Вечкевикс ялган! Илядо кеме эрьва кодамо оймеялтонтень, терявтнеде-снартнеде сонзэ: Пазонть пельде сон эли аволь. Эдь масторланга ней якить ламо кенгелиця пазмарицят. Пазонь Оймеялтонть содасынк истя: эрьва оймеялтось, кона видьксты ломанень рунгосо Иисус Христосонь самодонть, – те оймеялтось Пазонть пельде. Мекевланк, эрьва оймеялтось, кона а видьксты Иисус Христосонь ломанень рунгосо самодонть, – аволь Пазонть пельде. Те оймеялтось – Антихристэнь пельде, конань самодонть тынь марсиде, ды сон уш нейгак тесэ, масторлангсонть. Тиринь тякинеть! Тынь Пазонть пельде, ды тыненк изнявсть кенгелиця пазмарицятне, эдь Се, конась тыньсэнк, седе покш Идемевстенть, кона те пежетев масторлангонь ломантнесэ. Сынь – те масторлангстонть. Ды секскак кортыть истя, кода кортыть те масторлангсонть, ды те масторлангось кунсолы сынст. А вана минь Пазонть пельде, ды се, кие содасы Пазонть, кунсолы минек. Кие аволь Пазонть пельде, се а кунсолы минек. Истя минь содасынек видечинь Оймеялтонть ды манчемань оймеялтонть.

Вечкевикс ялган! Карматано вечкеме вейкенек-вейкенек, эдь вечкемась максозь миненек Пазонть пельде. Ды эрьвась, кона вечки, чачозь Пазонть эйстэ ды содасы Пазонть. Кие а вечки, се зярдояк эзизе содакшно Пазонть, эдь Пазось – вечкема. Пазось невтизе миненек Эсь вечкеманзо вана мейсэ: Сон кучизе масторлангонтень Эсензэ вейкине Цёранзо миненек эрямонь максомга. Вечкемась ашти аволь сеньсэ, кода минь вечкинек Пазонть, а вана мейсэ: Пазось Сонсь вечксамизь минек ды кучизе Эсензэ Цёранзо минек пежетнень нолдамонть кисэ. Вечкевикс ялган! Бути Пазось минек истя пек вечксамизь, сестэ миненеккак эряви вечкемс вейкенек-вейкенек. Пазонть зярдояк кияк эзизе некшне. Ансяк бути минь вечктяно вейкенек-вейкенек, сестэ минек эйсэ эри-ашти Сонсь Пазось, ды Сонзэ вечкемась алкуксокс топавтовсь минек эйсэ.
Минь эрятано-аштетяно Пазонть эйсэ, ды Сонгак эри-ашти минек эйсэ. Теде минь содатано Сонзэ Оймеялтонть коряс, конань Сон максызе миненек. Минь минсь неинек ды яволявттано: Тетясь кучизе Эсензэ Цёранзо масторлангонть Идицякс. Кие видьксты: Иисус – Пазонть Цёра, сень эйсэ эри-ашти Пазось, ды сонсь те ломанесь эри-ашти Пазонть эйсэ. Вана истя минь карминек содамо, кода Пазось вечксамизь, ды минь кемтяно те вечкемантень.
Пазось – вечкема, ды се, кие эри-ашти вечкемасо, эри-ашти Пазонть эйсэ, ды Пазось эри-ашти те ломаньсэнть. Пазонь вечкемась алкуксокс топавтовсь минек эйсэ, ды те масторлангсонть минь эрятано истя, кода эри Христос. Секскак минь апак пеле вастсынек Судямо чинть. Вечкемасонть арась пелема. Ине вечкемась пани весе пелеманть. Пелемась свал сюлмазь чумонь пандоманть марто, ды кие эри пелезь, се эзь пачкоде ине вечкемантень. Минь вечктяно Сонзэ секс, мекс Пазось васенцекс вечкимизь минек. Кие корты: «Мон вечкса Пазонть», – ансяк сонсь кирди кеж эсензэ кемиця ялганзо лангс, се кенгелиця. Кие а вечксы эсензэ кемиця ялганзо, конань сон некшнизе, сенень а вечкеви Пазоськак, конань сон эзизе некшне. Ды вана те кармавтовксось, конань Пазось миненек кадызе: «Кие вечксы Пазонть, сенень вечкема эсензэ кемиця ялганзояк».

සවන් දෙන්න Иоаннонь васенце сёрмазо 4