Ɛnɛ́ Yésus la ɓayége ɓɛ́ɛ́ ɓá sīŋglé ɓɛɓɛ la Yelúsalɛm, bú pám ɓɛ́ɓɛ la Betfagéa, á ɔ́kolá ví tín ɛ́ Olíva. Váŋ nɛ̄ Yésus a óm ɓáyēge ɓɛ́ɛ́ bíɓáa, aá la ɓɔ́ nɛ́: «Kɛnán á ŋkɔŋ á lɛ́ ɔ́sū váná, la lí pám, miníg kɛ li kɔ́p lí m̀mín á jákāas á tíŋɛ, mɔɔ́n wɛ́ɛ̄ á ŋgwáāg yɛ́ɛ̄; tiŋlán wɔ́, miní sɔ́la ma wɔ́ la mɔɔ́n wɛ́ɛ̄. Ndí kíyáɓɛ́nɛ mut a ɓāt ɓɛ́nɛ jam, peelán nyɛ́ nɛ́: Nyɔ́ŋ-Ɛsáŋɛ́ a byɛ́ɛ́ kóó la mɔ́; á ékūyá-kúyá, ag kɛ ɓɛ́nɛ mɔ́ li mwahle.» Náŋ ag ɓɔŋɓɛ á li somo nɛ́ jam m̀pɔ́tle-a-Ɔlolómɛ̄ a pɔ́t lí yāl. A lagléé nɛ́:
«Laglán ŋgɔn ŋkɔŋ á Síon nɛ́,
Légɓé sig, káísa yɔɔ ɛg sɔ́le wa,
la esuhɛ-nyuú, á lóō lí m̀mín á jákāas
la á lóō lí mɔ́ɔ̄n wɛ́ɛ̄, mɔɔ́n tít nyí ɛ ŋga ɓɛ́gɛ ɓot.»
Ɓayége bú kɛ, bú ɓɔ̄ŋ ákaa Yésus a lagléé ɓɔ́. Bú sɔ́la m̀mín á jákāas la mɔɔ́n wɛ́ɛ̄, ámbúh náŋ bú táa mbɔ́tí yáɓá á lóō lí tít la Yésus ɔ tɔ́ɔ̄ yɔ á lóō. limut jé lílōm lú táa mbɔ́tí á nzen. Ɓáŋá ɓátām bú sɛ́m péná ɛ́ ɓɔ́ɔ̄n bí mícāā, bú táa yɔ̄ á nzen. Ɓot bí ŋgí wɛɛ ɔ́sū ví Yésus la ɓá bí oŋ nyɛ́ á mbúh bí ŋgí lón nɛ́: «Osána á Mɔ́ɔ̄n Dávid! Ndómbo ɛ ɓɛ́ la nyɔ́ a ŋga sɔ́ á jóō lí Nyɔ́ŋ-Ɛsáŋɛ́! Osána á loó-loó!» Eceg Yésus a níŋgí á Yélūsalɛm, tísɔn ɛsɛ̄ yú póghan. Ɓot bí ŋgí ɓat nɛ́: «Ɓaá, nzáá nyɔ̄ŋ é?» Limut lú pélē nɛ: «Yésus, m̀pɔ́tle-a-Ɔlolómɛ̄ nyɔ́ŋ, mbyááhɛ nyí tísɔn Názalɛt á Galiléa.»


Ámbúh, Yésus ɔ níŋgí á ndáá-ēcɛ́ŋ-Ɔlolómɛ̄, ɔ dúhú ɓot bísɛ bí ŋgí nuŋu la ɓá bí ŋgí sóm átē. Ɔ ɓōtlé li ɓɛ́h lí téɓeli á sí yí ɓáveŋghanɛ-mɔní, la aɓɛlá á ɓánuŋu aɓeŋ. Ɔ lāgá ɓɔ̄ nɛ́: «Yá ciiɓɛ́ nɛ́: ‹Ndáá yáma ɛg kɛ li yáŋlɛ nɛ́ ndáá mikánɛ› ndí ɓɛ́nɛ, maná yaanɛ́ yɔ lisɔlɓéné lí mítɔnɓa!» Múŋ átē á ndáá-ēcɛ́ŋ-Ɔlolómɛ̄, ɓot-bí-ndím la ɓá ɓá lɛ́mɛ á míkoo bú sɔ́ nyɛ á ŋgwáāg la nyɛ́ ɔ mānɛ́ ɓɔ. Ɓakanʼyɛ ɓatíi-nsúlé la ɓayí-mbéndá bú álá, ɛnɛ́ ɓá ɛ́n bínanaŋga bí mam Yésus a sɔ́lé lí ɓɔŋ, bú ámblé ki kaa ɓá ɓɔɔ́n bí ŋgí lón múŋ á ndáá-ēcɛ́ŋ-Ɔlolómɛ̄ nɛ́: «Osána á Mɔ́ɔ̄n Dávid!» La ɓɔ́ bú bíhī Yésus nɛ́: «Ɔg ámble ákaa bí ŋga lága é?» Ndí nyɛ́ ɔ lāgá ɓɔ nɛ́: «Ɔɔ, miní ɓáág ŋgí lí sɔ́ŋgɔ lí yé epah Lícii-Lipúán ɛ́ ŋga máŋa nɛ́: ‹Wa ɓōŋhán mínyu mí ɓɔ́ɔ̄n ɓátɔ̄ga la mí mí míkɛ̄gá mí ɓɔ́ɔ̄n nɛ mí lɔ́ŋghɛ́nɛ wā ŋgóso eɓégɛ!›» La nyɛ́ ɔ yíg ɓɔ̄ váŋ, ɔ pám á tísɔn li kɛ á Betánia, ápah a loohɛ́ɛ díɓe.


La kítí eceg Yésus a ŋgí timan á tísɔn, nzal yú byēé nyɛ. Ɔ ɛ́n tín ɛ fígiya á ŋgwáāg nzen, ɔ sīŋglé yɔ ɓɛɓɛ, ndí āh kɔ́p ɓé tɔ jam átē, amáh sig áwāā la awáá. Ɔ lāgá hɔ́ yɔ nɛ́: «Á m̀ɓá la m̀ɓá ɔ ŋgɔ́ wúm ɓé pɛ mitám!» Á ékūyá-kúyá, nyíŋ tín fígiya yu wú, yu óm nɛ́ kɛ́lɛ́t. Ɓáyēge bú nyág ɛnɛ́ ɓá ɛ́n náŋ, bú yó nɛ: «Láá yá ɓɔ̄ŋɓɛ́ nɛ á ékūyá-kúyá tín ɛ fígiya ya wú, yu óm ki nɛ́ kɛ́lɛ́t é?» Yésus ɔ pélē ɓɔ̄ nɛ́: «La mbálɛ, mag laga ɓɛ́nɛ nɛ́, kíyáɓɛ́nɛ ɔlɔ́ vá, maná ɓɛ́la ŋyéɓé ndí manáh ɓɛ́la ɓé péndan, amáh lí ɓɔŋ lí yé ma sɔ́le lí ɓɔŋ lí tín ɛ fígiya; miníg la li lagá lí ví ɔkolá nɛ́: ‹Ɓógó vá, kɛ̄n ɓɛ́hán á túwɛ›, náŋ ag ɓɔŋɓɛ. Kí maná ɓɛ́la ŋyéɓé, yé ɛ́sɛ miní ŋga kɛ́ li ɓat kí miníg kánɛ, miníg kɛ yɔ́ lí kuh.»


Eceg Yésus a níŋgí á ndáá-ēcɛ́ŋ-Ɔlolómɛ̄, ɓakanʼyɛ ɓatíi-nsúlé la ɓacɛ́ŋ bí lílōmɛ bú sīŋglé nyɛ ɓɛɓɛ kí ag yéglɛ, bú bíhī nyɛ nɛ́: «La jɔɔ́jɔ́ɔ likundɛ ɔ ŋgɔ ɓɔ̄ŋ míŋ mam é? Nzáá a tí wa nyíŋ kundɛ é?» Yésus ɔ pélē ɓɔ̄ nɛ́: «Mág mag ɓat ɓɛ́nɛ mbihi yāhya; kí maná pélē ma, mág mag kɛ ɓɛ́nɛ li laga la jɔɔ́jɔ́ɔ likundɛ mi ŋga ɓɔ̄ŋ míŋ mam mísɛ. Laglán ma, ɓaá nzoɓan nyí Yohánɛs ɛg sɔ́le la Ɔlolómɛ̄ tɔ nɛ́ la ɓot-bí-bínam é?» Bú dūtɛ́ míɔ̄ŋɔ, bú mɔg nɛ: «Kíyáɓɛ́nɛ ɓa lāgá nɛ, Ɔlolómɛ̄, ag ɓat ɓɛ́hɛ nɛ́: ‹Ányúū yéé hɔ́ manáh yéɓe ɓé la nyɛ é?› Ndí ki ɓa yó ki nɛ́, ɓot-bí-bínam, biíg nyɛɛ li nyɔŋ lí lítāt la limut, átɔm nɛ́ ɓot bísɛ ɓá nyɔ̄ŋ Yohánɛs kaa m̀pɔ́tle-a-Ɔlolómɛ̄.» Váŋ nɛ̄ ɓá pélē Yésus nɛ́: «Bi ŋgá yí ɓé ɓɛ́hɛ.» Nyɛ́g ɔ tímānɛ̄ ɓɔ nɛ́: «Tɔ mág mi ŋgá laga ɓé ma ɓɛ́nɛ la jɔɔ́jɔ́ɔ likundɛ mi ŋga ɓɔ̄ŋ míŋ mam.»

Yésus ɔ bíhī ɓakanʼyɛ ɓatíi-nsúlé la ɓacɛ́ŋ bí lílōmɛ nɛ́: «Miníg ɔ́ŋɔ láá la nyí pɔ́l é? Mut wa nyɔ́ŋ a ɓɛ́ɛ́la ɓɔɔ́n bí páam bíɓáa; ɔ sīŋglé nyɔ́ ɔsú á ŋgwáāg, aá la nyɛ́ nɛ́: ‹Á mɔ́ɔ̄n wama, ɔ kɛnɛg lɛn, ɔ sál á ǹdíí á bínyɛŋgɛ́n bí wáany.› Nyɔ́ŋ ɔ pélē nyɛ̄ nɛ́: ‹Mi ŋgá kɛ ɓé ma›. Ámbúh eceg náŋ ɔ téeŋgɛ́ nyɛ, ɔ tímān lí kɛ. Nyɔ́ŋ mut ɔ sīŋglé nyɔ́ a yáhɛ́ bíɓáa á ŋgwáāg, ɔ lāgá nyɛ̄ nlemlem á jam. Nyɔ́ŋ ɔ pélē nyɛ nɛ́: ‹Etāa mag kɛ›. Ndí, ámbúh eceg āh kɛ ɓé. Wɔɔ́wɔ́ɔ mɔɔ́n á póla ɓɔ́ bíɓáa a ɓɔ̄ŋ nsom á ɛ́sāŋɛ́ é?» La ɓɔ́ bú pélē Yésus nɛ́: «Nyɔ́ ɔsú.» Váŋ nɛ́ a lāgá ɓɔ̄ nɛ́: «La mbálɛ, mag laga ɓɛ́nɛ nɛ́, ɓakomanɛ-ŋkuh-á-gɔ́mna la ɓondígá bí ákwala, bíg kɛ li dúgu lí lí pám la ɓɛ́nɛ á Ékombo Ɔ́lolómɛ̄. Ákaa ɛ́sɛ, Yohánɛs Ǹtíi-nzoɓan a sɔ́ á yóg yaná ag étɛ nzen ɛ tɛ́ɛ́ sim, ndí ɓɛ́nɛ, manáh yéɓe ɓé nyɛ; á mveŋghanɛ́, ɓakomanɛ-ŋkuh-á-gɔ́mna la ɓondígá bí ákwala ɓɔ́ ɓá yéɓé nyɛ. Tɔ ámbúh li ɛ́n náŋ, manáh yíg veŋe ɓé bilɛ́m nɛ́ miní yéɓé la nyɛ́.»


«Ámblán ɔŋgaáŋgan vitám ví nɛ́: M̀wɛɛ́n sí a sáláá ǹdíí á bínyɛŋgɛ́n bí wáany, ɔ céŋ wɔ kɔ́tá, ɔ tím m̀ɓáláŋ á m̀ɓálá átē ányúū li pámɛ lí mílɔg, la nyɛ́ ɔ óŋ njóŋgi ányúū li tát lí ǹdíí wɛ́ɛ́. Ámbúh náŋ, ɔ yíglé ɓáɛŋ ǹdíí wɛ́ɛ́ la nyɛ́ ɔ kɛ́ á dúwɛ. Ɛnɛ́ éceg ɛ́ mpumu yá kɔlan, ɔ óm ɓáɓɔŋle ɓɛ́ɛ́ á yóg ɓaɛŋ nɛ́ bí sɔ́la nyɛ́ ɛ́jɛ̄ɛ̄ jóga. Ndí ɓaɛŋ bú byeé ɓáŋ ɓaɓɔŋle; bú úm wa bikút, bú ól nyɔ́ŋɔ́, nyɔ́ ntám bú ól nyɛ la ŋgɔg. Ɔ óm sīg-pɛ ɓaɓɔŋle ɓatám, ɔbul li loo lí ɓá bí ɔ́sū; ɓaɛŋ bú ɓɔ̄ŋ ɓɔ nlemlem á jam. Á mísúgle, ɔ óm ɓɔ mɔ́ɔ̄n wɛ́ɛ̄ la miɔ́ŋɔ nɛ́: ‹Bíg kɛ li ditɛ lí mɔ́ɔ̄n wama.› Ndí ɛnɛ́ ɓáɛŋ ɓá ɛ́n nyɔ́ŋ mɔɔ́n á páam, bú laglán nɛ: Ŋ̀yéglan-embámbá nyɔ́, sɔ́án! Bi ól nyɛ́, bi yéglán émbāmbá. Bú byeé nyɛ, bú pámɛ́ nyɛ á ǹdíí, bú ól nyɛ. Ɓaá, eceg m̀wɛɛ́n ǹdíí a ŋga kɛ́ li sɔ́, ag kɛ láá lí ɓɔŋ lí ɓáŋ ɓaɛŋ é?» Ɓakanʼyɛ ɓatíi-nsúlé la ɓacɛ́ŋ bí lílōmɛ bú pélē nyɛ̄ nɛ́: «Ag kɛ li ól lí bíŋ bíɓēɓéyɛ bí ɓáɛŋ ɛ́h ɓɛ́ ɓé ŋgɔ́ɔ́, la nyɛ́ á tí ɓaɛŋ ɓatám nsɔ́n á ǹdíí wɛ́ɛ́, ɓá bí ɓɛ́ bíg tíi nyɛ́ ɛ́jɛ̄ɛ̄ jóga kí éceg yá kɔlan.» Yésus ɔ lāgá ɓɔ̄ nɛ́: «Ɓaá miníh ɓáág ŋgí lí sɔ́ŋgɔ á Licii-lipúán nɛ:
ŋgɔg ɓaóŋ ndáá ɓá ɓen,
yɔ nɛ́ ya tímān lí ɓɛgɛ lí ndáá;
misɔ́n mí Nyɔ́ŋ-Ɛsáŋɛ́ míŋ:
Sē líŋgɔ̄ŋɔ́ á miíh máhá é!
Jɔ́ nɛ́ mi ŋga lága ɓɛ́nɛ nɛ́: Likanʼyɛ lí Ɔ́lolómɛ̄ líg kɛ ɓɛ́nɛ li nyɔŋɓɛ, la jɔ́ lí tíéɓɛ́ lilóm lí ŋga kɛ́ li tíi lí mítām. Nyɔ́ la nyɔ́ a ŋga kɛ́ li ɓɛ́han á lóō lí nyíŋ ŋgɔg, ag kɛ li búge; nyɔ́ ki ɛ ŋga kɛ́ li ɓɛ́han á lóō, ɛg kɛ nyɛ́ lí kɔgte.» Ɛnɛ́ ɓákanʼyɛ ɓatíi-nsúlé la Elōg-Falísái ɓá ámblé nyúŋ aŋgaáŋgan, bú sɔ́ŋtánɛ́ nɛ ɓɔ́ nɛ́ Yésus a ŋga pɔ́tle. Bú somo nyɛ́ li byee, ndí bú kɔ̄n limut woŋ; átɔm nɛ́ ɓot bí ŋgí nyɔŋ nyɛ́ kaa m̀pɔ́tle-a-Ɔlolómɛ̄.

සවන් දෙන්න Matéus 21