© 2021 Bible Translators of Ukraine © 2021 Pioneer Bible Translators This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/

Кана бут ко манушэндар ачиле тэ зачинэ дума пала кода, со стердапэ машкар амэн, и сар амэнди розпхэндэ мануша, савэ англунэ дивэндар дыкхле кода, со сля, тай терэнас бути важ Дэвлэхкэрэ Лавэ, тунчи и манди, пативало Феофило, авиля пэ гындо тэ розлэпэ дэ кодэлэ, со стердапэ англунэ дивэндар, тай екх пала аврэ тэ чинэ тути, соб ту тэ полэх, пэ скици исин чячюно сикляримо, саво ту прылилян.

Дэ кодыя вряма, кала Иродо сля тхагари дэ Иудея, джювда екх рашай, саво вджялас дэ рашаенгири группа, тев сля пхурэдэрэґа Авии. Лэ акхарэнас Захария, тай лэхкиря ромняґа сля Елизавета, манушни Ааронохкэрэ родостар. Вонэ лэдуй сле дэвликунэ мануша, и лэнгоро джювимо сля бидошакоро. И вонэ джювдэ пав Дэвлэ Раехкэрэ заповеди и пав дума Дэвлэхкири. Лэндэ на сля чяворэн, колэсти со Елизаветатэ на выджялас тэ авэ пхаряґа, и вонэ лэдуй сле дэ пуранэн бэршэн.
Екхвар поджиля вряма Захариясти рашаенца тэ лиджя бути англа Дэвлэ. Сар прылито сля рашаендэ, вонэ чутэ жребии, касти тэ джя дэ храмо, тай Захариясти выпэля тэ заджя дэ храмо Раехкоро и тэ ваздэ тхув. Дэ кодыя вряма, кала Захария ваздэлас тхув дэ храмо, всавэрэ мануша мангэнаспэ аври, дэ грэда. Тунчи сикавдапэ Захариясти Раехкоро ангело, пав чячи риг жэртвенникостар, пэ савэ ваздэнас тхув Дэвлэсти. Кала Захария удыкхля ангело, дэня пэ лэстэ дар, и затинисиля даратар лэхкоро їло. Ангело пхэнда лэсти:
— На дар, Захария! Шунда Дэвэл мангимо тиро, тай ромни тири, Елизавета, бэнёла тути чявэ, и дэґа лэсти лав Иоанно. Тиро їло авэла бахтало баря лошатар, и Иоаннохкэрэ бэнимасти лошавэна бут мануша. Авэла вов барэ манушэґа англа Рае: на пэла мол и мортхали тай Свэнтонэ Фаноґа авэла пхэрдо инте тала дакэрэ їлэ. Бутэн манушэн дэ Израили вов рисарэла Раестэ, лэнгэрэ Дэвлэстэ. Вов джяла англа Рае, тай Ильяхкэрэ фано и зор авэна пэ лэстэ, и вов рисарэла дадэнгэрэ їлэ лэнгэрэ чярэндэ, тай накандунэн рисарэла свэнтонэ годятэ, тай лачярэла манушэн, соб тэ авэн вонэ англа Дэвлэ.
Захария пхэнда ангелости:
— Сар манди тэ патя кадэлэсти? Мэ пхуро, тай ромни мури дэ пуранэн бэршэн.
Ангело пхэнда лэсти:
— Мэ Гавриило, саво ачел англа Дэвлэ, тай бичалдо тэ дэдумэ туґа и тэ розпхэнэ тути пала када вса. Акэ, ту авэґа лало и ни екх лав на пхэнэґа ды кодэлэ, сар вса стерэлапэ. Кодэлэсти со ту на патинян мурэ лавэсти, пав савэ стерэлапэ вса дэ пэхкири вряма.
А мануша дожутярэнас Захария аври тай на полэнас, сости вов на выджял храмостар скици вряма. Кала вов выджиля храмостар, тунчи на сґалювда тэ выпхэнэ ни екх лав, нэ кици сикавэлас вастэнца, сар лало. Тунчи мануша полиле, со Дэвэл сикавда лэсти вари-со дэ храмо.
Ай кала проджиля лэхкири вряма тэ лиджя бути дэ храмо, Захария рисиля цэрэ. Проджиля набут вряма, и Елизавета, ромни лэхкири, ачиля пхари тай гаравэласпэ манушэндар панч чён. Тай пхэнэлас:
— Со терда манца Рай? Вздыкхляпэ пэ ман! И слиля ладжявимо мандар англа манушэн!

Пэ шовто чён, сар Елизавета ачиля пхари, ангело Гавриило сля бичалдо Дэвлэстар дэ форо Назарето, саво ачел дэ пхув Галилея, чятэ, савя акхарэнас Мария, пала савя дэне лав тэ отдэ ла пала Иосифо Давидохкэрэ родостар. Ангело авиля латэ тай пхэнда:
— Лошав, бахтали! Рай исин туґа!
Вой на полиля, со када терэлпэ тай сар тэ полэ лэхкэрэ лава. Ангело пхэнда лати:
— На дар, Мария! Дэвэл дэня тути бахт бари! Акэ, ту авэґа пхари тай бэнёґа Чяворэ, и дэґа Лэсти Лав Исусо. Вов авэла баро, тай Лэ авэна тэ акхарэ Барэдэрэхкоро Чяво. Дэвэл Рай дэла Лэсти троно, пэ савэ бэшэлас тхагари Давидо, дад Лэхкоро. И авэла Вов Тхагари дэ родо Иаковохкоро, и Тхагаримо Лэхкоро никала на пэрэачела.
Мария пхучля ангелостар:
— Сар откада вса авэла, кала мэ чей и муршэ на джянав?
Ангело пхэнда лати:
— Свэнто Фано сджяла упрал пэ тут, и зор Барэдэрэхкири ушарэла тут. И кодэлэсти Свэнто, Саво бэнёлапэ, акхарэлапэ Дэвлэхкэрэ Чявэґа. Акэ и Елизавета, тирэ родостар, пэ савя пхэнэнас «бичяворэнгири», шовто чён, сар ачиля пхари дэ пуранэн бэршэн. Акэ, важ Дэвлэ нэнай нисо, соб Вов тэ на стерэл!
Тунчи Мария пхэнда:
— Дэвэл — муро Хулай, мэк авэла вса, сар ту пхэндан.
Тай отджиля латар ангело.

Проджиля набут вряма, и Мария стидэняпэ тай сигэдэр джиля дэ форо Иудеенгоро, саво ачелас машкар плаен. Тай авиля дэ цэр Захариястэ и наисардапэ Елизаветаґа. Кала Елизавета шунда лакэрэ лава, подхукля чяворо тала лакэрэ їлэ, и пэ Елизавета сджиля Свэнто Фано. Вой ваздэня пэхкоро ґласо тай пхэнда:
— Бахтали ту машкар джювлен, тай бахтало Чяворо, Савэ ту пхиравэх тала тирэ їлэ! Пала со манди кадыя бахт, со авиля мандэ Мурэ Раехкири дэй? Кала ашундом тиро ґласо, тунчи ваздэняпэ чяворо дэ мурэ їлэ лошаґа. Бахтали ту, колэсти со патинян и Раехкэрэ лавэсти и со авэла кади, сар Вов пхэнда!
И пхэнда Мария:
— Ашарэл Рае води муро,
и лошавэл фано муро англа Дэвлэ мурэ,
Саво фирисарэл ман.
Вов удыкхля ман,
бутярня, сави нисо на ачел,
и акана всавэрэ родуря пхэнэна,
со бахтали мэ,
кала шунэна, со Дэвэл Зорало
стерда важ ман кадэва баро рындо.
И свэнто исин Лав Лэхкоро!
И родонэндэ, савэ полэн и трашан Лэстар,
Вов обрисявэл ковло їло Пэхкоро!
Барэ рындуря стерда Вов зоралэ вастэґа,
розпхагля дрома пхутимаренди.
Вов счута раен лэнгэрэ трононэндар
и ваздэня упрэ чёрэн,
бокхалэн чялярда лачимаґа,
ай барвалэн мукля шушэ вастэнца.
Авиля Лэсти пэ гындо
тэ подрицарэ Израиле,
бутярнэ Лэхкэрэ,
сар дэня Вов лав амарэ дадэнди,
Авраамости тай лэхкэрэ родости пэ всавири вряма.
Мария просля латэ пашэ трин чён тай рисиля цэрэ.

Тай авиля вряма Елизаветати тэ бэнё, и вой бэня чяворэ. Пашунэ мануша и родо лакоро шундэ, сар Рай дэня лати баро лачимо Пэхкоро, тай лошавэнас їтханэ лаґа. Пэ охто диво авиле вонэ тэ обчинэ чяворэ, и камле тэ дэ лэсти лав Захария, кади, сар акхарэнас лэхкэрэ дадэ. Нэ Елизавета, лэхкири дэй, пхэнда:
— Нат, дэн лэсти лав Иоанно.
Пхэндэ лати:
— Ника дэ тумаро родо кади на акхарэн!
Тай пхученас вастэнца лэхкэрэ дадэстэ, Захариястэ, камле тэ уджянэ лэстэ, сар вов камэл тэ акхарэ чяворэ. Захария помангля сандёры важ лилэн тай чинда упрал: «Лэсти лав Иоанно». Всавэрэ прылиле када пала дыво. Тунчи отмукля лэсти муй и чиб, и вов ачиля тэ дэдумэ тай тэ ваздэ слава Дэвлэсти. И всавэрэн пашунэн облиля бари дар, и када вса розджиляпэ пав всавири Иудея плаенгири. Мануша, савэ шундэ вса кода, пхученас еджинэ пэстэ:
— Каґа дурэдэр авэла кадэва чяворо?
И Раехкоро васт сля пэ чяворэ.

Ай Свэнто Фано сджиля пэ Захария, Иоаннохкэрэ дадэ, и вов ачиля тэ дэдумэ Дэвлэстар:
— Тэлював англа Тут,
Бахтало Рай, Дэвэл Израилехкоро!
Ту авилян Тирэ манушэндэ
тай фирисардан лэн.
Ваздэня важ амэн Фирисаре
цэрэстар, савэстар исин Тиро бутярно Давидо,
зрицардан Тиро лав,
саво Ту пхэнэґас
дэ думутни вряма
Тирэ свэнтонэ англунаренца,
со фирисарэґа амэн врыжымашэндар,
кодэлэндар, савэ вурыцён амэндар.
Вов сикавда ковло їло Пэхкоро
амарэ дадэнди
тай на бистарда, со спхангля лэнца Еджино Пэ
Свэнтонэ заветоґа.
Солаханя Вов Авраамости,
амарэ дадэсти,
со фирисарэла амэн врыжымашэндар,
соб амэ битрашакаро
тэ терах свэнто бути англа Лэстэ,
соб тэ авэл амаро джювимо свэнто тай чячюно
англа Лэхкоро Муй всавэрэ бэрша амарэ.
И тут, чяворо, акхарэна Барэдэрэхкоро англунари,
колэсти со ту джяґа англа Рае
и лачярэґа Лэсти дром,
и тховэґа Лэхкэрэ манушэнди дэ гындо,
со Дэвэл злэл лэндар бэзимо
и фирисарэла лэнгэрэ водя.
Пэхкэрэ ковлэ їлэстар
Дэвэл бичалэла амэнди Кхам,
Саво ваздэлапэ дэнзор,
и манушэнди, савэ мэрэн дэ калима,
дэла одуд
и сикавэла амэнди дром,
саво анэл пачя.
Ай чяворо барёлас, тай фано лэхкоро ачелас зорало, и сля вов дэ шуки пхув ды кодыя вряма, кала трэбуни лэсти сля тэ сикавэпэ манушэнди дэ Израили.

සවන් දෙන්න Лукатар 1