This translation was published by the Bangladesh Bible Society in 2022. If you are interested in obtaining a printed copy, please contact the Bangladesh Bible Society at shop.biblesociety.org.bd or info@biblesociety.org.bd

Marma Bible New Testament (BBS)

য়াংনক যীশু ক্রিলিরি, কোমাস্যাংরোচা ওয়িপাসানা ক্যংমা তামাদা বুউমা আল্হু থিঃগেতি। যীশু ম্রাংলিরি, ছাংরিসা মাছামা তয়ক লাঃরো নৈপেঃ পয়স্যা ল্হুউলিরি। য়াংখা যীশু কোঃ তিবিরোগো প্রলিরি, “ঙা নাংরোগো আম্হেং প্ররি, দিঃ ছাংরিসা মাছামাচা, আখ্রা লুঃউরোথাক কংগং আম্যা ল্হুউলিরি, আক্রংগা আখ্রা লুঃউরো আলুংসুউ য়াংসুউরোমা হিকচা চাঃরো-সকরো মুকুম উচ্চাগা আল্হু পিইলিরি, ছুগি দিঃ মিঃমাচা মিহিক-মেঙেংগিলি, হ্রাংরো নিংফু কিজু য়াংসুউমা যা হিকলিরি, য়াংচা আলুংচা ল্হুলিকরি।”


তিবিরো আতুওয়ংগা লৈগায়কচা ওয়িপাসানা ক্যংগো য়ুউরো আছুয়ি-আঙি প্যাংগেলিরি। য়াংসুউরো প্রগেলিরি, আল্হা আল্হা ক্যকলুংনা আফুদেং ওয়েং থিঃরো দিঃ ইংগো যাপুয়েং আল্হা লুঃউকরিলি ক্রিনা। য়াংখা যীশু প্রলিরি, “নাংরোগা দিঃচাগো ম্রাংরি, প্রফুছুগি জং তারাক লাঃমি যাখা দিঃ ক্যক তুলুং আথাকমা তুলুং মিহিকমুহুক; আলুংচা ফ্রুবলৈফু।”
তিবিরো যীশুগো মিংগেলিরি, “ছারা, যাখা দিঃচারো ফ্রইফুলিঃ অর ঙারো যা লাকখানাগো ম্রাংরো সিকফুচাগা, দিঃচারো ফ্রইফু আখিং ক্যাব্যা?”
আফ্রিমা যীশু প্রলিরি, “ক্রি, নাংরোগো লুঃউরো মিলিংনৈংঅং, আক্রংগা লুঃউম্যারোচা ঙাক নাঃমিনা লাঃরো প্রঃমি, ‘ঙারা মশীহ’ অর ‘আখিং ফ্রইব্যা।’ য়াংসুউরো নক্কা মাঃলালিগি। নাংরো যাখা চঃনা ছেংগ্যাংফাক তাঃরাগো ক্রামি য়াংখা মক্রককেকি, আক্রংগা পাথামা য়াংচারো ফ্রইফুসিই; য়িগিলি য়াংনক আখিংচা খঃ আতুং অাখিং লাঃফুব্যা মুহু।”
য়াংনক যীশু য়াংসুউরোগো প্রলিরি, “জে তুম্যুনা অর তুম্যুগো ছেংগ্যাংফাক লুকমি অর মাং তামাংনা তামাং ছেংগ্যাংফাক লুঃউকরো চঃ ফ্রইফু। কংগং আগ্রি মায়াং লুকফু অর আখ্রা আখ্রা আরারোমা ঙেকসিই-ঙেকনা অর কেইংফা কুয়িইফু। দিঃচারো আপি গংখাংমা যা প্রাসানা অর লাকখানা ম্রাংরাফুচা কংগং আগ্রিকি ক্রকফুয়ি।
“দিঃচারো ফ্রইফু হ্রিইগা লুঃউরো নাংরোগো তিঃগেমিঃ অর নাংরোগো ঞ্যচিঃ প্যাংলিমি। তাঃরা চৈফু কিজু য়াংসুউরো নাংরোগো তাঃরা চেঃরেদুঃ য়ুউ লাঃলিমি অর থংমা থিকলিকমি। ঙা কিজু নাংরোগো মাংনা ওকখ্যুকসু হ্রিইগা য়ুলাঃলিকমি, য়ল্হক মিগি ঙাক আক্রংগো য়ুউরো সাকসি পিইফুচা, নাংরোমা আলুয়ি ফ্রইলিমি। নাংরো আগো খ্যাং খ্যাং চিইমা ম্হেফুচাগা, য়াংখা কো ব্রাক্কা চাঃগা প্রফুকিজু, নাংরো হ্রিইগাকাবাং চাঃগা য়াং মাঃথাগি, যাফুলিছুগি ঙা নাংরোগো লুঃউরোমা মুতুরি চাঃগানা পৈংঞা পিইমি, য়াং চাঃগা আফ্রিমা নাংরো রেংসুরোচা তুখুউলি প্রফু মনৈংমুঃ অর য়াংচাগোলি লাক খেংরামিঃ। নাংরোমা অামিং-আফাঃ, ঞিং-মিছুয়ি অর মিউ-ছুয়িইরো নাংরো তিঃ পিইলিকমি। য়াংসুউরো নাংরোগা তয়ক তিরিগো সেঃবৈলিইমি। ঙা কিজু নাংরোগো আলুংসুউ মুংলিকমিঃ, য়িগিলি খ্যাংঞ্যংপ্যাংলিই নাংরোগা আম্যুই তাবাং মুনুনৈমুউক। নাংরো তিদি নিংগি, য়াল্হক ব্রিঃমা তিম্রিজ বাওয়াগো রাঃমি।
“যাখা নাংরো যিরুশালেংগো সুরুয়িরো রেংগেচাগো ম্রাংগেমি, য়াংখা সিকফুচাগা, যিরুশালেং প্যাকফু আখিং লাঃব্যা। য়াংখা যাসুরো যিহুদিয়ামা হিকফু, য়াংসুউরো তংদেং রুওয়াদুঃ ব্রিগেলিই। যাসুউরো ম্রুমা হিকফু, য়াংসুউরো ম্রু প্রাংদুঃ লাঃগেলিই। যাসুরো রুওয়ামা হিকগেতি, য়াংসুউরো খ্যাংচামুছু ম্রুদুঃ মাঃলাঃগেলিইগি, আক্রংগা য়াং রাকরোচা ডেং রাক ফ্রইফু, অর য়াংচা আলৈই সেংস্যাংস কেইং চাউমা যা রুইরো হিকরি, য়াংচা প্রিজুংফু। য়াংখা যাসুরো কোঃ ওয়েংসি অর যাসুরো সাঃ স্যিগো রাংসিই নুঃও তৈইতি য়াংসুউরো দুঃখুওয়াচা কংগং আগ্রিই ফ্রইফু! প্রিচা কংগং দুঃখাওয়া ক্যাফু অর যিহুদি লুঃউম্যুরো আথাকমা থাওরা ফুরা ঈ ডেং ক্যাফু। চৈদানা য়াংসুউরোগো সেঃবৈফু অর হিকচা আলুং জে লুঃউম্যুমা য়াংসুউরো থুঃউকদে ইকদে আখ্যুয়েং ক্যারো হিকফু। মন্হকরাক তৈঅং যিহুদিমুহু লুঃউরোমা আখিং মফ্রলিঃ, য়াকল্হক রাকতৈঅং যিহুদিমুহু লুঃউরো যিরূশালেংগো য়াংসুউরো ফুওয়া অক্কা নাং থাঃফু।
“য়াংখা নিং, লাঃ অর ক্রিরোমা কংগং আম্যা লাকখানা ম্রাংরামি। দিঃ কাবামা হিকচা লুঃউম্যুরো কংগং দুঃখাওয়া রাঃগেমি অর সমুদ্রাচা কংগং ছুউফুনা লৈংতঃফু কিজু সমুদ্রাচা থুদুরুং দুরুং ফ্রইফু। কাবালুং যা ফ্রইফুলিঃ য়াংচাগো চেংজারো লুঃউরোচা ক্রকরো আম্হেং মিসিক ফ্রইফু, আক্রংগা লাঃ, নিং অর ক্রিঃচা তিঃদি মিনিংব্যা। য়াং আখিংমা তেংখুংনা গোংধ প্রিজুংলো মনুসাওয়া সাঃদগো য়াংসুউরো গংখাং ব্রাংগা লাঃচাগো ম্রাংগেফু। দিঃ প্রাসানারো ফ্রইফু চাঃরি নক, নাংরো থাঃরো রেঃকেলি অর আগং থংগেলি, আক্রংগা নাংরো ক্যুয়েফু আখিং লাঃব্যা।”
য়াংনক যীশু কোঃ তিবিরোগো সুয়েংসাং পিইফু কিজু দিঃ চাঃগাগো প্রলিরি, “সাঃফেংবাংনা আখ্রা আপাংরোগো ক্রিঃগে। আরুওয়ক থুঃওয়কতি ম্রাংখা নাংরো সিঃফুচাগা, আঃপুঃ রাক লাঃব্যা। য়াংপুয়েংঞ্যং যাখা নাংরো দিঃ প্রাসানা ফ্রইচাগো ম্রাংগেমি, য়াংখা সিকফুচাগা, থাওরা ফুরা ঈ নেংঙেংদ নেংমা লাঃব্যা। ঙা নাংরোগো আম্হেং প্ররি, যাখা দিঃচারো ফ্রইফুলি য়াংখালি দিঃ খঃমা তেঃকে লুঃউচা হ্রাং হিকফুসিঃ। গংখাংনা কাবা ছুংরো লাঃমি, য়িগিরি ঙাক চাঃগাচা তাসাকপেলুং হিকলিমি।
“নাংরো কংগং সিঃদিনা নিংগে, যাফুলিছুগি নাংরো চিইনুন্হুংচা আপ্যাকমা, আঃয়ঃমা অর ইংথংমা ন্হঃরো মিঃহিরাঅং। য়জংমুহুক্কি কৈং যাপুয়েং ব্রুং প্যাংরো পুয়িইরো লাঃরিলি, য়াংপুয়েং ব্রুং প্যাংরো থুউ রাকচা নাংরো আথাকমা প্রফুছুগি, দিঃ কাবামা হিকচা লুঃউম্যুও আথাকমা লাঃ ক্যাফু। সিঃদিনা নিংগে অর ছুউক তংফুচাগা, খ্যাংচাবাং ফ্রইলিইফি, য়াংচাগো রুওয়েং লাঃফু কিজু অর মনুসাওয়া সাঃদ হ্রিকগা লাঃরো রেঃনৈংঅং।”
য়াং আখিংমা যীশু নিংদৈং ওয়িপাসানা ক্যংমা সুয়েংসাং পিইলিরি, য়িগিলি নিংওয়ংখা প্রাংগা লাঃরো জৈতুং তংমা নিংরি। হিকচা আলুং লুঃউরোচা যীশু চাঃগাগো নাংথংফু কিজু কংগং চঃজগা ওয়িপাসানা ক্যংমা রককেতি।

සවන් දෙන්න লূক 21