Matewu 5
5
Zwidiyo zwe ku Dombo
(5:1—7:29)
1Jesu wakati ebona mibunga ye bathu katatha dombo kagala pasi. Badiyiwa babe bakazha kunli, 2ngono katangisa kubadiya sahwoku:
Kushatha kwe lebeswa
(Luke 6:20-23)
3“Bakakombolegwa bashayi mu meya,
ngobe bushe gwe kudzimu nge gwabo.
4 #
Isaya 61:2
Bakakombolegwa banolila,
ngobe banowonyaladziwa.
5 #
Njimbo 37:11
Bakakombolegwa bana mimoyo minyolo,
ngobe banowothuwa shango.
6 #
Isaya 55:1, 2 Bakakombolegwa bana zhala ne nyota ye ndulamo,
ngobe Ndzimu unowobagutsha.
7Bakakombolegwa bana ngoni,
ngobe banowohwigwa ngoni.
8 #
Njimbo 24:3, 4 Bakakombolegwa bana mimoyo mitjena,
ngobe banowobona Ndzimu.
9Bakakombolegwa bagadzanyi,
ngobe banowodang'wa bana be Ndzimu.
10 #
1 Pita 3:14
Bakakombolegwa banodziyidzigwa ndulamo,
ngobe bushe gwe kudzimu nge gwabo.
11 #
1 Pita 4:14
“Makakombolegwa imwi ha bathu bemutuka kakale bemudziyidza kakale bemulebela bubi gose gwe manyepkhwa nge kwangu, 12#2 Zwiyitikalo 36:16; Mishingo 7:52shathani mu pululudze, ngobe mbhayilo wenyu nkulu u kudzimu, ngobe banomudziyidza sekwa bakadziyidza balebesambeli bakazha mbeli kwenyu.
Munyu ne tjedza
(Mako 9:50; Luke 14:34-35)
13 #
Mako 9:50; Luke 14:34, 35 “Ndimwi munyu we shango, koga ha munyu washuluka, ungabgwilizigwa njo wawo tjini wali? Ha utjina tjawakalulwamila ha kusi kulashigwa kuzhe koga kuti utshambiwe nge bathu.
14 #
Johani 8:12; 9:5 “Ndimwi tjedza tje shango. Nzi nkulu wakabakwa pezhugwi kwe dombo aungasumbikike. 15#Mako 4:21; Luke 8:16; 11:33Bathu naibo abangavoneke bakabe betshibikila lovone nge itundu. Banogubiga patjena gukavonekela mmwe ne mmwe umu ng'umba. 16#1 Pita 2:12Ndizoke tjedza tjenyu ngatjipenye sa ikoko mbeli kwe bathu kuti ndizo babone mishingo yenyu mibuya bakudze Tate benyu ba kudzimu.
Kudiya ngekwe nlayo
17“Musikumbule kuti ndakazha kuwokolomodza nlayo kene matama e balebesambeli, andizozha kuwozwikolomodza koga ndakazhila kuti matama iyawo ashingikale. 18#Luke 16:17Ndolebesa nditi, kudzina kupinda kudzimu ne shango, akuna na iyo shanga tukununu padzili dzose, kene bala dukununu lakakwagwa mu nlayo linowobhuda kudzina kose kushingikala. 19Iye unotjuluka mmwe ntukununu we milayo iyeyi kadiya bathu kuti bathamebo sa ikoko unowodang'wa ntukunu tjose mu bushe gwe kudzimu, koga iye unowothama kakale kadiya milayo iyeyi unowodang'wa nkulu mu bushe gwe kudzimu. 20Ndomudwa tjose nditi, ha kululwama kwenyu kusingapinde kwe Bafarasi ne badiyi be nlayo, nge malebeswa amungangine mu bushe gwe kudzimu.
Kudiya ngekwe kugwadzamoyo
(Luke 12:57-59)
21 #
Kufuluka 20:13; Matama 5:17 “Makahwa kuti kwakadwiwa bathu ba ntolo kuyi, ‘Usibulaye, ngono iye unobulaya unowosumikilisiwa.’ 22Koga ndomubudza kuti iye wagwadzilamoyo ikamu tjitje unowosumikilisiwa. Kakale iye unotuka ikamu tjitje unowodabidzana ne Gulukota, na iye unoti ‘Tjilengwe ndiwe,’ wakalingisana ne moto usingadzime. 23Ndizo, ha udusa tjipo tjitjo tjinopisiwa pa tjibeso ukakumbula kuti ikamu tjitjo tjong'ong'ola nge kuko, 24siya tjipo itjetjo mbeli kwe tjibeso, uyende. Tje kutanga gadzana ne ikamu tjitjo, ndizo ukoshanduka uwopa tjipo tjitjo.
25“Tjimbidza ugadzane ne una nlandu nawe, mutji mu zila muyenda ku nlayo kuti ndizo iwoyo wakutilika nlandu asidwe ekuyisa ku nsumikilisi, ngono nsumikilisi ekokuyisa ku nlindi, ukoyisiwa ku ng'umba ye busungwa, 26ndokubudza malebeswa nditi, autowobhuda mukati kudzina ulipa nge mari e bupelo.
Kudiya ngekwe bupombgwe
27 #
Kufuluka 20:14; Matama 5:18 “Makahwa kuti kukayi, ‘Musiyite bupombgwe.’ 28Koga ndomudwa nditi, iye unolinga nkadzi nge kun'yemula wayita bupombgwe kale naye mu moyo uwe. 29#Matewu 18:9; Mako 9:47Ha zhisho lilo le luji likuthama kuti uyite jinyo ulikonyombole ulilashe. Koyita, kuti ulashikigwe nge ndungululo ye mbili uwo ing'ompela pana kuti mbili uwo wose ulashigwe mu moto usingadzimike. 30#Matewu 18:8; Mako 9:43Ne luboko gugo gwe luji ha gukuthama kuti uyite jinyo uguthubule ugulashe. Koyita, kuti ulashikigwe nge ndungululo ye mbili uwo ing'ompela pana kuti mbili uwo wose uyende ku moto usingadzimike.
Kudiya ngekwe kuthubukana mu ndobolo
(Matewu 19:9; Mako 10:11-12; Luke 16:18)
31 #
Matama 24:1-4; Matewu 19:7; Mako 10:4 “Kakale kwakayi, ‘Iye unolamba nkadzi uwe ngaampe lukwalo gwe kunlamba.’ 32#Matewu 19:9; Mako 10:11, 12; Luke 16:18; 1 Bakorinta 7:10, 11Koga ndomudwa nditi, iye unolamba nkadzi uwe kuzhe kwe nlandu we bupombgwe, unonthama kuti abe phombgwe, koga iye unolobola nkadzi wakalambiwa unothama bupombgwe.
Kudiya ngekwe kutuna
33 #
Zwipo 19:12;
Mbalo 30:2; Matama 23:21 “Kakale makahwa kuti kwakayi ku bathu ba ntolo, ‘Usitune manyepkhwa, koga wakafanila shingila She tjawatuna nge kwatjo.’ 34#Jakubo 5:12; Isaya 66:1; Matewu 23:22Koga ndomudwa nditi, musigale matuna, kene nge kudzimu, ngobe tjigalo tje bushe gwe Ndzimu, 35#Isaya 66:1; Njimbo 48:2kene nge shango, ngobe tjigalo tje makumbo e Ndzimu, kene nge Jerusalema, ngobe nzi nkulu wa mambo. 36Usitune nge nsholo uwo, ngobe aungashandule vudzi likabe jena kene likabe dema. 37Tjaunoleba ngatjibe ‘Ee’ kene ‘Aa’ koga, ngobe tjimwe ne tjimwe tjinopaphiwa pezhugwi kwa ikoku tjodwa mu bubi.
Kudiya ngekwe kubgwilizila
(Luke 6:29-30)
38 #
Kufuluka 21:24; Zwipo 24:20; Matama 19:21 “Makahwa kuyi, ‘Zhisho ngalilipiwe nge zhisho kakale zhino nge zhino.’ 39Koga ndomudwa nditi, musinyanyayidzane ne nthu mbi. Ha nthu ekuloba mu lushaya gwe luji, umpe gumwe lushaya. 40Ngono ha mmwe ekusekesa ekulipisa ekutolela hempe iyo, unletje atole kose ne baki tjitjo. 41Kakale ha mmwe ekukombeledza kuyenda khilomitha ing'ompela, yenda naye khilomitha mbili. 42Unokukumbila umpe, kakale usinyime unoadzima mukuli.
Idani zwita zwenyu
(Luke 6:27-28, 32-36)
43“Makahwa kuyi, ‘Ida wawakabakidzana naye, ngono ushime tjita tjitjo!’ 44Koga ndomudwa nditi, idani zwita zwenyu kakale mutembezelele banomudziyidza, 45kuti ndizo mube bana ba Tate benyu ba kudzimu banobhudisila zhuba babi ne balulwami, bakanisila vula balulwami ne basi balulwami. 46Ha muda banomuda mowowana mbhayilo weni? Apa bakhethisi abatothama sa ikoko kene? 47Kakale ha mudumilisa zwikamu zwenyu zoga mopinda bamwe ngeni kene? Apa bathu basibagalimoyo abatokuyitabo ikoku kene? 48#Zwipo 19:2; Matama 18:13Ibeni balulwami bakapelela sa Tate benyu be kudzimu bakalulwama kwakapelela.
Выбрано:
Matewu 5: KBTP
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Kalanga Bible © Bible Society of Botswana, 2008, 2018.