<div class="version vid2373 iso6393zaj" data-vid="2373" data-iso6393="zaj">
 <div class="book bkGEN">
 <div class="chapter ch15" data-usfm="GEN.15">
 <div class="label">15</div><div class="s1">Lagano da Mulungu na Ablam</div><div class="p"> 1Abaho usenga wa MNDEWA umwizila Ablam muinzozi, wolonga, &#8220;Sambiudumbe, Ablam! Nie nokwimiliza, nhunza yako yowa ng'hulu ng'hani.&#8221;</div><div class="p"> 2Ila Ablam kalonga, &#8220;MNDEWA Mulungu, nhunza yaki inogile yondaunigwelele? Kwavija nie nabule mwana, na muhazi wa ng'anda yangu iyo Eliezeli munhu wa Damaski. 3Kwavija hunigwelele wana, avo nyakadala imwe yali mng'anda yangu iyo yondayawe muhazi wangu.&#8221;</div><div class="p"> 4Abaho usenga wa MNDEWA umwizila mwanza wa ikabili, ulonga, &#8220;Nyakadala ino Eliezeli hawa muhazi wa mali gako, ila mwanago mwenyego iyo yondayawe muhazi wako.&#8221; 5MNDEWA kamsola kamulava hanze, kamulongela, &#8220;Lola uchana kuulanga, uzipete zinhondo kamba uhadaha. Avo, vino vivo lukolo lwako vondaluwe.&#8221;</div><div class="p"> 6Ablam kamtamanila MNDEWA, na sama ya nhamanila yake, MNDEWA kampeta heyo kamba kabule uzenzeleganye.</div><div class="p"> 7Abaho kamulongela, &#8220;Nie iyo MNDEWA nikulavile kulawa isi ya Ulu, ikalile isi ya Wakaldayo, nikugwelele isi ino iwe yako.&#8221;</div><div class="p"> 8Ila Ablam kalonga, &#8220;Gweye, MNDEWA Mulungu, novitangaze kamba isi ino yowa yangu?&#8221; 9Avo MNDEWA kamulongela, &#8220;Nigalile bogwa wa ng'ombe yali na milao midatu, bogwa wa menhe yali na milao midatu, na songolomi wa ng'hondolo yali na milao midatu, hamoja na hua na nziwa.&#8221; 10Ablam kawagala wang'onyo wano wose ha Mulungu, kawakanha nyenza mbilimbili na kuzika mminhongo mibili, na kila lwenza lukiilola na miyage. Ila ndege kawachinja ila hawakanhile mzinyenza. 11Vimhungu waihumulukila imitufi, ila Ablam kawawinga.</div><div class="p"> 12Zua vidiswile, Ablam kawasa utulo kakuluza, ziza na bwembe vimgubika. 13MNDEWA kamulongela, &#8220;Uvitange kamba lukolo lwako lowa wahenza muisi ya wanhu wayagwe. Ako wowa nyakadala na wotendeligwa gehile mkipigiti cha milao mia nne. 14Ila nousuna undewa uja wondauwatende hewo wawe nyakadala, abaho wolawa na mali bwando. 15Ila gweye koilumba hamoja na wahenga zako mditindiwalo kuno uli na milao bwando. 16Mulelo wa ikane wa lukolo lwako wobwela hano na kutawala isi ino, kwavija kipigiti kino Waamoli bado hawanatenda vilozo vivikile hanhu ha hewo kutagusigwa.&#8221;</div><div class="p"> 17Zua vidiswile na kilo vikingile, nongo dilava yosi na wenge da moto ukwaka vibita hagatigati ya izinyenza za izinyama. 18Mdizua dija MNDEWA katenda lagano na Ablam, kamulongela, &#8220;Nowagwelela lukolo lwako isi ino, kulawa lwanda lwa Misili mbaka Lwanda lwa Yuflati, 19isi ya Wakeni, Wakenizi, Wakadimoni, 20Wahiti, Wapelizi, Walefai, 21Waamoli, Wakanaani, Wagiligashi, na Wayebusi.&#8221;</div>
 </div>
 </div>
</div>

Zaramo Bible Translation Project: © 2023 Pioneer Bible Translators
New Testament is a revision of: Zaramo New Testament: © 2020 The Word for the World International and © 2020 Pioneer Bible Translators

Abaho usenga wa MNDEWA umwizila Ablam muinzozi, wolonga, “Sambiudumbe, Ablam! Nie nokwimiliza, nhunza yako yowa ng'hulu ng'hani.”
Ila Ablam kalonga, “MNDEWA Mulungu, nhunza yaki inogile yondaunigwelele? Kwavija nie nabule mwana, na muhazi wa ng'anda yangu iyo Eliezeli munhu wa Damaski. Kwavija hunigwelele wana, avo nyakadala imwe yali mng'anda yangu iyo yondayawe muhazi wangu.”
Abaho usenga wa MNDEWA umwizila mwanza wa ikabili, ulonga, “Nyakadala ino Eliezeli hawa muhazi wa mali gako, ila mwanago mwenyego iyo yondayawe muhazi wako.” MNDEWA kamsola kamulava hanze, kamulongela, “Lola uchana kuulanga, uzipete zinhondo kamba uhadaha. Avo, vino vivo lukolo lwako vondaluwe.”
Ablam kamtamanila MNDEWA, na sama ya nhamanila yake, MNDEWA kampeta heyo kamba kabule uzenzeleganye.
Abaho kamulongela, “Nie iyo MNDEWA nikulavile kulawa isi ya Ulu, ikalile isi ya Wakaldayo, nikugwelele isi ino iwe yako.”
Ila Ablam kalonga, “Gweye, MNDEWA Mulungu, novitangaze kamba isi ino yowa yangu?” Avo MNDEWA kamulongela, “Nigalile bogwa wa ng'ombe yali na milao midatu, bogwa wa menhe yali na milao midatu, na songolomi wa ng'hondolo yali na milao midatu, hamoja na hua na nziwa.” Ablam kawagala wang'onyo wano wose ha Mulungu, kawakanha nyenza mbilimbili na kuzika mminhongo mibili, na kila lwenza lukiilola na miyage. Ila ndege kawachinja ila hawakanhile mzinyenza. Vimhungu waihumulukila imitufi, ila Ablam kawawinga.
Zua vidiswile, Ablam kawasa utulo kakuluza, ziza na bwembe vimgubika. MNDEWA kamulongela, “Uvitange kamba lukolo lwako lowa wahenza muisi ya wanhu wayagwe. Ako wowa nyakadala na wotendeligwa gehile mkipigiti cha milao mia nne. Ila nousuna undewa uja wondauwatende hewo wawe nyakadala, abaho wolawa na mali bwando. Ila gweye koilumba hamoja na wahenga zako mditindiwalo kuno uli na milao bwando. Mulelo wa ikane wa lukolo lwako wobwela hano na kutawala isi ino, kwavija kipigiti kino Waamoli bado hawanatenda vilozo vivikile hanhu ha hewo kutagusigwa.”
Zua vidiswile na kilo vikingile, nongo dilava yosi na wenge da moto ukwaka vibita hagatigati ya izinyenza za izinyama. Mdizua dija MNDEWA katenda lagano na Ablam, kamulongela, “Nowagwelela lukolo lwako isi ino, kulawa lwanda lwa Misili mbaka Lwanda lwa Yuflati, isi ya Wakeni, Wakenizi, Wakadimoni, Wahiti, Wapelizi, Walefai, Waamoli, Wakanaani, Wagiligashi, na Wayebusi.”

සවන් දෙන්න MWANDUSO 15