Van bottel tot kos

"Mense wat nog van melk leef, kan nie werklik saampraat oor die suiwer leer nie. Hulle is dan nog maar net kinders. Vaste kos is bedoel vir grootmense – vir hulle wat in die skool van die lewe ingeoefen is om tussen goed en kwaad te onderskei" (Hebreërs 5:13-14 NLV).

Geestelike volwassenheid is nie noodwendig aan ouderdom gekoppel nie. Hopelik word almal van ons wyser met ouderdom en kan ons toenemend ons lewenservarings in die lig van God se waarheid evalueer. Maar selfs al is jy nog jonk – chronologies gesproke of ten opsigte van jou geloof – is daar geen rede waarom jy nie jou babaformule vaarwel kan toeroep en aanbeweeg na meer substansiële kos nie (Hebreërs 5:13-14).

Verbind jou daartoe om vaste tye saam met God deur te bring in gebed en lofprysing. Proe soveel moontlik van die Bybel. Kou en kou en sluk … en neem dan nog ’n hap. Ware groei is net moontlik as ’n mens behoorlike kos eet. Moenie tevrede wees met enigiets minder as ’n stewige bord kookkos nie!