Левит 27
27
БетӀергьанасе назру гьабиялъул хӀакъалъулъ
1БЕТӀЕРГЬАНАС Мусада абуна:
2«ГӀизраилазда кӀалъай ва гьезда абе: Лъицаниги живго яги цевесев чи БЕТӀЕРГЬАНАСЕ назру гьавизе бегьула, гьединав чиясухъ кьезе кколеб хӀакъги кьун. 3Гьев къогоялдаса тӀаде араб ва лъабкъого соналдаса тӀаде инчӀеб ригьалъул бихьинчи вугони, гьесухъ кӀикъоялда анцӀго гӀарцул шекел кьезе ккола (Мукъадасаб Чадиралда хьвадулеб шекел), 4чӀужугӀаданалъухъ – лъеберго гӀарцул шекел; 5щугоялдаса тӀаде араб ва къого соналдаса тӀаде инчӀеб ригьалъул васасухъ – къого шекел, ясалъухъ – анцӀго шекел; 6цо моцӀалдаса тӀаде араб ва щуго соналдаса тӀаде инчӀеб ригьалъул лъимадухъ: васасухъ – щуго шекел гӀарцул, ясалъухъ – лъабго шекел гӀарцул; 7лъабкъого соналдаса тӀаде араб ригьалъул бихьинчиясухъ – анцӀила щуго шекел, чӀужугӀаданалъухъ – анцӀго шекел. 8Амма назру гьабурав чи цӀакъго ресукъав вугони ва лъазабураб къадаралда хӀакъ кьезе гьесул рес батичӀони, гьев кашишасда цеве вачине ккола – гьесул буголъиги хӀисабалде босун, кашишас гьесул багьа чӀезабизе букӀине.
9ГӀи-боцӀул рахъалъ назру гьабун букӀун, кинабгӀаги къурбаналъе ярагьунеб хӀайван БЕТӀЕРГЬАНАСЕ кьолеб бугони, гьеб хӀайван БЕТӀЕРГЬАНАСУЛ хиралъилъун ккола. 10Гьеб хӀайван хисун цоги хӀайван кьезе бегьуларо: хӀалакъаб хӀайваналъухъ кьариябги хисизе бегьуларо, кьарияб хӀайваналъухъ хӀалакъабги хисизе бегьуларо. Амма назру гьабурав чияс гьеб хӀайван цогидалъухъ хисани, гьеб кӀиябгоги БЕТӀЕРГЬАНАСУЛ хиралъилъун ккола. 11БЕТӀЕРГЬАНАС хъубаблъун лъазабураб ва къурбан гьабизе гьукъараб хӀайван кьезе лъицаниги назру гьабун бугони, гьеб кашишасда цебе бачине ккола, 12ва кашишас гьелда рекъараб багьа чӀезабизе ккола. Гьелъул багьа кашишас абухъе букӀина. 13ХӀайваналъул хважаинасе гьеб хӀайван жиндиего тезе бокьани, биччанте гьес гьелъухъ хӀакъ кьезе, гьелъул багьаялда тӀаде щуйил бутӀаги жубан.
14Лъица букӀаниги БЕТӀЕРГЬАНАСЕ жиндирго мина назру гьабуни, минаялъул хал-шалги гьабун, кашишас гьелда рекъараб багьа чӀезабила. Гьелъул багьа кашишас абухъе букӀина. 15Минаялъул хважаинасе мина жиндиего тезе бокьани, биччанте гьес гьелъухъ хӀакъ кьезе, гьелъул багьаялда тӀаде щуйил бутӀаги жубан, ва мина гьесие хутӀила.
16Лъица букӀаниги жиндирго умумузул ирслъун кколеб хур БЕТӀЕРГЬАНАСЕ назру гьабуни, гьелъул багьа гьабизе ккола кигӀан хьон хьалеб хур гьеб бугебали хӀисабалдеги босун, гьенибе хьараб щибаб пурчӀинадул хомералъухъ#27:16 Хомер – гӀага-шагарго 220 литра жанибе унеб роцен. кӀикъоялда анцӀ-анцӀ шекел гӀарцулги рикӀкӀун. 17Юбилеялъул соналъ лъица букӀаниги жиндирго хур БЕТӀЕРГЬАНАСЕ назру гьабуни, гьелъул багьа хисуларо. 18Амма Юбилеялъул сон ун хадуб пуланав чияс хур БЕТӀЕРГЬАНАСЕ назру гьабуни, гьелъул багьа гьабизе ккола тӀасияб Юбилеялъул сон щвезегӀан чан сон хутӀун бугебали хӀисабалдеги босун, арал соназухъ багьаги тӀаса бахъун. 19Гьев чиясе хур жиндиего тезе бокьани, биччанте гьес гьелъухъ хӀакъ кьезе гьелъул багьаялда тӀаде щуйил бутӀаги жубан, цинги хур гьесие хутӀила. 20Амма гьелъухъ хӀакъ кьун букӀун батичӀони ва цоги чиясе гьеб хур бичани, тӀокӀалъ гьеб тӀад буссинабизе рес букӀунаро. 21Назру гьабураб, амма хӀакъ кьечӀеб хур Юбилеялъул соналъ хважаинасухъе тӀадбуссунаро; гьеб тӀубан БЕТӀЕРГЬАНАСЕ батӀа гьабураб гьесул хиралъилъун хутӀула ва даимго кашишасул мулклъун лъугьуна.
22Чияхъа бичун босараб ва жиндирго умумузул гуреб хур лъица букӀаниги БЕТӀЕРГЬАНАСЕ назру гьабуни, 23Биччанте кашишас гьелъул багьа гьабизе Юбилеялъул сон щвезегӀан хутӀарал соналги хӀисабалде росун; гьев чияс гьебго къоялъ гьелъухъ хӀакъ кьезе ккола – гьеб БЕТӀЕРГЬАНАСУЛ хиралъилъун ккола. 24Юбилеялъул соналъ гьеб хур, жиндирго умумузул ирслъун гьеб кколев тӀоцевесев хважаинасухъе тӀадбуссинабизе ккола. 25Кинабго жоялъул багьа чӀезабизе ккола Чадиралда хӀалтӀизабулеб, ай къого гера бугеб шекелги хӀисабалде босун.
26ГӀи-боцӀул тӀоцебе гьабураб тӀинчӀ назру гьабизе бегьуларо, гьеб гьадингоги БЕТӀЕРГЬАНАСУЛ буго: бече батаниги, кьегӀер яги бурутӀ батаниги, гьеб БЕТӀЕРГЬАНАСУЛ ккола. 27Амма гьеб хъубаб хӀайваналъул тӀинчӀ бугони, гьелъухъ хӀакъ кьезе бегьула, гьелъул багьаялда тӀаде щуйил бутӀаги жубан. Гьелъухъ хӀакъ кьун гьечӀони, гьеб чӀезабураб багьаялда бичила.
28Лъилниги ихтияр гьечӀо жиндирго буголъиялдаса БЕТӀЕРГЬАНАСЕ херем#27:28 Херем гьабураб жо – БетӀергьанасе батӀа гьабураб, инсанасе хӀарамаб. гьабураб жо#27:28 Херем гьабиялъул кӀиго магӀна буго. Цо магӀнаялда, «херем» гьабураб жо ккола тӀубан БЕТӀЕРГЬАНАСЕ назру гьабураб, тӀокӀалъ я бичизе, я бичун босизе бегьулареб жо. Инсан «херем» гьавун вугони, гьев Мукъадасаб Рокъове лагълъун кьолаан., гьеб щиб батаниги, хӀакъги кьун нахъе босизе: инсан, яги гӀи-боцӀи, ялъуни жиндирго умумузул ракьалъул бутӀа. Херем гьабураб жо – гьеб БЕТӀЕРГЬАНАСУЛ кӀудияб хиралъилъун ккола.
29Инсан херем гьавун вугони, гьев хӀакъги кьун эркен гьавизе бегьуларо; гьев чӀвазе ккола#27:29 Херем – цогидаб магӀнаялда гьеб ккола «тӀубан тӀагӀинабиялдалъун БЕТӀЕРГЬАНАСУХЪЕ кьей». Гьаб магӀнаялда чи «херем» гьавизе бегьулаан кинаб букӀаниги такъсиралъухъ, ялъуни гьересиаллагьзабазе лагълъи гьабиялъухъ. Гьебго магӀнаялда «херем» гьабизе ва цӀа гъун бухӀизе бегьулаан тушбабазул шагьар ва рагъда щвараб давла (бал. Тархъ. 22:20; Къан. 13:16)..
30ТӀолабго хӀалухъеналъул, ай хуриса щвараб тӀорщалилги ахикьа бакӀарараб пихъилги анцӀил бутӀа#27:30 АнцӀил бутӀа – Аллагьасул Къануналда рекъон, щварабщинаб боцӀи-рикъзиялъул анцӀго бутӀа гьабун цо бутӀа гӀизраилаз левитазе кьолаан. БЕТӀЕРГЬАНАСУЛ буго. Гьеб БЕТӀЕРГЬАНАСУЛ хиралъилъун ккола.
31АнцӀго бутӀа гьабун цо бутӀа жиндиего тезе бокьарав чияс гьелъухъ хӀакъ кьезе ккола, гьелъул багьаялда тӀаде щуйил бутӀаги жубан. 32Гьединго гӀи-боцӀул анцӀил бутӀаги, – вехьасул тӀил кӀутӀараб щибаб анцӀабилеб хӀайван, – гьебги БЕТӀЕРГЬАНАСУЛ хиралъилъун ккола. 33АнцӀил бутӀаялъул хӀайван лъикӀабищ квешабищ балагьизе кколаро ва цоцазухъ хисизе бегьуларо. Нагагь лъицаниги гьеб хисани, кӀиябго БетӀергьанасул ккола; хисараб хӀайванги хӀакъги кьун нахъе босизе бегьуларо».
34Гьеле БЕТӀЕРГЬАНАС Синай магӀарда Мусадасан ГӀизраилил халкъалде рещтӀарал амраби.
Atualmente Selecionado:
Левит 27: АварАК
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© Институт перевода Библии, 2005-2023