<div class="version vid2848 iso6393cce" data-vid="2848" data-iso6393="cce">
 <div class="book bkGEN">
 <div class="chapter ch31" data-usfm="GEN.31">
 <div class="label">31</div><div class="s">Jakobe e pfhuka ka Labhani</div><div class="p"> 1Sekoko Jakobe a to engisa mapswi a vanana va Labhani va nga ti ti kha vona:</div><div class="p">&#8220;Jakobe a tekile sotshe si i nga ti sa tate wathu, wotshe#31:1 Mwendo: thomba. wudhumo.&#8221;</div><div class="p"> 2Ngu kuwona khohe ya Labhani, Jakobe a ti woni kambe ti to Labhani khaswi a txi mtsakela kufana ni kale.</div><div class="p"> 3 Mkoma Txizimu a wombile ka Jakobe, a txi khene:</div><div class="p">&#8220;Tshumela u txi tsula ditikoni ka vatate vako, mwani kwanu, ani ni na va ni nawe.&#8221;</div><div class="p"> 4Sekoko Jakobe a to ruma vathu veya dhana Rakeli ni Leya, va txi ta thembweni amu a nga ti dyisa kona mitxhambi yakwe ya sifuyo, 5a to ta va gela tiya:</div><div class="p">&#8220;Ni wona ti to tate wanu khaswi a txi ni tsakela kufana ni kale, aniko Txizimu txa tate wangu txi ni nani.&#8221; 6Anu ma tiziva ti to ni mthumete tate wanu ngu wotshe mtamo wangu. 7Tate wanu a ni kanganyisile e txitxa muholo wangu digumi da sikhati, aniko Txizimu kha txa mtumetisa ti to e ni mahela kubiha. 8Mbimo yi ene a nga ti ti khene:</div><div class="p">&#8220;Sotshe sihari si i ku sa matshakatshaka si na va muholo wako,&#8221; sekoko yotshe mitxhambi yi ti ti veleka vanana va matshakatshaka; ngako a txi womba ku khene:</div><div class="p">&#8220;Asi i ku sa madhowo a misesa, si na va i di muholo wako,&#8221; konako sotshe sihari si ti ti veleka vanana va matshakatshaka. 9Txizimu txi tekile mtxhambi wa tate wanu, txi txi ni ninga.</div><div class="p"> 10Ditshiku dokari, da mbimo yi sihari si landelanako, ni lorile, ni txi gula maso, ni wona ti to vamatune va va nga ti landela mikati i ti va misesasesa, ni va matshakatshaka ni va mavalavati. 11Ngelozi#31:11 Ti womba ku txitukutyani. ya Txizimu yi ni gete ngu mloro yi txi kha yona: &#8220;Jakobe!&#8221; Se ani ni xamute ni txi khani: &#8220;Ni ho hawa!&#8221; 12Ngelozi yi txi kha yona: &#8220;Gula maso ako konkuwa u wona taku, votshe vamabhongwe va landelako mikati mba matshakatshaka, mba sidokhodokho, ni sibawa, nguko ani ni woni totshe ti Labhani a nga ti maha kwako. 13#Wona ni ka: Gen. 28:18. Ani ngani Txizimu txa Bheteli, ahale u nga thela mafura ka phande u ni mahela txixambanyo. Konkuwa khukha, huma ka ditiko diya u txi tshumelela ditikoni mu u nga velekelwa kona.&#8221;</div><div class="p"> 14Sekoko Rakeli ni Leya va mxamute va txi kha vona:</div><div class="p">&#8220;Ina athu hi ngadi ni thomba nyumbani ka tate wathu kani? 15Ene a pimisa ti to athu hi vanyamthuvo, nguko a hi xavisile, ngu msana a txi dya male yathu kambe. 16Nguko, yotshe thomba yi Txizimu txi nga yi thavisa ka tate wathu, njathu ni vanana vathu. Ngu mhaka yeto, awe maha totshe ti Txizimu txi nga kugela.&#8221;</div><div class="p"> 17Sekoko konako Jakobe a to khukha, e gadhisa vanana vakwe ni vasikati vakwe, ha ka makamelu. 18A txi gola wotshe mtxhambi wakwe wa sifuyo, ni sotshe simaha si si nga ti mlumba, wotshe mtxhambi wu i nga ti wakwe, awu a nga ya wu mana ditikoni ka Padhani-Aramu e tsula ka Isaake tate wakwe, ditikoni ka Kanana. 19Ngako Labhani a nga ti tsute kuya kaya tinvuta takwe, Rakeli a to sala e pa sithombe si si nga ti lumba tate wakwe. 20Jakobe a to kanganyisa Labhani Muaramu, a sikombi ti to a lava kuthava. 21Ene a sikotile kuthava ni sotshe si a nga ti naso, e tsula, e tshawunyeta mnambo wa Ewufrate, a txi ya mmangoni ka Galahadhi.</div><div class="s">Labhani e londeta Jakobe</div><div class="p"> 22Ka ditshiku da wuraru, Labhani a to ziviswa ti to Jakobe a thavile. 23Sekoko ene a to teka vanawe, e mlondeta amu ka mtxhanu wa masiku ni mambidi a kutsimbila, eya mmanela mmangoni ka Galahadhi. 24Txizimu txi to endela Labhani, muaramu ngu mloro wa wusiku, txi txi m'gela tiya:</div><div class="p">&#8220;Ti wonele, u nga thuke u txi womba txilo ka Jakobe, mwendo txo biha, mwendo txa txinene.&#8221;</div><div class="p"> 25Labhani a to hoka hafuhi ka Jakobe, mmangoni ka Galahadhi, ahawa a nga ti gwimbile kona ditenda dakwe Labhani, ni va ka kwawe, a to gwimba ditenda dakwe nene kona mmangoni ka Galahadhi.</div><div class="p"> 26Sekoko Labhani a to womba ka Jakobe a txi khene:</div><div class="p">&#8220;Njitxani u nga maha ngu ku ni kanganyisa, u txi teka vanana vangu va mahorona nga tikhumbi ta ku ti mana yimbini, kani?&#8221; 27Ngu kutxani u txi maha ngu kupfhuka, u txi ni kanganyisa, u si ni zivisi, kasiku hi salisana ngu litsako, hi txi embelela tindando, ni kupeka tingoma, ni kuveta sitende, kani? 28Kambe khwa ni leka ni txi pswopswa vanana vangu ni vatukulu vangu. Ngu ditshuri, ati u nga ti maha nda wuphukuphuku! 29Ani ni ni mtamo wa ku kutsayisa, aniko Txizimu txa tate wako, ka wona wusiku wu wu nga pinda, txi ni gete tiya: &#8220;Ti wonele, u nga wombe txilo ka Jakobe, hambi txo biha, hambi txa txinene.&#8221; 30&#8220;Konkuwa, wa tsula, nguko i kale u txi xuva kutsula m'tini ka tate wako: Kambe ngu kutxani u txi pa sizimu sangu, kani?&#8221;</div><div class="p"> 31Sekoko Jakobe a to xamula ka Labhani, a txi khene:</div><div class="p">&#8220;Ani ni ti ko thava ti to u nga ni tekela vanana vako. 32Kasi awule u no mmana a di ni sizimu sako, kha na mbi hanya. Kona hawa masoni ka vanathu, wonisisa atxi txi kulumbako, na txi di ni nani, txi teke.&#8221; Kha ditshuri Jakobe a ti si ti zivi ti to Rakeli a pite sizimu sa tate wakwe.</div><div class="p"> 33Sekoko Labhani a to ya lava ditendani ka Jakobe, ngu msana eya lava ditendani ka Leya, ni matendani ka sithumi simbidi, aniko kha mana txilo. Ene a to huma ngu ditendani ka Leya, eya wulela ditendani ka Rakeli. 34Nguko, Rakeli a ti tekile sithombe sa tate wakwe, e si fenengeta ngu txigabhata txa dikamelu, e khalahatsha txitimwi ka txona. Labhani a guluwutile ka otshe matenda kambe kha mana txilo. 35Rakeli a to womba ka tate wakwe, a txi khene:</div><div class="p">&#8220;U nga pandiseke tata, ngako ni si khukhi ni txi ema masoni kwako, no va ni tshiku ya ti tathu vavasikati.&#8221; Labhani a lavisisile kotshe, kambe kha si mana sithombe.</div><div class="p"> 36Sekoko Jakobe a to henya e phikizana ni Labani. Se a to womba Jakobe ka Labhani, a txi khene:</div><div class="p">&#8220;Ngu wuhi mnandu wangu, ngu txihi txionho txangu, eko u zako u txi ni londeta, kani? 37U guluwutile ka sotshe simaha sangu. Ina u mani tximaha txokari txa nyumbani kwako, kani? Txi veke kona hawa, masoni ka vanathu ni masoni ka vananu, ti to vona va na hi lamula athu va vambidi. 38Nguko ni zumbile ni nawe mndani ka magumi mambidi a malembe, kambe tinvuta tako ni tiphongo tako kha ta txhisa, hambi ani kha na dya sinvutana sa mtxhambi wako. 39Kha na ku wuyisela sifuyo si so dawa ngu sihari sa txitinga, aniko ani ngani ni nga dihela kupwateka ka sona, awe u ni dihisile kambe asile si nga piwa ni mitshikari, ni sile si nga piwa ni wusiku. 40Ni mitshikari ni ti ti hiswa ngu lisani, ni wusiku ni ti ti pekwa ngu pheho, ni wukohe ni si wu mani. 41Ni thumile magumi mambidi a malembe m'tini kwako. Ni kuthumete digumi da malembe ni mune ngu mhaka ya vanana vako va vambidi, ni mtxhanu wa malembe ni dimwedo ngu mhaka ya mtxhambi wako, kambe digumi da sikhati awe u txitxile muholo wangu.</div><div class="p"> 42I ti ku Txizimu txa tate wangu, Txizimu txa Abrahamu, a txi Isaake, tate wangu, a txi thavako, txi ti si nga ni nani, awe nga u di ni humisile walo ni si nga ni txilo. Aniko Txizimu txi woni mikaralo yangu, ni mithumo ya manza angu, se hamnova txi ku kawukile.</div><div class="s">Jakobe ni Labhani ve maha txitumelelano</div><div class="p"> 43Sekoko Labhani a xamute ka Jakobe, a txi khene:</div><div class="p">&#8220;Vanana vava va txisikati mbanana vangu, vanana vawe mbatukulu vangu, mtxhambi wuwa mbwangu, sotshe siya u si wonako nzangu. Se ni nga maha txani nyamsi ngu vanana vangu ni vatukulu vangu, ava vona va nga va veleka kani?&#8221; 44Konkuwa, ngono hi ta maha txitumelelano, ani ni nawe, atxi txi no fakaza hagari kwangu ni nawe.</div><div class="p"> 45Sekoko konako, Jakobe a to teka dirigwi e di emisa, di ti maha txialakanyiso. 46Se Jakobe a to womba ka vanawe, a txi khene: &#8220;Sengeletelani marigwi.&#8221; Vona va to rolela marigwi, va txi maha mmumbu ngu ona, va txi dyela Txitimwi ka wona. 47Labhani a to raya wukhalowo ditina daku i Jegari-Sahadhuta, ani Jakobe a to wu raya ditina daku i Galedhi. 48Sekoko Labhani a wombile, a txi khene:</div><div class="p">&#8220;Mmumbu wuwa kukhukhela nyamsi wu na va fakazi hagari kwangu ni nawe.&#8221; Ngu mhaka yeto wukhalo wule a wu dhani ku i Galedhi. 49Awu rayilo kambe ditina daku i Misipa, nguko a ti khene:</div><div class="p">&#8220;Mkoma a nave muwoneleli hagari kwangu ni nawe, ngako hi txi hambana mmwani ni mmwani.&#8221; 50&#8220;Ngako u txi xupha vanana vangu, kambe ngako u txi teka vamwani vasikati, hahanze ka vanana vangu, hambiko ku si nga ni m'thu hagari kwathu, ti zive ti to Txizimu i fakazi hagari kwangu ni nawe.&#8221;</div><div class="p"> 51Labhani a to womba kambe ka Jakobe, a txi khene: &#8220;Wona mmumbu wuwa ni dirigwi diya, ni ngadi emisa hagari kwangu ni nawe. 52Mmumbu wuwa i fakazi, dirigwi diya i fakazi, kasiku ani ni si sikoti kutshawunyeta mmumbu wuwa ni txi ta kheyo kwako, niku nawe khu na mbi tshawunyeta mmumbu wuwa ni dirigwi diya, u txi ta kheno kwangu, ngu mapimo o biha. 53Txizimu txa Abrahamu, Txizimu txa Nakori, Txizimu txa lihunzu la mmweyo wawe, txi na mahe mlamuli hagari kwathu.&#8221; Se Jakobe a to xambanya ngu Txizimu txi txi khozelwako ngu Isaake, tate wakwe. 54Jakobe a to phaxa mhamba txitimwi ka mmango, e dhana va ka kwawe ve ta dya sakudya. Vona va dyite, va txi otela kona mmangoniyo.</div><div class="p"> 55Kambe Labhani a to wuka ni mixo ya mabimbi-kutxa, a txi pswopswa vanana vakwe va majaha ni vamahorana, a txi va katekisa; se a to khukha e tshumelela ka wukhalo wakwe.</div>
 </div>
 </div>
</div>

A Bíblia em Txitxopi © Bible Society in Mozambique, 2016.

Sekoko Jakobe a to engisa mapswi a vanana va Labhani va nga ti ti kha vona:
“Jakobe a tekile sotshe si i nga ti sa tate wathu, wotshe wudhumo.”
Ngu kuwona khohe ya Labhani, Jakobe a ti woni kambe ti to Labhani khaswi a txi mtsakela kufana ni kale.
MKOMA Txizimu a wombile ka Jakobe, a txi khene:
“Tshumela u txi tsula ditikoni ka vatate vako, mwani kwanu, ani ni na va ni nawe.”
Sekoko Jakobe a to ruma vathu veya dhana Rakeli ni Leya, va txi ta thembweni amu a nga ti dyisa kona mitxhambi yakwe ya sifuyo, a to ta va gela tiya:
“Ni wona ti to tate wanu khaswi a txi ni tsakela kufana ni kale, aniko Txizimu txa tate wangu txi ni nani.” Anu ma tiziva ti to ni mthumete tate wanu ngu wotshe mtamo wangu. Tate wanu a ni kanganyisile e txitxa muholo wangu digumi da sikhati, aniko Txizimu kha txa mtumetisa ti to e ni mahela kubiha. Mbimo yi ene a nga ti ti khene:
“Sotshe sihari si i ku sa matshakatshaka si na va muholo wako,” sekoko yotshe mitxhambi yi ti ti veleka vanana va matshakatshaka; ngako a txi womba ku khene:
“Asi i ku sa madhowo a misesa, si na va i di muholo wako,” konako sotshe sihari si ti ti veleka vanana va matshakatshaka. Txizimu txi tekile mtxhambi wa tate wanu, txi txi ni ninga.
Ditshiku dokari, da mbimo yi sihari si landelanako, ni lorile, ni txi gula maso, ni wona ti to vamatune va va nga ti landela mikati i ti va misesasesa, ni va matshakatshaka ni va mavalavati. Ngelozi ya Txizimu yi ni gete ngu mloro yi txi kha yona: “Jakobe!” Se ani ni xamute ni txi khani: “Ni ho hawa!” Ngelozi yi txi kha yona: “Gula maso ako konkuwa u wona taku, votshe vamabhongwe va landelako mikati mba matshakatshaka, mba sidokhodokho, ni sibawa, nguko ani ni woni totshe ti Labhani a nga ti maha kwako. Ani ngani Txizimu txa Bheteli, ahale u nga thela mafura ka phande u ni mahela txixambanyo. Konkuwa khukha, huma ka ditiko diya u txi tshumelela ditikoni mu u nga velekelwa kona.”
Sekoko Rakeli ni Leya va mxamute va txi kha vona:
“Ina athu hi ngadi ni thomba nyumbani ka tate wathu kani? Ene a pimisa ti to athu hi vanyamthuvo, nguko a hi xavisile, ngu msana a txi dya male yathu kambe. Nguko, yotshe thomba yi Txizimu txi nga yi thavisa ka tate wathu, njathu ni vanana vathu. Ngu mhaka yeto, awe maha totshe ti Txizimu txi nga kugela.”
Sekoko konako Jakobe a to khukha, e gadhisa vanana vakwe ni vasikati vakwe, ha ka makamelu. A txi gola wotshe mtxhambi wakwe wa sifuyo, ni sotshe simaha si si nga ti mlumba, wotshe mtxhambi wu i nga ti wakwe, awu a nga ya wu mana ditikoni ka Padhani-Aramu e tsula ka Isaake tate wakwe, ditikoni ka Kanana. Ngako Labhani a nga ti tsute kuya kaya tinvuta takwe, Rakeli a to sala e pa sithombe si si nga ti lumba tate wakwe. Jakobe a to kanganyisa Labhani Muaramu, a sikombi ti to a lava kuthava. Ene a sikotile kuthava ni sotshe si a nga ti naso, e tsula, e tshawunyeta mnambo wa Ewufrate, a txi ya mmangoni ka Galahadhi.

Ka ditshiku da wuraru, Labhani a to ziviswa ti to Jakobe a thavile. Sekoko ene a to teka vanawe, e mlondeta amu ka mtxhanu wa masiku ni mambidi a kutsimbila, eya mmanela mmangoni ka Galahadhi. Txizimu txi to endela Labhani, muaramu ngu mloro wa wusiku, txi txi m'gela tiya:
“Ti wonele, u nga thuke u txi womba txilo ka Jakobe, mwendo txo biha, mwendo txa txinene.”
Labhani a to hoka hafuhi ka Jakobe, mmangoni ka Galahadhi, ahawa a nga ti gwimbile kona ditenda dakwe Labhani, ni va ka kwawe, a to gwimba ditenda dakwe nene kona mmangoni ka Galahadhi.
Sekoko Labhani a to womba ka Jakobe a txi khene:
“Njitxani u nga maha ngu ku ni kanganyisa, u txi teka vanana vangu va mahorona nga tikhumbi ta ku ti mana yimbini, kani?” Ngu kutxani u txi maha ngu kupfhuka, u txi ni kanganyisa, u si ni zivisi, kasiku hi salisana ngu litsako, hi txi embelela tindando, ni kupeka tingoma, ni kuveta sitende, kani? Kambe khwa ni leka ni txi pswopswa vanana vangu ni vatukulu vangu. Ngu ditshuri, ati u nga ti maha nda wuphukuphuku! Ani ni ni mtamo wa ku kutsayisa, aniko Txizimu txa tate wako, ka wona wusiku wu wu nga pinda, txi ni gete tiya: “Ti wonele, u nga wombe txilo ka Jakobe, hambi txo biha, hambi txa txinene.” “Konkuwa, wa tsula, nguko i kale u txi xuva kutsula m'tini ka tate wako: Kambe ngu kutxani u txi pa sizimu sangu, kani?”
Sekoko Jakobe a to xamula ka Labhani, a txi khene:
“Ani ni ti ko thava ti to u nga ni tekela vanana vako. Kasi awule u no mmana a di ni sizimu sako, kha na mbi hanya. Kona hawa masoni ka vanathu, wonisisa atxi txi kulumbako, na txi di ni nani, txi teke.” Kha ditshuri Jakobe a ti si ti zivi ti to Rakeli a pite sizimu sa tate wakwe.
Sekoko Labhani a to ya lava ditendani ka Jakobe, ngu msana eya lava ditendani ka Leya, ni matendani ka sithumi simbidi, aniko kha mana txilo. Ene a to huma ngu ditendani ka Leya, eya wulela ditendani ka Rakeli. Nguko, Rakeli a ti tekile sithombe sa tate wakwe, e si fenengeta ngu txigabhata txa dikamelu, e khalahatsha txitimwi ka txona. Labhani a guluwutile ka otshe matenda kambe kha mana txilo. Rakeli a to womba ka tate wakwe, a txi khene:
“U nga pandiseke tata, ngako ni si khukhi ni txi ema masoni kwako, no va ni tshiku ya ti tathu vavasikati.” Labhani a lavisisile kotshe, kambe kha si mana sithombe.
Sekoko Jakobe a to henya e phikizana ni Labani. Se a to womba Jakobe ka Labhani, a txi khene:
“Ngu wuhi mnandu wangu, ngu txihi txionho txangu, eko u zako u txi ni londeta, kani? U guluwutile ka sotshe simaha sangu. Ina u mani tximaha txokari txa nyumbani kwako, kani? Txi veke kona hawa, masoni ka vanathu ni masoni ka vananu, ti to vona va na hi lamula athu va vambidi. Nguko ni zumbile ni nawe mndani ka magumi mambidi a malembe, kambe tinvuta tako ni tiphongo tako kha ta txhisa, hambi ani kha na dya sinvutana sa mtxhambi wako. Kha na ku wuyisela sifuyo si so dawa ngu sihari sa txitinga, aniko ani ngani ni nga dihela kupwateka ka sona, awe u ni dihisile kambe asile si nga piwa ni mitshikari, ni sile si nga piwa ni wusiku. Ni mitshikari ni ti ti hiswa ngu lisani, ni wusiku ni ti ti pekwa ngu pheho, ni wukohe ni si wu mani. Ni thumile magumi mambidi a malembe m'tini kwako. Ni kuthumete digumi da malembe ni mune ngu mhaka ya vanana vako va vambidi, ni mtxhanu wa malembe ni dimwedo ngu mhaka ya mtxhambi wako, kambe digumi da sikhati awe u txitxile muholo wangu.
I ti ku Txizimu txa tate wangu, Txizimu txa Abrahamu, a txi Isaake, tate wangu, a txi thavako, txi ti si nga ni nani, awe nga u di ni humisile walo ni si nga ni txilo. Aniko Txizimu txi woni mikaralo yangu, ni mithumo ya manza angu, se hamnova txi ku kawukile.

Sekoko Labhani a xamute ka Jakobe, a txi khene:
“Vanana vava va txisikati mbanana vangu, vanana vawe mbatukulu vangu, mtxhambi wuwa mbwangu, sotshe siya u si wonako nzangu. Se ni nga maha txani nyamsi ngu vanana vangu ni vatukulu vangu, ava vona va nga va veleka kani?” Konkuwa, ngono hi ta maha txitumelelano, ani ni nawe, atxi txi no fakaza hagari kwangu ni nawe.
Sekoko konako, Jakobe a to teka dirigwi e di emisa, di ti maha txialakanyiso. Se Jakobe a to womba ka vanawe, a txi khene: “Sengeletelani marigwi.” Vona va to rolela marigwi, va txi maha mmumbu ngu ona, va txi dyela Txitimwi ka wona. Labhani a to raya wukhalowo ditina daku i Jegari-Sahadhuta, ani Jakobe a to wu raya ditina daku i Galedhi. Sekoko Labhani a wombile, a txi khene:
“Mmumbu wuwa kukhukhela nyamsi wu na va fakazi hagari kwangu ni nawe.” Ngu mhaka yeto wukhalo wule a wu dhani ku i Galedhi. Awu rayilo kambe ditina daku i Misipa, nguko a ti khene:
“MKOMA a nave muwoneleli hagari kwangu ni nawe, ngako hi txi hambana mmwani ni mmwani.” “Ngako u txi xupha vanana vangu, kambe ngako u txi teka vamwani vasikati, hahanze ka vanana vangu, hambiko ku si nga ni m'thu hagari kwathu, ti zive ti to Txizimu i fakazi hagari kwangu ni nawe.”
Labhani a to womba kambe ka Jakobe, a txi khene: “Wona mmumbu wuwa ni dirigwi diya, ni ngadi emisa hagari kwangu ni nawe. Mmumbu wuwa i fakazi, dirigwi diya i fakazi, kasiku ani ni si sikoti kutshawunyeta mmumbu wuwa ni txi ta kheyo kwako, niku nawe khu na mbi tshawunyeta mmumbu wuwa ni dirigwi diya, u txi ta kheno kwangu, ngu mapimo o biha. Txizimu txa Abrahamu, Txizimu txa Nakori, Txizimu txa lihunzu la mmweyo wawe, txi na mahe mlamuli hagari kwathu.” Se Jakobe a to xambanya ngu Txizimu txi txi khozelwako ngu Isaake, tate wakwe. Jakobe a to phaxa mhamba txitimwi ka mmango, e dhana va ka kwawe ve ta dya sakudya. Vona va dyite, va txi otela kona mmangoniyo.
Kambe Labhani a to wuka ni mixo ya mabimbi-kutxa, a txi pswopswa vanana vakwe va majaha ni vamahorana, a txi va katekisa; se a to khukha e tshumelela ka wukhalo wakwe.

සවන් දෙන්න Genesisi 31