Houding

"Vriend, dit is noodsaaklik dat jy dit vir jouself sal uitmaak dat die lewe groter is as dit wat met jou gebeur."

Jy kan weliswaar nie altyd keer wat met jou gebeur nie — maar jy moet gewis verantwoordelikheid neem vir die gedagtes wat jy koester, jou gesindheid, gesprekke, gedrag en gewilligheid om genade te betoon. Dit is van kardinale belang dat jy gelowig standpunt moet inneem deur van jouself te sê wat God van jou sê. Jy moet 'n ten-spyte-van-mentaliteit ontwikkel. Gaan staan op jou staanplek (Daniël 10:11). Wanneer jy gelowig standpunt inneem laat jy nie toe dat die storm wat aan die buitekant woed storms in jou binneste veroorsaak nie. Neem dus die vaste besluit om jou in die Here te verbly, want Hy is getrou (Habakuk 3:17-19). Hy sal jou nooit begewe en jou nooit verlaat nie (Deuteronomium 31:6).