Мейле попонь прявтось кевкстизе Стефанонь: «Те чумондомась виде?» Стефан мерсь: «Ялгат-оят ды раськень тетят! Кунсоломизь, инеськеть! Иневалдонь Пазось лиссь Авраам минек покштянть икелев, зярдо сон эрясь Месопотамиясо, Харанов туемадонзо икеле, ды мерсь: “Кадык тиринь масторот, раськеть, кадык тетять кудонзо ды азё масторс, конань Мон невтьса теть”. Авраам кадызе Калдеянь масторонть ды кармась эрямо Харансо. Тетянзо куломадо мейле Пазось сонзэ кучизе тосто те масторонтень, косо тынь ней эрятадо. Сон эзь максо Авраамнень модань кодамояк талика, пильгень чалгавксошкаяк. Пазось тензэ ансяк алтась: Авраам ды сонзэ эйкакшонзо-нуцьканзо кармить улеме свал азорокс весе те масторонть лангсо, куш Авраамонь се шкане эйдезэяк арасель. Пазось мерсь тензэ: “Тонь эйкакштнэ-нуцькатне улить ве ёндонь сыцякс омбо масторсо. Тосо сынь кармить эрямо урексчисэ ды лепштямосо нилесядт иеть. Ансяк Мон судяса се раськенть, кона тейсынзе урекс тонь эйкакштнэнь-нуцькатнень. Ды теде мейле сынь лисить се масторстонть ды кармить сюконякшномо Монень вана те таркасонть”. Мейле Пазось кемекстась Авраам марто вейсэньлув, конань тешксэкс путозель цёрынень киськепень керявтомась. Теде мейле Авраамонь чачсь Исак цёразо, конанень сон тейсь керявтома чачомадонзо мейле кавксоце чистэ. Мейле Исаконь чачсь Яков цёразо, Яков ульнесь кемгавтово буень прявтнэнь тетякс.
Яковонь цёратнень сявадсть сельмест Иосифень лангс ды секскак сынь миизь сонзэ Египетэв урекс. Ансяк Пазось ульнесь Иосифень марто ды менстизе сонзэ весе стакачитнестэ. Сон казсь Иосифнень превейчи ды фараононть, Египетэнь инязоронть, пельде мельспаро. Фараонось аравтызе Иосифень покшокс эсензэ кудонзо ды весе Египетэнть лангсо.
Ды вана сась вачочи ды ине майсема Египетэнь ды Ханаанонь* мастортнэс. Минек покштятнененьгак а мезде ульнесь ярсамс. Зярдо Яков марясь, келя, Египетсэ ули сюро, сон васенцеде кучинзе тов цёранзо. Омбоцеде самстост Иосиф панжизе прянзо лелятнень-ялакстнэнь икеле, фараоноськак кармась содамо Иосифень раськетнеде. Теде мейле Иосиф тердинзе Яков тетянзо ды весе кудораськензэ, конатнеде ульнесть сизьгемень вете ломанть. Яков кудораськенек сась Египетэв, козо мейле кулоськак, тозо кулость покштяноккак. Уловост пачтязельть мекев Сикем ошов ды путозельть кевботмарс, конань Авраам рамакшнызе сиядо Сикемсэ эриця Еморонь цёратнень кедьстэ.
Малавгалесь шкась, зярдо топавтоволь Авраамнень максозь Пазонь алтавксось. Минек раськесь Египетсэ яла ламолгадсь. Се шкастонть прявтокс кармась лия инязор, кона мезеяк эзь сода Иосифте. Сон эрьва кода ёжовгалесь минек раськенек каршо, нарьгась минек покштятнень лангсо, мик кармавтылинзе ёртнеме ансяк чачозь эйдест, ды эйдтне кулсильть. Те шкане чачсь Моисей, кона ульнесь Пазонь мельстуиця мазый эйдекс. Васенце колмо ковонь перть Моисеень трясть-вансть тетянзо кудосо. Мейле, зярдо савсь эйденть ливтемс кудосто ды кадомс ськамонзо, сонзэ пурнызе-сэрнизе эстензэ фараононть тейтерезэ. Сон трясь-вансь Моисеень, кода эсь эйдензэ. Моисей тонавтозель се шкань Египетэнь весе превейчинтень-ёрокчинтень, ды сон ульнесь весемесэ кол: валсояк, тевсэяк.
Зярдо сонензэ топодсть ниленьгемень иеть, сась тензэ мель содавтомс эсь раськенсетнень, Израилень ломантнень. Весть сон несь, кода египетэнь ломань нарьги израилень ломань лангсо. Моисей каявсь тензэ лездамо: пандызе кеженть покордазенть кисэ ды маштызе египетэнсенть. Сон арсесь, эсь раськенсетне чарькодьсызь: Пазось сонзэ вельде кучи тенст идема. Ансяк сынь тень эзизь чарькоде. Омбоце чистэнть Моисей неизе, кода израилень кавто ломанть тюрьгадсть эсь ютковаст. Сон терявтсь оймавтомост: “Оят, эдь тынь ве раськень! Мекс, эно, тейтядо берянь вейкенк-вейкенк туртов?” Сестэ тюремань ушодыцясь тулкадизе Моисеень ве ёнов ды мерсь: “Кие тонь аравтынзеть прявтокс ды судиякс минек лангсо? Эли тон арсят моньгак маштомс, кода исяк маштык египетэнсенть?” Неть валтнэде Моисей оргодсь Мидиянь масторов ды эрясь тосо кода лия ёндо сыця. Тосо сонзэ чачсть кавто цёранзо.
Ниленьгемень иень ютазь чаво модасо, Синай пандодонть аволь васоло, Моисейнень лиссь Азоронть ангел, палыця кодоркс куракшсто лисиця толгель потсо. Моисей пек дивазевсь неявксонтень. Зярдо сон сась ваномонзо седе малас, маризе Азоронть вайгелензэ: “Мон тонь покштятнень Пазост, Мон Авраамонь Пазан, Исаконь Пазан ды Яковонь Пазан”. Моисей сорнозевсь тандадомадонть, пельсь сельмензэяк кепедеме. Азорось мерсь тензэ: “Каить карсемапелеть: те таркась, косат ней тон, – Монь иневанькс аштема таркам. Мон варштынь ды неия, кода Египетсэ лепштить Монь раськенть, маринь ломантнень кувсемаст. Ней Мон сынь ливтемест урексчистэ. Сак тей, Мон кучтан тонь мекев Египетэв”.
Те ульнесь се Моисеесь, конань сынь эзизь кунсоло ды конанень мерсть: “Кие тонь аравтынзеть прявтокс ды судиякс?” Сонзэ кучизе Сонсь Пазось улемс прявтокс ды идицякс. Пазось теизе тень ангел вельде, кона лиссь Моисейнень палыця кодоркс куракшсто. Моисей ливтизе раськенть Египетстэ. Сон тейнесь тамашат ды дивань тевть Египетсэяк, Якстере иневедьсэяк, ды ниленьгемень иень перть чаво модасояк. Те ульнесь секе Моисеесь, кона кортыль израилень ломантненень: “Азорось, тынк Пазось, кочки тенк тынсенк раськестэнть Пазмариця, кона монь кондямо. Сонзэ кунсолодо”. Те Моисеесь ёвтнилизе минек покштятненень ды раськентень, кона пурназель чаво модас, сень, мезенть ангелэсь панжилизе тензэ Синай пандонть прясо. Сонензэ максозельть Пазонь эрямонь кандыця валтнэ, миненек максомга. Ансяк покштянок эзть карма сонзэ кунсоломо: сынь велявтсть эйстэнзэ ды бажасть мурдамс мекев Египетэв. Сынь кортасть Ароннэнь: “Тейть тенек пазт, конат минек ветявольть. Эдь а содатано, мезе теевсь Моисеень марто, кона минек ливтимизь Египетстэ”. Сестэ сынь тейсть од букань кондямо чопача, кармасть кандтнеме тензэ печкезь ракшань анокст ды лия казнеть ды тейнесть киштемат-морамот эсь кедьсэст теевть пазонть лемс. Пазось велявтсь эйстэдест, кадынзе менелень тештненень сюконякшномо, кода теде сёрмадсть пазмарицятнеяк:
“Израилень ломантне! Арази Монень
тынь кандтниде печкемань ды пултамонь анокст
неть ниленьгемень иетнень перть чаво модасонть?
Арась, тынь кандтниде мартонк Молох пазонть коцткудонзо
ды Ремфан пазонк тештензэ,
неть чопачатнень, конатнень теинк сюконямо таркакс.
Секс Мон пантядызь Вавилононь томбалев”.
Минек кезэрень покштятнень ульнесь чаво модасо коцткудост, косо сынь озность-сюконясть Пазонтень. Коцткудось теезель Пазонть валонзо ды невтевксэнзэ коряс, конат ёвтазельть ды невтезельть Моисейнень. Мейле кезэрень покштятне максызь те коцткудонть минек покштятненень. Сынь Иисус Навинэнь ветямонзо ало кандызь коцткудонть лия масторс. Те масторонть сынь саизь эсест туртов сеть раськетнень кедьстэ, конатнень Пазось пансекшнынзе минек покштятнень икельде. Истя коцткудось ванстовсь Давидэнь шканзо самс. Пазось явиль мельспаро Давиднэнь, ды Давид энялдсь Сонзэ икеле: “Мерть монень путомс эрямо тарка тонеть, Пазонтень, конанень кемсь Яков”. Ансяк кудонть Тензэ путызе Соломон. Ялатеке Верепазось а эри ломанень кедьсэ путовт кудосо. Пазмарицясь истя пачти Пазонть валонзо:
“Менелесь – Монь Инязорксчинь озамо таркам,
модась – Монь пильгень чалгамо таркам!
Кодамо кудо путови тыненк Монь туртов? –
кевкстни Азорось, –
Косто муеви Монень оймсема тарка?
Арази аволь Монь кедьсэ те весе теезель?”
Каршо молицят! Тынк арась меленк панжомс эсенк седеенк Пазонтень ды кунсоломс Сонзэ! Тынь истяттадо, кода покштянккак – тынь свал мольтядо Иневанькс Оймеялтонть каршо! Арази ульнесь зярдояк пазмариця, конань тынк покштянк аволизь пансе? Сынь маштнильть сетнень, конат икелепелев ёвтнильть Видечисэнть* самодонзо, ды ней вана тынь Сонсензэяк миинк ды маштынк! Эдь тыненк ангелтнэнь вельде максозель Кой, ансяк тынь а эрятадо сонзэ коряс».

Тень кунсоломсто Инепромксонь ломантне азаргадсть ды чикордсть пейсэст. Ансяк Иневанькс Оймеялтсо пештязь Стефан варштась менельс ды неизе тосто Пазонть иневалдонзо ды Иисусонь, кона стядо аштесь Пазонть вакссо вить кедь ёно. «Ванодо», – мерсь сон, – «мон неса панжовозь менеленть ды Ломантнень Цёранть, кона стядо ашти Пазонть вакссо вить кедь ёно!» Ды сынь пижакадсть виев вайгельсэ, потомдасть эсест пилест, ды ве мельсэ каявсть Стефанонь лангс. Сынь ускизь сонзэ ош ушов ды кармасть чавомонзо кевсэ. Чумондыцятне кадызь ланга оршамост од ломаненть, конанень мерильть Савла, пильгензэ ваксс.
Стефанонь чавсть кевсэ. Те шкане Стефан энялдозь ознось: «Иисус Азоро, вастык монь оймем». Мейле сон прась кумажа лангс ды вайгельсэ мерсь: «Азоро, иляк лово тень пежетекс сынст туртов!» Неть валтнэнь марто лиссь Стефанонь оймезэ.

සවන් දෙන්න Апостолтнэнь тевест 7