Mateus 12
12
Jesus Mak Nain Ba Loron Sabdu
1 # 12:1 Bele lee iha Marcos 2:23-28, Lucas 6:1-5. Iha tempu nebaa, Jesus lao liu hosi toos batar#12:1 Lian Gregu uza liafuan jerál deit nebee dehan buat nebee ema kuda. Karik iha sira nia tempu, toos nee mak trigu ka buat seluk. iha loron Sabdu. No Ninia eskolante sira hamlaha no sira komesa ba silu batar fulin no haan. 2Maibee bainhira ema Farizeu sira haree buat nee, sira dehan ba Jesus, “Tebes, O nia eskolante sira halo buat nebee lei bandu iha loron Sabdu.”#12:2 Haree lei nian iha Exodu 20:10, Exodu 34:21. Haree mos Deuteronómiu 23:25. 3Maibee Nia dehan ba sira, “Imi seidauk lee buat nebee David halo bainhira nia no sira nebee hamutuk ho nia hamlaha?#12:3 Bele lee iha 1 Samuel 21:6. 4Nia tama ba uma Maromak nian, no nia haan paun santu. Maibee tuir lo-loos nia no sira nebee hamutuk ho nia la bele haan paun nee. Só saserdote sira deit mak bele haan.#12:4 Haree lei kona ba paun santu iha Levítiku 24:5-9. 5Ou imi seidauk lee iha Lei ka, oinsaa iha loron Sabdu katak saserdote sira iha Templu halo foer loron Sabdu, no sira la sala?#12:5 saserdote sira tenki servisu halo sakrifísiu. Númeru 28:9-10. 6Maibee Hau dehan ba imi, katak iha fatin nee iha Ida nebee boot liu Templu. 7Maibee se imi hatene ona liafuan nee nia sentidu, ‘Hau hakarak laran luak, laos sakrifísiu,’#12:7 Hosi Oseias 6:6. imi sei la kondena ema inosenti. 8Tanba Ema Nia Oan mak Nain ba loron Sabdu.”
Mane Ida Ho Liman Aat
9Bainhira Jesus sai ona hosi fatin nee, Nia tama ba sira nia sinagoga. 10No tebes, iha nebaa iha mane ida nebee iha liman sorin maten. No sira husu Jesus, “Tuir Lei, ita bele kura iha loron Sabdu ka lae?” Tanba sira buka razaun atu akuza Nia. 11Jesus dehan ba sira, “See deit mak iha bibi nebee monu ba rai kuak iha loron Sabdu, laos nia kaer bibi nee no hasai nia ka? 12Saa tan ema ida iha folin boot liu fali bibi ida! Nunee ita tuir Lei bainhira ita halo diak iha loron Sabdu.” 13Depois Jesus dehan ba mane nee, “Lolo o nia liman ba.” Mane nee lolo liman, no liman nee sai diak kedas, hanesan liman seluk. 14Maibee ema Farizeu sira sai ba liur no futu lia hasoru Jesus, oinsaa sira bele halakon Nia.
Maromak Nia Atan
15Jesus hatene kona ba planu nee, no Nia lao sai hosi fatin nee. Ema lubun boot tuir Nia, no Nia kura sira hotu. 16Nia foo orden ba sira katak sira la bele foo hatene ba ema seluk kona ba see mak Nia. 17Ida nee kumpri liafuan nebee koalia tiha ona liu hosi profeta Isaias, nebee dehan:
18“Tebes Hau nia atan, nebee Hau hili ona;
Ida nebee Hau hadomi, nebee Hau nia klamar kontenti liu ho Nia.
Hau sei tau Hau nia Espíritu iha Nia,
no Nia sei foo sai justisa ba ema Jentiu sira.
19Nia sei la diskuti malu ka hakilar;
no ema sei la rona Ninia lian iha dalan.
20Nia sei la halo tohar duut kain ida nebee kleuk ona,
no lilin nebee suar deit Nia sei la hamate,
too Nia lori justisa ho vitória;
21no iha Ninia naran ema Jentiu sira sei tau esperansa.”#12:21 Haree Isaias 42:1-3.
Koalia Aat Hasoru Espíritu Santu
22 # 12:22-32 Bele lee iha Marcos 3:22-30, Lucas 11:14-23. Depois sira lori ema ida ba Jesus nebee diabu hadau ona. Ema ida nee matan delek, no nia monok. Jesus kura nia no nia bele koalia no haree. 23Povu hotu hakfodak no dehan, “Nia mak oan mane hosi David ka?”#12:23 Povu espera katak bei-oan hosi liurai David sei mai no salva sira hosi ema Roma sira. 24Maibee bainhira ema Farizeu sira rona tiha nunee, sira dehan, “Nia duni sai diabu sira liu hosi Belzebu deit, nebee diabu sira nia nain.” 25Jesus hatene sira nia hanoin, no Nia dehan ba sira, “Reinu hotu nebee fahe hodi hasoru nia aan sei lakon mohu deit; no sidade ka uma hotu nebee fahe hodi hasoru nia aan sei la dura. 26No se Satanás mak duni sai Satanás, nia fahe ona hodi hasoru ninia aan rasik. Nunee oinsaa ninia reinu bele dura? 27No se Hau duni sai diabu sira liu hosi Belzebu, entaun imi nia oan sira duni sai diabu sira liu hosi see? Nunee sira sei tesi lia ba imi. 28Maibee se Hau duni sai diabu sira liu hosi Maromak nia Espíritu, entaun Maromak nia reinu sei too mai ona ba imi. 29Oinsaa mak ema ida bele tama ba ema forti nia uma, no hadau ninia riku-soin? Laos katak primeiru nia tenki kesi ema forti nee? Depois nia bele hadau ema nee nia uma. 30Ema nebee la hamutuk ho Hau, nia kontra Hau. No ema nebee la halibur ho Hau, nia namkari deit. 31Nunee Hau dehan ba imi, ema hotu nebee sala no koalia aat hasoru Maromak#12:31 ‘koalia aat hasoru Maromak’ nee tradus liafuan blasfémia hosi lian Gregu, nebee tuir lo-loos sira la hakerek ‘hasoru Maromak’. bele hetan perdaun, maibee ema nebee koalia aat hasoru Espíritu Santu sei la hetan perdaun. 32No see deit nebee koalia hasoru Ema Nia Oan sei hetan perdaun. Maibee see deit nebee koalia hasoru Espíritu Santu sei la hetan perdaun, laos iha tempu nee ka iha tempu nebee tuir mai.
Bele Hatene Ai Horis Liu Hosi Ninia Fuan
33Halo ai huun diak, no ninia fuan sei sai diak; ka halo ai huun aat, no ninia fuan sei sai aat. Tanba ita hatene ai huun liu hosi ninia fuan. 34Oh samea nia oan sira! Oinsaa mak imi nebee aat bele koalia buat nebee diak? Tanba ibun koalia hosi buat resin nebee sai hosi fuan laran. 35Ema diak sei foo sai buat sira nebee diak hosi riku-soin diak iha ninia fuan laran. Maibee ema aat sei foo sai buat aat hosi ninia riku-soin aat. 36Maibee Hau dehan ba imi, iha Loron Tesi Lia nian, ema tenki hataan kona ba liafuan folin laek ida-idak nebee sira koalia. 37Tanba liu hosi o nia liafuan o sei sai loos, no liu hosi o nia liafuan o sei hetan kastigu.”
Sinál Jonas Nian
38Depois ema eskriba no ema Farizeu balu hataan ba Jesus, no dehan, “Mestri, ami hakarak haree sinál ida hosi Ita Boot.” 39Maibee Nia hataan, no dehan ba sira, “Jerasaun nebee aat no halo sala foer#12:39 Liafuan Gregu refere ba jerasaun nebee halo sala seksuál. Dala ruma profeta sira uza liafuan ‘sala seksuál’ hodi dehan sira nia laran la metin ho Maromak. Haree Jeremias 3:6-9. buka sinál ida. No sira la hetan sinál ida, só deit sinál profeta Jonas nian. 40Tanba hanesan Jonas hela iha ikan boot nia kabun laran too loron tolu no kalan tolu,#12:40 Haree istória Jonas nian iha ikan boot laran iha Jonas 1:17; no tuir mai ema Nínive iha Jonas 3:7. nunee mos Ema Nia Oan sei hela loron tolu no kalan tolu iha rai laran.#12:40 Liafuan Gregu dehan ‘iha mundu nia fuan laran.’ 41Ema Nínive sei hamriik ho jerasaun nee iha tempu Tesi Lia nian, no sira sei kondena imi. Tanba sira arepende bainhira sira rona haklaken hosi Jonas. No tebes, iha ema ida iha nee nebee boot liu fali Jonas. 42Liurai feto hosi parte súl sei hamriik ho jerasaun nee iha tempu Tesi Lia nian, no nia sei kondena imi mos. Tanba nia mai hosi mundu rohan hodi rona matenek klean hosi Salomão.#12:42 Haree istória kona ba liurai feto hosi parte súl iha 1 Liurai 10:1-13. No tebes, iha ema ida iha nee nebee boot liu fali Salomão.
43 # 12:43-45 Bele lee iha Lucas 11:24-26. Bainhira espíritu foer sai ona hosi ema ida, nia lao liu rai maran hodi buka fatin deskansa, maibee nia la hetan. 44Nunee nia dehan, ‘Hau sei fila fali ba hau nia uma nebee hau husik tiha.’ Bainhira nia too, nia hetan uma nee mamuk, dasa tiha no moos. 45Entaun nia baa, no lori tan espíritu hitu nebee aat liu nia. Sira tama no hela iha nebaa. Ikus mai, ema ida nee sai aat liu fali uluk. Nunee mos sei sai hanesan ho jerasaun aat nee.”
Jesus Nia Inan No Alin Sira
46 # 12:46-50 Bele lee iha Marcos 3:31-35, Lucas 8:19-21 Bainhira Jesus koalia hela ho povu nee, tebes, Ninia inan no alin mane sira hamriik iha liur. No sira hakarak koalia ho Nia. 47Ema ida dehan ba Nia, “Tebes, Ita Boot nia inan no alin mane sira hamriik iha liur, no sira hakarak koalia ho Ita Boot.” 48Maibee Nia hataan ba ema nebee foo hatene ba Nia, “See mak Hau nia inan? No see mak Hau nia alin mane sira?” 49No Nia lolo liman ba Ninia eskolante sira, no dehan, “Tebes, nee mak Hau nia inan no Hau nia alin mane sira! 50Tanba see deit nebee halo tuir Hau nia Aman iha lalehan nia hakarak, nia mak Hau nia alin mane, alin feto no inan.”
Atualmente Selecionado:
Mateus 12: BK
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Copyright Kadi Timor. All rights reserved. Portions of scripture can be used without permission for the promotion of God's glory.