Jan e lɛl 1
1
Jesu Krist el sel ecʼodad
1Nuŋ ↄb ɛm e low fɛŋ e kok ɛm a, ke Odad anŋ ŋ̂. Ɛgŋ a eke el odad a okr af Nyam ab, ɛtŋ Odad a el Nyam. 2Nuŋ ↄb ɛm ɛtŋ Odad okr af Nyam ab.#1.1-2 Bɛ̀bmn Nyandrɛ 8.22-26. 3Nyam ocʼr kokrʼr ob fɛŋ; ob kaka anm eke wɛl kok ke nʼanm ɛm; 4fɛŋ a eke wɛl kok a ɛŋn sel in ɛm. Sel ikŋ na el agŋ eci usuayl. 5Usuayl am afŋ ncebn ɛm ɛtŋ ncebn ebmʼn. #1.5 ncebn ebmʼn: odad na Grɛk ɛm a, wɛl ↄtu ekʼitŋn ɛjecʼɛm dad ɛsɛ ncebn irmnmʼn es.
6Nyam ɛrm ɛgŋ nyam eke wɛl bʼɛsŋ Jan ow. 7Nʼam ow ɛsɛ daŋku af, ke lʼíj usuayl e daŋku yecʼɛtŋ ke in ɛm agŋ a fɛŋ úb nawrɛ. 8In obi a lʼelm usuayl, kↄ usuayl eci daŋku cɛ lʼij. 9Usuayl ikŋ na el usuayl tasi a ekʼam ow wus af aŋa ayal agŋ fɛŋ a.
10Odad a anŋ wus af aŋa. Nyam ocʼr kokrʼr wus, kↄ wus uwmʼn any. 11Lʼow in ecʼagŋ ɛm, kↄ in ecʼagŋ ɛgŋm ebmʼn. 12Gbɛkↄ agŋ bɛb ebʼr ɛtŋ ↄny ↄmn in ɛm; nʼↄŋ wɛl abusu eke wɛl kʼel Nyam ecʼey. 13Ow elm sos megl af e mew ab ɛm, oglog ɛgŋ ecʼerur ɛm -lʼelm Nyam ecʼey, kↄ Nyam ecʼerur ɛm -lʼel Nyam ecʼey.
14Odad a ɛwl el ɛgŋ ɛtŋ ir ɛb ɛy ab; Nyam ecʼerur eke ítŋnm lele nɛny nyam ij ab iyʼr ɛm gbↄŋ. Sʼɛkn in ecʼanygbɛl a, anygbɛl eke Iy bʼɛŋn Ɛs ɛm. 15Jan ij in e daŋku. Lʼɛlu lebl ninɛ: «Lɛgŋ a eke mʼam dad mʼɛsɛ: “Ɛgŋ nyam anŋʼm jam am ow, kↄ nʼↄny any lʼakmʼm aŋke lʼikŋ anym nʼanŋ gbuŋ ɛtŋ mʼanŋ a,” ke in ecʼodad anake mʼam dad a.»
16Tasi ɛm a, ɛy fɛŋ sʼɛŋn in eci aja ab ɛm eci ↄwrↄ a, tasi li yibr ɛy ow bobn. 17Sʼɛŋn ol Mois ɛm, kↄ Nyam ecʼerur ekʼítŋnm a lele nɛny nyam ij ab a, anŋ Jesu Krist ɛm ow. 18Lɛgŋ kaka ɛgŋ ɛknm Nyam, kↄ Iy ekpↄbi a sↄny coco eke el Nyam ke anŋ Ɛs ab a cɛ ɛluʼl ↄkm.
Jan mij ok nuŋ ɛs eci daŋku ij
Matie 3.1-12; Mark 1.1-8; Luk 3.1-18
19Jwifɛl e nuŋ af ɛsɛl ekʼel Jerusalɛm ecʼa ɛrm egb waw ɛsɛl lele Leviɛl ab Jan ogŋ a eke -li kʼibrm ow -lʼɛsɛ: «Kↄ ŋ bwo el ŋ ee?» Kin Jan eci daŋku ekʼij. 20Jan ↄnynm sos es odad a e dad ɛm ɛtŋ agŋ a fɛŋ eci any af li dad lʼɛrum mar ninɛ: «Ɛm, mʼelm Mesi a.» 21-Lʼibrm ow ninɛ: «Ɛtŋ ŋ bwo ee? Kↄ ŋ Eli ee?» Li dad ninɛ: «Njaŋ, mʼelm Eli.» -Lʼibrm ow ninɛ: «Kↄ ŋ Kokoba ↄb ɛs ab ee?» #1.21 Jwifɛl a am eku Kokoba ↄb ɛs nyam ɛsɛ Mois af, eke sɛgŋ es abal el ɛm a kʼow. Agŋ bɛb am tutr eke kokoba ↄb ɛs a bʼow el Mesi a. Ɛ̀kn Ɔkm Ok 18.15-18; Ob Kok 3.22. Ninɛ: «Njaŋ.» 22Ɛmɛny -lʼibrm ow ninɛ: «Ke sica ŋ bwo el ŋ ee? Agŋ a ekʼɛrm ɛy a, odad si kʼↄny si dad ɛl. Kↄ ŋ ayaf am ocr ŋ sosi ee?» 23Li dad ninɛ: «Ɛm, mʼel ɛgŋ a ekʼanŋ loj am ɛlu lebl dad ɛsɛ: Kòkr Ɛs Kↄtↄkↄ ecʼejagb a ínym sɛnyn sɛnyn a!» #1.23 Esayi 40.3, Sɛptant ɛm ecʼodad a eke wɛl oc. (Kokoba ↄb ɛs Esayi ecʼodad eke dad ab ana.) 24-25Ke ɛ́rmu ab ɛm Farisiɛl anŋ #1.24 ɛ́rmu ab ɛm Farisiɛl anŋ: Jan eci silɛl esig oglog ɛm a, ɛ́rmu a Farisiɛl. eke ɛmɛny am ibrmʼn ɛsɛ: «Eke batŋ elm Mesi a, elm Eli, elm Kokoba ↄb ɛs a, ke bla kʼↄŋ kʼam ok agŋ mij nuŋ ee?» 26Jan dad ɛl ninɛ: «Ɛm, mʼam ok ↄny mij nuŋ mij ɛm; gbɛkↄ ↄny ecʼaraŋn a, ɛgŋ nyam anŋ eke uwmn any. 27Nʼanŋʼm jam nʼam ow, ɛtŋ mʼitm bↄbↄ yɛji eke mi ki mↄmu in e cↄkrukpↄ meb ab es.» #1.27 Jwifɛl ogŋ a, ke éb utu ɛgŋ a, mↄmuʼn cↄkrukpↄ meb es, yↄyↄgʼr akr es. Juma ikŋ na elm Jwifɛl eci, kↄ madu eci. 28Ów amua fɛŋ am ɛy Betani ɛb ɛm Jurdɛn jam, yogŋ a eke Jan am ok agŋ mij nuŋ a.
Jesu, Nyam e licɛbli
29Eke lɛgŋ ɛny akr af a, Jan ɛkn Jesu ekʼam ow in ogŋ ɛtŋ li dad ninɛ: «Kin Nyam e licɛbli a eke bʼow ↄny wus na e sikpl oc es a. #1.29 Nyam e licɛbli: Odad eke Jwifɛl ogŋ a, ow ecʼiri a ok nↄnↄ. Bɛ̀bmn Nuŋ Ɔb 22.8; Ɔkm Ok 12.21-27; Ob Ap 14.12; Awl 28.3-4; Esayi 53.6-7. 30Lɛgŋ a eke mʼam dad mʼɛsɛ: “Ɛgŋ nyam anŋʼm jam am ow, nʼↄny any lʼakmʼm, aŋke lʼikŋ anym nʼanŋ gbuŋ ɛtŋ mʼanŋ a,” ke in ecʼodad anake mʼam dad a. 31Mʼuwm ɛgŋ a ekʼow kʼel ab any, gbɛkↄ mʼow eke mi kʼok agŋ mij nuŋ mij ɛm, yecʼɛtŋ ke mʼↄ́ŋ Israɛl ecʼagŋ a uwʼr any.» 32Ɛmɛny lʼij daŋku li dad ninɛ: «Mʼɛkn Abŋ Lala ekʼanŋ afr us es ɛsɛ kel af ke sigʼr es af. 33Ke mi kʼuwm ɛgŋ eke lʼel ab any, gbɛkↄ Nyam eke ɛrmʼm mʼow eke mi kʼok agŋ mij nuŋ mij ɛm a dadʼm ninɛ: “Bʼow ɛkn Abŋ eke bʼow us es ke sig es ɛgŋ nyam af, in anake li bʼow lʼok agŋ mij nuŋ Abŋ Lala ɛm a.” 34Mʼɛkn low na ɛtŋ mʼam ij daŋku eke ɛgŋ na el Nyam ecʼIy.»
Jesu eci jam ɛsɛl krɛkrɛ a
35Eke lɛgŋ ɛny akr af a, ɛmɛny Jan lele in e jam ɛsɛl yony ab anŋ yogŋ. 36Eke lʼɛkn Jesu ekʼam ɛc a, li dad ninɛ: «Kin Nyam eci licɛbli a ↄ!» 37Eke Jan eci jam ɛsɛl yony a iri odad na a, -lʼus ow jam. 38Jesu ɛwl sos mɛny, lʼɛkn eke agŋ yony am usʼr jam, ɛtŋ lʼibrm wɛl ninɛ: «Kↄ ↄny, bla am ↄↄl ee?» -Lʼibrm ow ninɛ: «Rabi, kↄ ŋ bogŋ ir ee?» (Rabi e nyandrɛ el “Low yɛgm agŋ ɛs.”) 39Li dad wɛl ninɛ: «Òwr, bʼow ɛkan.» Ke ow am titm ncebles eci wanci yar. -Nʼim -lʼɛkn yogŋ a eke lʼir a, ɛtŋ -nʼanŋ ow ab lɛgŋ ikpr a.
40Agŋ a ekʼiri Jan eci sodad a ke us Jesu jam a e nyam el Andre, Simↄ Piɛr lisijim. 41Lʼikŋ anym nʼim lʼɛkn lisijim Simↄ ɛtŋ li dad ow ninɛ: «Sʼɛŋn Mesi a.» (Mesi a e nyandrɛ el “Krist”.) 42Andre ɛwl Simↄ Jesu ogŋ a. Jesu lɛrʼr seŋ ɛtŋ dadʼr ninɛ: «Ŋ Simↄ, Jan jim; wɛl bʼow ɛsŋʼŋ Kefas.» (Ow e nyandrɛ el “Lob”.) #1.42 Simↄ, Jan jim: Ɛ̀kn Matie 16.17 lele ow ecʼakr otar ab ab. Kefas: ke Arame ɛm ana. Grɛk ɛm a, Piɛr.
43Eke lɛgŋ ɛny akr af a, Jesu ɛw eke kʼim Galile ɛtŋ lʼↄbr Filip. Li dad ow ninɛ: «Ùsʼm jam!» 44(Filip a Bɛtsayida ɛb ɛm ecʼɛgŋ; ɛb na anake Andre lele Piɛr ab yɛji el ow ecʼagŋ a.) 45Filip ↄbr Natanaɛl ɛtŋ dadʼr ninɛ: «Natanaɛl, ɛgŋ a eke Mois dad in ecʼodad ol e lɛl ab ɛm, #1.45 Ol e lɛl: nin eke Jwifɛl ɛw Bibl ɛm e silɛl yen krɛkrɛ a. Wɛl dad kokoba ↄb ɛs ecʼow a e low Ol Ɔkn 18.15-18 ɛm. ke kokoba ↄb ɛsɛl dad ow ecʼodad a,#1.45 Bɛ̀bmn Ol Ɔkn 18.18; Esayi 9.5-6; Ezekiɛl 34.23. sʼɛŋnʼn. Ɛgŋ a, Nasarɛt e Jesu, Josɛf jim.» 46Natanaɛl dadʼr ninɛ: «Kↄ Nasarɛt yɛji, low mamn ↄtu eke kʼanŋ ow ee?» #1.46 Nasarɛt: Ɛ̀kn Matie 2.23 ecʼakr otar a. Filip dadʼr ninɛ: «Òw, ke ɛ́kn.» 47Eke Jesu ɛkn Natanaɛl ekʼam ow titmʼn a, nʼam dad ow e lís e low lʼɛsɛ: «Kin Israɛl iy tasi; in ɛm mɛju owi kaka anm.» #1.47 Israɛl iy... mɛju owi: Israɛl el Jakↄb e nin owr; Jakↄb e nyandrɛ nyam el ɛgŋ ɛju ɛs. Ɛ̀kn Nuŋ Ɔb 25.26 lele ow ecʼakr otar ab ab. 48Natanaɛl ibrmʼn ninɛ: «Kↄ ayaf uwrʼm any ee?» Li dad ninɛ: «Eke anŋ babm e likŋ a ecʼew a, #1.48 Babm e likŋ a ecʼew: likŋ a ecʼál a bibn es titm wus. Wɛl bʼocr sos es im yogŋ tutr ów Nyam odad ab af, ŋↄŋn Nyam, awl Nyam lɛl. gbuŋ ke Filip ɛ́sŋʼŋ a, ke mʼɛknʼŋ.» 49Af yogŋ Natanaɛl dadʼr ninɛ: «Low yɛgm agŋ ɛs, ŋ Nyam ecʼIy tasi, ŋ Israɛl ecʼɛb ebu tasi!» 50Jesu dadʼr ninɛ: «Mi bi dad mʼɛsɛ, mʼɛknʼŋ babm e likŋ a ecʼew a ekʼanŋ a, ke kpɛkŋ úbʼm nawrɛ ee? Bʼow ɛkn ów ekʼagb akm na!» 51Ɛtŋ lʼigŋ af li dad ninɛ: «Low nawrɛ mʼam dad ↄny: bʼow ɛkan afr eke bʼow fig ke Nyam ecʼafr ɛrm ɛsɛl ám uyu, ke ám us es ɛgŋ ecʼIy e nuŋ af.» #1.51 Jesu ɛm a, jam ɛsɛl a bʼow ɛkn Nyam ecʼanygbɛl a ɛsɛ Jakↄb ecʼes ɛkn ab af. Nuŋ Ɔb 28.12-13.
Выбрано:
Jan e lɛl 1: adj
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 1998, Wycliffe Bible Translators, Inc.