ЭхкъечӀун 19
19
Синай дагъдин ценерив икьрар кутӀунун
(19:1–24:11)
Синайдин патав акъвазун
1Исраилдин рухваяр Мисридай экъечӀайдалай кьулухъ пуд лагьай варз алукьна, гьа и юкъуз абур Синайдин кьурумдив агакьна. 2Рефидим туна, абур Синайдин кьурумдиз гьахьна ва ана акъваз хьана.
Исраилдин рухваяр дагъдин ценерив алачухар экӀяна акъвазна, 3Муса Аллагьдин патав хкаж хьана. Ребби адав дагъдилай рахана: «Якьубан кӀвализ лагь, Исраилдин рухвайрив хабар агакьара: 4„Квез За мисривийриз вуч авунатӀа акуна, куьн За Жуван патав лекьрен лувараллаз, гьикӀ хканатӀани акуна! 5Куьне За лагьайвал ийиз хьайитӀа, ва Захъ галаз авай икьрардиз вафа яз хьайитӀа, куьн зи багьа эменни жеда, вири халкьарикай анжах са куьн! Вири чил Зиди я, 6куьнни Зи хахамрин пачагьлугъ, пак тир халкь жеда!“ И гафар Исраилдин рухвайрив агакьара».
7Муса элкъвена хтана, агъсакъалриз эверна ва абурув, Реббиди вичиз эмир гайивал, и гафар агакьарна. 8Вири халкьди са сивяй хьиз жаваб гана: «Чун Реббидин гафарин геле аваз фида».
Муса Реббидив халкьдин жаваб агакьариз фена.
9Реббиди Мусадиз лагьана: «Халкьдиз Зун вахъ галаз гьикӀ рахазватӀа ван жедайвал, ва идалай кьулухъ датӀана вахъ агъадайвал, зун ви кьилив къалин цифеда аваз къведа».
Мусади Реббидив халкьдин жаваб агакьарайла, 10Реббиди Мусадиз лагьана: «Халкьдин патав ахлад. Абуруз къени пака михьивилиз акъудунин ва алай парталар чуьхуьнин гьакъиндай эмир це. 11Пакадлай муькуькъан йикъаз гьазурвилер акурай: и юкъуз вири халкьдиз акваз Ребби Синай дагъдал эвичӀда. 12Инсанар патал дагъдилай элкъвена сергьят чӀугу ва дагъдиз хкаж тахьун ва адан бинедик гъил хкӀун тавун патал эмир це. Дагъдик гъил хкӀур вуж хьайитӀани, адав кьиникьин жаза агакьун лазим я. 13Амма адак хкӀамир. Ам вуж гьайван ва я инсан хьайитӀани, ам я къванцив, я хьелинив яна йикь. Анжах къаргъу ягъай вахтунда абурувай дагъдиз хкаж жеда».
14Муса дагъдай эвичӀна ва халкь михьивилиз акъудун патал эмир авуна. Инсанри чпин парталар чуьхвена, 15ва Мусади лагьана: «Пакадлай кьулухъ къвезвай йикъаз гьазурвилер аку. Папарикай къерех хьухь».
16Пуд лагьай юкъуз лап фад пакамахъ цавар рахана, цӀайлапанар яна, ва дагъ къалин цифеди кьуна. КӀевидиказ къаргъу яна ва инсанрик кундал зурзун акатна. 17Мусади халкь кундилай Аллагьдин вилик акъудна, ва абур дагъдин кӀане акъваз хьана. 18Синай дагъ гумади кьуна, вучиз лагьайтӀа Ребби – цӀай хьиз – адан кукӀушдал эвичӀна. Дагъдай, къулай хьиз, гум акъатзавай ва хъутӀкьунзавай. 19Къаргъудин сес къвердавай къати жезвай. Муса рахазвай ва Аллагьди адаз гугрумдин ванцелди жаваб гузвай.
20Ребби Синайдин кукӀушдал эвичӀна ва Мусадиз Вичин патав, кукӀушдал, эверна. Муса хкаж хьана.
21Реббиди Мусадиз лагьана: «ЭвичӀ ва халкьдиз иниз гужуналди экъечӀна Зун акун патал алахъунар тавун патал виликамаз хабар це: и кар абурукай гзафбур патал уьмуьрдин къимет жеда. 22Хахамри, Заз мукьва хьун патал гьазур жезвайла, чеб михьивилиз акъудун лазим я, тахьайтӀа За абуруз бала гуда».
23«Халкь Синай дагъдиз хкаж жедач, – лагьана Мусади Реббидиз, – Вуна чун виликамаз хабардар авунай эхир, зани дагъдилай элкъвена сергьят чӀугуна ва дагъ пак тирди малумарна».
24Реббиди Мусадиз лагьана: «Алад, эвичӀа ва инал Гьарунни галаз хъша. Амма хахамарни чет жемят гужалди инал, Зи патав, экъечӀун патал гьич алахъни тавурай, – тахьайтӀа За абуруз бала гуда».
25Муса халкьдин патав эвичӀна ва и кардикай хабар гана.
දැනට තෝරාගෙන ඇත:
ЭхкъечӀун 19: ЛезПК
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
© Институт перевода Библии, 2010-2024