Mathew 5
THADKUKI-BSI
5
Mol Chunga Athuhil
1Aman mipi chengse chu amun, molvum chungah akaltouvin; chuin ama atouvin ahile aseijuite chu ahengah ahungun;
2Chuin ama apaodoh-in, amaho chu hiche thuhi ahil pantan ahi.
Nunnom Tahbeh
(Luk 6:20-23)
3Lhagaova vaichaho anunnom ahiuve;
ijeh inem itile van lenggam chu
amaho-a ahi.
4 # Isai 61:2. Alhaseteho anunnom ahiuve;
ijeh inem itile lhep lungmonga umding ahiuve.
5 # Labu 37:11. Mi lungnengteho anunnom ahiuve;
ijeh inem itile amahon leiset chung alo dingu ahi.
6 # Isai 55:1-2. Chonphatna lama gilkel le dangchah ho anunnom ahiuve;
ijeh inem itile amaho chu vading ahiuve.
7Milungset teho anunnom ahiuve;
ijeh inem itile amaho chu kilungset ding ahiuve.
8 # Labu 24:3-4. Milungthengho anunnom ahiuve;
ijeh inem itile amahon Pathen amu dingu ahi.
9Misucham ho anunnom ahiuve;
ijeh inem itile amaho chu Pathen chate kiti ding ahiuve.
10 # 1 Pet 3:14. Chonphat jala bolsetna thohho anunnom ahiuve;
ijeh inem itile van lenggam chu amaho-a ahi.
11 # 1 Pet 4:14. Keima jala mihon nahouset uva, nabolset uva, chule nachung uva jouthu-a thugilou asei tengule anunnom nahiuve. 12#2 Thusm 36:16; Sol 7:52. Kipah-un, hapan kipah-un; ijeh inem itile van'a nasan dingu kipaman atame; ijeh inem itile nangho masanga anaum themgaoho jong chu mihon chutobangma chun abolseuvin ahi.
Chi le Meivah
(Mrk 9:50; Luk 14:34-35)
13Nangho leiset chi nahiuve: ahin chi khu tam tahenlang hile, ipi-a ki-al sah dingham? Chukalle apanna umtapontin, paidohle mihemte chotpha dingbou ahitai.
14 # Jhn 8:12; 9:5. Nangho vannoi vah nahiuve. Lhang vuma khopi chu akisel theipoi. 15#Mrk 4:21; Luk 8:16; 11:33. Min meivah avah-in, lo akhukhum ngaipoi, atunna chunga akoijin; chuteng in sunga um chengse chu asalvah bouvin ahi. 16#1 Pet 2:12. Hiche bang chun navah-u chu miho angah kilanghen, chuteng amahon nachon phatnao chu mu theijuntin, chule van'a um na-Pau chu avahchoi dingu ahi.
Dan Chung Changa Thuhil
17Keima danthu le themgaoho thu sumang dinga hungin neingaito hih-un; asumanga hung hilouvin, asubulhit dingjoh-a hung kahibouve. 18#Luk 16:17. Ijeh-inem itile tahbeh-a kaseipeh nahiuve, Vanle lei aman kahse-a, danthu chu jemsipah penle ajem halsicha jong aboncha abulhin masangse-a mang lou ding ahi. 19Hijeh chun koi hijongle hiche thupeh neopen lah-a khat suse-a, chule chutobanga bol ding hila chu, van lenggama aneopena kisei ding ahi; chule koi hijongle anitna, chule chutobanga hila vang chu, van lenggama alenpena kisei ding ahi. 20Ijeh-inem itile kaseipeh nahiuve, Nangho danthu sunho le Pharisai ho sanga nachon phatnao achung nunjoh louva ahile, van gama nalut louhel dingu ahi.
Lunghan Chung Changa Thuhil
21 # Pot 20:13; Danb 5:17. Tolthat hih-un; koi hijongle tolthat chu thupi tanna-a dinga kicha jinga umding ahi, tia malai mite jah-a kisei thu chu najataove. 22Ahivangin keiman nangho jah-a kasei ahi, Koi hijongle ajeh beija asopi lunghan khuma chu thupi tanna-a dinga kicha jinga umding ahi; chule, koi hijongle asopi, Raca, #5:22: Raca: lhoh bei. tia chu houvaipoloi kikhopna-a dinga kicha jinga umding ahi. Chule koi hijongle asopi, Mingol, tia chu damun meidila dinga kicha jinga umding ahi. 23Hiche jeh chun maicham mun'a thil to ding nachoija nahunga, nasopi nachunga alung himona nahetdoh-a ahile, 24Nathil to ding chu maicham koma chun dalhanlang, chen, nasopi chutoh gakicham masan, chujoule hungin nathil to ding chu toh-in.
25Nahehpa chu lampia naum petnin kichampin, achuti loule nahehpan thutan vaihom henga leh lutnin natin, thutan vaihom chun sottolle khutnah pedoh-in natin, chuteng aman songkul'a nakhum ding ahi. 26Tahbeh-a kaseipeh nahi, Nangman achai nakei paisa keh khat geija nasahsoh masangse-a, iti jongle chua kona napotdoh louhel ding ahi.
Jonthanhoi Chung Changa Thuhil
27 # Pot 20:14; Danb 5:18. Jonthanhoi bol hih-in, tia malaija kisei chu nanghon najataove; 28Ahivangin keiman nangho kaseipeh nahiuve, koi hijongle numei jonlunga vea chu amanu chutoh alunga jonga ahitai. 29#Matt 18:9; Mrk 9:47. Chule namit jetlamin nasuhmo le, kaldoh inlang paimangin; ijeh-inem itile natahsa pumpi damuna lelutna aum sangin, natibah khat aman ding nang dingin aphajoi. 30#Matt 18:8; Mrk 10:11-12. Chule nakhut jetlamin nasuhmo le, hi jong chu satlhan lang paimangin; natahsa pumpi-a damuna nachuh sangin, natibah khat aman dinga nang dinga phajo ahi.
Jida Chung Changa Thuhil
(Matt 19:9; Mrk 10:11-12; Luk 16:18)
31 # Danb 24:1-4; Matt 19:7; Mrk 10:4. Chule, Koi hijongle aji da-a chun, dana lekha pehen, kitisa ahi; 32#Matt 19:9; Mrk 10:11-12; Luk 16:18; 1 Cor 7:10-11. Ahivangin keiman najah uva kasei ahi, Ajon jeh tailouva thu dang jeh-a aji da-a chun, ajinu chu ajonsah ahi; chule koi hile akidasa numei chu akichenpia jong chu ajonga ahi.
Kihahsel Chung Changa Thuhil
33 # Thmpu 19:21; Minb 30:2; Danb 23:21. Chukitle, jouvin Kihahsel hih-un, naki hahselna chu Pakai henga molson, tia malai mite jah-a kiseisa chu najataove; 34#Jac 5:12; Isai 66:1; Matt 23:22. Ahivangin keiman najah uva kasei ahi; Imachan kihahsel hih-un, van min panin kihah sel hih-un, Pathen touna ahi jeh-in; 35#Isai 66:1; Labu 48:2. Chule lei min panin kihahsel hih-un, ijeh-inem itile hichu akengto ngapna ahi. Jerusalem min panin kihahsel hih-un; ijeh-inem itile hichu Leng chungnung khopi ahi. 36Naluchang panin kihahsel hih-un; ijeh-inem itile nangman nasam jang khat jengcha jong nakansah navomsah theipon ahi. 37Ahin nasei chu ahile ahi, ahiloule ahilou hijenghen; hicheng kalval chu agilouva kona bou ahitai.
Kiphulah Chung Changa Thuhil
(Luk 6:29-30)
38 # Pot 21:24; Thmpu 24:20; Danb 19:21. Mit khela mit, ha khela ha, tia kisei chu najataove; 39Ahivangin keiman nangho jah-a kasei ahi, Migilou thuh hih-un; amavang koi hile nangeiphe jetlam benga chu, lang khat jong dopeh-in. 40Koi hile heh dinga nago-a nasangkhol sungnung lah dinga go-a chu, naponlen jong chu pe jengin. 41Koi hile apoh po dinga nacham louva bola mile khat napuija chu, mile ni chepin. 42Nahenga thuma chu pen, nahenga thilpa thuma chu kihei mangsan hih-in.
Melma Ngailut Ding
(Luk 6:27-28,32-36)
43 # Thmpu 19:18. Naheng nakom ngailunlang, chule namelma teu hotbolun, tia kisei chu najataove; 44Ahivangin, keiman nangho jah-a kasei ahi, namelma teu ngailuvin, nagaosap teo chu phatthei boh-un, nahoteu chu phatbolun, chule nadangdat teole nabolseteu dingin taopeh-un; 45Chutilebou van'a na-Pau chate nahithei dingu ahi. Ijeh-inem itile aman migiloule mipha chunga anisa asosah gelin, chule michonpha le michonse chunga go ajuhsah gelin ahi. 46Ijeh-inem itile nanghon nangailu teo jeng chu nangailut uva ahile, ipi kipaman nasan dinguham? Kaidonghon jong chutima chu abolu hilouham? 47Chule nasopiu jengmai salam naboh uva ahile, midang ipi-a nakhelnao umam? Kaidonghon jong chutia chu abol louham? 48#Thmpu 19:2; Danb 18:13. Hijeh chun van'a um na-Pau aphat chamkimsoh bangin, nangho jong chamkimun.

Thadou Kuki CL (Re-edited) - Pathen Thutheng BU

Copyright © 2015 by The Bible Society of India
Used by permission. All rights reserved worldwide.

Узнать больше о Pathen Thutheng BU - BSI