭᔭ ᓇᒪ ᐅᒋ ᒥᔽᔨᑎᒻ ᐅᑕᐃᒡ᙮ 7ᐊᑯ ᑎᐸᔨᒋᒐᓱᐤ ᐊᔅᒋᔄᑦ, “ᓂᑭ ᓂᓱᐅᓇᒋᐊᐅᒡ ᒥᓯᐛ ᐃᔪᒡ ᐊᔅᒋᔪᐤ ᑲ ᐅᒋ ᐅᓯᐃᒂᐤ, ᒥᓯᐛ ᐃᔪᒡ ᑭᔭ ᐊᐛᓯᓯᒡ, ᒥᓐᑐᓯᒡ ᑭᔭ ᐱᔭᓱᐅᒡ ᐃᔅᐱᒥᒡ, ᓂ ᒥᒋᔨᐛᓯᓐ ᑲᒋ ᐅᓯᐃᒂᐤ᙮” 8ᒥᒄ ᓄᐛᔨᒋ ᒋ ᓇᐊᔨᑎᒥᐃᑯᐤ ᑎᐸᔨᒋᒐᓱᐤ᙮

ᓄᐛ ᑲ ᐅᓯᑕᑦ ᐅᐤᑎᔪᐤ

Genesis 6.9-22; 7.24; 8.14-19 (Proper-4 Year A)

9ᐊᐅᑯᐤ ᐊ ᐃᓯ ᑎᐸᒋᒪᑭᓄᐅᑦ ᓄᐛ ᐅᑦ ᐊᓂᔅᑯᑕᐸᓇ᙮

ᓄᐛ ᒥᒄ ᒋ ᐸᐃᑯᓱᐤ ᑲ ᑯᐃᔅᑯᑕᑎᓯᑦ ᐃᔪᐤ ᐅᑕ ᐊᔅᒋᒡ ᑭᔭ ᓇᓂᑎᒻ ᒋ ᓇᐊᔨᑎᒪᐊᐤ ᒋᓴᒪᓂᑐᐛ ᒥᒄ ᒐᒂᔪᐤ ᑲ ᐃᑐᑕᐧᒃ, 10ᑭᔭ ᒋ ᓂᔅᑎᔨᐛ ᐅᑯᓴ: ᓴᒻ, ᐊᒻ ᑭᔭ ᒐᐸᑦ᙮

11ᒋᓴᒪᓂᑐᐤ ᒋ ᐛᐸᑎᒻ ᒋᒋᐛ ᐊ ᒥᓴᔨᒡ ᒥᒋᑥᐅᓂᔪᐤ ᐅᑕ ᐊᔅᒋᒡ ᑭᔭ ᒋ ᒥᓴᐤ ᐊᒂᑎᓯᐅᓐ᙮ 12ᒋᓴᒪᓂᑐᐤ ᒋ ᒋᑕᐸᑎᒻ ᐊᔅᒋᔪᐤ ᑭᔭ ᒋ ᐛᐸᑎᒻ ᑲ ᐃᔅᐱᔅ ᒥᒋᑥᒥᑭᓂᔨᒡ, ᒥᓯᐛ ᐊᐛᓐ ᑲ ᑕᑦ ᐅᑕ ᐊᔅᒋᒡ ᒋ ᒥᒋᑥᐤ ᒥᒄ ᒐᒂᔪᐤ ᑲ ᐃᓯ ᐃᑐᑕᐧᒃ᙮ 13ᐊᑯ ᒋᓴᒪᓂᑐᐤ ᐊᑕᑦ ᓄᐛᔨᒋ, “ᓂᒋ ᐎᔭᔨᑕᓐ ᒐᒋ ᓂᓱᐅᓇᒋᐃᒂᐤ ᒥᓯᐛ ᐃᔪᒡ ᐅᑕ ᐊᔅᒋᒡ, ᐎᔨᐛᐤ ᐛᒋ ᒥᓴᒡ ᒥᒋᑐᑎᒧᐅᓐ ᐅᑕ ᐊᔅᒋᒡ᙮ ᓂᐦᐃ, ᓂᑭ ᓂᓱᐅᓇᒋᑕᓐ ᐊᔅᒋᔾ ᑭᔭ ᐃᔪᒡ᙮

14ᒐ ᐅᓯᑕᔨᓐ ᐊ ᒥᓴᒡ ᐅᐤᑦ, ᐊ ᐱᓯᑯᓯᒡ ᒥᔅᑎᑯᒡ ᒐ ᐊᐱᒋᐃᑥᐤ, ᐱᒍᐤ ᒐ ᒋᐳᔅᒋᓂᑲᒐᔨᓐ ᐱᑎᑭᒥᒡ ᑭᔭ ᐎᐎᑎᒥᒡ᙮ 15ᒪᐅ ᒐ ᐃᓯᓇᑯᑕᔨᓐ, ᓇᐤ ᒥᑕᓯᒥᑎᓄᐤ ᐊᓱ ᐱᑕᑕᒡ ᑕᑐᔪᐤ ᒥᓯᑦ ᒐ ᐃᔅᐱᔅ ᒋᓄᑕᔨᓐ, ᓂᔄᐅᑕᒡ ᑕᑐᔪᐤ ᐊᓱ ᐱᑕᑕᒡ ᑕᑐᐤ ᒥᓯᑦ ᒐ ᐃᔅᐱᔅ ᐃᔨᑭᔅᒋᑕᔨᓐ, ᓇᐎᔪᐤ ᐊᓱ ᐱᑕᑕᒡ ᑕᑐᐤ ᒥᓯᑦ ᒐ ᐃᔅᐱᔅ ᐃᔅᐱᑕᓂᑕᔨᓐ᙮ 16ᒐ ᐃᑐᑎᒥᓐ ᒐ ᐅᒋ ᓴᒐᐛᐱᓇᓄᐅᒡ ᒥᓯᐛ ᐛᔅᑲ ᐅᐤᑎᒡ, ᔭᓇᐤ ᑕᑐᓴᑉ ᒥᒋᒋᓐ ᒐᑲᑦ ᑕᐧᑯᒡ ᒐᒋ ᑎᒂᒋ᙮ ᓂᔍᐤ ᐊ ᐃᔅᐱᒥᑎᑯᐅᒡ ᒐ ᐃᓯᓇᑯᑕᔨᓐ ᐱᑎᑭᒥᒡ ᑭᔭ ᔅᑐᐧᑭᓐ ᐅᐱᒪ ᒐ ᒋᑯᒧᐃᑦ᙮”

17“ᐛᐸᑕ ! ᓂᑭ ᐃᑎᓴᐊᓐ ᒐᒋ ᐃᔅᒋᐸᒡ ᐊᔅᒋᔾ ᑭᔭ ᒋᑭ ᓂᓱᐅᓇᑎᓯᐅᒡ ᒥᓯᐛ ᐃᔪᒡ, ᒥᓯᐛ ᐊᐛᓐ ᑲ ᐊᔭᑦ ᐱᒪᑎᓯᐤ ᔭᔭᐅᓂᔪᐤ, ᒥᓯᐛ ᒐᒂᓐ ᐊ ᑎᒂᒡ ᐅᑕ ᐊᔅᒋᒡ ᒋᑭ ᓂᓱᐅᓇᑎᓐ᙮ 18ᒥᒄ ᓂᑭ ᑐᑕᓐ ᓂᓇᔅᑯᒧᐅᓐ, ᒋᔾ ᒥᒄ ᒋᑭ ᐳᓯᓐ ᐅᐤᑦ, ᒋᔾ ᑭᔭ ᒋᑯᓯᒡ ᑭᔭ ᒋᐅ ᑭᔭ ᒋᑯᓯᒡ ᐎᐛᐛ ᒐ ᐎᒋ ᐳᓯᒪᑯᒡ᙮ 19ᒐ ᐳᓯᐃᑥᐤ ᓇᓂᓱ ᒥᓯᐛ ᑕᑐᐎᒡ ᐊᐛᓯᓯᒡ, ᓇᐸ ᐊᐛᓯᔅ ᑭᔭ ᓄᓴ ᐊᐛᓯᔅ, ᒐ ᐳᓯᐃᑥᐤ ᐊᓐᑕ ᐅᐤᑎᒡ᙮ ᒐ ᑭᓄᐛᔨᒥᑥᐤ ᒐᒋ ᐱᒪᑎᓯᒡ ᒪᒂᒡ ᐃᔅᒋᐸᒐ᙮ 20ᓂᓱ ᒥᓯᐛ ᑕᑐᐎᒡ ᐊᓯᓇᑯᓯᑦ ᐱᔭᓱᐤ ᑭᔭ ᐊᐛᓯᔅ ᑭᔭ ᒥᓐᑐᔅ᙮ 21ᒐ ᐅᑎᓂᒥᓐ ᒥᓯᐛ ᑕᑐᐎᒡ ᐊ ᐃᓯᓇᒂᒡ ᒥᒋᒻ ᐊ ᒥᒋᓇᓄᐅᒡ ᑭᔭ ᒐ ᒪᐅᒋᑕᔨᓐ, ᒐᒋ ᐅᒋ ᒥᒋᔭᒄ ᑭᔭ ᒐ ᐅᒋ ᒥᒋᒡ ᐊᐛᓯᓯᒡ᙮”

22ᓄᐛ ᒋ ᐃᑐᑎᒻ ᒥᓯᐛ ᑲ ᐃᑎᓱᒥᑯᑦ ᒋᓴᒪᓂᑐᐛ᙮

දැනට තෝරාගෙන ඇත:

ᒐᓂᓯᔅ 6: ᓇᔅᑲᐱ

සළකුණු කරන්න

බෙදාගන්න

පිටපත් කරන්න