San Bible Protestant Edition © Bible Society of Burkina Faso, 2011.

Min tɛnɛn nə́ bɔ Zudee gána nɛ ǹ nə́ daa Antiɔsi kiwi. Maǹ Lawa-nyankɔlen darɛɛ mà bɛ̀ ǹ nə n dinin kuru á kɔnpɛ ka Muizu a dí-pɛn kɛn nɛ wa, mà ǹ ba boe la ǹ kirisibaa wa. Á n baa zia lɛa, liere gigiã wɔ Pooli laanka Barnabaasi biin ni ka bɛa minin kɛn lɛn nɛ. Ǹ nə́ tɔ́n pɛ mà Pooli ni ka Barnabaasi ni ka Antiɔsi min kɔsɔn dɔn nɛ, mà ǹ wo Zeruzalɛmu kiwi, dia dí-a wolen laanka nyɛɛnaandɛnan li, bɛa zia kɛ lɛ a boo ganaa.
Lawa a sɔmɔ minin nə́ ǹ zii tɔ-we sii yɔrɔ bɔ. Ǹ bɛ́ kiɛ̃ Fenisii gána nɛ ka Samarii gána nɛ, ǹ nə́ tɔrɔ kɔsɔn golee Lawa li kɛ boo da, á foo kɔɔ̃nbaa da dɔɔ̃nɔn tumaa ganaa parsiini. Ǹ bɛ́ ǹ nə́ dɔ Zeruzalɛmu, Lawa a sɔmɔ minin ni, dia dí-a wolen ne, ka nyɛɛnaandɛnan nə́ n da ǹ lɛ sɔnbɔraanɛ. Lawa dí mɛn tumaa nya ǹ gɔn, ǹ nə́ bɛ yii laakalaa ǹ nɛ. Sɛnɛ, Lawa-nyankɔlen lɛn mɛnɛn nə goã *Fariziɛ̃n lɛa lɛlɛ, bɛn kɔnɔn nə́ n lɛ bũ ǹ nə́ pɛ: «Ka doamaa nɛ ka tɔrɔ kɔsɔn lɛn kuru, ka pɛ ǹ nɛ mà ǹ kɔ Muizu a dí-pɛn lɛn lɛ.»

Dia dí-a wolen laanka nyɛɛnaandɛnan nə́ n lɛ sɔkɔn, ǹ nə́ bɛa boo kɛ lɛ sɔsɔ̃ ǹ nə́ ga a ganaa. Liere lɛ bɛ́ á sasa kɔ, Piɛrɛ nə́ n lɛ bũ á pɛ: «Ma dɔɔ̃nɔn lɛn, táa ka á doɛ̃ mà Lawa na á masɛ bɔ ka bii a giala koe li, màn mɛn bɛ́ toɛ, ma boo tii kɔɔ̃n pɛ tɔrɔ kɔsɔn manɛ, ǹ lɛ kɔ a ganaa ǹ golee Yezu li. Lawa mɛn bɛ́ min tumaa foo doɛ̃, a din na á nyaa mà asɛ lɛ kɔ tɔrɔ kɔsɔn ganaa, a giala á Yiri Fu kɔ ǹ la, ka a bɛ́ á kɔ wɔsɛn dɔn la lɔn. Lawa bɛa tɔrɔ kɔsɔn kɛn lɛn bɔ kɔn lɛ ka wɔsɛn nɛ wa. Ǹ dɔn bɛ́ ǹ nə́ goleemali kɛ wɔ, Lawa nə́ ǹ foo pii. Bɛ lɛ tɔ ganaa, a ba siĩni wɔsɛn nə wɔ Lawa lon wa. Wɔsɛn dinin laanka wɔ digolon bɛ́ wɔ boo la wɔ́ guĩ mɛn gũ wa, wɔsɛn ba siĩni wɔ bɛ da tɔrɔ kɔsɔ Lawa-nyankɔlen kɛn mìi-n wa. Sɛnɛ, wɔsɛn tá doɛ̃, wáa a din Dɛnaa Yezu lɛ a bǐɛ̃baa a lɛa nɛ, wɔsɛn nə́ kirisibaa yɛ, ka minin kɛn lɛn dɔn bɛ́ lɔn.»
Zaman lɛ tumaa golee ka kiĩni, ǹ nə́ n too kɔ Barnabaasi laanka Pooli lon. Lawa kaãbaa ǹ sii dadaran mɛnɛn zɛnaa ǹ gɔn tɔrɔ kɔsɔn gána nɛ, ǹ nə́ bɛn laakalaa.
Ǹ bɛ́ ǹ nə́ boo da ǹ nə́ nya, Zaaki dɔ tɔ́n nə́ n lɛ bũ á pɛ:
– Ma dɔɔ̃nɔn lɛn, ka n too kɔ masɛ lon. Lawa din nə saa lɔn a giala koe li, á minin bɔ tɔrɔ kɔsɔn bii, á ǹ baa a din wɔn lɛa, Simɔn na á wusoo á wɔsɛn yiri da bɛ lɛ nɛ. Bɛa sii kɛ lɛ din nə kɔnpii ka Lawa a boo gii-dalin boo ne, a giala a tá kiɛ̃ nɛ:
Lawa pɛ:
«Bɛa sii kɛ lɛ kio, ma á re die,
Davida tɔrɔ minin mɛnɛn bɛ́ ka kion kaa wole bɛ́ lɔn,
ma á re wusii ma ǹ saa ma ǹ da lon.
Bɛa kion kɛ lɛ a kɛ-bɔlɔ mɛn goã,
ma á re wusii ma bɛ dɔ, ma da lon.
A kũ bɛ lɛ ganaa kəni,
min gialakunun kɛn tá re giɛ ma li,
tɔrɔ gialakunun mɛnɛn tumaa bɛ́ ma tɔ nə ǹ ganaa.
Masɛ din Dɛnaa lɛ n pii miɛ̃,
masɛ mɛn bɛ́ má bɛa siin kɛn lɛn yɔrɔ bɔ
má koa haalɛ lɛlɛ-lɛlɛ.»
Masɛ Zaaki n taasɛ: Tɔrɔ kɔsɔn mɛnɛn nə n bɔyaa ǹ nə́ koe Lawa lɛ, nɔmaa baran n da ǹ mìi-n wa. Ka daa wɔ sɛ́wɔ kiɛ̃ kooro wɔ pɛ ǹ nɛ, mà ǹ nə n na ǹ nə n bɔ dì wúlu-bɔ ǹ siĩn ganaa, ka naarɛbaa nɛ, ka tɔɔ bɔlɔ-yui wole siĩn ni, ka màn mà nɛ. Sonbore, a kũ biikoo sɔsɔɔ ganaa, Muizu a dí-pɛn lɛn laakalaalin tá kiwi din tumaa nɛ, a giala, ǹ tá a sɛ́wɔ lɛ pii *susu ǹ pii tumaa li lɛsɔkɔn kionən ne.

Dia dí-a wolen lɛn laanka nyɛɛnaandɛnan lɛn nə́ kɔnwɔ ma ka Lawa a sɔmɔ minin lɛn nɛ, ǹ nə́ golee li, ǹ nə́ minin bɔ ǹ dinin bii, ǹ nə́ ǹ dia Antiɔsi kiwi, kun ka Pooli ni ka Barnabaasi ni. Bɛa minin lɛn, Zudaasi ni, ǹ nə́ bíi Barsabaasi, ka Silaasi ni, min yii guguru-an manɛ ǹ dɔɔ̃nɔn bii. Ǹ nə́ tɔ́n sɛ́wɔ kɛ kɔ ǹ la a n kiɛ̃-n kɛnɛn:
«Dɔɔ̃nɔn lɛn, kasɛn mɛnɛn bɛ́ tɔrɔ kɔsɔn lɛa, ka golee Lawa li, ka n Antiɔsi kiwi ka Siirii laanka Siliisii gána nɛ, wɔsɛn dia dí-a wolen ne, nyɛɛnaandɛnan nɛ, ka Lawa-nyankɔlen tá fòo diɛ ka nɛ.
Wɔ́ ma mà minin kɔnɔn nə́ bɔ wɔ li ǹ nə́ daa ka yiri lɔlɔkɔn ka ǹ daraan nɛ. Wɔsɛn nə ǹ dia wa. Wɔ́ golee li kun, wɔ́ minin bɔ wɔ́ á ǹ diɛ ka li. Ǹ tá die kun ka wɔ dɔɔ̃nɔn kɛn nɛ, Barnabaasi-n ka Pooli ni, min mɛnɛn bɛ́ ǹ nə́ n dinin kɔ wɔa Dɛnaa Yezu *Krita kɛ tɔ a lɛa. Wɔ ǹ Zudaasi laanka Silaasi diɛ wáa ǹ siin kɛn pɛ ka nɛ ka ǹ lɛ nɛ.
Sonbore, Lawa a Yiri Fu laanka wɔ dinin man wɔ́ golee li, wáa wɔsɛn ba guĩ kɔsɔ diɛ ka mìi-n wa, bɛ̀ á n bɔ siin mɛnɛn bɛ́ wɔ a n boe li doɛ̃ wa. Dì wúlu-bɔ ǹ siĩn kɛn, ka n na ka n bɔ bɛn ganaa, ka màn mà nɛ, ka tɔɔ bɔlɔ-yui wolen siĩn ni, ka naarɛbaa nɛ. Bɛ̀ ka á bɛa siin kɛn toɛ walan sɔnbɔraanɛ, á die bǐɛ̃ koe taãn-taãnɛ.
Wɔsɛn boo yii n ka bɛ nɛ.»
Ǹ nə́ zii kɔ zii tɔ-wɔlen lɛn la ǹ nə́ woo Antiɔsi kiwi. Ǹ bɛ́ ǹ nə́ dɔ, ǹ nə́ Lawa-nyankɔlen lɛn tumaa lɛ sɔkɔn, ǹ nə́ sɛ́wɔ lɛ kɔ ǹ la. Ǹ bɛ́ ǹ nə́ pɛ, ǹ foo kɔɔ̃n kɔ, a giala, á foo-basiɛ̃ kɔ ǹ la. Zudaasi laanka Silaasi bɛ́ Lawa a boo gii-dalin lɛa, ǹ nə́ biikoo gigiã saa ǹ nə́ boo da ǹ nɛ, ǹ nə́ n dɔ ǹ lɛ, ǹ nə́ ǹ foo taã. Ǹ nə́ lɛawaa kɔ́n zɛnaa ǹ li, bɛ kio, dɔɔ̃nɔn lɛn nə́ ǹ da zii, ǹ ná a nyankɔ mà Lawa zii fore ǹ ne. Ǹ dɔn nə́ wusoo ǹ nə́ woo ǹ dia wolen li. [ Silaasi sɛ mà asɛ tá li a giã walan, sɛnɛ Zudaasi sɛ woo.]
Pooli laanka Barnabaasi sɛ goã Antiɔsi. Ǹ nə́ goã minin darɛɛ, ǹ nə́ Dɛnaa a boo tii kɔɔ̃n kɛ pii kun ka min gigiã kɔsɔn nɛ.

Biikoo kɔ́n bɛ́ á kiɛ̃, Pooli pɛ Barnabaasi ni: «Wɔsɛn nə Dɛnaa a boo tii kɔɔ̃n lɛ pɛ kiwin mɛnɛn nɛ, daa, wɔ wusoo wɔ wo walan, wɔ n yii kɔ bɛa dɔɔ̃nɔn lɛn li, wɔ ǹ tɔ wɔ ǹ gɔn dɔ̃.»
A na á goã Barnabaasi gɔ́ɔ̃ nɛ a wo ka Zaã dɔ nɛ, ǹ bɛ́ ǹ mɛn bíi Marki. Sɛnɛ, Pooli sɛ, mà min mɛn bɛ́ á n na á n bɔ ǹsɛn ganaa Panfilii gána nɛ, a ná a dí lɛ nya kun ǹsɛn nɛ wa, mà bɛa dɛnaa a koe masɛ lɛ wa. Á liere baa ǹ bii ni taãn-taãn nɛ, didie nɔmaa á woo a wɔa paǹ li. Barnabaasi Marki kũ ǹ nə́ tà kuru ǹ goo saa ǹ nə́ woo Siipri. Sɛnɛ, Pooli sɛ Silaasi kũ á da kun a din ni. Dɔɔ̃nɔn ná a sii toa Dɛnaa gɔn, yǎa ǹ zii kɔ la á woo. Á Siirii gána wɔsɔ ka Siliisii gána nɛ, á Lawa a sɔmɔ minin foo taã mà ǹ goã golee Lawa li gɔ́ɔ̃ nɛ.

සවන් දෙන්න NDS 15