1 Johani 3
3
1Mu mone okuru o thsishimo ethsi na a tu shimi Tata, mane twa ethsiwa ci twana Nyambi, karo yoshemwa twanenthzi. Kaye ka ka tu dimuka, inene ka na ka mu dimuka. 2Ashimiwa ange, pano honi twana Nyambi, unone tu shime ku monithsiwa edi mbo twikara. Uno honi tu na dimuka ci Yesu ou a ku ka huka kenge twa ku monahara eci aye, inene kenge twa ku mu mona dyodi a di. 3Munu yomuhe oyu di nokurupero mu mwenthzi, aa cikenithsa eci edi a di o mukenu aye Krisitu.
4Munu yomuhe o ku tenda thsivi aa cora murao, inene thsivi po ku shwahura murao wa Nyambi. 5Uno honi mu na dimuka ci Yesu shime a keyire ku na tundithsa evi yetu, karo mu mwenthzi kwithsa thsivi. 6Kwithsa oyu di mwa Yesu o ku kwaterera ku tenda thsivi, o ku kwaterera ku tenda thsivi po ka naa mu mono nji ku mu dimuka.
7Anuke, katere mwangeriwe. O ku kwama owawa po muwawa, eci dyodi a di Krisitu ci muwawa. 8Unone yomuhe o ku kwaterera ku tenda thsivi po wa shamaonga, inene shamaonga na a tende thsivi ku tunda ku matatekero. Eyi a keyerire Mwana Nyambi po ku na umburura ekwama ya shamaonga. 9Mwana Nyambi yomuhe tumba a kwaterera ku tenda thsivi, inene mbuto thza Nyambi mu mwenthzi thzi di. Mweyo, tumba a kwaterera ku tenda thsivi, inene na erekiwa ope. 10Kenge dyo tu na dimukanga ana Nyambi nana shamaonga. Yomuhe o kukana ku tenda owawa kadi mwana Nyambi, mofoci kengeyo noyu o kukana ku shima muenthzenthzi.
Mu cishime oandu
11Inene ou po o muthzimbu ou na mu yuvu ku tunda ku matatekero, o kuninga ci twaa roera ku cishima oandu. 12Ka tu roerire kwikara eci Kaine, oyu wekarire woyu o mumango, karo wepaire minenthzi. Uno honi ine eyi a mwipaerire? Mukaci ko kuninga ci Kaine ekwama yenthzi nedi yoimango, aye minenthzi shime a kwamine yoiwawa.
13Mweyo, aenthzange mwa i komoka ngeci kaye kaa mi thzimba.
14Ngeci atwepo tu shima aenthzetu akwakutawa, apo twaa dimuka ci tu na tundu mu kufa ku thza mu mwoyo. Unone yomuhe o kukana ku shima aenthzenthzi, oyo shimbi ekarera mu kufa. 15Yomuhe o ku thzimba muenthzenthzi po thsipaanu. Mu na dimuka ci kwithsa thsipaanu oyu di no mwoyo o diyere mu mwenthzi.
16Kenge dyo tu na dimukanga thsishimo thso shemwa: Yesu Krisitu wa pire mwoyo wenthzi mukaci ketu. Mweyo, natwe twaa roera ku pa myoyo thzetu mukaci kaenthzetu anu. 17Ngeci munu o di no rufumo ro kaye no ku mona muenthzenthzi oyu na piri, unone kadi wa ku mu twara mucima, ngepi nga thsikara thsishimo thsa Nyambi moya munu? 18Anange, twa cishima pohuma ko maywi, unone ketenda noshemwa.
19Kenge dyo twa ku dimuka ci twakwa oshemwa no ku tanara micima pa meho a Nyambi. 20Inene ngeci micima thzetu thzaa tu shomorora, Nyambi mukuru kupita micima thzetu, karo na dimuka enu yoihe.
21Ashimiwa ange, ngeci micima thzetu ka thzi tu shomororire, apo twaa twethsa kwikara nondume pa meho a Nyambi. 22Karo kenge twa ku tambura yoihe eyi tu romba ku kwenthzi, pakuninga ci twaa hengeka eraerera yenthzi no ku kwama yo ku mu roerithsa.
23Ethsi thsodiyo thsiraerera thsenthzi, ci tu tawe mu dithzina dya Mwane Yesu Krisitu no ku cishima oandu eci edi a tu raererire. 24Yomuhe o ku hengeka eraerera ya Nyambi aa twarerera kwikara mwa Nyambi, naye Nyambi mu mwenthzi. Kenge dyo tu na dimukanga ci mu mwetu a di, ko Mupepo oyu na a tu pa.
Selectat acum:
1 Johani 3: mho
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
©2023 The Seed Company