Apolos Corintonö ö̧jibonö Pabloma yemidanö Éfesobe 'yi̧jetö, u'dakwöchobe mananö. 'Ya̧jo̧ma Éfesonö ichibö Dios iwene waisachadö edijetö. Jobadönö abebö a̧ja̧kwijetö:
—Jesúsnö kwösödaduwena ¿Dios O̧'wo̧ Luwo̧ma tebachibö öjamatinaji̧, ökwödö kwo̧'wo̧ luwo̧duwinö?— abebö a̧ja̧kwiawö̧ atadijadötö:
—Wajwida— atadijadötö—. Ina da̧ja̧kwijökötö Dios O̧'wo̧ Luwo̧nöma— jö̧ba̧lö. Jejenö yötjawiökwe Pabloma abebö a̧ja̧kwijetö:
—Ja̧danö, ökwödönö ojwenö bu̧datakwawama ¿taji i̧sebinada? —abebö a̧ja̧kwiawö̧ yöbawijadötö:
—Juan yöawina ösödadösa, jö̧ba̧lö, i̧sebijatö. Jo̧ba yöawina a̧ja̧kwö ösödö, da̧ja̧kwaja̧ ikena ojwenö ubu̧datobö adebijatö— yöbawijadötö Pablonö. Ikenama Pabloma jö̧ba̧lijetö jobadönö:
—A̧ja̧kwaduwitjö. Juanma sulabe tjomukwati̧ kabatibö balewachajadönö ojwenö bu̧datiainobe. Ja̧danö yöbawiainobe jelo̧nö, jo̧ba ökömanö ichakwo̧nöma, Jesúsnöma. Jo̧banöda kwösödaduwo, jö̧ba̧lö, yöbawiainobe— jejenö jö̧ba̧lijetö Pabloma jobadönöma. Ikenama jejenö yöawi̧ a̧ja̧kwadöma ojwenö ubu̧datobö abebijadötö Duluwo̧ Jesús iminö. Ikenama Pabloma, ojwenö ubu̧datajawö̧nö, ömamu 'bibeba̧lö Diosnö aebena Dios O̧'wo̧ Luwo̧ma tebachibö jamatijetö jobadö tjo̧'wo̧ luwo̧duwinö. Tebachibö öjamatajawö̧ma wainö ökwöinö yöba̧lijadötö. Ja̧danö, Dios iwenebi yöbawijadötö. Jobadöma a̧li̧nösamutjö du̧ju̧tajanö ömadö ji̧jadötö.
Ja̧danö, Pabloma, Éfesonö ja̧nöma ja̧wo̧dö wa̧medukwa luwa jenanö, judío jojodö tjotidökö mölekwena jobadö yötjaweju okwa tebachiabijetö. Tebachajo̧ yebabökönö yöbawijetö Dios iwenema. Jojodö yötja̧li̧ atada̧lö, ösödö yöbawijetö Pabloma, Dios La'aka Luwo̧ ö̧jena baibakwawa wenema. Jejenö yöbawijetö jojodönö, Diosnö tjösödo jö̧ba̧lö. Jejenö tja̧ja̧kwonö ju'wedöma tjuu 'ditjobetjö̧ öpöjödijadötö. Jobadöma Pablo yöawi̧ma, ji̧kwa mananö tjichibobö yöawi̧ma, öpöjödö tjo̧'wo̧ sulinö edö sulabenö yöba̧lijadötö jojodönö, Pablonöma. Jejenö yötja̧liökwe Pabloma jejutjö labebajijetö ju'wedö Jesúsnö ösödadönö öbibö. Jemi tupakwöma jejutjö yöbawijökötö. Jelejutjöda yöbawijetö, Tirano mikwo̧, ba̧ja̧dakwawa jojo, jo̧ba öba̧ja̧dejutjöda. Ju'wi möle jwiinö jeju okwa tebachö jojodö yötja̧li̧ atada̧lö yöbawiabijetö Pabloma. Ja̧danö, jobetjöma döbalataja o̧biya jenanö yöbawijetö. Jejenö lekwe yöawobetjö̧ okobe deinö Asianö ju̧kwadöma, judío jojodöbi, judío jojodöböködöbi a̧ja̧kwijadötö Duluwo̧ iwenema. Ja̧danö, Diosma, iteda ujulu i̧sebö, jojodö la'akatjöda edajitjökö jawa i̧sebö pjabatijetö Pablonö, jojodönö ö'wöchadönö otidonöma. Pablo jejenö otidiawö̧ jojodöma, jo̧ba u̧kwa kamijido̧bi emibö ȩwa̧jijadötö, ö'wöchadö wamenö tjöwanobö. Uunö ubutjawa̧laja̧do̧bi, wame jawa 'duawaja̧do̧bi emibö ȩwa̧jijadötö. Ȩwa̧jadö, ja̧do̧ tjöwanawö̧ ö'wöchadöma otiwanö babibijadötö. Ja̧danö, tjo̧'wo̧ luwo̧nö sulabedö ju̧kwadönö juna̧ladönö Pablo u̧kwa kamijido̧ tjöwanemi tjo̧'wo̧ luwo̧nö sulabedöma labekwibijadötö.
Ja̧ mölema judío jojodötjö ju'wedöma, tjo̧'wo̧ luwo̧nö sulabo̧nö a'dewö loawa waisadöma ji̧jadötö. Jobadöma jobe okobe jwiinö kwebachiabijadötö, tjo̧'wo̧ luwo̧nö sulabo̧nö a'dewö lobö. Jobadötjö ju'wedöma bakwo̧ judío jojo, Esceva mikwo̧ i̧tji̧mubijadötö. Tjabe'doma, Diostjö jojodötjö ö'weje la'aka pjabato̧bijetö. Jobadöma omukwatijadötö, Ökwödöbi Pablo a'dewö loinadanö, Jesús imi yöba̧lö wedo tjo̧'wo̧ luwo̧nö sulabo̧nö laebobö, jö̧ba̧lö. Jejenö omukwatö tjo̧'wo̧ luwo̧nö sulabo̧ ö̧jökwe ö̧jobekwö 'ya̧wibö sulabo̧ webijadötö:
—Ökwödönö a̧ja̧kwi. Pablo yöawinökwe Jesús ujulu iminö wedakwö. Bitetjö labebi—webijadötö. Jejenö wetjiökwe atadijetö:
—Ökwödöma ¿didököbaduwa? Jesúsnö chöwaisökwe. Pablonöbi chöwaisökwe. Jo̧kwaijayonö ¿ökwödöja? Wajwitawö̧— atadijetö. Ikenama o̧'wo̧ luwo̧nö sulabo̧ ö̧jökwema juluwanö mebibijetö jobadönö. Mebibö do̧batö labinö kwakwabö, tjökamisi kȩ'ö lobö juluwijetö jobadönö. Ujuluwajawö̧ma niawö̧, kamisi jwibadöda o̧dotjöma labeibö döbibajijadötö. Ikenama ja̧ baledaja̧ yötjawi̧ma a̧ja̧kwö okobe deinö Éfesonö ju̧kwadöma, judío jojodöbi, judío jojodöböködöbi jwiinö yebabijadötö. Ja̧danö, Duluwo̧ Jesúsnö, Okobe jwiinö juluwo̧, jö̧ba̧lö, ösödö otiwanö yöba̧lijadötö.
Ikenama ba̧jekwadö Jesúsnö ösödadöma ichö, jojodö tjöba a'o jamatö, ajayinö sulabenö ji̧atjina yöbawö lobijadötö. Jobadötjö ju'wedöma, mea boawa waisadöma, mea boawa jawa tjiwȩyudina ö'yebiya ichejebijadötö. Ichejebajadöma ja̧ ö'yebiyama juwö lobijadötö, jojodö tjeda̧lonö. Ja̧ juwö lotjina ö'yebiyama nöinö mikwawina ö'ye, cincuenta mil plata ö̧pi̧bi̧ya mikwawina ö'ye. Jemi tupakwö jobema ba̧jekwadö yöbawiabijadötö Duluwo̧ iwenema. Ja̧danö, ba̧jekwadöma a̧ja̧kwö ösödijadötö Duluwo̧ iwenema.

Ikenama ja̧ baledinemi tupakwöma Pabloma, o̧'wo̧ ösöwanö jö̧ba̧lijetö:
—Aaa, ötjöma babema Jerusalénbe chi̧'yocha. 'Ya̧jo̧ma kwetachocha Macedoniabebi, Acayabebi. Ikenama, Jerusalénnö kwebachö kabatiböma Romabe yöbawö chi̧'yocha— jö̧ba̧lijetö. Jejenö jö̧ba̧lö i̧'yakwa̧ abönö webijetö ömöledönö, du̧ju̧tajanö, Macedoniabe tji̧'yobö, Timoteonöbi, Eratonöbi. Tji̧'yonö Pabloma ji̧bijetö Asia nijinö, ja'yube lekwe.
Pablo ina Éfesonö ö̧jena jobe ju̧kwadöma Pablokwö nöinö wene juna̧lakwawijadötö. Jobadöma öpöjödijadötö Pablo yöawi̧ma, ji̧kwa mananö ichikwa wenema. Baikwö baledijetö: Bakwo̧ma Demetrio mikwo̧ma, 'dii̧ jawatjö, plata mikwi̧tjö otidö ji̧jetö. Jo̧bama ju'wedö platatjö otidadö tjuluwo̧bijetö. Jobadöma mikwanö jö̧ba̧lö tjiyobö otidijadötö, o̧'wo̧ jawama. Ja̧ o̧'wo̧ jawama jojodö tjo̧'wo̧ tjöwana̧loko Artemisa mikwujunö ösödakwaweju o̧'wo̧ jawa ejubiya, pjei̧ ejubiya otidijadötö. Ja̧ o̧'wo̧ jawa pjei̧ ejubiyama jojodönö mikwanö jö̧ba̧lö tjiyobetjö̧ balada nöinö emiabijadötö otidadöma. Ja̧danö, ju'wi möle Demetrioma ömöayedönö jwöbijetö tjichobö, yöawi̧ a̧ja̧kwö. Ichibajadönö yöbawijetö:
—Chömöledö, kwöwaisaduwa balada nöinö demobe jojodö tjo̧'wo̧ tjöwana̧lokonö ösödakwaweju o̧'wo̧ jawa ejubiya dotidi̧ma midö tjemobetjö̧. Jo̧kwaijayonö babema Pablo mikwo̧ yöawiawö̧ jojodöma tjemökena dotidi̧ma. Ida̧ökö da̧ja̧kwajabe jo̧ba yöawi̧ma. Jojodönö yöawobe tjo̧'wo̧ tjöwana̧lokonö tjöpöjödobö. Baikwö yöawobe: Jojodö tjotidinawö̧ma tjo̧'wo̧ tjöwana̧lökawö̧, jö̧ba̧lö. Diosdanö juluwöködö, jö̧ba̧lö, yöawobe. Isabenö, jojodöma ba̧jekwadö jo̧ba yöawi̧ tjösödobe, jo̧ba omukwati̧danö omukwatadö batjibanö. Bemi Éfesonö ju̧kwadöbi, okobe jwiinö Asianö jukwadöbi, ba̧jekwadö Pablo yöawi̧ a̧ja̧kwö tjösödobe. Jejenö tjösödobetjö̧ ökwödö dotidi̧ o̧'wo̧ jawa tjöpöjödena, Sulabenö kwotidaduwobe o̧'wo̧ jawama, jö̧ba̧lö. Ja̧danö, ökwödö dotidi̧ öpöjödö tjemökötjö̧ma ¿dakwö demakwa̧jö baladama? Ju'wibi yötawa, jejenö omukwatö ökwödö do̧'wo̧ döwana̧loko Artemisanö ösödakwawejuma, la'akasejuma, jojodö ba̧kwȩlö̧jatebö ösödö tebachajitjejuma, tjöpöjödena. Jejuma usulaseju, jö̧ba̧lö, tjöpöjödena. Ja̧danö, do̧'wo̧ döwana̧lokonöbi Artemisanö tjöpöjödena. Ökwödö Asianö ju̧kwadöbi, okobe deinö böjȩnö ju̧kwadöbi jobujunö kabatibö tjöpöjödena, Jobuju usulasuju, juluwökuju, jö̧ba̧lö— yöbawijetö Demetrioma ömöayedönö. Jejenö yöawiawö̧ jobadöma jwiinö labijadötö. Labinö jwöbeba̧lijadötö:
—Ökwödöma Artemisanö ösödadösa, do̧'wo̧ döwana̧loko jobujuma— labinö jwöbeba̧lijadötö.
Ja̧danö, ba̧jekwadö Éfesonö ju̧kwadöma labinö jwöbeba̧lö labijadötö. Jwiinö tjölabobetjö̧ Pablokwö ichinadönö, Macedonia jojodönö, Gayonö, Aristarconö do̧batibö tötöbijadötö jojodö tjö̧bajeju jobekwö. Ichibö tebatijadötö jeju okwa. Ja̧danö, Pablobi jeju teachobö jö̧a̧lijayonö Jesúsnö ösödadöma, Tekacha, jö̧ba̧lö, teachobö webijöködötö, inia tjöinö ja̧tjapji jö̧ba̧lö. Ja̧danö, ju'wedö jobe la'aka luwedöma, Pablonö tjösödobetjö̧ webijadötö ju'wedönö yötjawajobö, Jejuma tekacha, jö̧ba̧lö, kwabö lotjakwö, jö̧ba̧lö. Jeju okwa ba̧jekwadö ja̧jadöma okobe deinö labinö wainö jwöbeba̧lijadötö, bakwainö yöba̧lökönö. Jobadö jwöbeba̧ladötjö ju'wedöma, ba̧jekwadöma wajwibö ji̧jadötö jeju okwa ¿Tajawedö doko̧ko̧kwobeda? jö̧ba̧lö. Ikenama judío jojodöma jibö döbebijadötö jobadötjö bakwo̧nö, Alejandro mikwo̧nö, jojodö tjöba a'o ja̧nö yöa̧lobö. Jo̧bama, yöa̧lakwa̧ abönö ömamu kabebijetö, Wi babibö ja̧nö a̧ja̧kwaduwitjö, jö̧ba̧lö. Ikenama, jobe ju̧kwadöma jo̧banö edö, Bitema judíoso̧, jö̧ba̧lö, a̧ja̧kwökönö jemi tupakwö labinö jwöbeba̧lijadötö:
—Éfesonö ju̧kwadö dösödokoma, Artemisa mikwujuma jwiinö mikwawuju— jwöbeba̧lijadötö. Jejenö jwöbeba̧lijadötö dötölataja hora jenanö. Ikenama bakwo̧, Éfesonö jo̧, comisariodanö otido̧ma ichö jojodönö, Wi babibö ja̧nö a̧ja̧kwaduwitjö, jö̧ba̧lö, jö̧ba̧lijetö:
—Chömöledö Éfesonö ju̧kwadöma, okobe deinö jojodöma tjöwaisobe ökwödöda jwiinö mikwawuju dösödoko Artemisanö ösödakwaweju dite'ada̧li̧ma. Ja̧danö, inawa, mölejȩbetjö meinawabi, jobuju jo̧'wo̧ jawa ba̧wa ökwödöda dujuna̧li̧ma tjöwaisobe okobe deinö jojodöma. Bakwo̧bi deobe, Jejenömaökö, ökwödöma Artemisa jawa te'ada̧löködö, jö̧ba̧lo̧ma. Jo̧kwaobetjö̧ jwökeba̧laduwi̧ma wi babibö ju̧kwaduwi. Omukwatökönö sulabenö ja̧köbaduwoko chömöledö. Bidö do̧batö kwichejebajaduwawö̧ma ¿taji sulabenö ja̧tjaja̧da? Artemisanö ösödakwaweju okwa ¿tebachö tjönaukwaja̧ji̧? ¿Sulabenö yötja̧laja̧ji̧ Artemisanö? Jejenömaökö chömöledö— yöbawijetö—. A̧ja̧kwaduwi. Demetrioma, jo̧bakwö otidadöma bidökwö wene tjujuna̧lakwawitjö̧ma tji̧'yobö jö̧ta̧la weawa yöawakwawa jojodö tjö̧bobekwö yötjawobö. Ikenama, ökwödöma ina bidö ja̧tjina yökawaduwobö jö̧ka̧laduwitjö̧ma kwite'ada̧laduwo ju'wi möle, ko̧ko̧kwö yödawakwa̧ mölema. Ökwödö labinö jwökeba̧laduwi̧ma Roma la'aka luwedöma tjöpöjödena. Yötja̧lena, Bidöma jwiinö sulabenö jwöbeba̧ladö, jö̧ba̧lö. Jejenö yötja̧litjö̧ma atadakwawa jwiinö dö̧jena chömöledö—yöbawijetö. Jejenö yöbawö kabatö jojodönö webijetö tjȩwa̧jobö.

සවන් දෙන්න Hechos 19