<div class="version vid2302 iso6393slm" data-vid="2302" data-iso6393="slm">
 <div class="book bkACT">
 <div class="chapter ch26" data-usfm="ACT.26">
 <div class="label">26</div><div class="s">Si Paul missala ma al&#333;pan si Sultan Agarippa</div><div class="p"> 1Sakali itu missala na si Agarippa ni si Paul, uk na, &#8220;Pabaid ta na kau ngandaawahan di nu.&#8221; Manjari ninyal si Paul maka tangan na bo' iyampa nagna' ngandaawa.</div><div class="p"> 2&#8220;Ampun Sultan Agarippa,&#8221; uk na, &#8220;ma bistahan ku mehe kahapan ku sabab kau iya paal&#333;pan ku 'llaw itu, sabu ku ngandaawahan di ku pasal bayi panuntut aku uk manga Yahudi. 3Mehe kak&#333;gan ku sabab kasakupan nu iya addat Yahudi kamemon maka manga pagsualan sigam. Hangkan aku pamaap ni kau, bang peen kau 'nsa' siyumu pake ma aku.</div><div class="p"> 4&#8220;Kitauhan asal uk manga Yahudi kamemon bang salaingga bayi tuyu' ku satagg&#333;l min kaonde' ku ma diy&#333;m kakampungan ku, sampay isab mahi' ma Awrusalam. 5Tagg&#333;l na katauhan sigam aku. Kitauhan du uk sigam kapam&#333;gb&#333;g ku ma kalangnganan manga Parisi. 'Nsa' niya' makasali' ni manga Parisi bang b&#333;gb&#333;g du harap ni sara' agama Yahudi. 6Bannal manga Yahudi ian 'nsa' baya' muwan saksi' ma pasal ku. Na buttihi',&#8221; uk si Paul, &#8220;tiya' aku hiyukum ma sabab pangah&#333;wat ku in bayi janji' Tuhan ni kamaasan kami tuman du. 7Iya du isab uk na hi' hiy&#333;wat uk manga bangsa kami Yahudi sangpu' maka duwa, salta' peen sigam magtaat ni Tuhan 'llaw-sang&#333;m. Ampun Sultan, iya hangkan aku tiyuntutan uk manga pagkahi ku Yahudi, ma sabab pangah&#333;wat ku itu. 8Kaam manga kasehean iyu!&#8221; uk na, &#8220;Angay 'nsa' kaam ngahagad in Tuhan makallum aa magpatayan du pabing?</div><div class="p"> 9&#8220;Minsan aku bayi dahu, bayi pangannal ku subay aku muspusan k&#333;s&#333;g ku nagga' si Isa, aa Nasaret. 10Jari iya na hi' bayi kahinangan ku, waktu dahu ian mahi' ma Awrusalam. Bayi aku kabuwanan kapatut uk manga imam nakura', hangkan heka aa suku' Tuhan bayi l&#333;&#333;n ku ni diy&#333;m jil. Taabut peen sigam pib&#333;tangan hukuman ni kamatay, bayi aku pauyun ngaho'. 11Min heka isab bayi pabinsana' ku sigam ma diy&#333;m manga kalanggalan kamemon, bo' supaya sigam tal&#333;g&#333;s ngalabba min pame' sigam ma si Isa. Kalandu' pasu' atay ku ma sigam, hangkan sigam bayi abut ku ma manga kalahatan bangsa saddi supaya sigam kalaugan ku.&#8221;</div><div class="s">Biya' uk si Paul pasal kapinda na tudju ni si Isa</div><div class="p"> 12&#8220;Iya na ko' hi' bayi tuyu' ku,&#8221; uk si Paul, &#8220;iya hangkan aku bayi pahi' ni Damaskus mo kapatut maka sulat panohoan bayi pamuwan aku uk manga nakura'. 13Na, Ampun Sultan,&#8221; uk si Paul ni si Agarippa, &#8220;lattu peen 'llaw, ma labayan peen aku, niya' bayi tanda' ku sawa min diy&#333;m sulga', silaw le' min 'llaw. Magsahaya sawa hi' ma t&#333;ng&#333;d ku sampay ma manga aa bayi sehe' ku maglangngan hi'. 14Pahantak kami kamemon ni tana'. Jari niya' take ku suwara halling ni aku ma bahasa Hibrani, uk na, &#8216;Saul! O Saul! Angay aku pidjala' nu? Paddi' pikilan nu nagga' aku. Sali' sapantun du sapi', kapaddian bang nagga' ma kabayaan dapu na.&#8217; 15&#8216;Sayi kau iyu, Nakura'?&#8217; uk ku. Uk na, &#8216;Aku iya si Isa, iya pidjala' nu na peen. 16Suga' nangge na kau t&#333;&#333;d,&#8217; uk na. &#8216;Iya poon aku papanda' itu ni kau bo' kau tapene' ku sosohoan ku. Kawakilan kau ngalapal ma manga aa pasal in aku bayi tanda' nu 'llaw itu, maka ma pasal ayi-ayi iya pandaan ku ni kau ma sosongun. 17Papuwas ta du kau min pangantanan manga pagkahi nu Yahudi, maka min pangantanan bangsa saddi, iya song pamapahian ku kau. 18Subay sigam tabo nu supaya sigam makasayu t&#333;&#333;d, sali' hantang aa bang pikallatan mata, bo' sigam papinda min kalind&#333;man tudju ni kasawahan, min pangantanan nakura' sayitan tudju ni &#333;k&#333;man Tuhan. Manjari taampun du karusahan sigam sabab min pangand&#333;l sigam ma aku,&#8217; uk si Isa, &#8216;bo' pit&#333;ng&#333;d sigam ma diy&#333;man manga aa iya tapene' uk Tuhan.&#8217; &#8221;</div><div class="s">Halling si Paul pasal kahinangan na</div><div class="p"> 19&#8220;Hangkan ko', Ampun Sultan,&#8221; uk si Paul, &#8220;'nsa' bayi tasagga' ku iya bayi panda' ni aku ian min sulga'. 20Jari magnasihat na aku. Bayi tagnaan ku ma Damaskus, puwas na hi' ma Awrusalam, bo' ma kalohahan lahat manga Yahudi na, sampay isab ma manga aa 'nsa' Yahudi. Bayi panduan ku sigam kamemon subay ngalabba t&#333;&#333;d min dusa sigam bo' papinda me' ma Tuhan. Maka subay isab niya' kahinangan sigam hap tanda' saksi' in sigam bayi ngalabba na min dusa sigam. 21Iya na ko' hi' sababan na hangkan aku bayi siyaggaw uk manga Yahudi mahi' ma diy&#333;m langgal pagkulbanan. Tiyuud aku uk sigam, arak piyatay, 22lipara tiyabangan na peen aku uk Tuhan sampay ni kabuttihian. Hangkan na aku tiya' nangge ma itu naksi' ni manga aa kamemon deyo'-langkaw. Sali' du bissala ku itu maka bayi bissala uk manga kanabi-nabihan ma masa awwal hi', maka uk si Musa, ma pasal pakaradjaan ma sosongun. 23Uk pamalatun sigam in si Almasi subay makananam kabinsanaan maka kamatay. Maka si Almasi iya pikallum min kamatay du dahu min kamemon, bo' buwanan na kasawahan pikilan ma manga Yahudi maka ma manga aa iya 'nsa' Yahudi, supaya sigam kalappasan min hukuman dusa.&#8221;</div><div class="p"> 24Sakali itu, salta' peen si Paul ngandaawahan di na salaihi', bissalahan iya pak&#333;s&#333;g uk si Pistus, uk na, &#8220;Paul! Belaw kau! Kalandu' pahap langkaw pangadji' nu, iya na hi' makabelaw kau.&#8221;</div><div class="p"> 25Nambung si Paul, uk na, &#8220;Tuwan Balbangsa, 'nsa' aku belaw. Bannal sadja bissala ku itu, 'nsa' bissala belaw. 26Kitauhan asal uk Ampun Sultan pagbissalahan ta itu kamemon,&#8221; uk si Paul. &#8220;Hangkan aku makatawakkal missala ni iya, sabab makatantu aku in kamemon bayi patakka itu kasakupan asal uk na, sabab 'nsa' bayi kalimbungan. 27Ampun Sultan Agarippa,&#8221; uk si Paul, &#8220;magsabannal kau baha' ma bayi palatun manga kanabi-nabihan? Katauhan ku du in kaam magsabannal du.&#8221;</div><div class="p"> 28Uk si Agarippa ni si Paul, &#8220;Tapikil nu na baha' in aku magtuwi bo nu mag-Almasihin?&#8221;</div><div class="p"> 29Uk si Paul, &#8220;Minsan buttihi' magtuwi, atawa minsan ma tagg&#333;l, iya amu'-amu' ku na peen ni Tuhan bang peen kau, Ampun Sultan, sampay manga aa kamemon iya kake ma aku 'llaw itu, pasali' ni aku mag-Almasihin. Iya sadja subay 'nsa' kasalian bi iya bilanggu' pangingk&#333;t aku itu.&#8221;</div><div class="p"> 30Sakali nangge sultan maka gubnul maka si Bernike min paningkoan sigam, sampay manga sehe' sigam magtingkoan ian. 31Pagpakallo' peen sigam minnihi', magbissala sigam. Uk sigam, &#8220;Aa ian 'nsa' niya' sababan na pamapatayan atawa pamajilan iya.&#8221; 32Uk si Agarippa ni si Pistus, &#8220;Arapun iya bayi pilappa, suga' makalandu' na iya mikitukbal ni Sultan Mahatinggi.&#8221;</div>
 </div>
 </div>
</div>

Sakali itu missala na si Agarippa ni si Paul, uk na, “Pabaid ta na kau ngandaawahan di nu.” Manjari ninyal si Paul maka tangan na bo' iyampa nagna' ngandaawa.
“Ampun Sultan Agarippa,” uk na, “ma bistahan ku mehe kahapan ku sabab kau iya paalōpan ku 'llaw itu, sabu ku ngandaawahan di ku pasal bayi panuntut aku uk manga Yahudi. Mehe kakōgan ku sabab kasakupan nu iya addat Yahudi kamemon maka manga pagsualan sigam. Hangkan aku pamaap ni kau, bang peen kau 'nsa' siyumu pake ma aku.
“Kitauhan asal uk manga Yahudi kamemon bang salaingga bayi tuyu' ku sataggōl min kaonde' ku ma diyōm kakampungan ku, sampay isab mahi' ma Awrusalam. Taggōl na katauhan sigam aku. Kitauhan du uk sigam kapamōgbōg ku ma kalangnganan manga Parisi. 'Nsa' niya' makasali' ni manga Parisi bang bōgbōg du harap ni sara' agama Yahudi. Bannal manga Yahudi ian 'nsa' baya' muwan saksi' ma pasal ku. Na buttihi',” uk si Paul, “tiya' aku hiyukum ma sabab pangahōwat ku in bayi janji' Tuhan ni kamaasan kami tuman du. Iya du isab uk na hi' hiyōwat uk manga bangsa kami Yahudi sangpu' maka duwa, salta' peen sigam magtaat ni Tuhan 'llaw-sangōm. Ampun Sultan, iya hangkan aku tiyuntutan uk manga pagkahi ku Yahudi, ma sabab pangahōwat ku itu. Kaam manga kasehean iyu!” uk na, “Angay 'nsa' kaam ngahagad in Tuhan makallum aa magpatayan du pabing?
“Minsan aku bayi dahu, bayi pangannal ku subay aku muspusan kōsōg ku nagga' si Isa, aa Nasaret. Jari iya na hi' bayi kahinangan ku, waktu dahu ian mahi' ma Awrusalam. Bayi aku kabuwanan kapatut uk manga imam nakura', hangkan heka aa suku' Tuhan bayi lōōn ku ni diyōm jil. Taabut peen sigam pibōtangan hukuman ni kamatay, bayi aku pauyun ngaho'. Min heka isab bayi pabinsana' ku sigam ma diyōm manga kalanggalan kamemon, bo' supaya sigam talōgōs ngalabba min pame' sigam ma si Isa. Kalandu' pasu' atay ku ma sigam, hangkan sigam bayi abut ku ma manga kalahatan bangsa saddi supaya sigam kalaugan ku.”

“Iya na ko' hi' bayi tuyu' ku,” uk si Paul, “iya hangkan aku bayi pahi' ni Damaskus mo kapatut maka sulat panohoan bayi pamuwan aku uk manga nakura'. Na, Ampun Sultan,” uk si Paul ni si Agarippa, “lattu peen 'llaw, ma labayan peen aku, niya' bayi tanda' ku sawa min diyōm sulga', silaw le' min 'llaw. Magsahaya sawa hi' ma tōngōd ku sampay ma manga aa bayi sehe' ku maglangngan hi'. Pahantak kami kamemon ni tana'. Jari niya' take ku suwara halling ni aku ma bahasa Hibrani, uk na, ‘Saul! O Saul! Angay aku pidjala' nu? Paddi' pikilan nu nagga' aku. Sali' sapantun du sapi', kapaddian bang nagga' ma kabayaan dapu na.’ ‘Sayi kau iyu, Nakura'?’ uk ku. Uk na, ‘Aku iya si Isa, iya pidjala' nu na peen. Suga' nangge na kau tōōd,’ uk na. ‘Iya poon aku papanda' itu ni kau bo' kau tapene' ku sosohoan ku. Kawakilan kau ngalapal ma manga aa pasal in aku bayi tanda' nu 'llaw itu, maka ma pasal ayi-ayi iya pandaan ku ni kau ma sosongun. Papuwas ta du kau min pangantanan manga pagkahi nu Yahudi, maka min pangantanan bangsa saddi, iya song pamapahian ku kau. Subay sigam tabo nu supaya sigam makasayu tōōd, sali' hantang aa bang pikallatan mata, bo' sigam papinda min kalindōman tudju ni kasawahan, min pangantanan nakura' sayitan tudju ni ōkōman Tuhan. Manjari taampun du karusahan sigam sabab min pangandōl sigam ma aku,’ uk si Isa, ‘bo' pitōngōd sigam ma diyōman manga aa iya tapene' uk Tuhan.’ ”

“Hangkan ko', Ampun Sultan,” uk si Paul, “'nsa' bayi tasagga' ku iya bayi panda' ni aku ian min sulga'. Jari magnasihat na aku. Bayi tagnaan ku ma Damaskus, puwas na hi' ma Awrusalam, bo' ma kalohahan lahat manga Yahudi na, sampay isab ma manga aa 'nsa' Yahudi. Bayi panduan ku sigam kamemon subay ngalabba tōōd min dusa sigam bo' papinda me' ma Tuhan. Maka subay isab niya' kahinangan sigam hap tanda' saksi' in sigam bayi ngalabba na min dusa sigam. Iya na ko' hi' sababan na hangkan aku bayi siyaggaw uk manga Yahudi mahi' ma diyōm langgal pagkulbanan. Tiyuud aku uk sigam, arak piyatay, lipara tiyabangan na peen aku uk Tuhan sampay ni kabuttihian. Hangkan na aku tiya' nangge ma itu naksi' ni manga aa kamemon deyo'-langkaw. Sali' du bissala ku itu maka bayi bissala uk manga kanabi-nabihan ma masa awwal hi', maka uk si Musa, ma pasal pakaradjaan ma sosongun. Uk pamalatun sigam in si Almasi subay makananam kabinsanaan maka kamatay. Maka si Almasi iya pikallum min kamatay du dahu min kamemon, bo' buwanan na kasawahan pikilan ma manga Yahudi maka ma manga aa iya 'nsa' Yahudi, supaya sigam kalappasan min hukuman dusa.”
Sakali itu, salta' peen si Paul ngandaawahan di na salaihi', bissalahan iya pakōsōg uk si Pistus, uk na, “Paul! Belaw kau! Kalandu' pahap langkaw pangadji' nu, iya na hi' makabelaw kau.”
Nambung si Paul, uk na, “Tuwan Balbangsa, 'nsa' aku belaw. Bannal sadja bissala ku itu, 'nsa' bissala belaw. Kitauhan asal uk Ampun Sultan pagbissalahan ta itu kamemon,” uk si Paul. “Hangkan aku makatawakkal missala ni iya, sabab makatantu aku in kamemon bayi patakka itu kasakupan asal uk na, sabab 'nsa' bayi kalimbungan. Ampun Sultan Agarippa,” uk si Paul, “magsabannal kau baha' ma bayi palatun manga kanabi-nabihan? Katauhan ku du in kaam magsabannal du.”
Uk si Agarippa ni si Paul, “Tapikil nu na baha' in aku magtuwi bo nu mag-Almasihin?”
Uk si Paul, “Minsan buttihi' magtuwi, atawa minsan ma taggōl, iya amu'-amu' ku na peen ni Tuhan bang peen kau, Ampun Sultan, sampay manga aa kamemon iya kake ma aku 'llaw itu, pasali' ni aku mag-Almasihin. Iya sadja subay 'nsa' kasalian bi iya bilanggu' pangingkōt aku itu.”
Sakali nangge sultan maka gubnul maka si Bernike min paningkoan sigam, sampay manga sehe' sigam magtingkoan ian. Pagpakallo' peen sigam minnihi', magbissala sigam. Uk sigam, “Aa ian 'nsa' niya' sababan na pamapatayan atawa pamajilan iya.” Uk si Agarippa ni si Pistus, “Arapun iya bayi pilappa, suga' makalandu' na iya mikitukbal ni Sultan Mahatinggi.”

සවන් දෙන්න Hinangan 26