Тархал 33
33
Мисриялдаса хирияб Ракьалде
1Гьале Мусалги Гьарунилги нухмалъиялда гъоркь Мисриялдаса къватӀире рахъарал гӀизраилаз нухда чӀел гьабурал бакӀазул цӀарал. 2БЕТӀЕРГЬАНАСУЛ амруялдалъун хъвана гьаб Мусаца, сапаралда рукӀаго. Гьале гьезул сапаразул нух, гьез нухда чӀел гьабурабщинаб бакӀги хӀисабалде босун хъвараб:
3ГӀизраилал Раамсесалдаса сапаралде рахъана тӀоцебесеб моцӀалъул анцӀила щуабилеб къоялъ – гьеб букӀана Песахалда нахъисеб къо. Гьел хӀинкъичӀого, мисрияздаги рихьулаго рахъана гьениса къватӀире. 4Мисриялин абуни, БЕТӀЕРГЬАНАС чӀварал лъимал хабалъ лъолел рукӀана. Гьедин БЕТӀЕРГЬАНАС жаза гьабуна гьезул аллагьзабазе.
5Раамсесги нахъа тун, гӀизраилал лъалхъана Суккоталда.
6Суккоталдаса къватӀире рахъун хадур гьел лъалхъана Этамалда, салул авлахъалъул рагӀалда.
7Этамги тун, гьел сверана БагӀал-Цефоналъул бакъбаккул рахъалда бугеб Пи-Гьахироталдехун ва Мигдолалда гӀагарлъухъ лъалхъана.
8Пи-Гьахиротги тун, гьез ралъад бахана ва салул авлахъалде щвана. Лъабго къоялъ ана гьел Этам абураб салул авлахъалдасан ва Мараялда рещтӀана.
9Мараялдаса ун, гьел Элималде щвана. Элималда букӀана анцӀила кӀиго иццги лъабкъоялда анцӀго чамасдакил гъветӀги; гьел гьенир рещтӀана.
10Элималдасаги рахъун, гьел БагӀараб ралъдал рагӀалда рещтӀана.
11БагӀараб ралъдахъа гьел ана ва Син абураб салул авлахъалда рещтӀана.
12Син абураб салул авлахъалдасаги ун, гьел Дофкаялда лъалхъана.
13Дофкаялдасаги ун, гьел Алушалда рещтӀана.
14Алушги нахъа тун, гьел рещтӀана Рефидималда. Гьениб халкъалъе гьекъезе лъим букӀинчӀо.
15Рефидималдаса рахъун арал гьел рещтӀана Синай абураб салул авлахъалда.
16Синай салул авлахъалдасаги ун, гьел лъалхъана Киврот-Гьатааваялда.
17Киврот-Гьатааваялдасаги ана ва Хацероталда лъалхъана.
18Хацероталдаса арал гьел Ритмаялда рещтӀана.
19Ритмаялдаса ун хадур гьел Риммон-Парецалда рещтӀана.
20Риммон-Парецалдасаги ана ва Ливнаялда лъалхъана.
21Ливнаялдаса арал гьел Риссаялда рещтӀана.
22Риссаялдаса ана Кегьелаталде.
23Кегьелаталдасаги ун, гьел Шефер магӀарда аскӀор лъалхъана.
24Шефер мегӀерги тун, гьел ана Харадаялде.
25Харадаялдасаги ана Макгьелоталде.
26Макгьелоталдасаги ун, гьел Тахаталда рещтӀана.
27Тахатги нахъа тун, гьел Терахалде щвана.
28Терахалдасаги ун, гьел Миткаялде щвана.
29Миткаялдасаги гьел ана Хашмонаялде.
30Хашмонаги нахъа тун, гьел Мосероталда рещтӀана.
31Мосероталдасаги гьел ана Бене-Яаканалде.
32Бене-Яаканалдасаги ана гьел ва Хор-Хагидгадалда рещтӀана.
33Хор-Хагидгадалдасаги гьел ана Йотбатаялде.
34Йотбатаялдаса гьел Авронаялде ана.
35Авронаялдасаги ун, гьел Ецион-Гевералда рещтӀана.
36Ецион-Гевералдасаги гьел ана Цин абураб салул авлахъалда бугеб Кадешалде.
37Кадешалдаса ун хадур, гьел рещтӀана Эдомалъул гӀорхъода бугеб Гьор мегӀералда гӀагарлъухъ. 38БЕТӀЕРГЬАНАСУЛ амруялда рекъон, кашиш Гьарун вахана Гьор магӀарде ва гьенив хвана. Гьеб букӀана Мисриялдаса гӀизраилал къватӀире рахъаралдаса кӀикъоабилеб сон, щуабилеб моцӀалъул тӀоцебесеб къо. 39Гьор магӀарда хварав Гьаруница бан букӀана нусиялда къоло лъабго сон.
40Гьеб заманалдайин Ханааналъул Негев шагьаралда ханлъуда вукӀарав пача Арадида рагӀараб гӀизраилал рачӀунел ругеблъи.
41Гьор мегӀерги нахъа тун, гьел рещтӀана Цалмонаялда.
42Цалмонаялдасаги рахъун, гьел Пуноналда рещтӀана.
43Пуноналдаса ун, гьел Овоталде щвана.
44Овотги нахъа тун, гьел МогӀавалъул ракьазде щвана ва Ийе-Гьааварималда рещтӀана.
45Гьенисаги ун, гьел Дивон-Гадалда лъалхъана.
46Дивон-Гадалдасаги ун, гьел Алмон-Дивлатайималде щвана.
47Алмон-Дивлатайималдасаги ун, гьел Невоялда гӀагарлъухъ ругел Аварим мугӀрузда аскӀор рещтӀана.
48Аварим мугӀрулги нахъа тун, гьел рещтӀана Иордан гӀурул рагӀалда, Ерихон шагьаралда дандбитӀун бугеб, МогӀавалъул гӀатӀиракьалда. 49Иордан гӀурухъ МогӀавалъул гӀатӀиракьалда Бет-Ешимоталдаса бахъараб Авел-Шиттималде щвезегӀан къайи чӀвана гьез.
50МогӀавалъул гӀатӀиракьалда Ерихон шагьаралда дандбитӀун Иордан гӀурухъ рукӀаго, БЕТӀЕРГЬАНАС Мусада абуна:
51«ГӀизраилазда абе: „Иорданги бахун, Ханааналде нуж щвараб мехалда, 52гьеб ракьалда ругел киналго гӀадамал гьениса нахъе хъаме. Гъуре гьезул ганчӀилги, цӀулалги, маххулги гьарурал ясикӀо-аллагьзаби ва щущахъ риххизаре гьезул киналго мукъадасал абулел бакӀал. 53Гьеб ракь мукӀур гьабе ва гьениб гӀумру гьабе. Дица нужее ирсалъе кьолеб буго гьеб ракь. 54ГӀизраилазул къавмазда гьоркьоб гьеб ракь бикье, можороги бахъун. КӀудияб къавмалъе кӀудияб ракь кье, ва гьитӀиналъе – гьитӀинаб кье. Можороялъ бихьизабураб ракь букӀине буго нужер къавмазеги тухумазеги.
55Амма гьеб ракьалъул гӀадамал нахъе къотӀичӀони, гьенир хутӀарал гӀадамал нужее рукӀине руго бадиб къараб зазлъун ва хьолболъ къараб рукӀкӀенлъун. Нужеца гӀумру гьабизе бугеб гьеб ракьалда гьез хӀалхьи тезе гьечӀо нужее. 56Гьебмехалъ Дицаги нужее гьабила, гьезие гьабизе Дида ракӀалда букӀараб жо!“ – ян».
Atualmente Selecionado:
Тархал 33: АварАК
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© Институт перевода Библии, 2005-2023