San Juan 1

1
Ñeñth Poꞌñoñ pen Parets ñeñthña acheñetosets ñeñthara ñeñth Cristoterrets
1Awathotheñ eꞌñe ñanom paꞌmothrotheñ Cristoñapaꞌ eñalla epoet Pompor Parets. Ñañapaꞌ ñeñthara ñeñthchaꞌ Poꞌñoñ phaꞌ Parets tharroꞌmar ñach eñotaterreꞌ acheñeneshaꞌ ateth oteñ Yompor Parets. Tharraña ñapaꞌxhoꞌña eꞌñe atthekma partsoten ateth partsoten Pompor ñeñth atarr nanak Parets. 2Allempo errteꞌ ayexhkatarethta pats, ñañapaꞌ eꞌñe parro alloꞌtsen epoet Pompor Parets. 3Ñeñthoꞌmarña allowen esokmañen ñeñth eñall, ñapaꞌ ña eꞌñe yexhkatweꞌ ñeñth ateth moenet epoet Pompor. Ñeñth allpon eñallpaꞌ ama eñalle ñeñth ama yexhkato ña, amaꞌt esotholla, ñokma poeyexhkatar. 4Ñañapaꞌ añepaꞌt ñeñth alloch eꞌñe yokrrena. Ñeñthña alloch eꞌñe yokrrenapaꞌ ñeñthchaꞌ yeñotaterreꞌ allowen ñeñth kowen enten Pompor Parets. Ñeñthoꞌmar ñapaꞌ ateth pena ñerraꞌmrratheꞌ poetareꞌ tharroꞌmar ñapaꞌ ñach aꞌpoetarsamperreꞌ allowen yokthaphña. 5Amaꞌt ateth pena sosyaꞌtsañexhno añe patsro ñerraꞌmrratheꞌ chekmeteꞌ, ñañapaꞌ eꞌñe aꞌpoetareswos. Chekmeteꞌñapaꞌ amaꞌt awathapaꞌ amach errothenoth aꞌchekmetamperrano ñeñth poetarñatser ñeñth Yompor poꞌkowenña.
6Amaꞌt allempo ama orrtenaꞌ Cristo ñeñthchaꞌ poetarñatsotosets arr patsro, ñanempaꞌ añ orrtatsa poesheñarr yakma ñeñthpaꞌ añ paꞌsoꞌcheñ Juan; ñapaꞌ Yompor llesenseꞌ. 7Ñapaꞌ añekop wapa ñach aꞌpothoseꞌ atthoch wapa Cristo arr patsro ñeñthchaꞌ aꞌpoetarsamperreꞌ allowen yokthaphña. Atthoña ña poꞌñoñothpaꞌ ameꞌñatosana acheñeneshaꞌ. 8Tharraña Juanpaꞌ ama añeyaye ñeñthchaꞌ poetarñatsotosets arr patsro; ñapaꞌ añekpa wapa atthoch aꞌpothosan ñeñthchaꞌ aꞌpoetarsamphsañtostsa. 9Allempoña xhap añe patsro ñeñth poetarñatsotosets tharroꞌmar añ poetarñatser ñeñth eꞌñe poꞌñoxh ñeñthchaꞌ aꞌpoetarsamphsoseꞌ allowen acheñeneshaꞌ pokthaphña, ñeñthpaꞌ alletsa, oꞌch orrtosa añe patsro.
10Amaꞌt añ patspaꞌ ño poeyexhkatareñ, acheñeneshaꞌña arr patsropaꞌ arepaꞌtchaꞌ kowenayeꞌ agapapeto tharroꞌmar ama eseshayeꞌ eñotapaye. 11Amaꞌt arr xhapañ eꞌñe ña pamoꞌtseshesho, pamoꞌtseshaꞌñapaꞌ arepaꞌtchaꞌ kowenayeꞌ agapapeto. 12Tharraña poesheñaꞌtets ñeñth eꞌñe kowen agapyesapoeꞌ, amaꞌt allowen ñeñthchaꞌ ameꞌñerraya ña, ñetñapaꞌ apoerranet llesens atthoch eꞌñe poechemer perranet Yompor Parets. 13Ñeñth attho poechemer perrey Yompor ñeñthpaꞌ ama attheyaye ateth yeꞌñalletena ya ñeñthey arromñathey. Tharroꞌmar ñeñth attho yeꞌñalletena arr patsropaꞌ ñeñthpaꞌ ateth anarethey ya ñeñthey arromñathey. Ñamha attho poechemer oꞌ perrey Yompor, ñeñthpaꞌ ama añotheyaye ñeñth ateth kothapeꞌchateney poꞌpsheñeñ acheñ pokthaphña. Yapaꞌ añothña oꞌ poechemer perrey Yompor attho oꞌ moenaterrey eꞌñe ña pokthaphña.
14Cristoña ñeñth Poꞌñoñ pen Yompor oꞌ acheñetos arr patsro, oꞌ yeyxhañ eꞌñe parro mameꞌ añe patsro. Ñapaꞌ atarr amoerañtosa. Ñamha attho yexhatosey Yompor poꞌñoñ ñeñthña ñoñetspaꞌ eꞌñe poꞌñoxh ateth, ama shekëñtsoyaye amaꞌt mamesha. Ñamha yapaꞌ xhokma yentoñeꞌth poꞌkowenña. Ñeñthña poꞌkowenñapaꞌ ateth ñerraꞌm Pompor ñeñth poꞌpathrror peneꞌ ña. 15Allempoña Juan poerranarothpaꞌ aꞌpothan Cristo, ñeñthpaꞌ ateth eñora ñokop:
—Añmapaꞌ ñeñthkaꞌyeña notaseꞌth awaña, ñeñthchaꞌ wapatsa chentaꞌ ñapaꞌ atarr awamenkatheshaꞌ, nañapaꞌ ama tama awamenkatheyayno, tharroꞌmar ñapaꞌ awathotheñ eñalla. Amaꞌt allempo neꞌñalleta na, ñañapaꞌ eñalla. Ñeñthpaꞌ allowa ateth ot Juan ñenmath Cristokop.
16Ñapaꞌ atarr amoerañtosa ñeñthoꞌmarña alloweneypaꞌ atarr bensareꞌtampeney. Alloꞌna sen yebensareꞌtampesneneꞌ. 17Ñoñets ñeñth ateth anareth awathotheñpaꞌ ñeñth kellkonay Moisés awath. Tharraña Jesucristopaꞌ ñaña orrtatoseꞌña moereñets ñamha ñapaꞌ añ orrtatonay ñoñets ñeñth eꞌñe poꞌñoxh Yompor poꞌñoñ alloch yekeshperra. 18Yompor Paretspaꞌ amaꞌt awathapaꞌ ama eseshayeꞌ poentare. Poꞌpathrrorña ñeñth Cristotosets ñeñthpaꞌxhoꞌña Parets ñeñth eꞌñe parro atthekmoet; ñapaꞌ ña yeñotaterreꞌña ateth penaña Pompor Parets.
Juan ñeñth apatañtetsa Yomporekop, ñapaꞌ atarr kowentatosan Jesucristo
(Mt. 3.11-12; Mr. 1.7-8; Lc. 3.15-17)
19Allempo judioneshaꞌ paꞌmhchaꞌtaretherneshaꞌ ñetñapaꞌ moeñet acheñ Jerusaléñoth ñeñthchaꞌ awanmatsa Juanesho. Añ moeñet judioneshaꞌ poꞌkornaneshar ñamha levitaneshaꞌ ñeñth poꞌtarwas peneꞌ oꞌch thorrenet Parets paꞌpakllo. Ñetpaꞌ añekop amñarethtet ñetchaꞌ aꞌphthoꞌtoset Juan ñapaꞌ eseshaꞌtheꞌña. Oꞌña xhapoet ñeshopaꞌ ateth otoset:
—Phapaꞌ ¿eseshapeꞌtña, amaꞌt añeyaype ñeñthephchaꞌ Cristoterrets?
20Juanñapaꞌ ama aꞌnasoto; attho aꞌmethapaꞌ ñapaꞌ ateth otapanet:
—Napaꞌ amakaꞌye añeyayno ñeñthchaꞌ Cristoterrets.
21Ñetñapaꞌ alla otereterr:
—Ñeñthepñapaꞌ ¿eseshapeꞌtña, amaꞌt añeyaype Elías ñeñth aꞌmhtayeꞌth awath Yompor poꞌñoñ?
Ñañapaꞌ ateth oterraneterr:
—Amakaꞌye ñeñtheyayno.
Ñetñapaꞌ alla aꞌphthoꞌtereterr:
—Amapaꞌ ñatoꞌ ¿añephtheꞌ ñeñthephchaꞌ aꞌmhterreꞌ Yompor poꞌñoñ ñeñth yekwen?
Ñañapaꞌ alla oterraneterr:
—Amakaꞌye ñeñtheyayno.
22Ñetñapaꞌ alla otereterr:
—Ñeñthepñapaꞌ ¿eseshapeꞌtña pha? Yapaꞌ yemneñkaꞌye oꞌch photey allochñapaꞌ oꞌch yoteraꞌ ñeñth yemñeneꞌ. ¿Errothenaꞌtchaꞌña photeyña phokop?
23Ñañapaꞌ ateth oterraneterr:
—Napaꞌ nokopkaꞌye eñoseꞌthña Isaías ñeñth aꞌmhtayeꞌth Yompor poꞌñoñ awath. Allempopaꞌ atethkaꞌ oteꞌth:
Eꞌmorrterrach poesheñarr poꞌñoñ all amayo allchaꞌ serrpareꞌtaterranña acheñeneshaꞌ. Poerranarothpaꞌ añchaꞌ tomaꞌntaterranet thoñ ñapaꞌ atethchaꞌkaꞌye oterranet: “Saꞌkowenetyes thoñ allchaꞌ oñmos Partseshaꞌ oꞌch eꞌñe saꞌpaxharretyesoñ paꞌtheph.”
24Ñewa, ñeñth amñarethtatsa Juanesho, ñetpaꞌ añkaꞌye moeñenawet ñeñth fariseoneshaꞌ ñeñthara judioneshaꞌ paꞌmhchaꞌtaretherneshaꞌ. 25Ñetñapaꞌ alla otereterr Juan:
—Arepaꞌt Cristoyaypepaꞌ esoꞌmarwañakaꞌyeña phapatenña Yomporekop, arepaꞌt Elíasoyaype, arepaꞌt añeyaype ñeñthchaꞌ aꞌmhterreꞌ Yompor poꞌñoñ.
26Juanñapaꞌ ateth oterraneterr:
—Napaꞌ amaꞌt napatyen Yomporekoppaꞌ eꞌñekaꞌye oñochaya napatyenanet. Tharraña oꞌ xhap sesho poꞌpsheñeñ ñeñth ello atarr sherbets, tharraña sapaꞌ amakaꞌye señoteñeña sa. 27Ñapaꞌ amaꞌtchaꞌ chenta wapapaꞌ ñapaꞌ ñeñthkaꞌyeña ello atarr sherbets; nañapaꞌ ama es nesherbeno atthoch amaꞌt poꞌsapatrexhapaꞌ oꞌch nepyampes.
28Ñewa, allpaꞌ atethkaꞌye penet all oteñet Betábara allara Jordanaso yomhtaꞌn tharroꞌmar Juanpaꞌ allkaꞌye apatyenanña acheñeneshaꞌ Yomporekop.
Jesuspaꞌ ñeñth atmaꞌntatareth carnero ñeñth amtsarethtatseꞌth ochñartsokop
29Tsapathña Juan allempo entapan Jesús ñeshoneth en, ñañapaꞌ ateth otan acheñeneshaꞌ:
—Añkaꞌyeña ñeñth oꞌ llesenserr Yompor ñeñthchaꞌ Poꞌcarneror pen, ñach yawanmamperreꞌ yoꞌchñar alloweney ñeñthey añe patsroꞌtsaꞌyeney, tharroꞌmar ñach rromoerrets yoꞌchñarekop atethchaꞌ perra ateth amtsarethtena carnero ochñartsokop. 30Añmapaꞌ ñeñthkaꞌyeña notaseꞌth awaña: “Ñeñthchaꞌ wapatsa chentaꞌpaꞌ ñapaꞌ atarr awamenkatheshaꞌ, nañapaꞌ ama tama awamenkatheyayno, tharroꞌmar ñapaꞌ awathotheñ eñalla. Amaꞌt allempo neꞌñalleta na, ñañapaꞌ eñalla.” 31Amaꞌt na awañmoꞌchapaꞌ ama neñoteñe eseshaꞌtheꞌña ñeñthchaꞌ wapatsa chentaꞌ ñeñthchaꞌ Cristoterrets. Tharraña napaꞌ añekpaña nowena nach apatyesnomoeꞌ acheñeneshaꞌ oño, atthochña norrtaterrñañ israelenaꞌtarneshakop ñeñth poꞌñoxh Poechemer pen Yompor.
32Allempoña Juanpaꞌ eñotatan acheñeneshaꞌ ñapaꞌ ateth otanet:
—Na awaña allempo napataph Jesúspaꞌ Yomporña Poekamkëñ eꞌñe ateth nentaph ñerraꞌmrratheꞌ yeph oꞌ sowaꞌnma entoth, xhap eꞌñe Jesúsesho. 33Amaꞌt allempo napaꞌ ama neñoteñe ñeñththeꞌña Yompor Poechemer tharraña Yompor ñeñth oꞌ llesenserren atthoch napatyes acheñeneshaꞌ oño, ñapaꞌ atethkaꞌye otenen: “Esempoch pent oꞌ sowaꞌnma Nekamkëñ oꞌch xhap eꞌñe ñesho ñeñthchaꞌ chorrosaya, ñapaꞌ ñeñthchaꞌkaꞌyeña chorraterrawetña Parets Poekamkëñ.” 34Na poꞌñoxhpaꞌ oꞌkaꞌye neñch ñeñthoꞌmar theꞌpaꞌ neñotatenes ñeñthkaꞌyeña Yompor Poechemer.
Ñeñth ñanom poeyochreshaꞌ phaꞌ Jesús
35Tsapathñapaꞌ poꞌpocheño all then Juan epoet epsheña poeyochreshaꞌ. 36Kowenan Jesús all chopeñeꞌchen aꞌyeneth, alla oterraneterr:
—Añkaꞌyeña ñeñth Poꞌcarneror pen Yompor.
37Ñeñthña epsheña poeyochreshaꞌ allempo eꞌmet ateth oteñ Juan, ñetñapaꞌ allentha kothaꞌnmet Jesús. 38Poetallesnomtsaña Jesúspaꞌ entapanet kothaꞌneñet chentaꞌ ñañapaꞌ ateth otapanet:
—¿Esoꞌtña semnen?
Ñetñapaꞌ ateth ochet:
—Maestro, ¿erraꞌtña pexhap?
39Ñañapaꞌ ateth otanet:
—Soktherrenkaꞌye oꞌch senteñaꞌ.
Ñetñapaꞌ allentha kothaꞌneret Jesús oꞌch enteñetaꞌ all aꞌposa. Alla aꞌposet ñamet ñeñthe yethro tharroꞌmar allempopaꞌ oꞌ mamhamena oꞌch ellerren.
40Ñewa, ñeñthña epsheñoꞌmaret ñeñth eꞌmoeꞌ ateth oten Juan ñeñth kotheꞌ Jesús, poesheñarr ñeñthpaꞌ Andrés ñeñth Simón Pedro paꞌmoꞌnasheñ. 41Andrésñapaꞌ allorokma awerr eꞌnerrayaꞌ Simón; oꞌña enteraꞌpaꞌ ateth otwerr:
—Yapaꞌ oꞌkaꞌye yenter Mesías. (Ñewa, ñeñthña ñoñets Mesías añkaꞌye otenet ñeñthchaꞌ Cristoterrets.)
42Andrésñapaꞌ allentha anerran paꞌmoꞌnasheñ Simón Jesúsesho. Jesúsñapaꞌ kowapoeꞌpaꞌ ateth otaph:
—Phaꞌtña Simón, ñeñtheph poechemer pen Jonás. Theꞌpaꞌ nesocherrephchaꞌ Cefas (ñeñthara soꞌchñets ñeñth otenet griegaxho Pedro).
Attho Jesúspaꞌ xhoreꞌtan Felipe ñamha Natanael atthoch poeyochreshaꞌ perranet
43Tsapathña Jesúspaꞌ sechena oꞌch awerr Galileo. Allña entwenan Felipe ñañapaꞌ ateth otweñ:
—Amaꞌt pemno oꞌch phokthenen.
44Ñewa, Felipepaꞌxhoꞌña galileoꞌmarneshaꞌ, ña paꞌnetserpaꞌ añ paꞌsoꞌcheñ Betsaida ñeñthara ñamha Andrés paꞌnetser ñamha Pedro. 45Felipeñapaꞌ entwenan Natanaelpaꞌ ateth otweñ:
—Yapaꞌ oꞌkaꞌye yenter ñeñth ñokop kellkëꞌth Moisés all orrtatan ñoñets ñeñth ateth anareth, ñamha ñokop kellkëꞌth ñeñth aꞌmhtaꞌyesayeꞌth Yompor poꞌñoñ. Añepaꞌtkaꞌye Jesús ñeñth wetsa Nazaretoth ñeñth José poechemer.
46Natanaelñapaꞌ ateth otapan Felipe:
—Nazaretothpaꞌ amaꞌt awathapaꞌ amakaꞌye wenoña ñeñth eꞌñe kowen acheñ.
Felipeñapaꞌ ateth otererr:
—Poꞌñoxh orrakaꞌye oꞌch penteñaꞌ.
47Natanaelpaꞌ allentha awoꞌ oꞌch entenanaꞌ Jesús. Jesúsñapaꞌ entapan Natanaelpaꞌ ñañapaꞌ ateth eñora ñokop:
—Añkaꞌyeña poꞌñoxh poesheñarr israelneshaꞌ ñapaꞌ amakaꞌye shekëno amaꞌt mamesha.
48Natanaelñapaꞌ ateth otosan Jesús:
—Napaꞌ ¿errothenotheꞌtña peñotenen? Amakaꞌye pentarno.
Jesúsñapaꞌ ateth otererr:
—Allempo ama aꞌsechenphaꞌ Felipe nesho, allempo phapaꞌ alla phanen mañtho higocho nañapaꞌ nentenephkaꞌye.
49Natanaelñapaꞌ ateth otererr:
—Maestrochaꞌ pepaꞌtña Yompor Poechemereph. Pepaꞌtña Amhchaꞌtareth ñeñth atarr kowen allowen israelneshaꞌ.
50Jesúsñapaꞌ otererr:
—Napaꞌ oꞌ notaph napaꞌ nenteneph allempo phanen mañtho higocho, ñeñthoꞌmartheꞌña oꞌ phameꞌñaꞌna. Theꞌñapaꞌ oꞌch notas, elloña theꞌpaꞌ nanakchaꞌ senterrnan nepartsoña ñeñth ama tama sentennanaꞌ.
51Jesúsñapaꞌ alla otererr:
—Poꞌñoxhkaꞌ notenes, senterrchaꞌ enet atorareth ñamha Yompor poꞌmhllañotheñreneshaꞌ aꞌtaxhenet ñamha sowaxhenet eꞌñe nesho, na Ñeñthen Acheñetosets.

Выбрано:

San Juan 1: ame

Выделить

Поделиться

Копировать

None

Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь

YouVersion использует файлы cookie, чтобы персонализировать ваше использование приложения. Используя наш веб-сайт, вы принимаете использование нами файлов cookie, как описано в нашей Политике конфиденциальности