Malakayi 4
4
Ukwiza kwa wanda wa Mfumu e Leza
1Si-lolani, uwanda wakwiza pano awavilumba wonsi na wakachita wa luwembu walipya ngati alisote. Pa wandanye wowo walipya-pyu, asowe nu wakusyala, avino Imfumu e Leza wa maka yonsi wataka. 2Ukuwa mwemwe mwe wantu mukantontela, amaka yane ayakuwatula yalikatuka pakwe mwemwe ngati alilanzi, yalete ukupozya ngati ansansamwenje zilanzi. Muliwazevya ndivino awana wa ng’ombe wano wiyulilwa mu luwa. 3Mulichimvya awawipe, waliwa ngati alitukumbu lino lili kumatamba yinu, pa wanda wuno niza nachita wowonye, avino Imfumu e Leza wa maka yonsi wataka,
4Si-yizukanji imisambilizizye ya muntu wane e Musa, mwizuke amasundo ni viwindo vya kuwakomelezya kuno nawakomelezizye pa mwamba pe Horebu ukuti awantu wonsi awa Israeli wayatontela.
5Ukuwa pano uwanda wakutinia uwa Mfumu e Leza wutani wize, ndiwatumila umutumwa Eliya. 6Aliyiza asunkanie awakwasi na wanawawo apaliponga swinya, alyakuti ntize njize ndovye insi yinu.
Selectat acum:
Malakayi 4: WWN82
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
Chinamwanga Bible © United Bible Societies, 1981.