Matthaia 5
MIZ
5
Tlâng chunga thusawi
1Tichuan, mipuite chu a hmuhin tlângah a kal chho va; tin, a ṭhu a, a zirtîrte a hnênah an lo kal a; 2tin, thu a sawi a, anmahni a zirtîr a.
Engthâwlna thu
(Lk 6.20-23)
3“Rilrua retheite chu an eng a thâwl e;
vânram an ta a ni si a.
4Lungngaite chu an eng a thâwl e;
thlamuanin an la awm dâwn si a. #Is 61.2
5Thuhnuairawlhte chu an eng a thâwl e;
lei hi an la rochung dâwn si a. #Sam 37.11
6Felnaa rilṭâma tuihâlte chu an eng a thâwl e;
an la tlai dâwn si a. #Is 55.1-2
7Mi khawngaih thei takte chu an eng a thâwl e;
khawngaih an la hlawh dâwn si a.
8Thinlunga thianghlimte chu an eng a thâwl e;
Pathian an la hmu dâwn si a. #Sam 24.3-4
9Remna siamtute chu an eng a thâwl e;
Pathian faa vuahin an la awm dâwn si a.
10Felna avânga tihduhdah tuar hnute chu an êng a thâwl e;
vânram an ta a ni si a. #1 Pet 3.14
11“Miin keimah avânga an hau che ua, an tihduhdah che ua, dâwta sual tinrênga an hêk hunah che u, in eng a la thâwl ang. #1 Pet 4.14 12Lâwm ulangin, nasa takin hlim rawh u; vânah in lâwmman a awm hnem si a; chutiang bawkin in hmaa zâwlnei awmte pawh an tihduhdah ṭhin kha. #2 Chr 36.16; Tirh 7.52
Chi leh êng
(Mk 9.50; Lk 14.34-35)
13“Lei chi in ni e; nimahsela, chi hi a dâk tawh chuan engin nge an tihal leh ang? Chuta chinah chuan paih chhuaha, mihringte rah mai mai chauhvah lo chuan, eng atân mah a tlâktlai lo.#Mk 9.50; Lk 14.34-35
14“Khawvêl êng in ni e. Tlâng chhîpa khaw awm chu thuhrûk theih a ni lo. #Joh 8.12, 9.5 15Miin khâwnvâr hâlin hrai hnuaiah an dah ngai lo, a dahnaah an dah zâwk ṭhîn; tichuan, in chhûnga mi zawng zawng a ên ṭhîn. #Mk 4.21; Lk 8.16; 11.33 16Chutiang bawkin in êng chu mi mit hmuhin êng rawh se; chutichuan, in thiltih ṭhatte an hmu ang a, in Pa vâna mi an chawimawi thei ang. #1 Pet 2.12
Dân chungchâng
17“Dân thu emaw, zâwlneite thu emaw tiboral tûra lo kal ka nih ring suh u; tiboral tûra lo kal ka ni lo va, tifamkim tûra lo kal ka ni zâwk. 18Tihtakmeuhvin ka hrilh a che u, lei leh vân hi a boral hma loh chuan dân thua mi chhunhan tê tak tê emaw, thai han tê tak tê emaw, pakhat mah a boral tawp lo vang, a zaa a thlen kim hma loh zawng. #Lk 16.17 19Chutichuan, tu pawh hêng thupêk tê ber zîngah hian pakhat pawh bawhchhiaa, chutiang ti ve tûra mite zirtîr apiang chu, vânramah chuan mi tê ber an ti ang; amaherawhchu, tu pawh zâwma, zirtîr ve apiang chu, vânramah chuan mi lian an ti ang. 20In felnain lehkhaziaktute leh Pharisaite felna hi a khûm loh chuan, vânramah in lût tawp lo vang tih ka hrilh che u a nih hi.
Thurin chungchâng
21“Hmânlaia mite hnênah chuan, ‘Tualthah tûr a ni lo,’ an tih leh, ‘Tu pawh tualthat apiang chu a chungthu rêl a ni ang,’ tih a nih in hria a. #Ex 20.13; Deut 5.17 22Kei erawh chuan ka hrilh a che u, tu pawh a unau chunga thinur apiang chu, a chungthu rêl a ni ang a; tu pawh a unau, ‘mi chhawihpa,’ ti apiang chu, rorêlna sânga a chungthu rêl a ni ang; tin, tu pawh, ‘mi âpa,’ ti apiang chu, Gehenna meia kal tlâk a ni ang tih ka hrilh a che u. 23Chutichuan, maichâm bula thilpêk i hlan lai ngeia, i unauvin i chungah lungnih lohna a nei tih i hriat chhuah leh chuan, 24chuta maichâm hmaah chuan i thilpêk chu hnutchhiah la, kal langin, i unau chu rem zet la, chumi hnuah chuan i thilpêk chu rawn hlân rawh. 25I khingpui chu kalkawnga in kal dun laiin rem thuai rawh; chuti lo chuan, i khingpui chuan rorêltu a mantîr ang chia, rorêltu chuan tiangkengtu hnênah chuan a pe ang chia, tân inah an khung hlauh dah ang che. 26Tihtakmeuhvin ka hrilh a che, pawisa tê pawh i tlâk kim hma loh chuan, chuta ta chu i chhuak lo hul hual ang.
Uire chungchâng
27“ ‘I uire tûr a ni lo,’ an ti tih in hre tawh. #Ex 20.14; Deut 5.18 28Kei erawh chuan, tu pawh ngaih châka hmeichhia melh apiang chu, a thinlungah a uire tawh reng a ni tih ka hrilh a che u. 29Tin, i mit ding lamin a tihtlûk che chuan, kher chhuak la, paih daih rawh; i taksa a puma Gehenna-a paih ai chuan, i taksa pêng pakhat boral chu i tân a ṭha zâwk a ni. #Mt 18.9; Mk 9.47 30Tin, i kut ding lamin a tihtlûk che chuan, tan la, paih daih rawh; i taksa a puma Gehenna-a kal ai chuan, i taksa pêng pakhat boral chu i tân a ṭha zâwk a ni. #Mt 18.8; Mk 9.43
Inmâk chungchâng
(Mt 19.9; Mk 10.11-12; Lk 16.18)
31“ ‘Tu pawh nupui ma apiang chuan inmâkna lehkha a hnênah pe rawh se,’ an ti bawk a. #Deut 24.1-4; Mt 19.7; Mk 10.4 32Kei erawh chuan, tu pawh tlangvâl ngaih vâng ni lova nupui ma apiang chuan, amah chu a uiretîr a ni; tin, tu pawh mâk hnu nei apiang chu a uire a ni tih ka hrilh a che u. #Mt 19.9; Mk 10.11-12; Lk 16.18; 1 Kor 7.10-11
Chhechham chungchâng
33“Hmânlaia mite hnênah, ‘Dâwtah chhia chham suh la, Lalpa hnênah i chhechhamte chu hlen zâwk rawh,’ an ti tih in hre tawh bawk a. #Lev 19.12; Num 30.2; Deut 23.21 34Kei erawh chuan ka hrilh a che u, chhia rêng rêng chham suh u; vân chhâlin chham suh u, chu chu Pathian lalṭhutphah a ni si a; #Jak Is 66.1; Mt 23.22; Jak 5.12 35lei chhâlin chham hek suh u, chu chu a ke nghahchhan a ni si a; Jerusalem chhâlin chham hek suh u, chu chu Lal ropui tak khawpui a ni si a. #Sam 48.2; Is 66.1 36I lu chhâlin i chham tûr a ni hek lo, samzai pakhat pawh i tivârin i tidum thei si lo va. 37Nimahsela, in thusawi chu ‘a ni’ chu ni, ‘a ni lo’ chu ni lo ngawt rawh se; chûng aia chuang aliam chu sual laka chhuak a ni.
Phuba lâk chungchâng
(Lk 6.29-30)
38“ ‘Mit aiah mit, ha aiah ha,’ an ti tih in hre tawh. #Ex 21.24; Lev 24.20; Deut 19.21 39Kei erawh chuan ka hrilh a che u, mi sual dodâl suh u; i biang ding lama bêngtu hnênah chuan a lehlam pawh dawh rawh. 40Tin, tu pawhin i lakah thupawi siamin, i kawr lâk a tum chuan, i puan pawh lâktîr nghâl rawh. 41Tin, mêl khat kala phût luitu apiang che hnênah chuan mêl hnih kal rawh. 42A dîltu che hnênah pe la, i laka pûk duhtu chu hawisan suh.
Hmêlma hmangaih tûr
(Lk 6.27-28, 32-36)
43“ ‘I vêngte hmangaih la, i hmêlma haw rawh,’ an ti tih in hre tawh. #Lev 19.18 44Kei erawh chuan ka hrilh a che u, in hmêlmate chu hmangaih ula, a tiduhdahtu che u chu ṭawngṭaisak rawh u, 45in Pa vâna mi fate in nih theih nân; ani chuan mi sualte leh mi ṭhate chungah chuan a ni a chhuahtîr ṭhîn a, mi felte leh mi fel lote chungah pawh ruah a sûrtîr ṭhîn a ni. 46In hmangaitute chauh in hmangaih hian lâwmman eng nge in hmuh ang? Chhiahkhawntute pawhin chutiangin an ti ve lâwm ni? 47Tin, in unaute chauh chibai in bûk hian eng nge in tih hnem chuan bîk? Jentailte pawhin chutiangin an ti ve lâwm ni? 48Chutichuan, in Pa vâna mi a ṭha famkim angin in ṭha famkim tûr a ni. #Lev 19.2; Deut 18.13