Содавикс Атя* кучи шумбракстнемат тонеть, Пазонь кочкавт Азорава*, ды тонь эйкакштнэнень. Мон видечисэ вечктядызь тынк, ды аволь ансяк мон. Истя жо вечктядызь тынк весе лиятнеяк, кить кармасть содамо видечинть. Эдь те видечись эри-ашти минек эйсэ ды карми улеме мартонок пингеде пингес. Кадык Тетя Пазось ды Иисус Христос Азорось, Тетянть Цёразо, максыть тыненк видечи ды вечкема марто чансть, седеймарямо ды седейоймамо.

Мон пек кенярдынь, зярдо неинь тонь кона-кона эйкакшот видечисэ эрицякс, кода кармавтозельгак минек Тетянок пельде. Ды ней энялдан икелеть, азорава: карматано вечкеме вейкенек-вейкенек. Мон сёрмадан теть аволь од кармавтовкс, мекевланк, сень, кона максозель миненек ушодксстонть саезь. Ды те вечкемась вана мейсэ: миненек эряви эрямс Пазонь кармавтовкстнэнь коряс. Те Сонзэ кармавтовксонть тынь маринк ушодксстонть саезь ды сонзэ коряс тыненк эряви эрямс. Эдь масторланга кармасть якамо ламо манчицят, конат а видькстыть ломанень рунгосо Иисус Христосонь самодонть. Истятнэ – манчицят ды антихристт. Секс ванодо эсь мельганк, а ёмавтомс миненек сень, мезенть таштынек эсь важодемасонок, мекевланк, кадык максови тенек казнесь-пандомась целанек. Кие а эри-ашти Христосонь тонавтомасо ды моли сонзэ каршо, сень арась Пазозо; кие эри-ашти Христосонь тонавтомасо, сень ули Тетязояк ды Цёразояк. Бути кияк сы тыненк ды а пачти те тонавтоманть, истямо ломаненть илинк совавто эсенк кудос ды илядо шумбракстнеяк мартонзо. Кие шумбраксты истямо ломаненть марто, се сонзэ марто вейсэ теи зыянов тевть.

Ламодо ёвтыксэлинь мон тыненк, ансяк арась мелем теемс тень черниласо конёв лангс. Мон кеман: паряк, сан ды вастован мартонк, ды сестэ кортатано сельмеде сельмс кенярдоманк пештямос. Пазонь кочкавт Патять эйкакштнэ* кучить теть шумбракстнемат. Аминь.

සවන් දෙන්න Иоаннонь омбоце сёрмазо 1