1 Johani 2
2
Krisitu mukwa ku twimanena
1Anange, naa mi ñorera eyi ci nga katere mu tende thsivi. Unone ngeci yumweya aa tenda thsivi, kwaa di mukwa ku twimanena kwa Tata, aye Yesu Krisitu aye o muwawa. 2Yesu wa fire kwikara thsiyambero thso ku tundithsa humbithso thzevi yetu, kadi evi yetu pohuma, unone nevi yanu wahe mu kaye.
3Twaa twethsa ku dimuka ci tu na mu dimuka ngeci twaa hengeka eraerera yenthzi. 4Ngeci munu aa amba ci: “Ni na dimuka Nyambi,” unone kadi wa ku hengeka eraerera yenthzi, oyo munu a angera, karo oshemwa ka u di mu mwenthzi. 5Uno honi yomuhe o ku hengeka diywi dyenthzi, oyo thsishimo thsa Nyambi thsi na kwanenena shemwa mu mwenthzi. Kengeyo dyo tu na dimukanga ci mu mwenthzi tu di. 6Yomuhe o ku amba ci mwa Nyambi a di, aa roera ku yoya eci edi a yoyire Yesu.
Thsiraerera thsothsipe
7Ashimiwa ange, ka ni mi ñorerire thsiraerera thsothsipe, unone thso kare ethsi na mwikara nathso ku tunda ku matatekero. Ethsi thsiraerera thso kare po diywi edi na mu yuvu kare. 8Shaanga ikare kengeyo, ethsi thsiraerera ni mi ñorera thsipe, karo oshemwa wathso waa monahara mu mwenthzi nomu mwenu kengeyo. Inene mirema thzaa pwa, mwethzi o shemwa honi u na muneka kare.
9Yomuhe o ku amba ci aa yoya mu mwethzi, unone aa thzimba muenthzenthzi, oyo po shimbi ekarera mu mirema. 10Yomuhe o ku shima muenthzenthzi aa yoya mu mwethzi, karo kadi thsikuñu kwamweya. 11Uno honi yomuhe o ku thzimba muenthzenthzi po mu mirema a di, karo aa enda mu mirema. Munu o kengeyo ka a dimukire oku a thza, inene mirema na thzi mu tende kapuputwa.
12Anange, naa mi ñorera inene evi yenu na i teteriwa mu dithzina dya Yesu. 13Atata, naa mi ñorera inene mu na mu dimuka oyu wekarako ku tunda ku matatekero. Mishumba, naa mi ñorera inene na mu othzo o Mumango. 14Anuke, ni na mi ñorera inene mu na dimuka Tata. Atata, ni na mi ñorera inene mu na dimuka oyu wekarako ku tunda ku matatekero. Mishumba, ni na mi ñorera inene mu na tanara, karo diywi dya Nyambi mu mwenu di di, karo na mu othzo o Mumango.
Mwa shima kaye
15Mwa shima kaye nji ngara thsinu thso mu kaye. Ngeci munu aa shima kaye, thsishimo thsa Nyambi Tata ka thsi di mu mwenthzi. 16Inene yoihe yo mu kaye, ecikumbwethza yerama, ecikumbwethza yo meho no ku cinuneka mu mwoyo ka ya tunda kwa Tata, unone ya mu kaye. 17Kaye neyi i dimo eyi a cikumbwethza anu yaa pwa, unone o ku kwama eshima ya Nyambi kenge a ku yoya diyere.
Shifoto Krisitu
18Anange, thsino po thsikati thso mahurerero. Eci edi na mu yuvu ci Shifoto Krisitu aa keya, dyo i di, ashifoto Krisitu owangi na keya. Mweyo, tu na dimuka ci thsino thsodiyo thsikati thso mahurerero. 19Na tundu mu thsipani thsetu, inene nedi kadi akwa thsipani thsetu. Nga akwa thsipani thsetu nga na twarerera kwikara netu, uno honi na tu thsii ku monithsa nawanawa ci wahe nedi kadi akwa thsipani thsetu.
20Uno honi amwe po na mu wethsiwa kOyu Shokenu, karo mwahe mu na dimuka oshemwa. 21Ka ni mi ñorerire ci ngwa ka mu dimuka oshemwa, unone mukaci ko kuninga ci mu na u dimuka, no kuninga ci kwithsa kwangera ko ku tunda mushemwa. 22Edye ne mukwa kwangera ngeci kadi oyu o ku hamura ci Yesu po kadi yodiyo Krisitu? Yomuhe o ku hamura Nyambi Tata na Mwane Yesu Krisitu po yodiyo Shifoto Krisitu. 23Yomuhe o ku hamura Mwana, ka a di na Tata. Unone yomuhe o ku citawera Mwana, o di na Tata kengeyo.
24Eyi mwa yuvire ku tunda ku matatekero ikare mu mwenu. Ngeci eyi mwa yuvire ku tunda ku matatekero ayopo ikara mu mwenu, namwe kenge mwa kwikara mu thsiciwano na Mwana na Tata. 25Ethsi thsodiyo a tu kumbwethzire Mwana ku tu pa, ao mwoyo o diyere.
26Naa mi ñorera eyi enu mukaci kowa fota ku miangera. 27Uno honi amwe kuwethsiwa oku mwa tamburire ku kwenthzi ku nekarerera mu mwenu, mweyo, ka mu ningire ci shime a mi rongithse munu. Inene kuwethsiwa kwenthzi kwaa mi rongithsa enu yoihe, karo yoihe eyi a mi rongithsa ya shemwa, kadi yakwithsa. Mweyo, dyodi na a mi rongithsa, mu twarerere kwikara mwa Krisitu.
Ana Nyambi
28Uno honi, anange, mu twarerere kwikara mu mwenthzi, ci ou a ku monahara twa kwikare nondume no kukana ku fa honyi pa meho enthzi mu diyuwa dyo kukeya kwenthzi.
29Ngeci mu na dimuka ci Krisitu po muwawa, mu dimuke karo ci yomuhe o ku kwama yoiwawa po na erekiwa ope.
Selectat acum:
1 Johani 2: mho
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
©2023 The Seed Company