Mateo 5
5
Cushisha cawananchïpaj Jesús yachachishan
(Luc. 6.20-23)
1Aypalla runacuna shuntacasha caycajta ricarmi Jesusga lömaman aywaycur jamacuycuran chaypita yachachinanpaj. Disïpuluncuna ñaupanman shuntacaptin 2yachachiran cayno nir:
3«Cushishami cawanga imaypis Tayta Diosllaman yäracuycajcunaga. Paycunaga Tayta Diospa maquinchönami cawanga.
4«Cushishami cawanga llaquicuycajcunaga.#Isa. 57.18; 61.2 Paycunataga Tayta Diosmi shacyächenga.
5«Cushishami cawanga umildicunaga.#Sal. 37.11 Paycunami chasquenga Tayta Dios ‹Goycushayquipaj› nishan mushoj pachata.
6«Cushishami cawanga fiyupa yargaycajno yacunaycajnöpis Tayta Dios munashanno alli rurayta munajcunaga.#Prov. 9.5; Isa. 55.1-2 Paycunatami Tayta Dios yanapanga.
7«Cushishami cawanga cuyapar pï-maytapis yanapajcunaga. Paycunatami Tayta Diosninchi cuyapar yanapangapaj.
8«Cushishami cawanga shonguncho juchapaj mana yarpajcunaga.#Sal. 24.3-4 Paycunaga Tayta Diospa ñaupanmanmi chayangapaj.
9«Cushishami cawanga runa-masinta amistachejcunaga.#Prov. 12.20 Paycunatami Tayta Diosga ‹wamrämi canqui› nenga.
10«Cushishami cawanga Tayta Dios munashanno allita rurashanpita ñacachisha cajcunaga.#1Ped. 3.14 Paycunaga Tayta Diospa maquinchönami cawanga.
11«Cushishami cawanquipaj noga munashäno cawashayquipita runacuna ashllishuptiqui, ñacachishuptiqui, llullacur ima-aycatapis jitapäshuptiqui.#1Ped. 4.14 12Chayno ñacashayquipitaga Tayta Diosmi janaj pachacho alli cajta goshunquipaj. Gamcunatanömi Tayta Diospa profëtancunatapis unay ñacachiran. Chayno caycaptenga imano ñacarpis cushicuy.#2Crón. 36.16; Hech. 7.52
Cachino, achquino canapaj yachachishan
(Mar. 9.50; Luc. 14.34-35)
13«Gamcuna cay pachachöga cachinömi carcaycanqui. Cachi gamyacaptenga ¿imapänataj bälin? Manami imapäpis allinachu. Chaura jitariycuptin runacunanami lluchcar-ushan.
14«Cay pachachöga achquinömi carcaycanqui.#Juan 8.12; 9.5 Lömacho marca cashanno gamcunapis runacuna ricacushunayquipaj alli goyay. 15Lamparintapis sindircur manami pipis pacaycunchu. Chaypa ruquenga altumanmi churan achicyänanpaj.#Mar. 4.21; Luc. 8.16; 11.33 16Runacuna ricananpaj achqui sindiraycashanno gamcunapis runacuna ricashunayquipaj allillata rurar goyay-llapa. Chayta ricacurmi runacuna alabanga syëlucho caycaj Diosninchïta.#1Ped. 2.12
Lay nishanno Jesús cumlishan
17«Ama nogapäga yarpaychu Moisés isquirbishan laycunata, profëtacuna isquirbishancunata manacajman churanäpaj shamushäta. Chaypa ruquenga shamushcä lay imano cashantapis rasunpa tantiyachinäpämi. 18Syëlupis cay pachapis manaraj ushacaptinmi chay isquirbisha caycajcunaga cumlenga. Asta mas tacsha isquirbirashan cajllapis cumlengami.#Luc. 16.17 19Chay isquirbiraycajcunata jucnayllatapis mana ruraj cäga, mana wiyacunanpaj waquin runatapis shacyächej cäga Tayta Diospa ñaupancho mana alli ricashami canga. Llapan isquirbiraycashanta cumlir, waquin runacunatapis wiyacunanpaj alli shacyächejmi ichanga Tayta Diospa ñaupancho alli ricasha canga. 20Chauraga Tayta Diospa palabran nishanno caway-llapa. Fariseucunano, Moisés isquirbishan laycunata yachachej runacunano janan shongulla cumlej-tucorga gamcunapis Tayta Diospa maquincho goyänayquipaj manami imaypis chayanquipächu.
Mana chiquinacunapaj yachachishan
(Luc. 12.57-59)
21«Unayga runacunata Moisés niran:
« ‹Runa-masiquita ama wañuchinquichu.#Éxo. 20.13; Deut. 5.17
Wañuchej cäga jusgashami canga.›
22«Chaypis nogaga caynömi në: Pimi runa-masinta rabyapan, chay cäga jusgashami canga. Runa-masinta gayapajtaga jatun autoridächömi jusganga. Fiyupa rabyar runa-masinta ‹maldisyunädu› nejtaga Tayta Dios castigar infiernumanmi jitarponga.
23«Chaymi Tayta Diospaj Templucho altarman ofrendayquita churanayquipaj caycashayquicho runa-masiquita ima mana allitapis rurashayquita yarpärishpayquega 24altarpa lädunman ofrendayquita churaycur jinan öra aywanqui chay rabyachinacushayquita ashej. Tariycorga amistanqui. Nircur-raj cutiycur ofrendayquita Tayta Diospaj altarman churanqui.
25«Pipis quijashuptiquega autoridäman manaraj chayachishuptiqui aywaycashallayquicho arriglanqui. Man'chäga autoridämanmi chayachishunquipaj. Autoridänami suldäruncunawan carsilman wichgachishunquipaj. 26Manaraj llapan jagata pägarga chaypita manami llojshinquipächu.
Jucpa warminwan mana cacunanpaj yachachishan
27«Unayga runacunata Moisés niran:
« ‹Majayoj caycar jucwanga ama cacunquichu› nir.#Éxo. 20.14; Deut. 5.18
28«Chaypis nogaga caynömi në: Juc warmita ricashpayqui munaparga maynami majayquita jananpashanöna caycanqui. 29Chaymi derëchu caj ñawiqui juchata rurachishuptiquega chay caj ñawiquita jorgurir jitariycuy. Sänuta infiernuman garpurishunayquipitaga mas allimi canman jucaj ñawiyojllapis syëluman chayaptiqui.#Mat. 18.9; Mar. 9.47 30Derëchu caj maquiqui juchata rurachishuptiquega chay caj maquiquita rogurir jitariycuy. Sänuta infiernuman garpushunayquipitaga mas allimi canman jucaj maquiyojllapis syëluman chayaptiqui.#Mat. 18.8; Mar. 9.43
Majawan mana raquicänapaj yachachishan
(Mat. 19.9; Mar. 10.11-12; Luc. 16.18)
31«Unayga runacunata Moisés niran:
« ‹Runa warminpita raquicayta munarga
warminta papilta firmapächun raquicashan musyacänanpaj› nir.#Deut. 24.1-4; Mat. 19.7; Mar. 10.4
32«Chaypis nogaga caynömi në: Runaga warminpita raquicanman warmi juc runawan cacushallanpitami. Chaymi ima achäquipis mana caycaptin raquicaj runaga juchayoj caycan warmin jucwan camacänanpäpis. Runan jaguirishan warmiwan camacaj runapis juchayojmi ricacun.#Mat. 19.9; Mar. 10.11-12; Luc. 16.18; 1Cor. 7.10-11
Mana juranapaj yachachishan
33«Unayga runacunata Moisés niran:
« ‹Manacajllapäga ama juranquichu.
Jurar aunishayquitaga Tayta Diosta cumlinqui› nir.#Lev. 19.12; Núm. 30.2; Deut. 23.21
34«Chaypis nogaga caynömi në: Ni imanillarpis ama juranquichu. Ama juranquichu ‹Syëlupa jutinchömi jurä› nir. Syëluga Tayta Diospa jamananmi. 35Ama juranquichu ‹Cay pachapa jutinchömi jurä› nir. Cay pachaga Tayta Diospa chaquin lluchcaränanmi.#Isa. 66.1; Mat. 23.22; Stg. 5.12 Ama juranquichu ‹Jerusalenpa jutincho› nirpis. Jerusalenga mas munayniyoj ray Tayta Diospa siudäninmi.#Sal. 48.2 36Ama juranquichu ‹Quiquëpa bïdapa› nirpis. Rasunpaga manami munayniyojchu canqui ajchayquita yurajman ni yanaman ticrachinallayquipäpis. 37Juranayquipa ruquin aunirga auninqui, mana aunirga ‹mana› ninqui. Jurayparaj aunirga Satanás yarpashantanami rimaycanqui.
Mana alliwan mana cutichinapaj yachachishan
(Luc. 6.29-30)
38«Unayga runacunata Moisés niran:
« ‹Ñawinta jorgupaptenga quiquintapis ñawinta jorguparinqui.
Quiruta jorgupaptenga quirunta jorguparinqui› nir.#Éxo. 21.24; Lev. 24.20; Deut. 19.21
39«Chaypis nogaga caynömi në: Mana allicunata rurashuptiquipis ama ayñita cutichiychu. Gagllayquicho lagyashuptiquega jucaj-lä gagllayquitapis camapay.#Lam. 3.30 40Camisayquita guechushunayquipaj demandashuptiquega punchuyquitapis goycuy. 41‹Guepëta juc kilömetruyaj apäshimay› nishuptiquega ishcay kilömetruyaj apaparcuy. 42Imatapis ‹Goycamay› nishuptiquega goycuy. ‹Mañaycamay› nishuptiquipis mañaycuy.
Chiquimajninchïtapis cuyanapaj yachachishan
(Luc. 6.27-28, 32-36)
43«Unayga runacunata Moisés niran:
« ‹Runa-masiquitaga llapan shonguyquiwan cuyanqui› nir.#Lev. 19.18
Waquenga nin:
‹Chiquishojniquita chiquinqui› nir.
44«Chaypis nogaga caynömi në: Chiquishojcunatapis cuyay. Chiquishojcuna alli cawananpäpis Tayta Diosta mañacapay. 45Chayno rurarmi Tayta Diospa wamrancuna canqui. Tayta Diosmi intita shanächimun alli runacunapäpis fiyu runacunapäpis. Tamyachimun alli runacunapa chacranmanpis fiyu runacunapa chacranmanpis iwal. 46Cuyanacushallayquita cuyaptiquega manami camacanchu cuyashayquipita ima allitapis chasquinayqui. Asta impuestuta cobrajcunapis cuyashallantaga cuyanmi. 47Rejsinacushallayquita saludarga manami allita ruranquichu. Tayta Diosta mana rispitajcunapis chaynöllaga ruranmi.
48«Chaura gamcunaga syëlucho caycaj Tayta Diosninchi alli cashanno gamcunapis allillata rurar caway-llapa.#Lev. 11.44-45; 19.2; Deut. 18.13
Выбрано:
Mateo 5: qub
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2010, Wycliffe Bible Translators, Inc. All rights reserved. In cooperation with Asociación Cristiana JAWCA.