This Bible text is a corrected edition of the 1908 Western Cree Bible; it is in the public domain.

ᒥᒋᒫᐨ ᐅᐦᒋ ᑭᓭᒪᓂᑐ ᑭ ᐅᓯᐦᑖᐤ ᑭᓯᐠ ᒥᓇ ᐊᐢᑭ. ᐊᓂᒪ ᐊᐢᑭ ᓇᒪᐃᐧᔭ ᑭ ᑭᐢᑭᓇᐋᐧᓯᓈᑲᐧᐣ ᒥᓇ ᑭ ᐱᓯᓯᑳᐧᐤ; ᐁᑯᓯ ᐊᐧᓂᑎᐱᐢᑳᐤ ᑭ ᐊᔮᐤ ᑎᒥᕽ; ᐁᑯᓯ ᐅᐟ ᐊᐦᒑᐦᑲᐧ ᑭᓭᒪᓂᑐ ᑭ ᐸᐹ ᓱᐋᐧᑫᔨᐊᐧ ᐁ ᐊᐧᐢᑭᑎᐯᔮᑭ ᓂᐱᔭ. ᑭᓭᒪᓂᑐ ᒫᑲ ᑭ ᐃᑌᐧᐤ, ᒫᐦᑎ ᑭᑕ ᐋᐧᓭᔮᐤ; ᐁᑯᓯ ᑭ ᐋᐧᓭᔮᐤ. ᑭᓭᒪᓂᑐ ᒫᑲ ᑭ ᐋᐧᐸᐦᑕᒼ ᐋᐧᓭᔭᐤ ᐁ ᒥᔮᐧᓯᓂᔨᐠ; ᐁᑯᓯ ᑭᓭᒪᓂᑐ ᑭ ᐱᐢᑭᐦᑎᓇᒼ ᐋᐧᓭᔮᐤ ᐊᐧᓂᑎᐱᐢᑳᐤ ᐅᐦᒋ. ᑭᓭᒪᓂᑐ ᒥᓇ ᐁ ᐋᐧᓭᔮᔨᐠ ᑭᓯᑳᐤ ᑭ ᐃᓯᔨᐦᑳᑕᒼ, ᐁᑯᓯ ᐁ ᐊᐧᓂᑎᐱᐢᑳᔨᐠ ᑎᐱᐢᑳᐤ ᑭ ᐃᓯᔨᐦᑳᑕᒼ; ᐁᐊᐧᑯ ᐁ ᐅᑖᑯᓯᐠ ᒥᓇ ᐁ ᑫᑭᓭᐹᔮᐠ ᓂᐢᑕᒼ ᐁ ᑭ ᑭᓯᑳᐠ.
ᐁᑯᓯ ᑭᓭᒪᓂᑐ ᑭ ᐃᑌᐧᐤ, ᑭᔮᒼ ᑭᑕ ᐃᐦᑕᑲᐧᐣ ᐁ ᓇᔦᐊᐧᑕᑯᑌᐠ ᒣᑳᐧᐨ ᓂᐱᕽ, ᐁᑯᓯ ᑭᑕ ᐅᐦᒋ ᐱᐢᑭᐦᑎᓂᑳᑌᑭ ᓂᐱᔭ ᓂᐱᕽ ᐅᐦᒋ. ᑭᓭᒪᓂᑐ ᒫᑲ ᑭ ᐅᓯᐦᑖᐤ ᐁ ᓇᔦᐊᐧᑕᑯᑌᐠ, ᐁᑯᓯ ᑭ ᐱᐢᑭᐦᑎᓇᒼ ᐊᓂᐦᐃ ᓂᐱᔭ ᓯᐹ ᑳ ᓇᔦᐊᐧᑕᑯᑌᐠ ᑳ ᐊᔮᑭ, ᐊᓂᐦᐃ ᓂᐱᔭ ᐅᐦᒋ ᐃᐢᐱᒥᕽ ᐃᓯ ᑳ ᓇᔦᐊᐧᑕᑯᑌᐠ ᑳ ᐊᔮᑭ; ᐁᑯᓯ ᒫᑲ ᑭ ᐃᐦᑭᐣ. ᐁᑯᓯ ᑭᓭᒪᓂᑐ ᑳ ᓇᔦᐊᐧᑕᑯᑌᐠ ᑭᓯᐠ ᑭ ᐃᓯᔨᐦᑳᑕᒼ. ᐁᐊᐧᑯ ᐁ ᐅᑖᑯᓯᐠ ᒥᓇ ᐁ ᑫᑭᓭᐹᔮᐠ ᓂᓵᐧᐤ ᐁ ᑭ ᑭᓯᑳᐠ.
ᒥᓇ ᑭᓭᒪᓂᑐ ᑭ ᐃᑌᐧᐤ, ᒫᐦᑎ ᓂᐱᔭ ᓯᐹ ᑭᓯᑯᕽ ᑳ ᐊᔮᑭ ᐯᔭᑲᐧᓄᕽ ᑭᑕ ᒫᐊᐧᓴᑯᐸᔨᐊᐧ ᒥᓇ ᑭᔮᒼ ᐊᓂᒪ ᐹᑲᐧᐢᑲᒥᐠ ᑭᑕ ᓄᑲᐧᐣ; ᐁᑯᓯ ᑭ ᐃᐦᑭᐣ. ᒥᓇ ᑭᓭᒪᓂᑐ ᐊᐢᑭ ᑭ ᐃᓯᔨᐦᑳᑕᒼ ᐊᓂᒪ ᐹᑲᐧᐢᑲᒥᐠ; ᒥᓇ ᐁ ᑭ ᒫᒪᐃᐧᐸᔨᑭ ᓂᐱᔭ ᑭᐦᒋᑲᒥ ᑭ ᐃᓯᔨᐦᑳᑕᒼ; ᐁᑯᓯ ᑭᓭᒪᓂᑐ ᑭ ᐋᐧᐸᐦᑕᒼ ᐁᐊᐧᑫᐧᔨᐤ ᐁ ᒥᔮᐧᓯᓂᔨᐠ. ᒥᓇ ᑭᓭᒪᓂᑐ ᑭ ᐃᑌᐧᐤ, ᒫᐦᑎ ᐊᐢᑭ ᑭᑕ ᓂᐦᑖᐃᐧᑭᐦᑖᒪᑲᐣ ᒪᐢᑯᓯᔭ, ᒥᓇ ᒥᓂᓵᐦᑎᐠ ᒥᓇ ᑳ ᓵᑲᐢᑭᐠ ᑫ ᓂᐦᑖᐃᐧᑭᐦᒋᑫᒪᑲᕽ ᑫ ᒥᓂᓯᐃᐧᐟ ᐁ ᑐᐃᐧᑳᓂᐃᐧᐟ, ᑎᐱᔭᐤ ᑫ ᓂᐦᑖᐃᐧᑭᐦᐃᓱᐟ ᐊᐢᑭᕽ; ᐁᑯᓯ ᑭ ᐃᐦᑭᐣ. ᐁᑯᓯ ᐊᐢᑭ ᑭ ᓂᐦᑖᐃᐧᑭᐦᑖᒪᑲᐣ ᒪᐢᑯᓯᔭ, ᒥᓇ ᑳ ᓵᑲᐢᑭᐠ ᑳ ᓂᐦᑖᐃᐧᑭᒋᑫᒪᑲᕽ ᐁ ᑐᐃᐧᑳᓂᐃᐧᐠ, ᒥᓇ ᒥᐢᑎᐠ ᑳ ᒥᓂᓯᐃᐧᐟ ᑎᐱᔭᐤ ᑳ ᓂᐦᑖᐃᐧᑭᐃᓱᐟ, ᐁ ᑐᐃᐧᑳᓂᐃᐧᐟ; ᐁᑯᓯ ᑭᓭᒪᓂᑐ ᑭ ᐋᐧᐸᐦᑕᒼ ᐁ ᒥᔮᐧᓯᐠ. ᐁᐊᐧᑯ ᐁ ᐅᑖᑯᓯᐠ ᒥᓇ ᐁ ᑫᑭᓭᐹᔮᐠ ᓂᐢᑖᐧᐤ ᐁ ᑭ ᑭᓯᑳᐠ.
ᒥᓇ ᑭᓭᒪᓂᑐ ᑭ ᐃᑌᐧᐤ, ᒫᐦᑎ ᑭᑕ ᐊᔮᐊᐧᐠ ᑫ ᐋᐧᓭᔮᓯᑫᒋᐠ ᐁ ᓇᔦᐊᐧᑕᑯᑌᐠ ᑭᓯᐠ, ᑭᑕ ᐱᐢᑭᐦᑎᓂᑳᑎᐠ ᑭᓯᑳᐤ ᑎᐱᐢᑳᕽ ᐅᐦᒋ; ᑭᔮᒼ ᒫᑲ ᐁᐊᐧᑯᓂᐠ ᑭᑕ ᑭᐢᑭᓇᐋᐧᒋᐦᒋᑲᓂᐃᐧᐊᐧᐠ ᒥᓇ ᑭᑕ ᐅᐦᒋ ᐋᔨᐢᐱᑖᐊᐧᕽ, ᒥᓇ ᑭᑕ ᑲᑭᓯᑳᐠ, ᒥᓇ ᑭᑕ ᐊᔭᐢᑭᐊᐧᕽ; ᑭᔮᒼ ᒫᑲ ᐁᐊᐧᑯᓂᐠ ᑭᑕ ᐋᐧᓯᓱᐊᐧᐠ ᐁᑯᑕ ᐁ ᓇᔦᐊᐧᑕᑯᑌᐠ ᑭᓯᐠ ᑭᑕ ᐊᐧᓭᐢᑲᑭᐠ ᐊᐢᑭ; ᐁᑯᓯ ᒫᑲ ᑭ ᐃᐦᑭᐣ. ᐁᑯᓯ ᑭᓭᒪᓂᑐ ᑭ ᐅᓯᐦᐁᐤ ᓂᓱ ᐁ ᑭᐦᒋ ᐋᐧᓯᓱᔨᐟ; ᐊᓇ ᐊᔨᐋᐧᐠ ᑳ ᑭᐦᑳᔮᓴᐁᐧᐟ ᑭᑕ ᑎᐯᔨᐦᑕᕽ ᑭᓯᑳᐤ, ᐊᓇ ᒫᑲ ᓄᐦᑕᐤ ᑳ ᐃᐢᐱᑖᓴᐁᐧᐟ ᑭᑕ ᑎᐯᔨᐦᑕᕽ ᑎᐱᐢᑳᐤ; ᐊᒐᐦᑯᓴ ᒥᓇ ᑭ ᐅᓯᐦᐁᐤ. ᑭᓭᒪᓂᑐ ᒫᑲ ᑭ ᐊᔦᐤ ᓇᔦᐊᐧᒋ ᑭᓯᑯᕽ ᑭᑕ ᐋᐧᓭᐢᑲᑭᐠ ᐊᐢᑭ. ᑭᑕ ᑎᐯᔨᐦᑕᑭᐠ ᑭᓯᑳᐤ ᒥᓇ ᑎᐱᐢᑳᐤ, ᑭᑕ ᐱᐢᑭᐦᑎᓇᑭᐠ ᐋᐧᓭᔮᐤ ᐊᐧᓂᑎᐱᐢᑳᐤ ᐅᐦᒋ; ᐁᑯᓯ ᑭᓭᒪᓂᑐ ᑭ ᐋᐧᐸᐦᑕᒼ ᐁ ᒥᔮᐧᓯᐠ. ᐁᐊᐧᑯ ᐁ ᐅᑖᑯᓯᐠ ᒥᓇ ᐁ ᑫᑭᓭᐹᔮᐠ ᓀᐋᐧᐤ ᐁ ᑭ ᑭᓯᑳᐠ.
ᒥᓇ ᑭᓭᒪᓂᑐ ᑭ ᐃᑌᐧᐤ, ᒫᐦᑎ ᐊᓂᐦᐃ ᓂᐱᔭ ᑭᑕ ᐁᐧᔪᒋ ᓂᐦᑖᐃᐧᑭᐦᐁᐊᐧᐠ ᐊᓂᐦᐃ ᐅᓯᐦᒋᑲᓇ ᐁ ᐊᐧᐢᑲᐃᐧᔨᐟ ᒥᓇ ᐁ ᐱᒫᑎᓯᔨᐟ, ᒥᓇ ᑫ ᐸᐹᒥᔮᐟ ᐊᐢᑭᕽ ᐃᐢᐱᒥᕽ ᐃᓯ ᓇᔦᐊᐧᒋᑭᓯᑯᕽ. ᐁᑯᓯ ᑭᓭᒪᓂᑐ ᑭ ᐅᓯᐦᐁᐤ ᑭᐦᒋ ᐋᐧᐸᒣᑲᐧ, ᒥᓇ ᑳ ᐃᑕᓯᐟ ᐅᓯᐦᒋᑲᐣ ᑳ ᐊᐧᐢᑲᐃᐧᐟ ᐊᓂᑕ ᓂᐱᕽ ᑳ ᐅᐦᒋ ᐁᐧᔪᒋ ᓂᐦᑖᐃᐧᑭᒋᐠ, ᐁ ᑐᐃᐧᑳᓂᐃᐧᒋᐠ, ᒥᓇ ᑳ ᐊᐧᑕᐦᑕᐦᑲᐧᓂᐟ ᐁ ᑐᐃᐧᑳᓂᐃᐧᐟ; ᐁᑯᓯ ᑭᓭᒪᓂᑐ ᑭ ᐋᐧᐸᐦᑕᒼ ᐁ ᒥᔮᐧᓯᐠ. ᐁᑯᓯ ᑭᓭᒪᓂᑐ ᑭ ᓴᐁᐧᔨᒣᐤ, ᐁ ᐃᑌᐧᐟ, ᐃᐧ ᒥᔪ ᓂᐦᑖᐃᐧᑭᐦᐃᑐᐠ ᒥᓇ ᐃᐧ ᒥᐦᒉᑎᐠ, ᒥᓇ ᓵᑲᐢᑭᓇᐦᑖᐠ ᓂᐱᔭ ᑭᐦᒋᑲᒥᕽ, ᒥᓇ ᑭᔮᒼ ᑳ ᐸᐹᒥᔮᐠ ᑭᑕ ᐃᐧ ᒥᐦᒉᑎᐤ ᐊᐢᑭᕽ. ᐁᐊᐧᑯ ᐁ ᐅᑖᑯᓯᐠ ᒥᓇ ᐁ ᑫᑭᓭᐹᔮᐠ ᓂᔮᓇᓈᐧᐤ ᐁ ᑭ ᑭᓯᑳᐠ.
ᒥᓇ ᑭᓭᒪᓂᑐ ᑭ ᐃᑌᐧᐤ, ᒫᐦᑎ ᐊᐢᑭ ᑭᑕ ᓂᐦᑖᐃᐧᑭᐦᑖᒪᑲᐣ ᐁ ᐱᒫᑎᓯᔨᐟ ᐅᓯᐦᒋᑲᓇ ᐁ ᑐᐃᐧᑳᓂᐃᐧᔨᐟ, ᐊᐊᐧᑳᐣ ᒥᓇ ᑫ ᐱᒥᑖᒋᒧᒋᐠ, ᒥᓇ ᐊᐢᑭᐃᐧ ᐱᓯᐢᑭᐤ ᐁ ᑐᐃᐧᑳᓂᐃᐧᐟ; ᐁᑯᓯ ᒫᑲ ᑭ ᐃᐦᑭᐣ. ᐁᑯᓯ ᒫᑲ ᑭᓭᒪᓂᑐ ᑭ ᐅᓯᐦᐁᐤ ᐊᐢᑭᐃᐧ ᐱᓯᐢᑭᐊᐧ ᐁ ᑐᐃᐧᑳᓂᐃᐧᔨᐟ ᒥᓇ ᐊᐊᐧᑳᓇ ᑳ ᑐᐃᐧᑳᓂᐃᐧᔨᐟ, ᒥᓇ ᑲᐦᑭᔭᐤ ᑳ ᐸᐹᒥᑖᒋᒧᐟ ᐊᐢᑭᕽ ᐁ ᑐᐃᐧᑳᓂᐃᐧᐟ; ᐁᑯᓯ ᑭᓭᒪᓂᑐ ᑭ ᐋᐧᐸᐦᑕᒼ ᐁ ᒥᔮᐧᓯᐠ. ᒥᓇ ᑭᓭᒪᓂᑐ ᑭ ᐃᑌᐧᐤ, ᒫᐦᑎ ᐅᓯᐦᐋᑖᐣ ᐊᔨᓯᔨᓂᐤ ᑭᐟ ᐃᓯᓈᑯᓯᐃᐧᓂᓈᕽ ᑭᑕ ᓇᐢᐱᑖᑯᔭᕽ, ᒥᓇ ᑭᔮᒼ ᐃᐧᔭᐋᐧᐤ ᑭᑕ ᑎᐯᔨᒣᐊᐧᐠ ᑭᓄᓭᐊᐧ ᑭᐦᒋᑲᒥᕽ ᒥᓇ ᐱᔦᓯᓴ, ᒥᓇ ᐊᐊᐧᑳᓇ, ᒥᓇ ᑲᐦᑭᔭᐤ ᐊᐢᑭ; ᒥᓇ ᑕᐦᑐ ᑳ ᐸᐹᒥᑖᒋᒧᒋᐠ ᐊᐧᐢᑭᑕᐢᑲᒥᐠ. ᐁᑯᓯ ᑭᓭᒪᓂᑐ ᑭ ᐅᓯᐦᐁᐤ ᐊᔨᓯᔨᓂᐊᐧ ᐃᐧᔭ ᐅᐟ ᐃᓯᓈᑯᓯᐃᐧᓂᕽ, ᑭᓭᒪᓂᑐ ᐅᐟ ᐃᓯᓈᑯᓯᐃᐧᓂᕽ ᑭ ᐃᓯ ᐅᓯᐦᐁᐤ; ᓈᐯᐊᐧᔭ ᒥᓇ ᐃᐢᑫᐧᐊᐧᔭ ᑭ ᐃᓯ ᐅᓯᐦᐁᐤ. ᐁᑯᓯ ᑭᓭᒪᓂᑐ ᑭ ᓴᐁᐧᔨᒣᐤ ᒥᓇ ᑭᓭᒪᓂᑐ ᐅᒥᓯ ᑭ ᐃᑌᐤ, ᐃᐧ ᒥᔪ ᓂᐦᑖᐃᐧᑭᐦᐃᑐᐠ ᒥᓇ ᐃᐧ ᒥᐦᒉᑎᐠ, ᒥᓇ ᓵᑲᐢᑭᓇᐦᑖᐠ ᐊᐢᑭ ᒥᓇ ᓵᑯᑖᐠ, ᒥᓇ ᑎᐯᔨᒥᐦᑯᐠ ᑭᓄᓭᐊᐧᐠ ᑭᐦᒋᑲᒥᕽ, ᒥᓇ ᐱᔦᓯᓴ ᑳ ᐸᐹᒥᐦᐋᒋᐠ, ᒥᓇ ᑕᐦᑐ ᑫᑲᐧᐩ ᑳ ᐱᒫᑕᕽ ᑳ ᐊᐧᐢᑲᐃᐧᑖᒫᑲᕽ ᐊᐧᐢᑭᑕᐢᑲᒥᐠ. ᑭᓭᒪᓂᑐ ᒫᑲ ᑭ ᐃᑌᐧᐤ, ᒋᐢᐟ, ᑭ ᑭ ᒥᔨᑎᓈᐋᐧᐤ ᑳ ᐃᑕᐦᑐ ᓵᑲᐢᑭᐠ ᑳ ᓂᐦᑖᐃᐧᑭᐦᒋᑫᒪᑲᕽ ᐊᐧᐢᑭᐨ ᒥᓯᐁᐧ ᐊᐢᑭᕽ ᑳ ᐊᔮᐠ, ᒥᓇ ᑳ ᐃᑕᑖᐧᐢᑯᓯᐟ ᒥᐢᑎᐠ, ᐊᓇ ᒥᐢᑎᐠ ᑳ ᓂᐦᑖᐃᐧᑭᐦᑖᐟ ᒥᓂᓴ; ᑭᔭᐋᐧᐤ ᑭ ᑲ ᐅ ᒥᒋᐃᐧᓂᓈᐋᐧᐤ. ᒥᓇ ᑳ ᐃᑕᓯᐟ ᐱᓯᐢᑭᐤ ᐊᐢᑭᕽ ᑳ ᐊᔮᐟ, ᒥᓇ ᑳ ᐃᑕᐦᑐ ᐸᐹᒥᐦᐋᐟ, ᒥᓇ ᑳ ᐃᑕᓯᐟ ᑳ ᐸᐹᒥᑖᒋᒧᐟ ᐊᐢᑭᕽ ᑳ ᐱᒫᑎᓯᐟ, ᑭ ᑭ ᒥᔨᑎᓈᐋᐧᐤ ᑳ ᐃᑕᐦᑐ ᐅᓵᐊᐧᐢᑲᐧᐢᑭᐠ ᑳ ᓵᑲᐢᑭᐠ ᑭᑕ ᐅ ᒥᒋᐃᐧᓂᔦᐠ; ᐁᑯᓯ ᒫᑲ ᑭ ᐃᐦᑭᐣ. ᑭᓭᒪᓂᑐ ᒫᑲ ᑭ ᐋᐧᐸᐦᑕᒼ ᑕᐦᑐ ᑫᑲᐧᐩ ᑳ ᑭ ᐅᓯᐦᑖᐟ, ᒋᐢᐟ ᒫᑲ, ᓇᐢᐱᐨ ᑭ ᒥᔮᐧᓯᐣ. ᐁᐊᐧᑯ ᐁ ᐅᑖᑯᓯᐠ ᒥᓇ ᐁ ᑫᑭᓭᐹᔮᐠ ᓂᑯᑖᐧᓯᑳᐧᐤ ᐁ ᑭ ᑭᓯᑳᐠ.

සවන් දෙන්න ᒉᓂᓯᐢ 1