Marcos 16
16
Jesus rĩr mãn
(Mt 28.1-8; Lc 24.1-12; Jo 20.1-10)
1Vẽnhkán ke kurã tũg kỹ, kuty ẽn kã fag tóg nén ger há mãg mũ. Maria Madalena fi vẽ, kar kỹ Salomé fi ke gé, kar kỹ Maria tỹ Tiago mỹnh fi ke gé. Fag tỹ ti fár ger há han sór vẽ. 2Tỹ vaj kỹ kusãg pẽ ki fag tóg ti kej ra mũ mũ. Fag mũ ki rã tóg jun ke kỹ sa nĩ. Semana kurã ve ki ke vẽ. 3Kỹ fag tóg jagnẽ mỹ: “ũ nỹ hỹn ẽg mỹ ti kej ti nón mũ', tá', pó tỹ nĩfe ẽn ti'?“ he mũ. 4Fag tỹ tá junjun mũ ra ti kej nĩfe tóg nor nĩ nĩ. Pó mág ẽn tóg tĩn kỹ nĩ nĩ.
5Kỹ fag tóg ti kej kã ra ge mũ sir. Kã táfag tóg kyrũ vég mũ. Kur kupri tu kỹ tóg ẽg pẽgja tá nĩ nĩ. Kỹ fag tóg ti kamẽg mũ. 6Kỹ kyrũ ẽn tóg fag mỹ: “vẽnh mỹ' he tũg,” he mũ. “Ãjag hỹn Jesus jãvãnh mũ, Nazaré tá ke ti, ag tỹ krunh to ũn sãg mũ ẽn ti. Rĩr ti jẽ nĩ, tag ki ti tũ nĩ ha. Ag tỹ ti fi jan hã vẽ ha,” he tóg. 7“Kur Pedro ag mỹ tónh mũ jẽg, ti mré mũ tĩ kar ag mỹ ke gé. Ag mỹ: ãjag jãmĩ tóg tĩg mũ nẽji, Galiléia ra, hem nĩ. Tá ãjag ti venh mũ, hã kỹ tóg ãjag mỹ tó ja nĩ, hem nĩ,” he tóg.
8Kỹ fag tóg ti kej tá fũrũrũn kãpa mũ. Pétẽ fag tóg mũ mũ sir, fag mỹ e tĩn kỹ, fag tỹ jũrũn ke kỹ. Fag pijé ũ mỹ nén ũ tó mũ mỹr', fag kanẽ jur kỹ.
Maria Madalena fi tỹ ti ve
(Mt 28.9-10; Jo 20.11-18)
9 Semana kurã ve ẽn ki Jesus tóg ti rĩr mãn kỹ, kusãg ki Maria Madalena fi mỹ vẽnh ven vén mũ, ti tỹ ũn ki vẽjagrẽ kórég tỹ 7 (ke) pan ja ẽn fi mỹ. 10Kỹ fi tóg ti mré ke ag mỹ tónh tĩ mũ, ag fe kaj nỹtĩn kỹ, ag kygfỹ' hen kỹ. 11Hã ra ag tóg fi vĩ kri nĩm tũ nĩ.
Ũn régre ag tỹ ti ve
(Lc 24.13-35)
12Kar kỹ Jesus tóg ũn régre ag mỹ vẽnh ven mũ gé sir. Ag mũ ra ag tóg ẽpry kri ti vég mũ. Ag mỹ tóg vẽsỹ ũn kỹ tĩ nĩ. 13Kỹ ag tóg vỹnvỹn ke kỹ ti mré ke ag mỹ tó mũ gé sir. Hã ra ag tóg ag vĩ kri fig tũ nĩ gé.
Jesus tỹ ti mré mũ tĩ ag mỹ vẽnh ven
(Mt 28.16-20; Lc 24.36-49; Jo 20.19-23; Hk 1.6-8)
14Vãhã tóg ũ tỹ 11 (ke) ag mỹ vẽnh ven mũ gé, ag pin kỹ, ag jẽg nỹtĩ ra. Kỹ tóg ag mỹ vĩ tar han kỹ: “ãjag ne tóg ũ tỹ inh rĩr mãn vég mũ ẽn fag fi vĩ kri nĩm ja tũ nĩ',” he mũ.
15Kỹ tóg ag mỹ: “ga kri mũ kỹ ẽmã kar mĩ vẽnh vĩ sér kãmén nĩ, Topẽ tỹ há kar ag mỹ,” he mũ. 16“Ũ tỹ ãjag vĩ kri fig mũ ẽn ag vỹ krenkren ke mũ, fag ke gé, ũ tỹ inh ki ge kỹ kygpe kỹ nỹtĩ ẽn ag,” he tóg. “Hã ra ũ tỹ kri fig tũ ẽn vỹ kren ke tũ nĩ, ũ tỹ inh ki rã tũ ẽn,” he tóg. 17“Ũ tỹ inh ki ge mũ ẽn ag vỹ milagre venh ke mũ, fag ke gé,” he tóg. “Vẽjagrẽ kórég pan jé ag tóg ke mũ, ijykre tỹ. Ũn vĩ ũ ag vĩ tó jé ag tóg ke mũ,” he tóg. 18“Ag tỹ kejẽn pỹn kãgmĩg mũ ra, veneno kron mũ ra tóg, ag tỹ hẽ ri kenh ke tũ nĩ,” he tóg. “Ũn kagyga ag mẽgmẽ jé ag tóg ke mũ gé, ag nĩgé tỹ, kỹ ag tóg sir krenkren ke mũ, fag ke gé“ he tóg.
Jesus tỹ ti jóg ra tĩg
(Lc 24.50-53; Hk 1.9-11)
19Kar kỹ Jesus tóg kanhkã ra tãpry mũ sir, kỹ tóg tá jun kỹ Topẽ pẽgja tá nĩ mũ. 20Kỹ ti mré mũ tĩ ag tóg ẽmã kar mĩ mũ mũ sir. Vẽnh vĩ sér ẽn tugtó ag tóg mũ sir. Kỹ ẽg Senhor tóg ag tar han tĩ nĩ. Ag vĩ kóm tóg ẽg tỹ nén han vãnh ẽn hynhan mũ. Hã vẽ.
Atualmente Selecionado:
Marcos 16: kgp
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido