ᐊᑈᔅᑕᓇᒡ 4
4
ᐱᑕᕐ ᑭᔭ ᒠᓐ ᑲ ᐃᔨᒪᐊᒡ ᐊᓂᔭ ᑲ ᓂᑲᓂᔅᑭᒥᔨᒡ ᒋᓴᐊᔭᒥᐊᐅᒋᐛᐱᔪᐤ
1ᐊᔅᒄ ᒪᒃ ᒪᒂᒡ ᐊ ᐃᔨᒪᐊᒡ ᐊᓂᔭᔪᐛ ᐃᔪᐛ, ᐱᑕᕐ ᑭᔭ ᒠᓐ ᒋ ᐸᒋ ᓇᑎᑯᐅᒡ ᐊᔭᒥᐊᐅᒋᒪᐛ ᑭᔭ ᐊᓂᔭᔪᐛ ᐅᒋᒪᒧᐛᐛ ᐊᓐᒡ ᐊᓯᒪᑭᓂᓯᒡ ᑲ ᓂᓇᑭᑐᐛᔨᑕᒡ ᒋᓴᐊᔭᒥᐊᐅᒋᐛᐱᔪᐤ, ᑭᔭ ᐊᓂᔭᔪᐛ ᓴᑎᔪᓯᐊ᙮ 2ᓇᒪ ᐅᒋ ᓇᐊᔨᑎᒥᔪᐛ ᐊ ᒋᔅᑯᑎᒧᐛᒡ ᐊᓂᔭᔪᐛ ᐃᔪᐛ ᐊ ᐃᑕᒡ ᑲᐤ ᐊᒋ ᐅᓂᔅᑲᔨᒋ ᒋᓴᓴ ᓂᐳᐅᓂᒡ ᐅᒡ ᑭᔭ ᐊ ᐃᑕᒡ ᒐ ᐅᓂᔅᑲᔨᒋ ᐊᐛᔪᐛ ᐊᑎ ᐊᒋ ᓂᐱᔨᒋ᙮ 3ᓴᔅ ᒪᒃ ᒋ ᐅᑕᑯᓯᔪᐤ ᑲ ᒪᑯᓇᑭᓄᐎᒡ ᐱᑕᕐ ᑭᔭ ᒠᓐ᙮ ᑲᒪᑯᓄᐛᓯᐅᒋᐛᐱᒡ ᒪᒂᒡ ᑲ ᑭᓄᐛᔨᒪᑭᓄᐎᒡ ᐊᓂᔭᔪᐤ ᑕᐱᔅᑲᔨᒡ᙮ 4ᐃᔭᐱᒡ ᒪᒃ ᒥᒐᑦ ᐊᐛᓐᒋ ᒋ ᑕᑈᑎᒧᐛᐅᒡ ᑕᓐ ᑲ ᐃᓯ ᐎᑎᒥᔨᒋ ᐊᓂᔭᔪᐛ ᐊᑈᔅᑕᓇ᙮ ᓴᓯᑲᓐ ᐱᑕᑕᒡ ᒐᓯᐱᔪᐤ ᓇᐸᐅᒡ ᒋ ᑕᑎᓯᒐᓂᒋ ᐊ ᑕᑈᑕᒡ᙮
Acts 4.5-12 (Easter-4 Year B)
5ᐎᔭᐱᓂᔨᒡ ᒪᒃ ᐊᓐᒡ ᑲ ᓂᑲᓂᐱᒡ ᒍᐤ ᐃᔪᒡ ᑭᔭ ᐊᓐᒡ ᑲ ᓂᑲᓇᔨᑕᑯᓯᒡ ᑭᔭ ᑲ ᒋᔅᑯᑎᒪᒐᒡ ᐎᓱᐛᐅᓂᔪᐤ ᒋ ᓂᔅᑲᑐᐅᒡ ᐊᓐᑕ ᒋᕈᓯᓕᒥᒡ᙮ 6ᒋᓴᐊᔭᒥᐊᐅᒋᒪᐛ ᐊᓇᔅ ᑲ ᐃᓯᓂᐧᑲᓱᔨᒋ ᒋ ᓂᒋᔅᑯᐛᐅᒡ ᑭᔭ ᐊᓂᔭ ᑲᔭᐸᓴ, ᒠᓇ, ᑭᔭ ᐊᓕᒃᓴᓐᑕᕋ ᑭᔭ ᒥᒄ ᐊ ᐸᐃᑯᔅᑲᓇᓯᔨᒋ ᒋᓴᐊᔭᒥᐊᐅᒋᒪᐛ᙮ 7ᒋ ᐸᓱᐛᑭᓄᐅᔪᐛ ᒪᒃ ᐊᓂᔭ ᐊᑈᔅᑕᓇ ᒐᒋ ᐅᑎᔅᑯᑲᐳᔅᑕᑯᒡ ᐊᑯ ᐊᑕᒡ, “ᒐᒄ ᓱᐧᑲᑎᓯᐅᓐ ᑭᔭ ᒐᒄ ᐃᓯᓂᐧᑲᓱᐅᓐ ᑲ ᐅᒋ ᐃᑐᑎᒪᒄ ᐅ ?”
8ᐊᑯ ᒪᒃ ᐱᑕᕐ ᐊ ᓴᑭᔅᒋᓇᔅᑲᑯᑦ ᑲ ᐸᔭᒋᓯᔨᒋ ᐊᒐᒂ, ᒋ ᐃᑕᐤ, “ᒋᔨᐛᐤ ᑲ ᓂᑲᓂᔅᑯᐛᑯᒡ ᐃᔪᒡ, ᑭᔭ ᑲ ᓂᑲᓇᔨᑕᑯᓯᔭᒄ, 9ᒧᔭᒻ ᐊᓄᒡ ᒐᓯᑲᒡ ᐎ ᑯᒂᒋᐃᑯᐅᔭᒐ ᐊᓂᒪ ᑕᓐ ᑲ ᐃᓯ ᒥᔪᑐᑎᒧᐛᑭᓄᐅᑦ ᐊᓐ ᑲ ᒪᔅᒋᑦ ᐃᔪᐤ ᑭᔭ ᑕᓐᑕ ᐛᒋ ᒥᓏᑎᓯᑦ᙮ 10ᒋᔅᒐᔨᑎᒥᒄ ᒥᓯᐛ ᐊᑎᓯᔭᒄ ᑭᔭ ᒥᓯᐛ ᐃᔅᕋᐃᓪ ᐃᔪᒡ ᐅᑦ ᐃᓯᓂᐧᑲᓱᐅᓐ ᐅᒋ ᐊᓐ ᒋᓴᔅ ᙭ ᓇᓴᕆᑎᒡ ᑲ ᐅᒋᑦ ᐊᓐ ᑲ ᒋᔅᑕᔎᑕᒄ ᒋᐱᔭᑎᑯᒡ ᑭᔭ ᒋᓴᒪᓂᑐᐤ ᑲ ᐅᓂᔅᑲᓇᑦ ᓂᐳᐅᓂᒡ ᐅᒡ, ᐊᐅᑯᐤ ᐅᒋ ᐅᐛ ᐃᔪᐤ ᒋᑦ ᐅᑎᔅᑯᑲᐳᔅᑕᑯᐛᐤ ᐊᒋ ᒥᓏᒋᐊᑭᓄᐅᑦ᙮ 11ᐊᐅᑯᐤ,
‘ᐅ ᐊᓯᓂᔾ ᒋᔨᐛᐤ ᑲ ᒪᓂᒐᓯᒡ ᑲᒋ ᐊᑐᐛᔨᒪᒄ ᑲ ᓂᑲᓂᐱᑦ ᐊ ᒋᒐᔭᔨᒡ᙮’
12ᓇᒪᐎᔾ ᑯᑎᒃ ᐊᐛᓐ ᐊᔭᐤ ᐱᒪᒋᐃᐛᐅᓂᔪᐤ, ᐛᔅ ᓇᒪ ᑎᑯᓐ ᑯᑎᒃ ᐃᓯᓂᐧᑲᓱᐅᓐ ᓯᐸ ᒋᓯᑯᒡ ᑲ ᒥᔭᑭᓄᐅᒡ ᐃᔪᒡ ᒐᒋ ᐅᒋ ᐱᒪᒋᐃᑯᔭᐧᒄ᙮”
13ᐊᓐᒡ ᒪᒃ ᑲ ᒪᒧᐎᒡ ᒋ ᒥᔅᑲᑕᔨᑎᒺᐅᒡ ᑕᓐ ᑲ ᐃᓯ ᐃᔨᒥᔨᒋ ᑭᔭ ᐊᓂᔭᔪᐤ ᐊ ᐃᔅᐱᔅ ᓱᒋᑕᐊᔨᒋ ᐱᑕᕋ ᑭᔭ ᒠᓇ ᐊ ᒋᔅᒐᔨᒪᒡ ᐊᑲ ᐅᒋ ᒋᔅᑯᑎᒧᐛᑭᓄᔨᒋ᙮ ᐊᑯᑕ ᒪᒃ ᑲ ᐅᒋ ᒋᔅᒐᔨᑕᒡ ᒋᓴᓴ ᐊᒋ ᐎᒐᐛᑭᓂᔨᒋ᙮ 14ᒥᒄ ᒪᒃ ᓇᒪ ᒐᒂᔪᐤ ᐅᒋ ᐃᑕᐅᒡ ᒐᒋ ᐎᑎᒧᐛᒡ ᐛᔅ ᒋ ᐛᐱᒪᐅᒡ ᐊᓂᔭᔪᐛ ᓇᐸᐛ ᑲ ᒥᓏᒋᐊᑭᓄᔨᒋ ᐊ ᐎᒋᑲᐳᔅᑐᐛᔨᒋ ᐱᑕᕋ ᑭᔭ ᒠᓇ᙮ 15ᐊᑯ ᒪᒃ ᒂ ᐃᑕᒡ ᐊᓂᔭᔪᐤ ᐱᑕᕋ ᑭᔭ ᒠᓇ ᒐᒋ ᐎᐎᔨᒋ ᐊᓐᑕ ᐊᓂᔭᔪᐤ ᐊ ᒪᒧᐱᒡ ᐊᑯ ᐎᔨᐛᐤ ᑲ ᐃᔨᒥᐃᑐᒡ᙮ 16ᐊᑯ ᒂ ᐃᔅᒋᔄᒡ, “ᑕᓐ ᐊᑯ ᒐ ᐃᑐᑐᐛᐧᑯᒡ ᐅᒡ ᓇᐸᐅᒡ ? ᒥᓯᐛ ᐊᐛᓐ ᐅᑕ ᒋᕈᓯᓕᒥᒡ ᒋᔅᒐᔨᑎᒧᒡ ᐊᒋ ᒥᓏᒋᐊᑭᓄᐅᑦ ᐊᓐ ᓇᐸᐤ ᐎᔨᐛᐤ ᐅᒡ᙮ ᓇᒪ ᒋᑭ ᒋ ᐊᓏᑕᓇᓄᐤ᙮ 17ᐊᑯ ᒪᒃ ᒐᒋ ᓂᑲᓂᒪᐧᒄ ᐊᑲ ᐊᑐᐎᔅ ᒐᒋ ᒥᓯᑕᐱᔨᒡ ᐊᓐᑕ ᐃᔪᒡ ᐊ ᑕᒡ ᐊᓂᔭᔪᐤ ᐊ ᐃᓯ ᐊᔨᒧᒪᑭᓄᐅᑦ ᒋᓴᔅ᙮ ᒋᑕᐊᒧᐛᑕᐅᓐᒋ ᐅᒡ ᓇᐸᐅᒡ ᒐ ᐊᑲ ᓂᑕ ᒥᓐ ᒋ ᐊᔨᒧᒪᒡ ᒋᓴᓴ᙮”
18ᒥᓐ ᑲᐤ ᒂ ᐎᓴᒪᒡ ᐱᑕᕋ ᑭᔭ ᒠᓇ ᐊᓐᑕ ᐊ ᒪᒧᐎᒡ, ᐊᑯ ᑲ ᐃᑎᓱᐛᑕᒡ ᒐ ᐊᑲ ᓇᔅᒡ ᒋ ᐊᔨᒧᒪᔨᒋ ᒋᓴᓴ ᑭᔭ ᒐ ᐊᑲ ᒋ ᒋᔅᑯᑎᒪᒐᔨᒋ ᐅᑦ ᐃᓯᓂᐧᑲᓱᐅᓂᔪᐤ ᐊ ᐊᐱᒋᑕᔨᒋ᙮ 19ᐱᑕᕐ ᑭᔭ ᒠᓐ ᒂ ᐃᓯ ᐎᑎᒧᐛᒡ ᐊ ᐃᑕᒡ, “ᐎᔭᔨᑎᒧᒄ ᒪ, ᑕᓐ ᐊᓂᔭᔪᐤ ᐊ ᑯᐃᔅᑯᓇᑯᓂᔨᒡ ᐊ ᐃᓯᓇᐧᒃ ᒋᓴᒪᓂᑐᐤ᙮ ᒋᔨᐛᐤ ᐊ ᒐᒋ ᑕᑈᑕᑕᒡ ᑭᔭ ᒪᒃ ᒋᓴᒪᓂᑐᐤ ᒐᒋ ᑕᑈᑐᐅᒋᒡ ? 20ᐛᔅ ᑕᐸ ᓂᑭ ᒋ ᐳᓂᓇᓐ ᐊ ᐛᐎᑎᒪᒡ ᑕᓐ ᑲ ᐃᓯ ᐛᐸᑎᒪᒡ ᑭᔭ ᑕᓐ ᑲ ᐃᓯ ᐸᑎᒪᒡ᙮”
21ᐊᑯ ᒪᒃ ᐊᓐᒡ ᐊᓐᑕ ᑲ ᒪᒧᐎᒡ, ᒂ ᐃᑕᒡ ᒐ ᐛᓯᐊᒡ ᐊᑲ ᐳᓂᔨᒐ ᐊ ᐊᔨᒧᒪᔨᒋ ᒋᓴᓴ ᑭᔭ ᒂ ᐱᔅᑎᓇᒡ᙮ ᓇᒪ ᐅᒋ ᒥᔅᑭᒧᒡ ᒐᒂᔪᐤ ᒐᒋ ᐅᒋ ᐛᐛᓯᐊᒡ ᐛᔅ ᒥᓯᐛ ᐊᓐᒡ ᐃᔪᒡ ᒋ ᒪᒥᒋᒪᐅᒡ ᒋᓴᒪᓂᑐᐛ ᐊᓂᔭᔪᐤ ᐅᒋ ᑕᓐ ᑲ ᐃᔅᐱᔨᒡ᙮ ᓇᒪ ᐅᒋ ᐛᐛᓯᐊᐅᒡ ᐛᔅ ᒋ ᑯᔅᑕᐅᒡ ᐊᓂᔭᔪᐛ ᐃᔪᐛ ᐊᓐᑕ ᑲ ᑕᔨᒋ᙮ 22ᐊᓐ ᒪᒃ ᓇᐸᐤ ᑲ ᒪᒥᔅᑲᒡ ᒥᓏᒋᐊᑭᓄᐅᑦ, ᐅᔅᑕ ᓇᐎᔪᐤ ᒋ ᐃᑕᑐᐳᓇᓱᐤ᙮
ᑕᓐ ᑲ ᐃᓯ ᐊᔭᒥᐊᒡ ᐊᓐᒡ ᑲ ᑕᑈᑕᒡ
23ᐃᔅᐱ ᒪᒃ ᑲ ᐱᔅᑎᓇᑭᓄᐎᒡ ᐱᑕᕐ ᑭᔭ ᒠᓐ, ᑲᐤ ᒋ ᓂᑐᐛᐱᒪᐅᒡ ᐅᐎᒐᐛᑭᓄᐛᐛ ᐊᑯ ᒂ ᐎᑎᒧᐛᒡ ᑕᓐ ᑲ ᐃᑎᑯᒡ ᐊᓂᔭᔪᐛ ᑲ ᓂᑲᓂᐱᔨᒋ ᐊᔭᒥᐊᐅᒋᒪᐛ ᑭᔭ ᐊᓂᔭᔪᐛ ᑲ ᓂᑲᓂᔅᑯᐛᔨᒋ ᐃᔪᐛ᙮ 24ᐃᔅᐱ ᑲ ᐎᑎᒧᐛᒡ ᐊᓂᔭᔪᐛ ᐅᐎᒐᐛᑭᓄᐛᐛ ᐊᑯ ᒪᒧᐤ ᒂ ᐊᔭᒥᐊᒡ ᒋᓴᒪᓂᑐᐛ᙮ ᐊᐅᒄ ᐅᔭ ᑲ ᐃᓯ ᐊᔭᒥᐊᒡ, “ᒪᐅᒡ ᑲ ᐃᔅᐸᔨᑕᑯᓯᔨᓐ ᐅᑎᐸᔨᒋᒐᐤ, ᒋᔾ ᑲ ᐅᓯᑕᔨᓐ ᒋᒋᒋᓯᒄ ᑭᔭ ᐊᔅᒋᔾ ᑭᔭ ᐎᓂᐸᒄ, ᒥᓯᐛ ᒪᒃ ᒐᒂᔪᐛ ᑕᓐ ᐊ ᐃᓯ ᑎᒂᒋ ᐊᓐᑕ᙮ 25ᑲ ᐸᔭᒋᓯᑦ ᐊᒐᐧᒄ ᒋ ᐊᓱᐤ ᐎᑎᒧᐛᐤ ᑎᐱᑕ, ᒋᑦ ᐊᐱᒋᐊᑭᓇ ᐊᓂᔭᔪᐤ ᒋᔾ ᑕᓐ ᑲ ᐎ ᐃᔅᒋᔄᐅᑦ, ᒋ ᐃᔅᒋᔄᐤ ᒪᒃ,
ᒐᒂᔪᐤ ᐛᒋ ᒋᔄᓯᒡ ᐃᔪᒡ ᐊᑲ ᒍᐤ ᐃᑎᔅᑲᓇᓯᒡ᙮
ᒐᒂᔪᐤ ᐛᒋ ᐃᑕᔨᑕᒡ ᐊᐛᓐᒋ ᒐᒋ ᐃᑐᑕᒡ ᐊᓂᔭᔪᐤ ᒐᒂᔪᐛ ᐊᑲ ᐊᐱᑎᓂᔨᒋ᙮
26ᐅᒋᒪᐅᒡ ᐅᑕ ᐊᔅᒋᒡ ᒋ ᐊᔭᔅᑯᐎᔪᒡ ᒐ ᓂᔅᑯᔅᑐᐛᒡ ᒋᓴᒪᓂᑐᐛ ᑭᔭ ᐊᓂᔭᔪᐛ ᑲ ᐛᔭᐱᒪᔨᒋ᙮
27ᐊᐅᑯᓐ ᒪᒃ ᑕᑈ ᐊ ᐃᔅᐱᔨᒡ ᐊᓄᒡ ᐛᔅ ᒋᓴᐅᒋᒪᐤ ᐊᕈᑦ, ᑭᔭ ᐊᓐ ᐅᒋᒪᐤ ᑈᓐᑎᔭᔅ ᑈᓚᑦ, ᑭᔭ ᐊᓐᒡ ᒍᐤ ᐃᔪᒡ, ᑭᔭ ᐊᓐᒡ ᐊᑲ ᒍᐤ ᐃᑎᔅᑲᓇᓯᒡ ᒪᒧᐎᐅᒡ ᐊ ᓂᔅᑯᔅᑐᐛᒡ ᒋᓴᓴ, ᐊᓂᔭᔪᐛ ᑲ ᐛᔭᐱᒥᑎ ᑲ ᐸᔭᒋᓯᔨᒋ ᒋᑦ ᐊᐱᒋᐊᑭᓇ᙮ 28ᒥᒄ ᒪᒃ ᐅᔭ ᑕᓐ ᑲ ᐃᓯ ᐃᑐᑕᒡ, ᒋᔾ ᓴᔅ ᐛᔅᑭᒡ ᔅᒋ ᐎᔭᔨᑕᓐ ᒐ ᐃᔅᐱᔨᒡ, ᒋᔾ ᒪᒃ ᔅᒋ ᐃᑐᑕᓐ ᒐᒋ ᑎᐱᐱᔨᒡ᙮ 29ᐅᑎᐸᔨᒋᒐᐤ, ᑭᓄᐛᐱᒥᒡ ᒪ, ᑕᓐ ᐊ ᐃᓯ ᓇᓂᑐᐤ ᑯᔅᑕᒋᐃᔨᒥᒡ᙮ ᐎᒋᐃᓇᓐ ᓂᔭᓐ ᒋᑦ ᐊᐱᒋᐊᑭᓐᒡ ᒐᒋ ᓱᒋᑲᐳᐅᔭᒡ ᐊ ᐛᐎᑎᒪᒡ ᒋᒥᔽᒋᒧᐅᓐ, ᒐᒋ ᓱᒋᑕᐊᔭᒡ᙮ 30ᐎᒋᐃᓇᓐ ᒪᒃ ᒐᒋ ᒥᓏᒋᐃᒋᒡ ᑲ ᐊᐧᑯᓯᒡ, ᑭᔭ ᑯᑎᑲ ᒪᒥᔅᑲᒡ ᐃᑐᐅᓇ ᒐᒋ ᐃᑐᑎᒪᒡ, ᒋᓴᔅ ᐊᓐ ᑲ ᐸᔭᒋᓯᑦ ᒋᑦ ᐊᐱᒋᐊᑭᓐ ᐅᑦ ᐃᓯᓂᐧᑲᓱᐅᓐ ᐊ ᐊᐱᒋᑕᐎᒋᑦ᙮”
31ᐃᔅᐱ ᒪᒃ ᑲᒋ ᐃᓯ ᐊᔭᒥᐊᒡ, ᒋ ᐊᔭᒋᐱᔪᐤ ᐊᓂᔭᔪᐤ ᐊᓐᑕ ᑲ ᒪᒧᐎᒡ᙮ ᒥᓯᐛ ᒪᒃ ᒋ ᓴᑭᔅᒋᓇᔅᑲᑯᐅᒡ ᑲ ᐸᔭᒋᓯᔨᒋ ᐊᒐᒂ, ᐊᑯ ᒪᒃ ᑲ ᓱᒐᔨᒧᒡ ᑭᔭ ᓇᒪ ᐅᒋ ᑯᔅᑕᒍᐅᒡ ᐊ ᐛᐎᑕᒡ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ᙮
ᑲ ᑕᑈᑕᒡ ᑕᓐ ᑲ ᐃᓯ ᐛᐎᒋᐃᑐᒡ
Acts 4.32-35 (Easter-2 Year B)
32ᐊᑯ ᒪᒃ ᐊᓐᒡ ᑲ ᑕᑈᔭᔨᒪᒡ ᒋᓴᓴ, ᒋ ᐸᐃᑯ ᒥᑐᓇᔨᑎᒧᒡ ᑭᔭ ᐸᐃᑯᓄᒡ ᒋ ᐃᓯ ᐎᔭᔨᑎᒧᒡ᙮ ᑕᓐ ᑲ ᐃᓯ ᑎᐱᔨᐛᐅᓯᑦ ᐊᐛᓐ ᒐᒂᔪᐤ ᓇᒪ ᐅᒋ ᐃᑕᔨᑎᒻ ᒥᒄ ᐎᔾ ᐊ ᑎᐱᔨᐛᐅᓯᑦ, ᒥᓯᐛ ᐊᐛᔪᐛ ᒋ ᒪᒧᐤ ᐊᐱᒋᑕᔪᐛ ᑕᓐ ᑲ ᐃᓯ ᐊᔭᑦ᙮ 33ᒋ ᓱᒋᑕᑯᓱᐅᒡ ᑭᔭ ᒋ ᒥᔅᑎ ᒥᔪᑕᑯᓱᐅᒡ ᐊᓐᒡ ᐊᑈᔅᑕᓇᒡ ᐊ ᐛᐎᑕᒡ ᑎᐸᔨᒋᒐᓱᐛ ᒋᓴᓴ ᑲᐤ ᑲ ᐅᓂᔅᑲᔨᒋ ᓂᐳᐅᓂᒡ ᐅᒋ, ᑭᔭ ᒋᓴᒪᓂᑐᐛ ᒋ ᒥᔅᑎ ᓱᐛᔨᒥᑯᐅᒡ ᒥᓯᐛ ᐊ ᑎᓯᒡ᙮ 34ᓇᒪ ᒪᒃ ᐛᒋ ᐸᐃᒄ ᐊᓐᒡ ᑲ ᑕᑈᔭᔨᒪᒡ ᒋᓴᓴ ᐅᒋ ᒋᔅᑎᒪᑎᓯᐅᒡ᙮ ᐛᔅ ᑕᑐᐤ ᐊᐛᓐ ᑲ ᑎᐱᔨᐛᐅᓯᑦ ᐊᔅᒋᔪᐤ ᑭᔭ ᒥᒋᐛᐱᔪᐤ ᒋ ᐊᑕᐛᒐᐤ᙮ ᒋ ᐸᑕᐅᒡ ᒪᒃ ᐊᓂᔭᔪᐤ ᓱᓇᔭᔪᐤ ᑲ ᐃᔅᐱᑲ ᑕᑈᔭᔨᒪᒡ ᒋᓴᓴ ᔅ ᐅᓯᑕᒡ ᐊᓂᔭ ᒐᒂᓇ ᑲᒋ ᐊᑕᐛᒐᒡ᙮ 35ᐊᑯ ᒂ ᒥᔭᒡ ᐊᓂᔭᔪᐛ ᐊᑈᔅᑕᓇ ᐊᓂᔭ ᓱᓇᔭᔪᐤ᙮ ᐊᑯ ᑲ ᒪᑎᓂᒧᐛᒡ ᐊᓂᔭᔪᐛ ᑕᑐᐤ ᐊᐛᔪᐛ ᑲ ᒋᔅᑎᒪᑎᓯᔨᒋ᙮
36ᐊᐅᑯᓐ ᑲ ᐃᑎᑦ ᒍᓯᑉ, ᐊᓐ ᓕᐸᐃ ᐃᔪᐤ ᑲ ᐃᑎᔅᑲᓇᓯᑦ, ᓴᐃᐳᕋᔅ ᒥᓂᔅᑎᑯᒡ ᒋ ᐱᒪᑎᓯᒐ ᐅ ᓇᐸᐤ᙮ ᐊᓐᒡ ᒪᒃ ᐊᑈᔅᑕᓇᒡ ᐸᕐᓇᐸᔅ ᒋ ᐃᓯᓂᐧᑲᑕᐅᒡ ᐅᔭ ᒍᓯᑉ᙮ ᐊᓐ ᒪᒃ ᐃᓯᓂᐧᑲᓱᐅᓐ ᑲ ᓯᒋᒪᑦ ᐊᐛᔪᐛ ᒐᒋ ᓱᒋᑲᐳᔨᒋ ᐃᓯ ᐱᔭᑭᔅᒋᑕᑯᑕᑭᓄᐤ᙮ 37ᒍᓯᑉ ᒪᒃ ᒋ ᐊᑕᐛᐤ ᐊᔅᒋᔪᐤ ᐊᒋ ᑎᐱᔨᐛᐅᓯᑦ, ᒂ ᐸᑕᑦ ᒥᓯᐛ ᐊᓂᔭᔪᐤ ᓱᓇᔭᔪᐤ, ᑲ ᒥᔭᑦ ᐊᓂᔭᔪᐛ ᐊᑈᔅᑕᓇ᙮
දැනට තෝරාගෙන ඇත:
ᐊᑈᔅᑕᓇᒡ 4: ᓇᔅᑲᐱ
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada