Aromayi 13
13
Kwo Bmiya A Yesu-viyi Ba Vi Bo
1Fye ku ze aɓo vi-yi n na aza ba nɓa gyi ebe nyi, ntuge Shekwoyi nu na kpe ɓa n ɓo. Ebe ho to lo n Shekwoyi nu to shi kwo n wo iko yin. 2Ntu cenu aza n ɓata shi ekni awyidna bwan Shekwoyi nu n ɓa ta vi wo ɓom. Tata ɓa vi ɓa n na avun. 3Gama abusi-ɓiyi-da ta wan aza n ɓa zhin ɓefyecen, ama oza n wo zhin ɓenukwoyi tilas nu wa wo wo dna. Shi awyi-dna bwa ɓoho ta bwa hon. 4Shekwoyi tnu n na busi ɓiyi-da yi ɓa bma fye nu zhin. Ama n ho zhin ɓenukwoyi tilas ha wo wo dna ntuge wo ɓa wan ho. Shekwoyi wa tnu n woi n cenu. 5Shi awyidna bwa ntu a ɓo ɓo ngun aba, kmisunyi, n na bai to a wan hon, bayi, ntuge ho kpe lo ge kwo kunce lo.
6Fye gba gadu cewo, ntu aɓoye ɓo n gun aba. Ntuge a gba a tnu-tnu zhinyi n na bai ɓa gyi abye n Shekwoyi tnu-tnu zhin yi, ɓai zhin fye bauta. 7Fye gba ozaho-zahoi nya n kwo kunce, fye gba ofye gadu n bugba bui-bui, fye vi aza ɓo nɓa kpe n fye she. Fye ga aza mwa-mwa n kwo kunce nɓayi.
8Fye gba ofye ata vinya, a kpe yeye ta fye to zo kwo gban, ntuge n fya ye n ɓayi fye zhin Shekwoyi ɓeye nu, fyei shi wo awyidna bwa. 9N ha ye n ho zado yi shi ho ye n hohin sun, hota ye ha gyi wo fin, ho taye ha wu won kwo ha wyiwo vim. Hoi ta zhin ɓe nukwoyi n wo nyikwo yin kwo ha ye enya n wo n ceyin, kwo ha zhin ɓe n na awyidna ngu n awo agna nge ato zhin. Ngun awo vinya pupuru fi n gmanyi ye nu. Ha ye n ho zado yi shi ho ye n hohin tukwoyi. 10Yeye ta zhin za ɓenukwoyin. Cenu zhin Kwoi nu zfiin aɓo vinya n Shekwoyi ye, wyidna gmanyi nu n fyeye.
11Asese n bmiya dalili nyi n jesun. Fye kpe shi esa n la gba, esa busilo. La kun a gyewyi ntuge, Dagayi ɓe ɓe la gnawo vivi n du esa n yi ɓei ga gaiciya n cei. 12-13 Sukwo n la duya, owo ɓe-ɓe nyipyeyi la ga ɓe, Ntuce, fye kma ɓe nukwoyi zhin ya, fya kpe ɓemana zhin. Shi kwo kunce a buzanga da sase. Fye zhin ɓemana fya zhin gaiciya n na aɓo vinya n fye ɓa zhin n na bai aza da fye ɓo manayi. Fye to wunsa ya n na gnikwo gniyi, n jesin yi, n na anagbayi zhinyi, n shakpeyi, n gu sun yi, kwo eshen. 14Ama gyi Kristi wye wa bma ho zhin, ha sase shi kwo kunce, to ha zhin shaula ha dagma dna n ɓenukwoyi zhin m.
දැනට තෝරාගෙන ඇත:
Aromayi 13: GAW
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Alkawali Woiwoyi
(Gbagyi New Testament)
Copyright © 1997 by Biblica, Inc.
All rights reserved worldwide.