Maꞈtehˬ 5
5
Gawˬ jawˬ kʼoeˇ taˆ dawˬ mehˬ mehˬ-euˬ
1Yeˬsuˇ tsawˇ haˬ aˇ maꞈ maꞈ ma-ahˇ ya mawˇ ngeh, gawˬ jawˬ uˬ du daˆ leˇ-awˇ nuiˇ-awˇ, aˬ yawꞈ-euˬ zaˬ lahˇ deuˬ aˬ yawꞈ-euˬ dawˬ peh uiˬ laˇ-euˬ meh. 2Kʼoeˇ ngeh, aˬ yawꞈ maꞈ-ahˇ heu loꞈ-ehˇ mehˬ nehˬ tsoˆ nehˬ-euˬ meh.
Guiˬ lahˬ huiˬ-eu gaˇ kawˆ
(Luˇkaꞈ 6.20-23)
3“Nui ma laꞈ kʼoeˇ shaˬ-eu zahˬ-eu tsawˇ haˬ deuˬ guiˬ lahˬ huiˬ-eu meh.
Aˬ jeˬ miˇ neh ehˇ naˇ, mˬ taˆ miˇ kʼahˬ-aˬ, aˬ yawꞈ maꞈ-euˬ miˇ kʼahˬ pyeuꞈ-eu meh.
4“Noeˬ shaˬ noeˬ zahˬ-eu tsawˇ haˬ deuˬ guiˬ lahˬ huiˬ-eu meh.
Aˬ jeˬ miˇ neh ehˇ naˇ, aˬ yawꞈ maꞈ-ahˇ bi noeˬ saˇ laˇ tehꞈ-a.
5“Nui nahˬ nui yu ahˇ-eu tsawˇ haˬ deuˬ guiˬ lahˬ huiˬ-eu meh.
Aˬ jeˬ miˇ neh ehˇ naˇ, miˇ tsaˬ dawˬ tawˆ luꞈ aˬ yawꞈ maꞈ-ahˇ oꞈ-eu jeˬ biˇ meh.
6“Yaw tsaˬ yaw dawˇ jeˬ-ahˇ mehꞈ-eu shuꞈ-eu tsawˇ haˬ deuˬ guiˬ lahˬ huiˬ-eu meh.
Aˬ jeˬ miˇ neh ehˇ naˇ, yaw tsaˬ yaw dawˇ jeˬ-ahˇ aˬ yawꞈ maꞈ ya dzaˬ ya dawˇ dehˆ tehꞈ-a.
7“Gʼawˬ shaˬ gaˬ nya-eu tsawˇ haˬ deuˬ guiˬ lahˬ huiˬ-eu meh.
Aˬ jeˬ miˇ neh ehˇ naˇ, aˬ yawꞈ maꞈ-ahˇ Miˬyehˇ gʼawˬ shaˬ gaˬ nehˬ tehꞈ-a.
8“Nui ma laꞈ kʼoeˇ muiˬ-eu shawˇ-eu tsawˇ haˬ deuˬ guiˬ lahˬ huiˬ-eu meh.
Aˬ jeˬ miˇ neh ehˇ naˇ, aˬ yawꞈ maꞈ Miˬyehˇ-ahˇ ya mawˇ tehꞈ-a.
9“Tsaˬ leˇ dzoeˇ leˇ ni mˇ-eu tsawˇ haˬ deuˬ guiˬ lahˬ huiˬ-eu meh.
Aˬ jeˬ miˇ neh ehˇ naˇ, aˬ yawꞈ maꞈ-ahˇ Miˬyehˇ-euˬ zaˬ lehˇ kuˇ tehꞈ-a.
10“Yaw tsaˬ yaw dawˇ jeˬ mˇ-eu baˬ da neh, kʼehˬ-eu kʼaˆ-eu jeˬ-ahˇ ya daˬ-eu tsawˇ haˬ deuˬ guiˬ lahˬ huiˬ-eu meh.
Aˬ jeˬ miˇ neh ehˇ naˇ, mˬ taˆ Miˆ kʼahˬ-aˬ, aˬ yawꞈ maꞈ-ahˇ oꞈ-eu jeˬ biˇ meh.
11“Naw maꞈ ngaˬ-euˬ mehˬ nah caw teh-eu baˬ da neh, aˬ cawˬ yehˬ bawˬ sehˇ lu-ehˇ ehˇ-eu, kʼehˬ-eu kʼaˆ-eu, maˬ ngeuˇ gaˇ keuˆ ni gʼawˬ mya jeˬ ja bu ja doeˇ-eu, heu deuˬ-ahˇ naw maꞈ ya daˬ ngeh, guiˬ lahˬ huiˬ-eu meh. 12Laˬ kʼaˬ cehˇ dui dui-awˬ. Aˬ jeˬ miˇ neh ehˇ naˇ, mˬ kʼoeˇ taˆ naw maꞈ gʼaˇ duˬ lehˬ hmˬ taˬ-euˬ laꞈ sawˬ huiˬ dui dui meh. Naw maꞈ-euˬ mehˬ hu dehꞈ dzeuˇ jawˇ dzeuˇ yaꞈ-euˬ Miˬyehˇ gʼaˇ duˬ ngehˬ dah-eu deuˬ kʼawꞈ, kʼoeˇ loꞈ-ehˇ kʼehˬ nehˬ kʼaˆ nehˬ gaˇ ya daˬ-euˬ meh.
Saˬ deuꞈ hawˇ-eu yaw shehꞈ
(Maˬkuˆ 9.50; Luˇkaꞈ 14.34-35)
13“Naw maꞈ-aˬ, miˇ tsaˬ zaˬ dawˬ tawˆ luꞈ gʼaˇ duˬ saˬ deuꞈ pyeuꞈ-eu meh. Ehˇ kʼawꞈ, saˬ deuꞈ kʼoeˇ saˬ ca taˆ-eu byoˆ-iˇ naˇ, aˬ joˆ-ehˇ paˇ taˆ laˇ nya nmˇ. Miˇ tsa tahˬ dzeh-awˇ, tsawˇ haˬ nawˬ nawˬ-ehˇ bi cah-eu uˬ taꞈ, aˬ jeˬ gaˇ dahˇ paˇ tsoeˬ nmˇ.
14“Naw maꞈ-aˬ, miˇ tsaˬ dawˬ tawˆ luꞈ gʼaˇ duˬ yaw shehꞈ pyeuꞈ-eu meh. Gawˬ jawˬ uˬ du jaˆ-eu meuˬ-ahˇ maˬ dehˬ kaˬ zaꞈ nya-a. 15Tsawˇ haˬ tiˬ gʼaˬ-iˬ, tsiˇ kʼmˬ doꞈ-awˇ kʼaˆ puˬ neh maˬ moꞈ tsahˬ taˬ-a. Ehˇ kʼawꞈ, tsiˇ kʼmˬ doꞈ taˬ duˬ kʼoeˇ taˆ ciˬ daˆ-awˇ, pehˬ zaˬ ma zaˬ mawˇ nya ni yaw shehꞈ bi bya-eu meh. 16Kʼoeˇ gaˇ duˇ ni, naw maꞈ neh mˇ-euˬ yaw muiˬ jeˬ-ahˇ aˬ cawˬ mawˇ-awˇ, mˬ kʼoeˇ taˆ jawˇ-eu naw maꞈ-euˬ Aˬda-ahˇ ja ceuˬ ni, aˬ cawˬ mehˬ shi naw maꞈ-euˬ yaw shehꞈ yaw kʼaˆ-ehˇ bi bya-awˬ.
Zahˇ dawˬ kʼoꞈ dawˬ gaˇ kawˆ
17“Zahˇ dawˬ kʼoꞈ dawˬ hawˇ-eu Miˬyehˇ gʼaˇ duˬ ngehˬ dah-eu deuˬ neh mehˬ taˬ tsoˆ taˬ yaꞈ-euˬ dawˬ deuˬ-ahˇ laˆ cawˆ le-eu gʼaˇ duˬ ngaˇ oe-euˬ nga lehˇ naw maꞈ taˬ noeˬ. Kʼoeˇ deuˬ-ahˇ laˆ cawˆ-eu gʼaˇ duˬ oe-euˬ maˬ ngeuˇ. Mˇ byah-eu gʼaˇ duˬ oe-euˬ ma. 18Ngaˇ naw maꞈ-ahˇ dawˇ coe ni ehˇ nehˬ nyaˇ. Mˬ hawˇ-eu miˇ kʼaˇ ziꞈ kʼoeˇ keuˆ ni maˬ ehˇ, Zahˇ dawˬ kʼoꞈ dawˬ laꞈ kʼoeˇ kʼaˇ ahˇ-eu jeˬ dawˬ tawˆ luꞈ maꞈ byah laˇ kʼoeˇ keuˆ ni maˬ ehˇ, Zahˇ dawˬ kʼoꞈ dawˬ laꞈ kʼoeˇ boꞈ taˬ-euˬ aˇ boꞈ boꞈ zaˬ tiˬ boꞈ tehꞈ-ehˇ kʼawꞈ maˬ byoˆ-iˇ-aˇ. 19Kʼoeˇ miˇ neh, zahˇ dawˬ kʼoꞈ dawˬ heu deuˬ laꞈ kʼoeˇ, aˬ cawˬ naˆ maˬ tseˇ nyiˇ dzehˬ-eu tiˬ dawˬ na-ahˇ yawˬ ha maˬ caw teh-eu uˬ taꞈ, aˬ cawˬ maˬ bi caw teh ni mehˬ-eu tsoˆ-eu tsawˇ haˬ aˬ geu gʼaˬ maˬ kaˬ, mˬ taˆ Miˇ kʼahˬ laꞈ kʼoeˇ aˬ cawˬ naˆ maˬ tseˇ teˬ dui nyiˇ dui dui tehꞈ-a. Ehˇ kʼawꞈ, zahˇ dawˬ kʼoꞈ dawˬ kʼoeˇ deuˬ-euˬ mehˬ nah yawˬ ha caw teh-awˇ, aˬ cawˬ kʼawꞈ caw teh ni mehˬ nehˬ tsoˆ nehˬ-eu tsawˇ haˬ aˬ geu gʼaˬ maˬ kaˬ, mˬ taˆ Miˇ kʼahˬ laꞈ kʼoeˇ aˬ cawˬ naˆ maˬ tseˇ huiˬ dzehˬ mahˇ dzehˬ tehꞈ-a. 20Ngaˇ naw maꞈ-ahˇ ehˇ nehˬ nyaˇ. Zahˇ dawˬ kʼoꞈ dawˬ mehˬ-eu saˬ laˬ deuˬ hawˇ-eu Paˬliˬsehˇ deuˬ naˆ maˬ tseˇ naw maꞈ yaw tsaˬ yaw dawˇ jeˬ maˬ ahˇ dzehˬ naˇ, mˬ taˆ Miˇ kʼahˬ laꞈ kʼoeˇ naw maꞈ maˬ ya uˇ leˇ-a.
Nui ma pehˇ-eu gaˇ kawˆ
21“Aˇ hu tsawˇ haˬ deuˬ-ahˇ ehˇ taˬ-euˬ dawˬ naw maꞈ ya gaˬ-euˬ meh. ‘Tsawˇ haˬ maˬ ya sehꞈ-a. Tsawˇ haˬ sehꞈ-eu tsawˇ haˬ-aˬ, yaˇ kʼaˬ daˇ gaˇ ya daˬ meh’ lehˇ ehˇ taˬ-euˬ meh. 22Ehˇ kʼawꞈ, naw maꞈ-ahˇ ngaˇ heu loꞈ-ehˇ ehˇ-eu ma. Yawˬ ha-euˬ mehˇ nmˇ#5.22 ‘Mehˇ nmˇ’ lehˇ ehˇ-eu-aˬ, jah-eu tsawˇ haˬ yaw kaˬ tiˬ gʼaˬ tiˇ gʼaˬ kuˇ taꞈ-eu tsawˇ myahˇ meh. -ahˇ nui ma pehˇ-eu tsawˇ haˬ aˬ geu gʼaˬ maˬ kaˬ, yaˇ kʼaˬ daˇ gaˇ ya daˬ tehꞈ-a. Yawˬ ha-euˬ mehˇ nmˇ-ahˇ yaˬ kʼehˇ yaˬ-eu tsawˇ haˬ-aˬ, yaˇ kʼaˬ daˇ-eu deuˬ-euˬ mehˬ shi bi sheuˬ keuˆ gʼeh tehꞈ-a. Yawˬ ha-euˬ mehˇ nmˇ-ahˇ, ‘Miˬyehˇ-ahˇ maˬ siˬ nya-eu tsawˇ cawˆ’ lehˇ ehˇ-eu tsawˇ haˬ-aˬ, shiˬ buiˇ lah ma-ahˇ ya shaˬ tehꞈ-a. 23Nawˇ lawˇ duˬ kʼoeˇ taˆ tiˬ jeˬ paˬ lawˇ-eu lehˇ gʼeh ngeh, nawˬ-euˬ mehˇ nmˇ nawˬ-ahˇ nui ma maˬ saˇ-eu gaˇ kawˆ tiˬ jeˬ na jaˆ gaˇ noeˬ doˆ laˇ naˇ, 24lawˇ-eu shehˇ-eu jeˬ-ahˇ lawˇ duˬ mehˬ shi bi jaˆ yaꞈ-awˇ, nawˬ-euˬ mehˇ nmˇ nehˬ-ehˇ jahˇ tsaˬ geuꞈ gʼaˬ miˇ tsa paˇ gʼoꞈ poˆ laˇ-awˇ, lawˇ-eu shehˇ-eu jeˬ mˇ-awˬ.
25Nawˬ-ahˇ yaˇ kʼaˬ ja-eu tsawˇ haˬ nehˬ-ehˇ yaˇ kʼaˬ daˇ-eu nymˇ-ahˇ le luꞈ ngeh, naw nyaꞈ yaw kaˬ yaw kawˇ-ehˇ laˆ tsaꞈ geuꞈ-awˬ. Yaw kawˇ-ehˇ maˬ laˆ tsaˬ geuꞈ naˇ, tsawˇ haˬ kʼoeˇ gʼaˬ nawˬ-ahˇ yaˇ kʼaˬ daˇ-eu gʼaˬ-euˬ laꞈ-ahˇ aˬ nehˬ tehꞈ-a. Yaˇ kʼaˬ daˇ-eu gʼaˬ kʼawꞈ, nawˬ-ahˇ paˬ kuˆ-ahˇ haw-eu gʼaˬ-euˬ aˬ laꞈ laꞈ kʼoeˇ a nehˬ-awˇ, paꞈ kuˆ-ahˇ bi dawˆ tehꞈ-a. 26Ngaˇ nawˬ-ahˇ maˇ jawˆ ni ehˇ nehˬ nyaˇ. Doˆ paˬ-ehˇ gʼeh-eu pyuˇ tiˬ pehˆ maˬ doˆ jiˇ kʼoeˇ keuˆ ni, paꞈ kuˆ laꞈ kʼoeˇ nawˇ ya uˇ tehꞈ-a.
Aˬ cawˬ-euˬ miˬ zaˬ yo zaˬ-ahˇ bahˬ-eu gaˇ kawˆ
27“ ‘Aˬ cawˬ-euˬ miˬ zaˬ yo zaˬ-ahˇ maˬ ya bahˬ maˬ ya muˆ-a’ lehˇ ehˇ-eu dawˬ naw maꞈ ya gaˬ gʼaˬ-euˬ meh. 28Ehˇ kʼawꞈ, naw maꞈ-ahˇ ngaˇ heu loꞈ-ehˇ ehˇ-eu ma. Tsawˇ haˬ tiˬ gʼaˬ zaˬ miˬ zaˬ tiˬ gʼaˬ-ahˇ haw-awˇ, yuꞈ taꞈ jawˇ taꞈ mawꞈ-eu nui ma ahˇ naˇ, nui ma laꞈ kʼoeˇ zaˬ miˬ zaˬ kʼoeˇ gʼaˬ-ahˇ bahˬ-euˬ muˆ-euˬ meh. 29Nawˬ-euˬ myaˆ nuiˆ aˇ maˇ nuiˆ baˬ da neh nawˇ iˬ baˇ ya mˇ-euˬ ngeuˇ naˇ, myaˆ nuiˆ kʼoeˇ nuiˆ kʼeuꞈ doˆ-awˇ biˬ dzeh-awˬ. Gʼawˇ mawˇ mawˇ lah-ehˇ shiˬ buiˇ lah ma-ahˇ bi biˬ ahˇ-eu naˆ maˬ tseˇ, aˇ sehˇ tiˬ sehˇ ya teˬ-iˇ-eu maˬ gaˇ dzehˬ tehꞈ-a. 30Nawˬ-euˬ aˬ laꞈ aˇ maˇ laꞈ baˬ da neh nawˇ iˬ baˇ ya mˇ-euˬ ngeuˇ naˇ, aˬ laꞈ kʼoeˇ laꞈ deuˆ tsehˆ-awˇ biˬ dzeh-awˬ. Gʼawˇ mawˇ mawˇ lah-ehˇ shiˬ buiˇ lah ma-ahˇ bi biˬ ahˇ-eu naˆ maˬ tseˇ, aˇ sehˇ tiˬ sehˇ dahˬ-iˇ-eu maˬ gaˇ dzehˬ tehꞈ-a.
Miˬ zaˬ kʼoꞈ-eu gaˇ kawˆ
(Maꞈtehˬ 19.9; Maˬkuˆ 10.11-12; Luˇkaꞈ 16.18)
31“ ‘Tsawˇ haˬ aˬ geu gʼaˬ maˬ kaˬ, miˬ zaˬ kʼoꞈ naˇ, kʼoꞈ-euˬ gaˇ kawˆ yaw duˬ yaw ciˇ baw ni, miˬ zaˬ gʼaˬ-ahˇ sahˬ boꞈ tiˬ dzeh ya biꞈ meh’ lehˇ ehˇ taˬ-euˬ jaˆ-eu meh. 32Ehˇ kʼawꞈ, ngaˇ naw maꞈ-ahˇ heu loꞈ-ehˇ ehˇ-eu ma. Tsawˇ haˬ aˬ geu gʼaˬ maˬ kaˬ, yawˬ ha-euˬ miˬ zaˬ aˬ cawˬ nehˬ-ehˇ bahˬ-euˬ muˆ-euˬ maˬ jaˆ gaˇ kʼoꞈ dzeh nehˬ-awˇ, miˬ zaˬ kʼoeˇ gʼaˬ yawˬ zahˇ yawˬ iˇ paˇ naˇ, miˬ zaˬ gʼaˬ aˬ cawˬ-euˬ yo zaˬ-ahˇ bahˬ ni kʼaˬ dzeˇ zaˬ gʼaˬ neh jahˇ-euˬ meh. Aˬ cawˬ-euˬ miˬ kʼoꞈ-ahˇ sheuˬ-eu tsawˇ haˬ aˬ geu gʼaˬ maˬ kaˬ, aˬ cawˬ-euˬ miˬ zaˬ-ahˇ bahˬ-eu meh.
Kamˬ-eu gaˇ kawˆ
33“ ‘Nawˇ maˬ mˇ nya-eu jeˬ taˬ kamˬ. Nawˬ neh mˇ ma lehˇ SahˬpaˬMiˬyehˇ-ahˇ kamˬ taˬ-euˬ jeˬ-ahˇ, kamˬ-euˬ loꞈ-ehˇ mˇ byah-awˬ’ lehˇ, aˇ hu tsawˇ haˬ deuˬ-ahˇ ehˇ nehˬ taˬ-euˬ dawˬ kʼoeˇ dawˬ kʼawꞈ, naw maꞈ ya gaˬ gʼaˬ-euˬ meh. 34Ehˇ kʼawꞈ, ngaˇ naw maꞈ-ahˇ heu loꞈ-ehˇ ehˇ-eu ma. Kamˬ-eu jeˬ tiˬ pawꞈ-iˬ taˬ mˇ. Mˬ-ahˇ gʼoe-awˇ neh kʼawꞈ taˬ kamˬ. Aˬ jeˬ miˇ neh ehˇ naˇ, kʼoeˇ-aˬ, Miˬyehˇ-euˬ nuiˇ mahˬ meh. 35Miˇ-ahˇ gʼoe-awˇ neh kʼawꞈ taˬ kamˬ. Aˬ jeˬ miˇ neh ehˇ naˇ, kʼoeˇ-aˬ, Miˬyehˇ-euˬ aˬ kuiˇ cawˬ taˬ duˬ meh. Yeˬluˇsaˬlehˬ meuˬ-ahˇ gʼoe-awˇ neh kʼawꞈ taˬ kamˬ. Aˬ jeˬ miˇ neh ehˇ naˇ, kʼoeˇ-aˬ, huiˬ dui dui-eu Sahˬ paˬ-euˬ meuˬ meh. 36Nawˬ-euˬ uˬ duˬ-ahˇ gʼoe-awˇ neh kʼawꞈ taˬ kamˬ. Aˬ jeˬ miˇ neh ehˇ naˇ, uˬ duˬ tsehˇ kahˇ tiˬ kahˇ pyuˇ laˇ ni maˬ ehˇ, naˆ-iˇ ni maˬ ehˇ, nawˇ jahˇ nya-eu maˬ ngeuˇ-a. 37Ngeuˇ naˇ ‘Ngeuˇ ma’, maˬ ngeuˇ naˇ ‘Maˬ ngeuˇ’ lehˇ tehꞈ-ehˇ ehˇ-awˬ. Kʼoeˇ uˬ taꞈ-ehˇ ngehˬ dzehˬ tmˇ dzehˬ-eu dawˬ deuˬ-aˬ, Haiˬ-eu Nehꞈ sahˬ paˬ-euˬ laꞈ kʼoeˇ neh doˆ le-euˬ dawˬ meh.
Aˬ cawˬ-ahˇ aˬ joˆ-ehˇ ya mˇ kʼoꞈ nehˬ-eu gaˇ kawˆ
(Luˇkaꞈ 6.29-30)
38“ ‘Myaˆ nuiˆ-euˬ poeˬ myaˆ nuiˆ, seuˬ-euˬ poeˬ seuˬ’ lehˇ ehˇ taˬ-euˬ dawˬ naw maꞈ ya gaˬ-euˬ meh. 39Ehˇ kʼawꞈ, ngaˇ naw maꞈ-ahˇ heu loꞈ-ehˇ ehˇ-eu ma. Aˬ cawˬ yaw doeˇ jahˇ laˇ gaˇ yaw doeˇ taˬ jahˇ kʼoꞈ nehˬ. Tsawˇ haˬ tiˬ gʼaˬ na nawˬ-euˬ baˬ ba aˇ maˇ paw pyawˬ-ahˇ tehˆ laˇ naˇ, aˇ caˇ pyawˬ paˇ ciˬ daˬ nehˬ-awˬ. 40Tsawˇ haˬ tiˬ gʼaˬ na nawˬ-euˬ pehˇ kʼahˬ laꞈ kʼoeˇ kahˇ ja za geuꞈ mawꞈ naˇ, laꞈ nyiˇ kahˇ kʼawꞈ lehˆ caw nehˬ-awˬ. 41Tsawˇ haˬ tiˬ gʼaˬ na nawˬ-ahˇ kʼaˆ gʼaˬ-awˇ, tiˬ laˇ kaˬ gaˇ keuˆ ni bi caw teh le mawꞈ naˇ, nyiˬ laˇ kaˬ gaˇ keuˆ ni caw teh nehˬ-awˬ. 42Shaˇ-eu tsawˇ haˬ-ahˇ biꞈ-awˇ, ngaˬ mawꞈ paˇ mawꞈ-eu tsawˇ haˬ-ahˇ ngaˬ nehˬ paˇ nehˬ-awˬ.
Muiˇ-eu tsawˇ haˬ-ahˇ gaˬ-awˬ
(Luˇkaꞈ 6.27-28,32-36)
43“ ‘Yawˬ ha dawˬ peh jawˇ-eu tsawˇ haˬ-ahˇ gaˬ-awˇ, yawˬ ha-ahˇ muiˇ-eu tsawˇ haˬ-ahˇ muiˇ-awˬ’ lehˇ ehˇ taˬ-euˬ dawˬ naw maꞈ ya gaˬ-euˬ meh. 44Ehˇ kʼawꞈ, ngaˇ naw maꞈ-ahˇ heu loꞈ-ehˇ ehˇ-eu ma. Naw maꞈ-ahˇ muiˇ-eu tsawˇ haˬ-ahˇ gaˬ-awˇ, naw maꞈ-ahˇ kʼehˬ nehˬ kʼaˆ nehˬ laꞈ-eu tsawˇ haˬ deuˬ gʼaˇ duˬ guiˬ lahˬ shaˇ nehˬ-awˬ. 45Kʼoeˇ loꞈ-ehˇ jahˇ naˇ, naw maꞈ-aˬ, mˬ kʼoeˇ taˆ jawˇ-eu naw maꞈ-euˬ Aˬ da-euˬ zaˬ pyeuꞈ laˇ tehꞈ-a. Aˬ jeˬ miˇ neh ehˇ naˇ, aˬ yawꞈ-aˬ, tsawˇ muiˬ tsawˇ doeˇ maˬ tseˇ ni, dawˬ tawˆ luꞈ kʼoeˇ taˆ aˬ yawꞈ-euˬ nahˇ ma bi doˆ laˇ-awˇ, yaw tsaˬ yaw dawˇ tsawˇ haˬ hawˇ-eu maˬ tsaˬ maˬ dawˇ-eu tsawˇ haˬ maˬ tseˇ paˆ ni, dawˬ tawˆ luꞈ kʼoeˇ taˆ uˬ yehˇ bi yehˇ le-eu meh. 46Naw maꞈ-ahˇ gaˬ-eu tsawˇ haˬ deuˬ-ahˇ tehꞈ-ehˇ naw maꞈ gaˬ naˇ, naw maꞈ aˬ jeˬ aˇ poeˬ paˇ baw ta. Kawˬ taꞈ-eu tsawˇ haˬ deuˬ kʼawꞈ kʼoeˇ loꞈ-ehˇ gaˬ-eu maˬ ngeuˇ-a loˇ. 47Cawˬ yaw gʼoeˇ deuˬ-ahˇ tehꞈ-ehˇ naw maꞈ dawˬ ngehˬ cawˬ naˇ, naw maꞈ aˬ cawˬ taꞈ-ehˇ yaw muiˬ jeˬ mˇ dzehˬ-euˬ aˬ gaˇ paˇ jaˆ nmˇ. Lawˇ ciꞈ zaˬ deuˬ kʼawꞈ kʼoeˇ naˆ ni mˇ byah luꞈ-eu maˬ ngeuˇ-a loˇ. 48Kʼoeˇ miˇ neh, mˬ kʼoeˇ taˆ jawˇ-eu naw maꞈ-euˬ Aˬ da byah-eu loꞈ-ehˇ, naw maꞈ kʼawꞈ bi byah laˇ-awˬ.
Выбрано:
Maꞈtehˬ 5: AHK
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Akha Bible Revision (Latin Script) © Thailand Bible Society, 2011.