<div class="version vid2373 iso6393zaj" data-vid="2373" data-iso6393="zaj">
 <div class="book bkGEN">
 <div class="chapter ch50" data-usfm="GEN.50">
 <div class="label">50</div><div class="p"> 1Usufu kainamilila kukihanga cha tataake na kumkumbatila, kamulilila na kumnonela. 2Abaho Usufu kawalagiza waganga wake wam'bake tataake dawa giladi sambiyole, avo waja iwaganga wam'baka Yakobo dawa ya kuzuila kola. 3Wam'baka dawa ija mmazua malongo mane, kwavija kino kicho kipigiti kilondigwa kubakigwa dawa munhu yadanganhike. Wamisili wamulilila Yakobo mmazua malongo saba.</div><div class="p"> 4Mazua ga kumulilila Yakobo vugamalile, Usufu kawalongela wakulu wa ng'anda ya Falao, &#8220;Nowayalalila, soleni usenga uno mumgalile Falao, 5&#8216;Tataangu viyakalile behi na kudanganhika, kanilongela nimduilile kamba nomzika mdipanga diyahimbile muisi ya Kanaani. Avo nileke nichole nikamzike tataangu abaho nobwela.&#8217; &#8221;</div><div class="p"> 6Falao kamulongela, &#8220;Genda ukamzike tataako kamba vuumduilile kamba kotenda avo.&#8221;</div><div class="p"> 7Avo Usufu kachola kumzika tataake. Kasindikizigwa na watumigwa wose wa Falao hamoja na wakulu wose wa ng'anda ya Falao na wakulu wose wa isi ya Misili. 8Vivija Usufu kawasola watumigwa wose wa ng'anda yake na wandugu zake na wanhu wose wakalile mng'anda ya tataake. Ila wana zao, madale gao ga ng'hondolo, na madale ga ng'ombe zao wao wasigale Gosheni. 9Waja wogala mikwama na wakwela falasi vivija wachola hamoja na heyo. Dikala dale kulu ng'hani da wanhu.</div><div class="p"> 10Viwavikile hana ulubuga lwa kwanikila ngano lukemigwa Atadi, lukalile ng'ambu ya ulawilo wa zua wa Lwanda lwa Yolodani, wagegemeza na dizwi kulu na usungu mkulu ng'hani umemile giogio, Usufu kakala haja mkipigiti cha mazua saba yomulilila tataake. 11Wenekae wa Kanaani viwonile kililo kija haja halubuga lwa kwanikila ngano lukemigwa Atadi, walonga, &#8220;Wamisili wana mting'hano wa kililo.&#8221; Kino kicho kilamso hanhu haja behi na Yolodani hokemigwa Abeli-Misili.#50:11 Abeli-Misili ulinga na ulonzi wa Kieblania ulonga kililo cha Wamisili.</div><div class="p"> 12Wana wa Yakobo watenda kamba viyawalagize, 13wampapa Yakobo mbaka kuisi ya Kanaani na kumzika muimhango, mumgunda wa Makipela behi na Mamle, awo Ablaham uyaugulile kulawa ha Efloni Muhiti, hawe hanhu ha kuzikila. 14Usufu viyeshile kumzika tataake, kabweleganya Misili hamoja na wandugu zake na waja wose wacholile na heyo kumzika tataake.</div><div class="s1">Usufu Kowagela Kumgongo Wakulu Zake</div><div class="p"> 15Wakulu zake Usufu viwonile kamba tataao kadanganhika, walonga, &#8220;Yowaze ihawa Usufu yang'hali na lusango na tweye, na yahagelegeza kutubwelezela mbuli zose zihile zitumtendele?&#8221; 16Avo wamgalila usenga Usufu, wolonga, &#8220;Kipigiti tataetu hanadanganhika katulongela, 17tukugalile usenga uno, &#8216;Wagele kumgongo wakulu zako gehile gose gawakutendele.&#8217; Avo tugele kumgongo sama ya gehile gose gatukutendele tweye, watumigwa wa Mulungu wa tataako.&#8221; Usufu viyahulike gano kalila ng'hani.</div><div class="p"> 18Abaho wakulu zake weza waibwanha hasi haulongozi wake, na kulonga, &#8220;Tweye twa nyakadala zako.&#8221;</div><div class="p"> 19Ila Usufu kawalongela, &#8220;Sambimdumbe, nie na Mulungu mbaka niwataguse? 20Hata kamba mweye mgesa gehile, ila Mulungu kagesa ganogile, giladi ugima wa wanhu bwando sambiubanangike kamba voyotenda sambi. 21Avo sambimdumbe, nie nowagwelela mandia mweye hamoja na wanenu.&#8221; Mkulonga mbuli zino zilimwilile, kawahoza imioyo.</div><div class="s1">Ifa ya Usufu</div><div class="p"> 22Avo Usufu kagendelela kukala muisi ya Misili, heyo hamoja na wanhu wa ng'anda ya tataake. Usufu kakala milao mia na longo dimwe. 23Usufu kawona wana na wazukulu wa Eflaim. Vivija kawona wana wa Makili mwana wa Manase awo iyawalongile kamba wanage. 24Abaho Usufu kawalongela wandugu zake, &#8220;Nie na mmabehi kudanganhika, ila Mulungu kokwiza kuwemiliza na kuwalava mweye muisi ino na kuwagala kuisi iyawaduilile Ablaham, Isaka, na Yakobo.&#8221; 25Abaho Usufu kawalongela Waislaeli wamduilile, kalonga, &#8220;Mulungu yeheza kuwataza kuwalava muisi ino, muipape mizege yangu kulawa hano.&#8221; 26Avo Usufu kadanganhika kipigiti viyakalile na milao mia na longo dimwe. Wam'baka dawa ya kuzuila kola, na kumwingiza mdijanaenza kuja Misili.</div>
 </div>
 </div>
</div>

Zaramo Bible Translation Project: © 2023 Pioneer Bible Translators
New Testament is a revision of: Zaramo New Testament: © 2020 The Word for the World International and © 2020 Pioneer Bible Translators

Usufu kainamilila kukihanga cha tataake na kumkumbatila, kamulilila na kumnonela. Abaho Usufu kawalagiza waganga wake wam'bake tataake dawa giladi sambiyole, avo waja iwaganga wam'baka Yakobo dawa ya kuzuila kola. Wam'baka dawa ija mmazua malongo mane, kwavija kino kicho kipigiti kilondigwa kubakigwa dawa munhu yadanganhike. Wamisili wamulilila Yakobo mmazua malongo saba.
Mazua ga kumulilila Yakobo vugamalile, Usufu kawalongela wakulu wa ng'anda ya Falao, “Nowayalalila, soleni usenga uno mumgalile Falao, ‘Tataangu viyakalile behi na kudanganhika, kanilongela nimduilile kamba nomzika mdipanga diyahimbile muisi ya Kanaani. Avo nileke nichole nikamzike tataangu abaho nobwela.’ ”
Falao kamulongela, “Genda ukamzike tataako kamba vuumduilile kamba kotenda avo.”
Avo Usufu kachola kumzika tataake. Kasindikizigwa na watumigwa wose wa Falao hamoja na wakulu wose wa ng'anda ya Falao na wakulu wose wa isi ya Misili. Vivija Usufu kawasola watumigwa wose wa ng'anda yake na wandugu zake na wanhu wose wakalile mng'anda ya tataake. Ila wana zao, madale gao ga ng'hondolo, na madale ga ng'ombe zao wao wasigale Gosheni. Waja wogala mikwama na wakwela falasi vivija wachola hamoja na heyo. Dikala dale kulu ng'hani da wanhu.
Viwavikile hana ulubuga lwa kwanikila ngano lukemigwa Atadi, lukalile ng'ambu ya ulawilo wa zua wa Lwanda lwa Yolodani, wagegemeza na dizwi kulu na usungu mkulu ng'hani umemile giogio, Usufu kakala haja mkipigiti cha mazua saba yomulilila tataake. Wenekae wa Kanaani viwonile kililo kija haja halubuga lwa kwanikila ngano lukemigwa Atadi, walonga, “Wamisili wana mting'hano wa kililo.” Kino kicho kilamso hanhu haja behi na Yolodani hokemigwa Abeli-Misili.
Wana wa Yakobo watenda kamba viyawalagize, wampapa Yakobo mbaka kuisi ya Kanaani na kumzika muimhango, mumgunda wa Makipela behi na Mamle, awo Ablaham uyaugulile kulawa ha Efloni Muhiti, hawe hanhu ha kuzikila. Usufu viyeshile kumzika tataake, kabweleganya Misili hamoja na wandugu zake na waja wose wacholile na heyo kumzika tataake.

Wakulu zake Usufu viwonile kamba tataao kadanganhika, walonga, “Yowaze ihawa Usufu yang'hali na lusango na tweye, na yahagelegeza kutubwelezela mbuli zose zihile zitumtendele?” Avo wamgalila usenga Usufu, wolonga, “Kipigiti tataetu hanadanganhika katulongela, tukugalile usenga uno, ‘Wagele kumgongo wakulu zako gehile gose gawakutendele.’ Avo tugele kumgongo sama ya gehile gose gatukutendele tweye, watumigwa wa Mulungu wa tataako.” Usufu viyahulike gano kalila ng'hani.
Abaho wakulu zake weza waibwanha hasi haulongozi wake, na kulonga, “Tweye twa nyakadala zako.”
Ila Usufu kawalongela, “Sambimdumbe, nie na Mulungu mbaka niwataguse? Hata kamba mweye mgesa gehile, ila Mulungu kagesa ganogile, giladi ugima wa wanhu bwando sambiubanangike kamba voyotenda sambi. Avo sambimdumbe, nie nowagwelela mandia mweye hamoja na wanenu.” Mkulonga mbuli zino zilimwilile, kawahoza imioyo.

Avo Usufu kagendelela kukala muisi ya Misili, heyo hamoja na wanhu wa ng'anda ya tataake. Usufu kakala milao mia na longo dimwe. Usufu kawona wana na wazukulu wa Eflaim. Vivija kawona wana wa Makili mwana wa Manase awo iyawalongile kamba wanage. Abaho Usufu kawalongela wandugu zake, “Nie na mmabehi kudanganhika, ila Mulungu kokwiza kuwemiliza na kuwalava mweye muisi ino na kuwagala kuisi iyawaduilile Ablaham, Isaka, na Yakobo.” Abaho Usufu kawalongela Waislaeli wamduilile, kalonga, “Mulungu yeheza kuwataza kuwalava muisi ino, muipape mizege yangu kulawa hano.” Avo Usufu kadanganhika kipigiti viyakalile na milao mia na longo dimwe. Wam'baka dawa ya kuzuila kola, na kumwingiza mdijanaenza kuja Misili.

සවන් දෙන්න MWANDUSO 50