ᐊᒃᓱᑕᔅ 28
28
ᒐ ᐃᓯᓇᑯᓂᔨᒋ ᐊᔭᒥᐅᒋᒪᐅᒡ ᐅᑦ ᐊᐱᒋᑕᐅᓄᐛᐛ
1ᐊᑯ ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᐃᑎᓴᐤ ᐊᐛᓐ ᒐᒋ ᓂᑐᐛᐱᒪᑦ ᐊᕋᓇ ᑭᔭ ᐅᑯᓯᔨᐛ: ᓇᑕᑉ, ᐊᐱᐦᐅ, ᐃᓕᐊᓴᕐ ᑭᔭ ᐃᑕᒪᕐ᙮ ᐊᐅᑯᓐᒡ ᐅᒡ ᑲ ᐅᑎᓂᒂᐤ ᐊᓐᑕ ᒥᓯᐛ ᐊᑕᑎᓯᒡ ᐃᔅᕋᐃᓪ ᐃᔪᒡ ᐅᒡ ᒐᒋ ᐊᑐᔅᑯᐅᒡ ᒐᒋ ᐊᔭᒥᐊᐅᒋᒪᐅᒡ᙮ 2ᒐ ᐎᑎᒧᐅᑥᐤ ᑲ ᑭᔅᒋᐅᒡ ᐊᑐᔅᒐᒡ ᐃᔪᒡ ᒐᒋ ᐅᓯᑕᐛᒡ ᐊᕋᓇ ᐸᔭᒋ-ᐊᐱᒋᑕᐅᓇ ᒐᒋ ᐃᔅᐱᑕᔨᒪᑭᓄᐅᑦ ᑭᔭ ᒥᔪᓇᑯᓯᑦ᙮ 3ᒐ ᐎᑎᒧᐅᑥᐤ ᑲ ᑭᔅᒋᐅᒡ ᐊᑐᔅᒐᒡ ᐊᓐᒡ ᑲ ᒥᔨᑲᐤ ᒐᒋ ᐊᔭᒡ ᑭᔅᒋᐅᓂᔪᐤ ᒐᒋ ᐅᓯᑎᒧᐛᒡ ᐊᕋᓇ ᐊᐱᒋᑕᐅᓇ ᒐᒋ ᐳᔅᑲᐧᒃ ᐃᔅᐱᔾ ᐱᔅᑎᓇᑭᓄᐅᒐ ᒐᒋ ᐊᑐᔅᑯᐅᑦ ᐊ ᐊᔭᒥᐊᐅᒋᒪᐅᑦ᙮ 4ᒐ ᐎᑎᒧᐅᑥᐤ ᒐᒋ ᐅᓯᑕᒡ ᐱᑕᓱᐅᓂᔪᐤ, ᐊᔅᐱᒋᑯᓇᐅᓂᔪᐤ, ᐊᔭᒥᐊᐤ ᐊᑯᐱᔪᐤ, ᐊ ᒥᒪᑕᐅᒂᑕᔨᒡ ᐱᒍᐎᔭᓂᔪᐤ, ᑕᐱᔅᑲᑭᓂᔪᐤ, ᑭᔭ ᐱᒂᑕᐅᓂᔪᐤ᙮ ᐊᐅᑯᔪᐛ ᐅᔭ ᐊᔭᒥᐊᐅ-ᐊᐱᒋᑕᐅᓇ ᒐ ᐳᔅᑲᒡ ᒋᐧᑲᓂᔅ ᐊᕋᓐ ᑭᔭ ᐅᑯᓴ ᒪᒂᒡ ᐊᑐᔅᑯᐅᒡ ᐊᔭᒥᐊᐅᒋᒪᐅᒡ᙮ 5ᐊ ᒥᔽᔨᒡ ᐱᒍᐎᔭᓂᔪᐤ ᒋᑭ ᐊᐱᒋᑕᐅᒡ, ᑲ ᐱᔅᑭᓂᓯᔨᒋ ᑭᔭ ᑲ ᐱᒋᒥᓇᑯᓯᔨᒋ ᑭᔭ ᑲ ᒥᐧᑯᓯᔨᒋ ᐊᓯᑭᓇᔭᐱᔭ, ᑭᔭ ᐊ ᐎᔄᐅᓱᓇᔭᐱᔅᑯᔨᒋ ᓴᔅᑎᒂᔭᐱᔭ ᐊ ᐊᐱᒋᐊᒡ᙮”
ᐊᔅᐱᒋᑯᓇᐅᓐ
6“ᒋᑭ ᐅᓯᑕᐅᒡ ᐊᔅᐱᒋᑯᓇᐅᓂᔪᐤ ᐊ ᒥᔽᔨᒡ ᐱᒍᐎᔭᓂᔪᐤ ᐊ ᐊᐱᒋᑕᒡ, ᐊ ᒥᒪᑕᐅᒂᑕᑭᓄᐎᔨᒡ ᑲ ᐱᔅᑭᓂᓯᔨᒋ ᑭᔭ ᑲ ᐱᒋᒥᓇᑯᓯᔨᒋ ᑭᔭ ᑲ ᒥᐧᑯᓯᔨᒋ ᐊᓯᑭᓇᔭᐱᔭ ᐅᒡ, ᑭᔭ ᐊ ᐎᔄᐅᓱᓇᔭᐱᔅᑯᔨᒋ ᓴᔅᑎᒂᔭᐱᔭ᙮ 7ᒋᑭ ᐎ ᒋᑭᒧᐛ ᓂᓱ ᒥᑎᑎᒥᓂᒡ ᒪᑯᐱᓱᐅᓇ ᒐ ᐊᓂᔅᑯᑎᒋ ᐊᓐᑕ ᓂᓱ ᐊ ᒋᒐᔭᒋ ᐊᔅᐱᒋᑯᓇᐅᓂᒡ ᒐᒋ ᒋᔅᑲᐧᒃ ᐊᔭᒥᐊᐅᒋᒪᐤ᙮ 8ᑭᔭ ᐱᒂᑕᐅᓐ ᐸᐃᑯᑕᐤ ᒋᑭ ᐅᒋ ᐅᓯᑕᑭᓄᐤ ᑭᔭ ᒐ ᐊᓂᔅᑯᑎᒡ ᐊᓐᑕ ᐊᔅᐱᒋᑯᓇᐅᓂᒡ ᐊ ᐸᐃᒂᒡ ᒐᒋ ᐃᓯᓇᒂᒡ᙮
9ᓂᓱ ᐅᓂᒃᔅ ᐊᓯᓂᔭ ᒋᑭ ᐅᑎᓂᒧᒡ ᑭᔭ ᒋᑭ ᒥᓯᓂᐱᔎᐊᒺᐅᒡ ᐅᑦ ᐃᓯᓂᐧᑲᓱᓂᔨᐛ ᐊᓂᓴᐳᐎᒋ ᒐᑭᐸ ᐅᑯᓯᔨᐛ᙮ 10ᓂᔅᑎᒧᓴᓐ ᐅᒡ ᐃᔅᐱᔅ ᐊᓐ ᒪᔅᑕᓄᓴᓐ ᒐᑭᑉ ᐅᑯᓴ ᒋᑭ ᐎ ᒥᓯᓂᐱᔎᐊᑭᓄᔪᐛ ᐅᑦ ᐃᓯᓂᐧᑲᓱᓄᐛᐛ, ᐊᓱᑕᒡ ᐊᓐᑕ ᐸᐃᒄ ᐊᓯᓂᒡ ᑭᔭ ᐊᓱᑕᒡ ᐊᓐᑕ ᑯᑎᑲ ᐊᓯᓂᒡ᙮ 11ᐊᓐ ᐊᐛᓐ ᑲᔅᒋᑕᑦ ᐊ ᒋᒥᔄᑦ ᐊᓯᓂᔭ ᑲ ᒥᔅᑎ ᒥᔪᓯᓯᔨᒋ ᒋᑭ ᒥᓯᓂᐱᔎᐊᒺᐤ ᐅᑦ ᐃᓯᓂᐧᑲᓱᓂᔨᐛ ᓂᓴᑉ ᒐᑭᐸ ᐅᑯᓯᔨᐛ, ᑭᔭ ᒋᑭ ᒋᑭᒧᑕᐤ ᐎᔄᐅᓱᓇᔭᔪᐤ ᐊᓐᑕ ᐛᔅᑲ ᐊᓯᓂᒡ᙮ 12ᐊᑯ ᒐ ᒋᑭᒧᑕᑦ ᐊᓂᔭ ᓂᓱ ᐊᓯᓂᔭ ᑲ ᒥᔅᑎ ᒥᔪᓯᓯᔨᒋ ᐊᓐᑕ ᒥᑎᑎᒥᓂᒡ ᒪᑯᐱᓱᐅᓇ ᑲ ᐎᐸᔨᒋ, ᒐᒋ ᒋᔅᒋᑐᐛᑭᓄᐅᒡ ᓂᓴᑉ ᐊᑕᑐᔅᑲᓇᓯᒡ ᐃᔅᕋᐃᓪ ᐃᔪᒡ᙮ ᐊᕋᓐ ᒋᑭ ᒋᔅᑭᒻ ᐅᑦ ᐃᓯᓂᐧᑲᓱᓂᔨᐛ ᐊᓂᔭ ᓂᓴᑉ ᐊ ᐃᑎᔅᑲᓇᓯᔨᒋ ᐃᔅᕋᐃᓪ ᐃᔪᐛ ᐊᑯ ᓂᔾ ᑎᐸᔨᒋᒐᓱᐤ ᓇᓂᑎᒻ ᒐ ᒋᔅᒋᑐᐅᒂᐤ ᓂᑦ ᐃᔨᒥᒡ᙮ 13ᐊᓐᑕ ᐛᔅᑲ ᐊᓯᓂᒡ ᒋᑭ ᒋᑭᒧᑕᐅᒡ, ᐎᔄᐅᓱᓇᔭᐤ ᐅᒡ ᒋᑭ ᐅᒋ ᐅᓯᑕᐅᒡ, 14ᑭᔭ ᓂᓱ ᐊ ᐎᔄᐅᓱᓇᔭᐱᔅᑯᔨᒋ ᐃᓴᒂᔭᐱᔭ ᐊ ᐱᐧᑲᑕᔨᒋ ᒋᑭ ᒋᑭᒧᑕᐅᒡ ᐊᓐᑕ ᐛᔅᑲ ᐎᔄᐅᓱᓇᔭᐤ ᐊᓯᓂᒡ᙮”
ᐱᑕᓱᐅᓐ
15“ᒐ ᐎᑎᒧᐅᑥᐤ ᐊ ᑭᔅᒋᑕᒡ ᐊᑐᔅᒐᒡ ᐃᔪᒡ ᒐᒋ ᐅᓯᑎᒧᐛᒡ ᐊᕈᓇ ᐱᑕᓱᐅᓂᔪᐤ ᒐᒋ ᒋᔅᑭᒥᔨᒋ ᐅᔅᑲᔅᒋᑭᓂᔨᒡ ᒐᒋ ᐅᒋ ᒋᔅᒐᔨᑎᒺᑦ ᒋᓴᒪᓂᑐᐛ ᐅᑦ ᐃᑕᔨᑎᒧᐅᓂᔨᐛ, ᑭᔭ ᐸᐃᑯᑕᐤ ᒐᒂᓂᒡ ᒋᑭ ᐅᒋ ᐅᓯᑕᑭᓄᐅᔪᐤ ᒧᔭᒻ ᐊᔅᐱᒋᑯᓇᐅᓂᔪᐤ ᑭᔭ ᐸᐃᑯᑕᐤ ᒋᑭ ᐃᓯ ᒥᒪᑕᐅᒂᑕᑭᓄᐎᔪᐤ᙮ 16ᒋᑭ ᐎ ᑭᔅᑭᒐᔪᐤ ᑭᔭ ᒋᑭ ᐎ ᓂᔄᒋᓇᑭᓄᐅᔪᐤ ᐸᐃᑯᔅᑕᐤ ᒥᒋᒋᓐ ᒋᑭ ᐎ ᐃᔅᐱᔅ ᒋᓏᔪᐤ ᑭᔭ ᐸᐃᑯᔅᑕᐤ ᒥᒋᒋᓐ ᒋᑭ ᐎ ᐃᔅᐱᔅ ᐃᔅᑭᔅᑲᔪᐤ᙮ 17ᐊᑯ ᐊ ᑭᔅᒋᐅᑦ ᐊᑐᔅᒐᑦ ᐃᔪᐤ ᒋᑭ ᒋᑭᒧᑕᐤ ᐊ ᓇᐛᐸᑭᒧᑕᑦ ᐊ ᒥᔪᓯᓯᔨᒋ ᐊᓯᓂᓴ᙮ ᐊᓐᑕ ᐅᔅᑭᒡ ᒐ ᐱᒪᐸᑯᒧᐎᔨᒡ ᕈᐱᔾ (ᑲ ᒥᒂᒡ ᐊᓯᓂᔾ), ᑭᔭ ᑐᐸᔅ (ᑲ ᐎᔄᐛᒡ ᐊᓯᓂᔾ), ᑭᔭ ᑲᕐᓂᑦ (ᑲ ᒥᒂᒡ ᐊᓯᓂᔾ) ᒋᑭ ᒋᑭᒧᑕᐤ᙮ 18ᐊᑯ ᒥᓐ ᒐ ᐱᒪᐸᑯᒧᐎᔨᒡ ᐊᓐᑕ ᐊᓇᒡ, ᐊᒥᕋᓪᑦ (ᑲ ᓯᐸᑯᐅᒡ ᐊᓯᓂᔾ), ᑭᔭ ᓴᐸᐃᕐ (ᑲ ᐱᔅᑭᓇᒡ ᐊᓯᓂᔾ), ᑭᔭ ᓱᓇᔭᐤ ᐊᓯᓂᔅ (ᐊ ᓴᐳᓄᒂᒡ ᐊᓯᓂᔾ)᙮ 19ᐊᑯ ᐊᓐᑕ ᓂᔅᑐ ᒐ ᐱᒪᐸᑯᒧᐎᔨᒡ ᐊ ᒥᔪᓯᓯᒡ ᐊᓯᓂᔨᒡ ᒐᓴᓐᑦ (ᑲ ᒥᒂᒡ ᐊᓯᓂᔾ), ᑭᔭ ᐊᑲᑦ (ᑲ ᐛᐸᒡ ᐊᓯᓂᔾ), ᑭᔭ ᐊᒪᑎᔅᑦ (ᑲ ᐱᒋᒥᓇᒡ ᐊᓯᓂᔾ)᙮ 20ᐊᑯ ᒪᔅᑕᔾ ᒐ ᐱᒪᐸᑯᒧᐎᔨᒡ ᐸᕆᓪ (ᑲ ᐎᔄᐛᒡ ᐊᓯᓂᔾ), ᑲᕐᓂᓕᔭᓐ (ᑲ ᒥᒂᒡ ᐊᓯᓂᔾ), ᒐᔅᐳᕐ (ᑲ ᓯᐸᑯᐅᒡ ᐊᓯᓂᔾ)᙮ ᒥᓯᐛ ᐅᔭ ᐊ ᒥᔪᓯᓯᔨᒋ ᐊᓯᓂᔭ ᒋᑭ ᐎ ᒋᑭᒺᐅᒡ ᐎᔄᐅᐤ ᓯᑭᓇᔭᐱᔅᑯᒡ᙮ 21ᒥᓯᐛ ᐊᓐᑕ ᐸᐸᐃᒄ ᐊᓂᓴᐳᒡ ᐊᓯᓂᔨᒡ ᒋᑭ ᐎ ᒥᓯᓇᑕᐃᑭᓄᔪᐛ ᒐᑭᑉ ᑲ ᓂᓴᐳᔨᒋ ᐅᑯᓴ ᐅᑦ ᐃᓯᓂᐧᑲᓱᐅᓂᔨᐛ ᒐ ᓂᑲᓂᔅᑯᐛᔨᒋ ᐃᔅᕋᐃᓪ ᐃᔪᐛ᙮
22ᓂᓱ ᒋᑭ ᐎ ᐅᓯᑕᑭᓄᐛ ᐊ ᐎᔄᐅᓱᓇᔭᐱᔅᑯᐅᒋ ᐃᓴᒂᔭᐱᔭ ᐊ ᐱᐧᑲᑕᔨᒋ ᒐᒋ ᒋᑭᒧᑕᑭᓄᐅᒡ ᐱᑕᓱᓐ᙮ ᒐ ᒪᒧᑭᒧᐎᔨᒋ ᐊᓐᑕ ᐊᔅᐱᒋᑯᓇᐅᓂᒡ᙮ 23ᐊᑯ ᓂᓱ ᐊ ᐎᔄᐅᓱᓇᔭᐱᔅᑯᔨᒋ ᓯᒋᐸᒋᑭᓇ ᒋᑭ ᐅᓯᑕᐤ ᑭᔭ ᒋᑭ ᒋᑭᒧᑕᐤ ᐊᓐᑕ ᐃᔅᐱᒥᒡ ᐊ ᒋᒐᔭᔨᒡ ᐊᔅᐱᒋᑯᓇᐅᓂᒡ᙮ 24ᒋᑭ ᐎ ᐅᓯᑕᐤ ᓂᓱ ᐊ ᐎᔄᐛᐱᔅᑯᔨᒋ ᐃᓴᒂᔭᐱᔭ ᑭᔭ ᒋᑭ ᒋᑭᒧᑕᐤ ᐊᓐᑕ ᐸᐸᐃᒄ ᐊ ᐎᔄᐅᓱᓇᔭᐱᔅᑯᔨᒋ ᓯᒋᐸᒋᑭᓂᒡ᙮ 25ᒋᑭ ᒪᑯᐱᑎᒻ ᐊᔨᑐᐤ ᐊᓐᑕ ᐛᔅᑲ ᐎᔄᐅᓱᓇᔭᐤ ᐊᓯᓂᒡ ᐊᑯ ᐱᑕᓱᐅᓐ ᒐ ᒋᑭᒧᒡ ᐊᔅᐱᒋᑯᓇᐅᓂᒡ ᒥᑎᑎᒥᓂᒡ ᒪᑯᐱᓱᐅᓇ ᐊᐱᒋᑕᑭᓄᐅᒋ᙮ 26ᓂᓱ ᒥᓐ ᒋᑭ ᐅᓯᑕᐤ ᐊ ᐎᔄᐅᓱᓇᔭᐱᔅᑯᔨᒋ ᓯᒋᐸᒋᑭᓇ ᐊᑯ ᒐ ᒋᑭᒧᑕᑦ ᐊᓇᒡ ᐃᑕᒐ ᐱᑕᓱᐅᓂᒡ ᐊᓐᑕ ᒋᒡ ᐱᑎᑭᒥᒡ ᐊᔅᐱᒋᑯᓇᐅᓂᒡ᙮ 27ᐊᑯ ᓂᓱ ᒥᓐ ᒐ ᐅᓯᑕᑦ ᐊ ᐎᔄᐅᓱᓇᔭᐱᔅᑯᔨᒋ ᓯᒋᐸᒋᑭᓇ ᐊᑯ ᒐ ᒋᑭᒧᑕᑦ ᐊᓐᑕ ᐊᓇᒡ ᐃᑕᒐ ᓂᑲᓐ ᒥᑎᑎᒥᓂᒡ ᒪᑯᐱᓱᐅᓂᒡ, ᒥᒋᒪ ᐱᑕᓱᐅᓂᒡ ᐛᒋ ᒋᑭᒧᒡ ᐊᔅᐱᒋᑯᓇᐅᓂᒡ, ᐃᔅᐱᒥᒡ ᐱᒂᑕᐅᓂᒡ᙮ 28ᑲ ᑭᔅᒋᐅᑦ ᐊᑐᔅᒐᑦ ᒋᑭ ᒪᑯᐱᑎᒻ ᐊ ᐎᔄᐅᓱᓇᔭᐱᔅᑯᔨᒋ ᐱᑕᓱᐅᓂᒡ ᓯᒋᐸᒋᑭᓇ ᐊᓐᑕ ᐊᔅᐱᒋᑯᓇᐅᓂᒡ ᐊᐱᔅᑭᓇᔨᒡ ᐊᐱᓯᔪᐤ ᐊ ᐊᐱᑕᑦ, ᐃᔅᐱᒥᒡ ᐱᒂᑕᐅᓂᒡ ᒐᒋ ᒋᑭᒧᔨᒡ ᑭᔭ ᒐ ᐊᑲ ᒋ ᒥᓂᐱᔨᒡ᙮
29ᐃᔅᐱ ᐸᒐᒋ ᐊᕋᓐ ᐊᓐᑕ ᑲ ᐸᔭᒋᒥᑭᓂᔨᒡ ᑲᐱᔅᒋᒐᔭᔨᒡ, ᒋᑭ ᐳᔅᑭᒻ ᐊᓂᔭ ᐱᑕᓱᐅᓂᔪᐤ ᐊ ᒥᓯᓇᓱᐎᔨᒋ ᓂᓴᑉ ᐊ ᐃᑎᔅᑲᓇᓯᔨᒋ ᐃᔅᕋᐃᓪ ᐃᔪᐛ᙮ ᐊᑯ ᓂᔾ ᑎᐸᔨᒋᒐᓱᐤ, ᓇᓂᑎᒻ ᒐ ᒋᔅᒋᑐᐅᒂᐤ ᓂᑦ ᐃᔨᒥᒡ᙮ 30ᐊᕋᓐ ᒋᑭ ᐱᑕᐊᒻ ᐊᓐᑕ ᐱᑕᓱᐅᓂᒡ ᐊᓂᔭ ᓂᓱ ᒐᒂᔪᐛ ᐊᔭᒥᐊᐅᒋᒪᐤ ᒐ ᐊᐱᒋᑕᑦ ᒐᒋ ᒋᔅᒐᔨᑕᐧᒄ ᓂ ᓂᔎᐛᓯᐛᐅᓂᔪᐤ ᐊᓂᔭ ᑕᓐ ᑲ ᐃᓯ ᑯᒂᒋᒐᒧᑦ᙮ ᐊᑯ ᒪᒃ ᒥᒋᒪ ᐅᔅᑲᔅᒋᑭᓂᒡ ᒐ ᑎᑯᓂᔨᒡ ᐸᒐᒋ ᑲ ᐸᔭᒋᒥᑭᓂᔨᒡ ᑲᐱᔅᒋᒐᔭᔨᒡ ᒐᒋ ᐃᔨᒥᐃᑦ᙮ ᓇᓂᑎᒻ ᒋᑭ ᐎ ᐳᔅᑭᒻ ᐊᓂᔭ ᐱᑕᓱᐅᓂᔪᐤ ᐸᒐᒋ ᒐᒋ ᐅᒋ ᒋᔅᒐᔨᑕᐧᒃ ᐊ ᐃᑎᓱᒥᒋ ᐃᔅᕋᐃᓪ ᐃᔪᐛ᙮”
ᑯᑎᑲ ᐊᔭᒥᐊᐅᒋᒪᐛ ᐅᑦ ᐊᐱᒋᑕᐅᓂᔪᐛ
31“ᒐ ᐎ ᑎᒧᐅᑥᐤ ᐊᑭᒐᑕᐛᔨᑕᑯᓯᒡ ᐊᑐᔅᒐᒡ ᐃᔪᒡ ᐊ ᐱᔅᑭᓂᓯᔨᒋ ᓯᑭᓇᔭᐱᔭ ᒐᒋ ᐊᐱᒋᐊᒡ ᐊ ᐅᓯᑕᒡ ᐊᔭᒥᐊᐤ ᐊᑯᐱᔪᐤ ᑕᒥᒡ ᐊᔅᐱᒋᑯᓇᐅᓂᒡ ᒐᒋ ᒋᔅᑲᐧᒃ ᐊᔭᒥᐊᐅᒋᒪᐤ᙮ 32ᒋᑭ ᐱᑯᓇᑕᐅᒡ ᐊᓐᑕ ᐃᔅᐱᒥᒡ ᐅᔅᑎᒂᓂᔨᒡ ᒐᒋ ᐅᒋ ᐳᔅᑭᒥᔨᒋ ᑭᔭ ᒋᑭ ᓱᒋᓇᑯᑕᐅᒡ ᐊᓐᑕ ᐛᔅᑲ ᒐ ᐊᑲ ᐱᑯᐱᔨᒡ᙮ 33ᐊᓇᒡ ᐊᓐᑕ (ᐊᔅᐱᒂᓱᐅᓂᒡ) ᐊ ᐅᓂᔎᑭᓂᔨᒡ ᐅᑦ ᐊᑯᐱᔪᐤ ᒋᑭ ᒥᒪᑕᐅᒂᑎᒧᒡ ᑲ ᒥᒂᔨᒋ ᒥᔅᑎᒥᓇ ᐊᑯ ᐊᓐᑕ ᑕᐧᑯᒡ ᒧᔭᒻ ᒋᓴᐅᒋᒪᐅᑯᓂᔎᐅᓂᔪᐤ ᒋᑭ ᐃᓯᓇᑯᑕᐅᒡ᙮ ᑲ ᐱᔅᑭᓂᓯᔨᒋ ᑭᔭ ᑲ ᐱᒋᒥᓇᑯᓯᔨᒋ, ᑭᔭ ᑲ ᒥᐧᑯᓯᔨᒋ ᐊᓯᑭᓇᔭᐱᔭ ᒋᑭ ᐊᐱᒋᐊᐅᒡ᙮ 34ᒋᑭ ᒋᑭᒧᑕᐅᒡ ᑲ ᐎᔄᐅᓱᓇᔭᐱᔅᑯᔨᒋ ᒥᑥᐃᑭᓂᓴ ᐊᓐᑕ ᑎᔅᑐᐎᒡ ᒥᔅᑎᒥᓂᒡ᙮ 35ᐊᑯ ᑕᑥᐤ ᐸᒐᒋ ᐊᕋᓐ ᐊᓐᑕ ᑲ ᐸᔭᒋᒥᑭᓂᔨᒡ ᑲᐱᔅᒋᒐᔭᔨᒡ ᒐᒋ ᐃᑐᑕᐧᒃ ᐅᑦ ᐊᑐᔅᒐᐅᓐ ᐊᔭᒥᐊᐅᒋᒪᐅᑦ ᑭᔭ ᐛᔪᐎᒋ, ᒋᑭ ᒥᑥᐱᔨᐛ ᐊᓂᔭ ᒥᑥᐃᑭᓂᓴ ᒪᒂᒡ ᐸᒧᑕᒋ ᒐ ᐊᑲ ᐳᓂᐱᒪᑎᓯᑦ᙮ 36ᒋᑭ ᐅᓯᑕᐅᒡ ᐊᓴᑯᐛᔨᒡ ᐎᔄᐅᓱᓇᔭᐱᔅᑯᔪᐤ ᑭᔭ ᒐ ᐎᑎᒧᐅᑦ ᑲ ᑭᔅᒋᑕᒡ ᐊᑐᔅᒐᒡ ᒐᒋ ᐎᓯᓇᑕᐊᒡ, “ᐊ ᐸᔭᒋᓯᑦ ᑎᐸᔨᒋᒐᓱᐛ ᐃᔅ,” ᐊᑎᔅᑕᔨᒡ᙮ 37ᒋᑭ ᒪᑯᐱᑎᒧᒡ ᐊᓐᑕ ᓂᑲᓐ ᑕᐱᔅᑲᑭᓂᒡ ᐊᐱᔅᑭᓇᐸᑭᓂᔨᒡ ᐊᐱᓯᔪᐤ ᐊ ᐊᐱᒋᑕᒡ᙮ 38ᐊᑯ ᐊᐅᑯᔪᐤ ᐅᔭ ᒐ ᐳᔅᑲᐧᒃ ᐊᕋᓐ ᒐᒋ ᒥᔪ ᐅᑎᓂᒥᔨᒋ ᑎᐸᔨᒋᒐᓱᐛ ᐃᔪᐛ ᐅᒥᑐᔅᑕᐊᒪᒐᐅᓂᔪᐛ ᐊᑎᓱᐧᒄ ᐊᑲ ᓄᓴᒻ ᐃᑎᔨᒋ᙮
39ᓇᔅᒡ ᐛᒋ ᒥᔽᓯᔨᒋ ᐱᒍᐎᔭᓇ ᒋᑭ ᐅᒋ ᐅᓯᑕᐛᐅᒡ ᐊᕋᓇ ᐅᑦ ᐊᑯᐱᔪᐤ ᑭᔭ ᐅᑕᐱᔅᑲᑭᓂᔨᐛ᙮ ᐃᔭᐱᒡ ᒋᑭ ᐅᓯᑕᐛᐅᒡ ᐊ ᒥᒪᑕᐅᒂᑕᔨᒡ ᐅᐱᒂᑕᐅᓂᔪᐤ᙮ 40ᒐ ᐎᑎᒧᐅᑥᐤ ᒐᒋ ᐅᓯᑎᒧᐛᒡ ᐊᕋᓇ ᐅᑯᓯᔨᐛ ᐊᑯᐸ, ᐱᒂᑕᐅᓇ, ᑭᔭ ᐊᑯᓂᔎᐅᓇ ᒐᒋ ᒋᔅᑕᔨᑕᑯᓯᔨᒋ ᑭᔭ ᒐᒋ ᒥᔪᓇᑯᓯᔨᒋ᙮ 41ᐊᑯ ᒐ ᒋᑭᒧᑕᑎᔨᑥᐤ ᒋᐧᑲᓂᔅ ᐊᕋᓐ ᑭᔭ ᐅᑯᓴ᙮ ᐊᑯ ᒐ ᐊᑎ ᑯᑎᐱᓂᒧᐅᑥᐤ ᐱᒥᔪᐤ ᐊ ᐸᔭᒋᓯᒡ ᑎᐸᔨᒋᒐᓱᐛ ᐃᔅ, ᐊᑯ ᒐ ᐊᑐᔅᑯᐅᒡ ᐊᔭᒥᐊᐅᒋᒪᐅᒡ᙮
42ᐊᑯ ᒐ ᐅᓯᑎᒧᐛᒡ ᐅᐱᑐᔅᑭᒋᐱᓱᐅᓂᔨᐛ ᐃᔅᐱᔅ ᐅᑈᒪᐅᑯᐛᒡ ᐊ ᐃᔅᐱᑎᔨᒋ ᒐ ᐊᑲ ᓄᑯᓯᔨᒋ ᐊ ᒧᓴᓯᔨᒋ᙮ 43ᑕᑥᐤ ᐸᒐᑥᐎ ᐸᔭᒋ-ᐱᒍᐎᔭᓂᒋᐛᐱᒡ ᑭᔭ ᒪᒃ ᐊᓐᑕ ᑲ ᐸᔭᒋᒥᑭᓂᔨᒡ ᑲᐱᔅᒋᒐᔭᔨᒡ ᒋᑭ ᐎ ᐳᔅᑯᐛᐅᒡ ᐱᑐᑭᔅᒋᐱᓱᓇᓇ ᒐ ᐊᑲ ᓂᐸᐊᑭᓄᐅᒡ ᐊ ᒧᓴᓯᒡ᙮ ᐊᐅᑯᔪᐤ ᐅᔭ ᐸᐃᑯᑕᐤ ᒧᔅ ᒐ ᐎ ᑐᑕᒡ ᐊᕋᓐ ᑭᔭ ᐅᑦ ᐊᓂᔅᑯᑕᐸᓇ᙮”
දැනට තෝරාගෙන ඇත:
ᐊᒃᓱᑕᔅ 28: ᓇᔅᑲᐱ
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada