ЭхкъечӀун 8
8
Кьвед лагьай жаза: хъипер
1Реббиди Мусадиз эмир гана: «Фиръавандин кьилив алад, адаз лагь: „Реббиди лугьузва: ‹Зи халкь Заз икрам авун патал ахъая! 2Ахъай тавуртӀа, За ви уьлкведал хъипер ракъурда. 3Вири Нил хъипералди алахьна физ жеда: абур Нилдай экъечӀда ва ви имаратар ацӀурда, вун ксузвай кӀвализ гьахьда, ви месерик экечӀда, ви мукьуванрин ва вири халкьдин кӀвалера ацӀана жеда, куь къулар ва хвахар ацӀурда. 4Хъипер ви патавни къведа, ви халкьдин патавни къведа, ви мукьуванринни!›“»
5Реббиди Мусадиз эмир гана: «Гьаруназ лагь хьи, ада кӀекӀец авай гъил Нилдин, Мисридин амай вири вацӀарин ва вирерин винел яргъи авурай – ва Мисридин чилерал хъипер ракъуррай».
6Гьаруна Мисридин ятарин винел вичин гъил яргъи авуна – ва абурай хъипер экъечӀна, ва вири Мисридин чил чпелди ацӀурна. 7Амма Мисридин суьгьуьрбазрини гьа икӀа авуна – Мисридин чилел хъипер ракъурна.
8Фиръаванди Мусадизни Гьаруназ эверна ва абуруз лагьана: «Реббидивай тӀалаба, Ада зун ва зи халкь и хъиперикай хилас авурай! А чӀавуз за куь халкь Реббидиз къурбандар гун патал ахъайда». 9Мусади жаваб гана: «Эмир це заз: куь кӀвалерай хъипер квахьна кӀандай вахт тайинара! За ви, ви мукьуванрин ва халкьдин патахъай тӀалабда – ва хъипер анжах Нилда амукьда». 10«Пакадин йикъалди», – жаваб гана фиръаванди. «Гьа вуна лагьайвал жеда, – жаваб гана Мусади. – Им Реббидиз, чи Аллагьдиз, барабар гьич са затӀни авачирди вун гъавурда акьун патал я. 11Хъипери гьам вун, гьам ви имаратар, гьам ви мукьуванар, гьамни ви халкь секиндиз тада; абур анжах са Нилда жеда».
12Мусани Гьарун фиръавандин патавай хтайла, Мусади Реббидиз Ада Мисридал ракъурай вири хъиперин гьакъиндай ялвар авуна. 13Реббидини Мусадин тӀалабун кьилиз акъудна. Вири хъипер гиликьна: кӀвалера, гьаятра ва чуьлда. 14Гиликьнавай хъипер кӀунтӀариз кӀватӀ авунай ва вири уьлкве тирвал мурдар ни акъатнавай. 15Амма фиръавандиз бедбахтвал алатайди акуна, мад терсвилер давамарна: Реббиди виликамаз лагьайвал, ада Мусадизни Гьаруназ яб хганач.
Пуд лагьай жаза: ветӀер
16Реббиди Мусадиз эмир гана: «Гьаруназ лагь хьи, ада кӀекӀец хкажна хьиз чилел алай руг ярай, – ва вири Мисри тирвал руквадикай ветӀер жеда».
17Мусадини Гьаруна гьа икӀ авуна. Гьаруна вичин кӀекӀец руквадихъ галукьарна – ва гьасятда вири инсанрал ва гьайванрал ветӀер алкӀана. Вири Мисри тирвал чилел алай руг ветӀериз элкъвена. 18Суьгьуьрбазризни чпин амалралди ветӀер халкь ийиз кӀан хьана – амма абурулай алакьнач!
Гьам инсанрал, гьам гьайванрал ветӀер алкӀанвай.
19«Им Аллагьди тӀуб югъурун я!» – лагьана суьгьуьрбазри фиръавандиз.
Амма фиръаванди, Реббиди виликамаз лагьайвал, вичин терсвал давамарна ва Мусадизни Гьаруназ яб хганач.
Кьуд лагьай жаза: бувунар
20Реббиди Мусадиз лагьана: «Пака, экуьнахъ фад, фиръаван вацӀал фидайла, мад адан вилик экъечӀна лагь: „Реббиди лугьузва: ‹Зи халкь Заз икрам авун патал ахъая! 21Ахъай тавуртӀа, За гьам вал, гьам ви хизандал, гьам ви мукьуванрал, гьамни вири ви халкьдал бувунар ракъурда. Вири мисривийрин кӀвалер, гьатта мисривийрин кӀвачерик квай чилни – бегьем бувунривди ацӀанваз жеда! 22Амма Гешен чилел За икӀ ийидач: ана Зи халкьди уьмуьр тухузва – ва ана бувунар жедач. Им Зун, Ребби, а чилел алайди ваз чир хьун патал я! 23Жуван халкь За хилас ийида, амма ви халкь – ваъ. И аламат пака къалурда!›“»
24Реббиди гьакӀ авунни авуна. Бувунри циф хьана фиръавандин имарат, адан мукьуванрин кӀвалер ва бегьем вири Мисри ацӀурна. Уьлкве бувунар себеб яз терг жезвай.
25Фиръаванди Мусадизни Гьаруназ эверна ва абуруз лагьана: «Алад фена куь Аллагьдиз къурбандар гьа ина, чи чилел це». 26Амма Мусади жаваб гана: «Чавай акӀ ийиз жедач. Реббидиз, чи Аллагьдиз, гудай къурбанд мисривийри мурдар яз гьисабда эхир. Чна и серенжем мисривийрин вилик кьиле тухвайтӀа, абуру чун къван гана рекьида! 27Чна, пуд йикъан рекьиз кьурумдиз экъечӀна, ва гьана Реббидиз, чи Аллагьдиз, гьада вичи къалурай тегьерда къурбандар гун лазим я». 28«Хъсан я, за куьн ахъайда, – лагьана фиръаванди. – Алад ва кьурумда Реббидиз, куь Аллагьдиз, къурбандар ая. Амма яргъаз къакъатмир. Зи паталайни тӀалабунар ая!» 29Мусади жаваб гана: «За ви патавай хъфей чӀавуз Реббидивай тӀалабда, ва лап пака куьн вири бувунрикай хилас жеда – гьам фиръаван, гьам мукьуванар, гьамни вири Мисридин халкь. Амма фиръаванди мад чакай таб тавурай, чи халкьдиз фена Реббидиз къурбандар авун патал манийвилер тавурай».
30Фиръавандин патавай хтана, Мусади Реббидивай тӀалабна – 31Реббиди адан тӀалабун кьилиз акъудна: гьам фиръаван, гьам адан мукьуванар, гьамни вири Мисридин халкь бувунрикай хилас авуна. Гьич са бувунни амукьнач.
32Амма фиръаванди терсвилер давамарзавай: Исраилдин рухваяр ахъайзавачир.
දැනට තෝරාගෙන ඇත:
ЭхкъечӀун 8: ЛезПК
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
© Институт перевода Библии, 2010-2024