ᐊᒃᓱᑕᔅ 9
9
ᐊᐛᓯᓯᒡ ᑲ ᓂᐱᒡ
1ᐊᑯ ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᑲᐤ ᓂᑐᐛᐱᒪ ᒋᓴᐅᒋᒪᐤ ᑭᔭ ᒐ ᐃᑎᑦ, ‘ᑎᐸᔨᒋᒐᓱᐤ ᐃᑉᕈᐤ ᐅᒋᓴᒪᓂᑐᒧᐛᐛ ᒂ ᐃᔅᒋᔄᔨᒋ “ᐱᔅᑎᓇᐧᑯᒡ ᓂᑦ ᐃᔨᒥᒡ ᒐᒋ ᔅᑐᑕᒡ ᐊᑯ ᒪᒃ ᒐᒋ ᐊᔭᒥᐊᔅᑐᐅᒡ᙮” 2ᐊᑲ ᑕᑈᑎᒥᓇ ᑭᔭ ᐊ ᐊᑲ ᓇᐃᒥᑥᐛ ᒐᒋ ᔅᑐᑕᒡ, 3ᑎᐸᔨᒋᒐᓱᐤ ᐅᓱᐧᑲᑎᓯᐅᓐ ᐅᒡ ᒋᑭ ᐸᒋ ᐃᑎᓴᒻ ᒥᔅᑎ ᐊᐧᑯᓱᐅᓂᔪᐤ ᒐ ᐃᔭᒡ ᒋᑦ ᐊᐛᓯᓯᒧᐛᐅᒡ ᐊᓐᑕ ᑲ ᑕᒡ ᓂᑕᐅᒋᒋᑭᓂᒡ᙮ ᐊᓐᒡ ᑲᐸᐃᑭᔎᐅᒡ ᑭᔭ ᐅᐧᑲᓐᒡ ᑭᔭ ᑲ ᒥᔅᑎ ᐱᔎᐅᑯᓇᒡ ᐊᐛᓯᓯᒡ ᑭᔭ ᒥᔅᑐᓯᒡ, ᒪᔭᑕᓂᓯᒡ ᑭᔭ ᑲ ᐅᑦ ᐊᔅᑭᓂᓯᒡ᙮ 4ᒥᒄ ᑎᐸᔨᒋᒐᓱᐤ ᒋᑭ ᑎᐸᓇᐅᒡ ᐊᓂᔭ ᐃᔅᕋᐃᓪ ᐃᔪᐛ ᐅᒥᔅᑐᓯᒥᔪᐛ ᑭᔭ ᐊᓂᔭ ᐃᒋᑉᑦ ᐃᔪᐛ ᐅᒥᔅᑐᓯᒥᔪᐛ, ᒐ ᐊᑲ ᓂᐱᔨᒋ ᒥᔅᑐᓴ ᐃᔅᕋᐃᓪ ᐃᔪᐛ ᑕᐸᔨᒪᔨᒋ᙮’ ”
5ᑎᐸᔨᒋᒐᓱᐤ ᒋ ᐎᔨᔭᑎᒻ ᑕᐃᔅᐱ ᒐ ᐃᔅᐱᔨᒡ ᑭᔭ ᒂ ᐃᔅᒋᔄᑦ, “ᐛᐸᒐ ᑎᐸᔨᒋᒐᓱᐤ ᐅᔭ ᒋᑭ ᐃᑐᑎᒻ ᒐᒂᔪᐤ ᐅᑕ ᐃᒋᑉᑦ ᐊᔅᒋᒡ᙮” 6ᑭᔭ ᐎᔭᐱᓂᔨᒡ ᐊᐅᑯᔪᐤ ᑲ ᐃᑎᑦ ᑎᐸᔨᒋᒐᓱᐤ: ᒥᓯᐛ ᐊᓂᔭ ᐅᑦ ᐊᐛᓯᓯᒥᔪᐛ ᐃᒋᑉᑦ ᐃᔪᐛ ᒋ ᐳᓂᐱᒪᑎᓯᔪᐛ, ᒥᒄ ᓇᒪ ᐛᐛᒡ ᐸᐃᒄ ᐃᔅᕋᐃᓪ ᐃᔪᐛ ᐅᑦ ᐊᐛᓯᓯᒥᔪᐛ ᐅᒋ ᐳᓂᐱᒪᑎᓯᔪᐛ᙮ 7ᒋᓴᐅᒋᒪᐤ ᒂ ᐃᑎᓴᐛᑦ ᓇᐸᐛ ᒐᒋ ᓇᓂᑐ ᒋᔅᒐᔨᑎᒥᔨᒋ ᑭᔭ ᒂ ᒋᔅᒐᔨᑕᐧᒄ ᐊᑲ ᐛᐛᒡ ᐸᐃᒄ ᓂᐱᔨᒋ ᐃᔅᕋᐃᓪ ᐃᔪᐛ ᐅᑦ ᐊᐛᓯᓯᒥᔪᐛ᙮ ᒥᒄ ᐃᔭᐱᒡ ᒋ ᒥᔅᑯᔅᑎᒂᓇᐤ ᑭᔭ ᓇᒪ ᐅᒋ ᐎ ᐱᔅᑎᓇᐤ ᐃᔅᕋᐃᓪ ᐃᔪᐛ᙮
ᒥᓯᑭᔾ ᐊᐧᑯᓱᐅᓐ
8ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ ᑭᔭ ᐊᕋᓇ, “ᒐ ᓴᑭᔅᒋᓂᑕᔨᒄ ᑭᔅᑕᐤ ᐊᓐᑕ ᒋᑎᒋᐛᐛᒡ ᐊᓐᑕ ᒋᓴᐱᔅᒐᐛᓂᒡ ᐅᒡ, ᑭᔭ ᒧᓱᔅ ᐃᔅᐱᒥᒡ ᒋᑭ ᐃᓯ ᐛᐱᓂᒻ ᐊ ᐛᐱᒥᑯᑦ ᒋᓴᐅᒋᒪᐛ᙮ 9ᐅ ᒧᔭᒻ ᒐ ᐃᔅᐱᔨᒡ ᐊ ᒥᓯᑕᐱᔨᒡ ᒋᑭ ᐱᒋᑕᐱᔪᐤ ᒥᓯᐛ ᐊᓐᑕ ᐃᒋᑉᑦ ᐊᔅᒋᒡ, ᒐ ᐊᐧᑯᓯᒡ ᐅᓯᑭᔪᐛᐛ ᐃᔪᒡ ᑭᔭ ᐊᐛᓯᓯᒡ ᒥᓯᐛ ᐃᒋᑉᑎᒡ᙮”
10ᐊᑯ ᑲ ᒪᒧᓴᒋᓇᒡ ᑭᔅᑕᔪᐤ ᒋᓴᐱᔅᒐᐛᓂᒡ ᐅᒋ ᑭᔭ ᒂ ᓂᑐᐛᐱᒪᒡ ᒋᓴᐅᒋᒪᐛ᙮ ᒋᓴᐅᒋᒪᐤ ᐊ ᑭᓄᐛᐱᒥᑦ, ᒧᓱᔅ ᒂ ᐛᐱᓇᐧᒃ ᑭᔅᑕᔪᐤ ᐃᔅᐱᒥᒡ ᐃᓯ, ᑭᔭ ᒥᓯᑭᔾ ᐊᐧᑯᓱᐅᓐ ᒂ ᐱᒥᐱᔨᒡ ᐊ ᑲᔅᑎᓇᒡ ᐃᔪᒡ ᑭᔭ ᐊᐛᓯᓯᒡ ᒥᓯᐛ ᐊᓐᑕ ᐃᒋᑉᑎᒡ᙮ 11ᑭᔭ ᑲᒥᓂᑐᐅᓯᒡ ᓇᒪ ᐅᒋ ᐅᑎᔅᑯᑲᐳᔅᑐᐛᐅᒡ ᒧᓱᓴ ᐛᔅ ᑭᔭ ᐎᔨᐛᐤ ᒋᑲᔅᑎᓂᒧᒡ ᒥᓯᑭᔾ ᐊᐧᑯᓱᐅᓂᔪᐤ ᒧᔭᒻ ᒥᓯᐛ ᐃᒋᑉᑦ ᐃᔪᒡ᙮ 12ᐊᑯ ᑎᐸᔨᒋᒐᓱᐤ ᒂ ᐃᑐᑐᐛᑦ ᒋᓴᐅᒋᒪᐛ ᒐᒋ ᒥᔅᑯᔅᑎᒂᓇᔨᒋ᙮ ᑭᔭ ᒋᓴᐅᒋᒪᐤ ᓇᒪ ᐅᒋ ᓂᑐᑐᐛᐤ ᒧᓱᓴ ᑭᔭ ᐊᕋᓇ, ᒧᔭᒻ ᑎᐸᔨᒋᒐᓱᐤ ᑲ ᐃᑕᑦ ᒧᓱᓴ᙮
ᓯᓯᑯᓂᐱᔾ
13ᐊᑯ ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᐎᐱᒡ ᒐ ᐅᓂᔨᓐ ᒐᒋᓴᐸᔭᒐ᙮ ᒐ ᓂᑐᐛᐱᒥᑦ ᒋᓴᐅᒋᒪᐤ ᑭᔭ ᒐ ᐃᑎᑦ, ‘ᑎᐸᔨᒋᒐᓱᐤ ᐃᑉᕈᐤ ᐅᒋᓴᒪᓂᑐᒧᐛᐛ ᒂ ᐃᔅᒋᔄᔨᒋ: “ᐱᔅᑎᓇᐧᑯᒡ ᓂᑦ ᐃᔨᒥᒡ ᒐᒋ ᔅᑐᑕᒡ ᑭᔭ ᒐᒋ ᐊᔭᒥᐊᔅᑐᐅᒡ᙮” 14ᐊᑲ ᐃᑐᑎᒥᓇ ᐅ, ᒋᑭ ᐃᑎᓴᐊᒪᑎᓇᐛᐤ ᒥᓯᐛ ᐊ ᐃᓯᓇᒂᒡ ᐊᐧᑯᓱᐅᓐ ᒋᔾ ᑭᔭ ᒋᑯᐸᓇᒥᒡ ᑭᔭ ᒋᑦ ᐃᔨᒥᒡ᙮ ᐊᑯ ᒐ ᐎ ᐛᐸᑎᔨᑕᑯᒡ ᓂᔾ ᐅ ᒋᓴᒪᓂᑐᐤ ᓇᒪ ᑕᐤ ᐊᐛᓐ ᐊᑕᔨᑕᑯᓯᑦ ᐊᑕᔨᑕᑯᓯᔭᓐ ᐅᑕ ᐊᔅᒋᒡ᙮ 15ᓴᔅ ᓄᑎᒻ ᒋᐸ ᒋ ᓂᐸᐃᑎᓇᐛᐱᓐ᙮ ᒋᐸ ᒋ ᒥᔨᑎᓇᐛᐱᓐ ᐊᐧᑯᓱᐅᓐ ᑭᔭ ᓇᒪ ᐊᑐᒡ ᔅᒋ ᓄᑯᓯᓇᐛᐱᓐ ᐅᑕ ᐊᔅᒋᒡ᙮ 16ᐊᑯ ᒋ ᒥᔨᑎᓇᐛᐤ ᒐᒋ ᐱᒪᑎᓯᔭᒄ ᒥᒄ ᒐᒋ ᐛᐸᑎᒪᒃ ᓂᓱᐧᑲᑎᓯᐅᓐ ᑭᔭ ᓂᑦ ᐃᓯᓂᐧᑲᓱᐅᓐ ᒐᒋ ᒋᔅᒐᔨᑕᑭᓄᐅᒡ ᐅᑕ ᐊᔅᒋᒡ᙮ 17ᐊᔅᒄ ᒋ ᒥᔅᑯᐅᓯᓐ ᐊᑲ ᐎ ᐱᔅᑎᓂᑥᐤ ᒋᓴᒪᓂᑐᐤ ᐅᑦ ᐃᔨᒥᒪ᙮ 18ᐛᐸᒐ, ᓂᑭ ᐃᑎᓴᐊᓐ ᒐ ᓯᓯᑯᓂᐱᔨᒡ ᒥᓯᐛ ᐊᓐᑕ ᐃᒋᑉᑎᒡ ᑭᔭ ᐊᑲ ᓂᑕ ᐃᓯᓇᒂᒡ ᒋᑭ ᐃᓯᓇᑯᓐ ᐊᓐᑕ ᐃᒋᑉᑎᒡ᙮ 19ᒐ ᐃᑎᓱᒥᑥᐤ ᒋᑦ ᐃᔨᒥᒡ ᐱᑎᑭᒥᒡ ᒐᒋ ᑕᒡ ᑭᔭ ᒐᒋ ᐱᑎᑲᐊᒡ ᐅᑦ ᐊᐛᓯᓯᒧᐛᐛ ᑭᔭ ᒐᒋ ᐱᑎᑭᑕᒡ ᓄᑎᒻ ᒐᒂᔪᐛ ᐊᓐᑕ ᐊ ᑎᑯᓂᔨᒋ ᓂᑕᐅᒋᒋᑭᓂᒡ ᐛᔅ ᐊᑲ ᐱᑎᑲᑭᓄᑥᐛ, ᒥᓯᐛ ᐊᐛᓐ ᑭᔭ ᐊᐛᓯᓯᒡ ᒋᑭ ᑲᔅᑕᐅᑯᐅᒡ ᐊ ᓯᓯᑯᓂᐱᔨᒡ ᐎᐎᑎᒥᒡ ᐊᑕᒡ ᑭᔭ ᒥᓯᐛ ᒋᑭ ᐳᓂᐱᒪᑎᓯᐅᒡ᙮’ ”
20ᐱᔅᒐ ᒋᓴᐅᒋᒪᐤ ᐅᑯᐸᓇᒪ ᐊ ᑯᔅᑎᒺᒡ ᑎᐸᔨᒋᒐᓱᐛ ᐅᑦ ᐃᔨᒧᐅᓂᔪᐤ, ᒋ ᐃᔭᓯᒋᔨᐛ ᐊᐱᑎᑲᔨᒋ ᐅᑯᐸᓇᒥᔪᐛ ᑭᔭ ᐅᑦ ᐊᐛᓯᓯᒥᔪᐛ᙮ 21ᐊᑯ ᐊᓐ ᐊᐛᓐ ᐊᑲ ᐅᒋ ᓂᑐᑎᒺᑦ ᑎᐸᔨᒋᒐᓱᐛ ᐅᑦ ᐃᔨᒧᐅᓂᔪᐤ ᒂ ᓂᑭᑕᑦ ᐅᑯᐸᓇᒪ ᑭᔭ ᐊᐛᓯᓴ ᐊᓐᑕ ᓂᑕᐅᒋᒋᑭᓂᒡ᙮
22ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᐃᔅᐱᑕ ᔅᑎᒋᔾ ᐊᓐᑕ ᒋᓯᑯᒡ ᐃᔅ ᑭᔭ ᐊ ᓯᓯᑯᓂᐱᔨᒡ ᒐ ᐸᒋᑎᒡ ᐊᓐᑕ ᐃᒋᑉᑎᒡ᙮ ᒐ ᑲᔅᑕᐅᑯᒡ ᐊᓐᒡ ᐃᔪᒡ ᑭᔭ ᐊᐛᓯᓯᒡ ᑭᔭ ᐊ ᓂᑕᐅᒋᓂᔨᒋ ᒐᒂᔪᐛ ᐊᓐᑕ ᓂᑕᐅᒋᑭᓂᒡ ᐊᓐᑕ ᒥᓯᐛ ᐃᒋᑉᑦ ᐊᔅᒋᒡ᙮” 23ᒧᓱᔅ ᒂ ᐃᔅᐱᔨᑕᑦ ᐅᓯᔅᑲᐅᓐ ᐊᓐᑕ ᒋᓯᑯᒡ ᐃᔅ᙮ ᐊᑯ ᑎᐸᔨᒋᒐᓱᐤ ᒂ ᐃᑎᓴᐛᑦ ᓂᒥᔅᒋᐅᐛ ᑭᔭ ᐊ ᓯᓯᑯᓂᐱᔨᒡ᙮ ᑭᔭ ᓂᒥᔅᒋᐅᔅᑯᑕᐤ ᒂ ᐃᔅᐱᔨᒡ ᐊᓐᑕ ᒧᔅᑎᔅᑭᒥᒡ᙮ ᑎᐸᔨᒋᒐᓱᐤ ᒂ ᐃᑎᓴᐧᒃ ᐊ ᓯᓯᑯᓂᐱᔨᒡ ᐊᓐᑕ ᐃᒋᑉᑦ ᐊᔅᒋᒡ᙮ 24ᐊᑯ ᒂ ᓯᓯᑯᓂᐱᔨᒡ ᑭᔭ ᓂᒥᔅᒋᐅᒡ ᒂ ᐸᑕᑯᓯᒡ᙮ ᒋᒋᐛ ᒋ ᐊᒂᑕᔨᑕᑯᓂᔪᐤ, ᓇᒪ ᓂᑕ ᐅᒋ ᐃᓯᓇᑯᓐ ᐊ ᒋᔎᔨᑕᒂᒡ ᐊᓐᑕ ᐃᒋᑉᑎᒡ᙮ 25ᒥᓯᐛ ᐎᐎᑎᒥᒡ ᑲ ᑎᒂᒡ ᒐᒂᓐ ᐃᒋᑉᑎᒡ ᒋ ᐃᔭᔪᐅᓐ᙮ ᒥᓯᐛ ᒐᒂᓐ ᐊᓐᑕ ᓂᑕᐅᒋᒋᑭᓂᒡ ᒋ ᐅᓂᑎᓐ, ᐃᔪᒡ ᑭᔭ ᐊᐛᓯᓯᒡ ᑭᔭ ᓂᑕᐅᒋᒋᑭᓇ, ᐃᔭᐱᒡ ᒥᔅᑎᑯᒡ᙮ 26ᒥᒄ ᐊᓐᑕ ᑯᓯᓐ ᐊᔅᒋᒡ ᐃᔅᕋᐃᓪ ᐃᔪᒡ ᐊᑕᒡ ᓇᒪ ᐅᒋ ᓯᓯᑯᓂᐱᔪᐤ᙮
27ᒋᓴᐅᒋᒪᐤ ᒂ ᐎᓴᒪᑦ ᒧᓱᓴ ᑭᔭ ᐊᕋᓇ᙮ “ᓂᔾ ᓂᒋ ᒥᒋᑐᑕᓐ,” ᒂ ᐃᑕᑦ᙮ “ᑎᐸᔨᒋᒐᓱᐤ ᑕᑈᐤ, ᑭᔭ ᓂᔾ ᑭᔭ ᓂᑦ ᐃᔨᒥᒡ ᓂᒋ ᒥᒋᑐᑕᓇᓐ᙮ 28ᓂᑐᑎᒧᐤ ᑎᐸᔨᒋᒐᓱᐤ᙮ ᓴᔅ ᓂᑦ ᐃᔅᐱᔨᓇᓐ ᓂᒥᔅᒍᐅᒡ ᑭᔭ ᐊ ᓯᓯᑯᓂᐱᔨᒡ᙮ ᑭᔭ ᒋᑭ ᐱᔅᑎᓂᑎᓇᐛᐤ᙮ ᓴᔅ ᐅᑕ ᓇᒪ ᒋᑭ ᐅᒋ ᑕᓇᐛᐤ᙮”
29ᒧᓱᔅ ᒂ ᐃᑕᑦ, “ᐅ ᒋ ᐎᐎᔭᓇ ᐅᑕᓇᐤ, ᐊᑯ ᒐ ᓴᑐᓂᒧᐅᒃ ᓂᑎᒋᔭ ᑎᐸᔨᒋᒐᓱᐤ ᐊᔭᒥᐊᐃᔭᓐ᙮ ᓂᒥᔅᒍᐅᒡ ᒐ ᒋᒺᒡ᙮ ᓇᒪ ᒋᑭ ᒋ ᑎᑯᓐ ᐃᔭᐱᒡ ᐊ ᓯᓯᑯᓂᐱᔨᒡ᙮ ᐊᑯ ᒐ ᒋᔅᒐᔨᑎᒪᒄ ᑎᐸᔨᒋᒐᓱᐤ ᑕᐸᔨᑕᐧᒃ ᐅᔭ ᐊᔅᒋᔪᐤ᙮ 30ᒥᒄ ᓂ ᒋᔅᒐᔨᑕᓐ ᒋᔾ ᑭᔭ ᒋᑦ ᐊᐱᒋᐊᑭᓐᒡ ᓇᒪ ᐊᔅᒄ ᒋ ᑯᔅᑕᐛᐤ ᑎᐸᔨᒋᒐᓱᐤ ᒋᓴᒪᓂᑐᐤ᙮”
31ᒥᓯᐛ ᒋ ᓂᓱᐅᓇᑎᓇ ᐛᐱᔅᑲᑭᓂᑭᓇ ᑭᔭ ᐃᔎᓯᒥᓄᒂ, ᐛᔅ ᒋ ᐊᑎᑕᐛ ᐃᔎᓯᒥᓄᒂ ᑭᔭ ᒋ ᐊᑎ ᐛᐱᑯᓂᑭᓄᐛ ᐛᐱᔅᑲᑭᓂᑭᓇ᙮ (ᐛᐱᔅᑲᑭᓂᑭᓐ ᐊᐅᑯᓐ ᐊᐱᒋᑕᐅᓇ ᐊ ᐅᒋ ᐅᓯᑕᑯᓂᔨᒋ, ᑭᔭ ᓂᑕᐅᒋᑕᑭᓐ ᐃᔎᓯᒥᓄᒃ ᐊᓯᓂᐧᑲᑕᒡ ᒧᔭᒻ ᐸᒂᓯᑭᓂᒥᓐ ᐃᓯᓇᑯᓐ᙮) 32ᐊᑯ ᓇᒪ ᐛᒋ ᐸᐃᒄ ᐸᒂᓯᑭᓂᒥᓇ ᐅᒋ ᓂᓱᐅᓇᑎᓇ ᐛᔅ ᐊᔅᒄ ᓇᒪ ᐅᒋ ᐊᑎᑕᐛ᙮
33ᐊᑯ ᒧᓱᔅ ᓇᑭᑕᑦ ᒋᓴᐅᒋᒪᐛ ᑭᔭ ᐛᔪᐎᑦ ᐅᑕᓇᔪᐤ᙮ ᒂ ᐅᐱᓂᔅᒐᔨᔅᑐᐛᑦ ᑎᐸᔨᒋᒐᓱᐛ, ᑲ ᒋᒺᔨᒋ ᓂᒥᔅᒍᐛ ᑭᔭ ᒂ ᓂᑲᐱᔨᒡ ᐊ ᓯᓯᑯᓂᐱᔨᒡ, ᑭᔭ ᒂ ᒋᒧᐛᑎᓂᔨᒡ᙮ 34ᐃᔅᐱ ᒋᓴᐅᒋᒪᐤ ᐎᔭᐸᑕᐧᒃ ᐊ ᒋᒧᐛᑎᓂᔨᒡ ᑭᔭ ᐊᑲ ᓯᓯᑯᓂᐱᔨᒡ ᑭᔭ ᐊᑲ ᐸᑕᑯᓯᔨᒋ ᓂᒥᔅᒍᐛ, ᐎᔾ ᑭᔭ ᐅᑯᐸᓇᒪ ᒥᓐ ᒂ ᒥᒋᑐᑕᒡ ᑭᔭ ᒂ ᒥᔅᑯᔅᑎᒂᓇᒡ᙮ 35ᒋᓴᐅᒋᒪᐤ ᓇᒪ ᐅᒋ ᑕᑈᑎᒻ ᐃᔪᐛ ᒐᒋ ᔅᑐᑕᔨᒋ, ᒧᔭᒻ ᑎᐸᔨᒋᒐᓱᐤ ᑲ ᐃᑕᑦ ᒧᓱᓴ᙮
දැනට තෝරාගෙන ඇත:
ᐊᒃᓱᑕᔅ 9: ᓇᔅᑲᐱ
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada