Matayo 17
17
Khumweekhamweekha khwe imbonekha ya Yesu
(Mako 9.2-13; Luka 9.28-36)
1Lwanyuma lwe bifukhu bisesaba, Yesu waatsya ni Petero, Yakobo, ni wandaaye Yokana, baaniina khu lukiingi luleeyi, nga bali bonyene. 2Ibweene iyo Yesu wakalusibwa shifwaani sheewe nga bamubona. Mu moni mweewe mwamweekhamweekha nga inyaanga, ni bikwaaro byeewe byakhosa nga buwaanga. 3Ni mu saawa nyene iyo, Musa ni Eliya bababonekhela nga bakanikha ni Yesu.
4Petero waaloma Yesu ari, “Umukasya, nga shilayi ifwe khuuba nga khuli ano. Noola waakanile, kane noombakhe ano bisari bitaru; shitweela shishoowo, shishiindi sha Musa, ni shishiindi sha Eliya.”
5 #
Rak 22.2; Zab 2.7; Isay 42.1; Mat 3.17; 12.18; Mako 1.11; Luka 3.22;
Maka 18.15
#
2 Pet 1.17,18 Ne n'aba nga ashikanikha aryo, namufweeli umweekhamweekha waabafusaasa, ni likono lyaama mu namufweeli nga liloma liri, “Uyu niye Umwaana wase, umukanwa naabi. Ni mumuwuliliise.”
6Baleekelwa ni baawulila likono ilyo, baakwa aasi befumalikha, nga bariire naabi. 7Ne Yesu weetsa, waabawaambakho, waabaloma ari, “Ni mwinyukhe, mukharya ta.” 8Baryo ni benyusa tsimoni tsaabwe, baalekha khubonakho umuundu ukuundi yeesi ta, akhali Yesu yenyene.
9Ne ni baaba nga beekha khukhwaama khu lukiingi, Yesu waabakhoonyakilila ari, “Mukhaboolelakho umuundu yeesi khu khubonesebwa khuno ta, khukhwoolesa Umwaana w'Omuundu nga waalamusibwile khukhwaama mu bafu.”
10 #
Mal 4.5
Baleekelwa baamureeba bari, “Lwashiina baleekeli be kamakaambila ka Musa baloma bari, Eliya niye uwaakhila khuunyoowa khukhwiitsa?”
11Yesu wabeelamo ari, “Ilala Eliya niye ulinyoowa khukhwiitsa, aliŋoonaŋoona bibiindu byoosi. 12#Mat 11.14Ne mbaboolela ndi, Eliya wamala khaale khukhwiitsa, ne sibamwofwasa ta, bamukhola shoosi sheesi bakana. Aryo n'Umwaana w'Omuundu musaambo nyeneyo alitaambisibwila mu mikhono kyaabwe.”
13Ulwo baleekelwa baamanya bari, aaba akanikha isi bali bibiwaamba khu Yokana Umubatisa.
Yesu awonesa umusiinde uwaba ni kusaambwa kuubi
(Mako 9.14-29; Luka 9.37-43)
14Nga boolele isi lituuli lye babaandu, umusaani mutweela weetsa isi Yesu, wafukhamila aasi is'ali. 15Waloma ari, “Umukasya n'uwaambile umusiinde wase shiisa. Akwaka tsifubu, naluundi tsimutaambisa naabi. Tsifuunda ngali, tsimukwiisa mu mulilo, ni mu mbuka ikiindi lukanile mu meetsi. 16Imureerire isi baleekelwa boowo, ne baalekha khunyala khumuwonesa ta.”
17Yesu weelamo ari, “Inywe muli kumuboolo kukuukhafukiilila ta, kukwaborokha, ise indyoolesa eena khuuba ni nanywe? Ise indyoolesa eena khuubekhalilikha? Ni mumunderere ano.” 18Yesu waakhookhela shisaambwa shiibi, ni nasho shaamururamo. Ni mu mbuka nyeneyo, umusiinde tsana waawonesebwa.
19Lwanyuma baleekelwa beetsa isi Yesu mu shimoonyo, baamureeba bari, “Umukasya, ne lwashiina ifwe sikhunyalile khuuwoona shisaambwa isho ta?”
20 #
Mat 21.21; Mako 11.23; 1 Kor 13.2 Naye Yesu wabeelamo ari, “Lwekhuuba khufukiilila khweenywe khukyeekhe. Ilala imbaboolela ndi, ni muba ni khufukiilila nga khulekhaana nga khamiitso kaladaali, munyala khuuloma lukiingi luno muri, ‘Rura khukhwaama ano, utsye iyo, nio nalwo luliitsya.’ Imbaawo shishiilibabeela shihangafu ta.” 21Imbaawo shishinyala shaatimisa kumusimu kwe isaambo yino ta, khuurusakho khuuloomba ni khubuya intsala.
Yesu akanikha luundi khu bye khuufwa khweewe
(Mako 9.30-32; Luka 9.43-45)
22Nga Yesu ni baleekelwa beewe boosi beetsile atweela i Galilaaya, Yesu waabalomela ari, “Umwaana w'Omuundu atsya khuwaanibwayo mu mikhono kye babaandu. 23Balimwiira, ne khu shifukhu she khataru, alilamusibwa khukhwaama mu bafu.” Ni baleekelwa kumutaambo kwabawaamba.
Kumusolo kwe Lisaayilo Likhulu
24 #
Luky 30.13; 38.26 Lwanyuma nga Yesu ni baleekelwa beewe boolele i Kaperunaumu, babuusanisi be kumusolo kwe Lisaayilo Likhulu beetsa isi Petero baamureeba bari, “Umuleekeli weenywe asasula kumusolo kwe Lisaayilo Likhulu?” 25Petero wabeelamo ari, “E e, naawa.”
Ne Petero n'ola mu ntsu nga ashiili khuloma ilomo yoosi ta, Yesu waamureeba ari, “Simoni, iwe waambaasa urye? Bayiinga be shiibala, kumusolo namwe busuulu babibuusanisa khukhwaama khu banaanu? Khukhwaama khu baana baabwe besiinde namwe khukhwaama khu bareende?”
26Petero welamo ari, “Khukhwaama khu bareende.”
Yesu waamuloma ari, “Isho shokesa shiri, babaana bali be lukoosi. 27Ne khulekha khubakhalasa ta, tsya khu nyaantsa, utuume kumulobo kwoowo mu meetsi, uwaambise tsinyeeni. Ne iyo yeesi kane unyoowe khuwaambisa, wasamise mu khanwa mwayo, kane unyoolemo lipeesa. Kane uliyile, ulibawe, khusasula kumusolo kwase ni kukwoowo.”
දැනට තෝරාගෙන ඇත:
Matayo 17: LPE
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
The Bible in Lumasaaba © Bible Society of Uganda, 2016.