جٚه عیسی مسیحٚ رسول، پطرس، اینتخاب بوبوسته‌یأن، هو غریبٚ کسأنی وأسی کی پونتوس و غَلاطیه و کاپادوکیه و آسیا و بیطینیه میأن پراکندَه بوستیدی، اوشأنی رِه کی خودایٚ پئر جٚه قبل در موردٚ اوشأن دأنستی و خودا روحٚ تقدیس کودنٚ مره اینتخاب بوبوستید کی عیسی مسیحٚ جأ ایطاعت بوکونید و اونٚ خون اَشأنٚ سر بپاشأنه ببه.
خودا فیض و سلامتی شِمرِه فتّ و فراوان ببه.

موتبارک ببه خودا کی اَمی خوداوند عیسی مسیحٚ پئر ایسه و خو رحمتٚ عظیمٚ وأسی، عیسی مسیحٚ ویریشتن جٚه مورده‌یأنٚ دونیا اَمرأ، ایتأ اومیدٚ زنده وأسی، اَمرَ تولدٚ تازه ببخشه و ایتأ ارثیه وأسی کی خراب و آلودَه نیبه و همیشه پابرجایه. اَ ارثیه آسمانٚ میأن شِمرِه حفظ بوبوسته؛ و خودا شمرَ خو قودرت و شیمی ایمأنٚ اَمرأ موحافظت کونه، او نجاتٚ وأسی کی هسأ حاضره و آخرٚ زمأنٚ دورون آشکارَ به. و تومامٚ اَشأنٚ وأسی شادی کونیدی، اگه چی هسأ لازم بو ایتأ کوجه زمأت جورواجورٚ ایمتحانأنٚ اَمرأ غم و قورصه بدأرید. و اَطویی شیمی اصلٚ ایمأن ایمتحانٚ میأن ثابت ببه، و عیسی مسیحٚ ظوهورٚ موقع، باعیثٚ ستایش، جلال و حورمت ببه، هو ایمأن کی طلا جأ گیرانقیمت‌تره، هو طلا کی آتشٚ مره خالصَ به ولی ایروز جٚه بین شه. شومأن با اَنکی اونَ نیده‌ییدی، اونَ دوس دأریدی، هَطویم اگه چی الأن اونَ نیدِئن دریدی ولی اونَ ایمأن دأریدی و ایجور پور جلال شادی کونیدی کی نشأ اونَ تعریف کودن، چره کی شیمی ایمأنٚ نتیجه‌یَ یأفتن دریدی کی شیمی جانٚ نجات ایسه.
پیغمبرأنی کی جٚه او فیضی کی شِمرِه مقرر بوبوسته گب بزه‌یید، درباره‌یٚ اَ نجات دقتٚ اَمرأ تحقیق بوکودید. اوشأن سعی کودیدی کی بفهمید، وختی کی مسیحٚ روح اوشأنٚ وجودٚ دورون جٚه قبل شهادت دَیی کی مسیح وأ رنج بکشه و بعدٚ اون جلال بیأفه، کی‌یَ و چی وختی‌یَ ایشاره کودی. اوشأنٚ رِه آشکارَ بوسته کی شمرَ خدمت کودید نه خودشأنَ، او وختی کی جٚه چیزأنی گب زه‌ییدی کی هسأ شومأن اینجیلٚ موبشرأنٚ جأ ایشتأوید، اوشأنی کی روح‌القدسٚ قوّتٚ اَمرأ کی آسمانٚ جأ روانه بوسته، شمرَ بشارت دیهید. حتی فرشته‌یأن اوشأنٚ درکٚ رِه ناجه دأریدی.

پس شیمی حواسَ جمَ کونید و پرهیزکاری اَمرأ تومامٚ شیمی اومیدَ بنید او فیضٚ سر کی عیسی مسیحٚ ظوهورٚ موقع شمرَ عطا به. گوش کون زأکأنٚ مأنستن، دِه ونألید جاهیلی زمأنٚ خوأسته‌یأن شیمی زندگی‌یَ شکل بده. بلکی او قدوسٚ مأنستن کی شمرَ دعوت بوکوده، شومأنم تومامٚ شیمی رفتارأنٚ دورون موقدّس بیبید؛ چره کی بینیویشته بوبوسته: «موقدّس بیبید چونکی من قدوسم.»
شومأن، او کسی‌یَ پئر دوخوأنیدی کی هر کسَ اونٚ کارأنٚ وأسی بی‌طرفداری داوری کونه، پس شیمی غربتٚ دورانَ ترسٚ اَمرأ بوگذرأنید، چره کی دأنیدی زندگی باطیلٚ رأ و روشٚ جأ، کی شیمی پئرأنٚ جأ به ارث ببرده‌بید، آزادَ بوستید، نه طلا و نقره مأنستن چیزأنٚ اَمرأ کی جٚه بین شیدی، بلکی مسیحٚ گیران‌قیمتٚ خونٚ اَمرأ، هو بی‌عیب و نقصٚ بره. اون قبلٚ اَنکی دونیا خلق ببه، اینتخاب بوبوسته‌بو ولی هسأ کی آخرٚ زمأن ایسه شیمی وأسی ظوهور بوکوده. شومأن اونٚ وأسی خودایَ ایمأن بأوردید، هو خودایی کی اونَ مورده‌یأنٚ دونیا جأ ویریزأنه و جلال فدَه و اَطویی ایسه کی شومأن خودایَ ایمأن دأریدی و اونَ اومیدواریدی.
اَسأ کی حقیقتٚ جأ ایطاعت کودنٚ اَمرأ شیمی وجودَ پاکَ کودید کی برأر خأخورٚ مأنستن بی‌ریا همدیگرٚ اَمرأ موحبت بدأرید، پس وأ کس‌کسَ جٚه دیل و جان موحبت بوکونید. شومأن دوواره بدونیا بمویید، نه جٚه نوطفه کی جٚه بین شه بلکی جٚه خودا همیشگی کلام کی زنده ایسه و باقی مأنه. چونکی:
«اینسأنٚ نسل هَچین علفَ مأنه
و تومامٚ اونٚ جلال صارا گولأنٚ مأنه؛
علف خوشکَ به و گولأن فیویدی
ولی خوداوندٚ کلام تا اَبد باقی مأنه.»
و اَن او کلامی ایسه کی شمرَ بشارت بدَه‌ییدی.

සවන් දෙන්න ۱پطرس ۱