Левит 25
25
Шаматалъул сон
1Синай магӀарда БЕТӀЕРГЬАНАС Мусада абуна:
2«ГӀизраилил халкъалда абе: Дица нужее кьолеб бугеб ракьалде щведал, гьеб ракьалъги БЕТӀЕРГЬАНАСУЛ шамат тӀубазабизе ккола. 3Анлъго соналъ хурги бекье, цӀолбол гъабуги кӀуре, хӀалухъенги бакӀаре. 4Анкьабилеб соналъ биччанте ракьалъ хӀухьбахъизе – гьеб буго БЕТӀЕРГЬАНАСУЛ шаматалъул сон: хурги бекьуге, цӀолбол гъабуги кӀуруге. 5Хуриб жибго бижараб жоялъулги, кӀуричӀеб гъабуялда бижараб цӀолболги хӀалухъен бакӀаруге. Ракьалъ хӀухьбахъизе биччай. 6ХӀалхьиялъул соналъ ракьалда жибго бижарабщинаб нигӀмат нужее квен-тӀехалъе букӀина: нужееги, нужер лагъзадериеги, нужер хӀалтӀухъабазеги, нужеда гьоркьор гӀумру гьабулел чияр халкъалъул гӀадамазеги, 7нужер гӀи-боцӀуеги, гӀалхул жанаваразеги. Ракьалда жибго бижарабщинаб жо кваназе бегьула.
Юбилеялъул сон
8Гьединаб анкьго шаматалъул сон рикӀкӀе, ай анкьго нухалъ анкьго сон – анкьго шаматалъул соналда жаниб кинабниги кӀикъоялда ичӀго сон кколеб хӀалалъ. 9Анкьабилеб моцӀалъул анцӀабилеб къоялъ, ай Кипурималъул къоялъ, тӀолабго улкаялда рагӀизабун сур пуй, 10ва кӀикъоялда анцӀабилеб сон хирияб сонлъун лъазабе; гьеб соналъ улкаялъул тӀолалго гӀадамазе эркенлъи щвела. Гьеб букӀине буго Юбилеялъул сон. Гьеб соналъ щивав чиясухъе тӀадбуссина жиндирго умумузул ирс, ва щивав чи жиндирго хъизан-кулпаталъухъеги нахъвуссина. 11Биччанте кӀикъоялда анцӀабилеб сон нужее Юбилеялъул сонлъун букӀине: хурги бекьуге, жибго бижараб бугӀа-ролъулги кӀуричӀеб гъабуялда бижараб цӀибилалъулги хӀалухъенги бакӀаруге. 12Гьеб Юбилеялъул сон бугелъул, гьеб хирияб сонлъун букӀа нужее, ва гьеб соналъ кванай жибго бижараб нигӀмат.
13Юбилеялъул соналъ щивав чиясухъе тӀадбуссина гьесул умумузул мулк.
14Нагагь лъицаниги жиндирго мулк бичулеб ялъуни бичун босулеб бугони, гьелда гьоркьоб хӀилла гьабуге. 15Бичун ракь босулеб бугони, Юбилеялъул соналдаса нахъе чан сон арабали хӀисабалдеги босун гьабе даран. Бичулев чиясги, бачӀин бакӀарулел соназул чан сон хутӀун бугебали хӀисабалдеги босун гьабизе ккола ракьалъул багьа: 16ЦӀикӀкӀун сонал хутӀаралгӀан, ракьалъул багьаги цӀикӀкӀуна, дагьал хутӀаралгӀан, багьаги дагьлъула, щайгурелъул гьениса щолеб хӀалухъенлъидал гьес бичулеб бугеб. 17Цоцае рекӀкӀ гьабуге, Аллагьасукьа хӀинкъа. Дун вуго БЕТӀЕРГЬАН, нужер Аллагь.
18Дир къанунал цӀуне, Дир амраби тӀуразаре. Гьедин гьабуни, нужерго улкаялда лъикӀаб, хӀинкъи гьечӀеб гӀумру букӀина нужее. 19Ракьалъ гьарзаго хӀалухъенги кьела, гӀорцӀизегӀан кваназе нигӀматги букӀина, ва парахатаб хӀинкъи гьечӀеб гӀумруги букӀина нужее. 20Нужеца цӀехезе бегьула: „Хурги бекьичӀони, хӀалухъенги бакӀаричӀони, щиб нижеца кваназе бугеб анкьабилеб соналъ?“ – ин. 21Анлъабилеб соналъ Дица нужеде кӀудияб баракат рещтӀинабила, ва гьеб соналъ нужее лъабго соналъул къадаралда хӀалухъен бижизабила. 22Микьабилеб соналъ хуриб хьон хьалеб мехалда, жеги басрияб хӀалухъен кваналел рукӀина нуж, ва ичӀабилеб соналъ цӀияб тӀорщел бакӀаризегӀанги гьелъ хьихьила нуж.
Бичараб умумузул ракь тӀадбуссинабиялъул къанунал
23Ракь абадиялъего бичизе бегьуларо, щайгурелъул ракь Дир ккола, нужин абуни руго Дица рега-рахъине бакӀ кьурал гьалбал, заманалъ рачӀарал апарагзаби. 24Нужер улкаялда ракь бичун босулев щивав чияс гьелъул хважаинасе ихтияр кьезе ккола гьеб нахъе бичун босизе.
25Дур ракьцояв мискинлъани ва гьес жиндирго умумузул ракьул цо бутӀа бичани, виччанте гьесул цевесев гӀагарав чи вачӀине ва гьеб нахъе бичун босизе. 26Гьединав гӀагарав чи ватичӀони, амма бичун букӀараб ракь нахъе босизе гӀураб гӀарац гьесул жиндирго батани, 27биччанте гьес ракь бичаралдаса нахъе арал сонал рикӀкӀине ва, хутӀарал соназухъ гӀарацги кьун, гьеб нахъе босизе. 28Амма гьеб нахъе бичун босизе ракьул хважаинасул рес батичӀони, бичун босарав чиясухъ хутӀила гьеб Юбилеялъул сон тӀаде щвезегӀан. Юбилеялъул соналъ ракь нахъе кьела – гьеб гьелъул цевесев хважаинасухъе тӀадбуссина.
29Сверун къараб шагьаралда лъицаниги жиндирго мина бичани, гьеб бичаралдаса нахъе лъагӀалил болжалалда жаниб гьеб нахъе бичун босизе ихтияр букӀуна гьесул – гьебгощинаб мехалъ мина тӀадбуссинабизе рес букӀуна. 30Сверун къараб шагьаралда бугеб гьеб мина бичарав чияс лъагӀалида жаниб гьеб нахъе бичун босичӀони, гьеб абадиялъго хутӀула босарав чиясеги гьесул наслабазеги. Юбилеялъул соналъги гьеб нахъе кьоларо. 31Амма росабалъ ругел минаби ракьалъул бутӀалъун ккола; гьел нахъе ричун росизе бегьула ва Юбилеялъул соналъ ричарал чагӀазухъе нахъе кьезе ккола.
32Левийилазул ихтияр буго гьезул сверун къарал шагьаразда ругел жидерго минаби бокьараб мехалда нахъе ричун росизе, 33гьел цогидал левитазе ричун рукӀун ратаниги. Левийилазул шагьаралда бичараб мина Юбилеялъул соналъ нахъе кьезе ккола, щайгурелъул левитазул шагьаразда ругел минаби гӀизраилазул цогидал къавмазда гьоркьоб Левийил наслабазе кьураб ирслъун ккола. 34Гьезул шагьаразда сверун бугеб боцӀи хьихьулеб мегъ-ракьги бичизе бегьуларо: гьеб левитазул абадияб ирс ккола.
ГӀарцуда тӀаде хайир босизе гьукъи
35Дур гӀагарав чи мискинлъани ва язихълъани, гьесие кумек гьабе ва духъего ваче гьев: биччанте гьес къватӀиса вачӀарав гьобол ялъуни апараг хӀисабалда дуда цадахъ гӀумру гьабизе. 36Дур гӀагарав чи дуда аскӀов чӀезе те, гьесухъа хайир босуге – дурго Аллагьасукьа хӀинкъа. 37Дуего тӀаде хайир щвезелъун гьесухъе къарзалъе гӀарацги кьоге, гьесие чед-хинкӀги бичуге. 38Дун вуго БЕТӀЕРГЬАН, нужер Аллагь; Дица Мисриялдаса нахъе рачана нуж Ханааналъул ракь нужее кьезе ва нуж Дирго халкълъун рукӀиналъе гӀоло.
39Дур ракьцояв мискинлъани ва живго жинцаго дуе вичани, лагъ гӀадин хӀалтӀизавуге гьев. 40Биччанте гьев къватӀиса ккун вачарав хӀалтӀухъан хӀисабалда Юбилеялъул сон тӀаде щвезегӀан дуе хӀалтӀизе. 41Гьеб соналъ гьев эркенлъила ва цадахъ лъималгун жиндирго хъизан-кулпаталде ва умумузул ракьалде тӀадвуссина. 42Киналго гӀизраилал Дица Мисриялъул лагълъиялдаса нахъе рачарал Дир лагъзал ккола ва гьел нахъеги лагълъиялде ричизе бегьуларо. 43Гьединав чиясда тӀад зулмучилъун вукӀунге, дурго Аллагьасукьа хӀинкъа.
44Дуе лагъзал къваригӀараб мехалъ, нужеда сверухъ ругел къватӀиса халкъазухъа ричун росе лагъзалги гъаравашалги. 45Гьединго нужеца гьел ричун росизе бегьула нужеда гьоркьор гӀумру гьабун ругел чияр халкъазул чагӀазухъа ва нужер ракьалда гьарурал гьезул наслабазухъа ва гьел рукӀина нужер мулклъун. 46Гьел рукӀина нужер мулклъун, нужер лъималазеги абадияб ирслъун. Риччанте гьел рукӀине нужее лагъзаллъун, амма нужерго халкъалда, ай гӀизраилазда тӀад зулму гьабуге.
47Нужеда гьоркьоб гӀумру гьабулев чияр ракьалъул чи бечелъани, дур халкъцоявин абуни мискинлъани, ва чиярасе яги гьесул халкъалъул цоги чиясе лагълъиялде гьес живгоги вичани, 48гьев нахъе вичун восизе бегьула. Гьесул гӀагарав чияс вичун восизе бегьула гьев: 49инсул яги эбелалъул вацас яги цоги бокьарав гӀагарав чияс. Ялъуни гьесие жиндиего гӀураб гӀарац щун бугони, жиндицаго живго эркен гьавизеги бегьула. 50Биччанте гьев вичун восарав чиясги гьесги Юбилеялъул соналде щвезегӀан хутӀарал сонал рикӀкӀине. Гьесул багьа гьабизе ккола гьел соналги, ккун вачарав хӀалтӀухъанасе гьел соназухъ кколеб мухьги хӀисабалде босун. 51Юбилеялъул сон щвезе жеги гӀемерал сонал хутӀун ругони, живго вичулелъул гьесие щун букӀараб гӀарцул цӀикӀкӀарасеб бутӀа нахъе кьезе ккола гьес. 52Гьединго Юбилеялъул сон щвезе дагьал сонал хутӀун ратани, гьел соназда рекъон кьезе ккола живго эркен гьавиялъухъ мухь. 53Хважаинасе гьев вукӀине ккола ккун вачарав хӀалтӀухъан хӀисабалда; гьединав чиясда тӀад зулму-хӀал гьабизе биччазе бегьуларо нужеца.
54Вичун восарав чи эркен гьавун гьечӀони, Юбилеялъул соналъ эркенлъула гьевги гьесул лъималги. 55ТӀолалго гӀизраилал Дир лагъзал ругелъул. Гьел руго Дица Мисриялдаса нахъе рачарал Дир лагъзал. Дун вуго БЕТӀЕРГЬАН – нужер Аллагь.
Atualmente Selecionado:
Левит 25: АварАК
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© Институт перевода Библии, 2005-2023
