Левит 24

Нахучирахъазда жанибе тӀолеб нах

(Тархъ. 27:20-21)

1БЕТӀЕРГЬАНАС Мусада абуна:

2«ГӀизраилазда лъазабе нахучирахъалъе хӀалтӀизабизе бацӀцӀадаб зайтуналъул нах духъе босеян – кидаго нахучирахъ бакун букӀине. 3Мукъадасаб Чадиралда жанир БЕТӀЕРГЬАНАСУЛ КъотӀиялъул гъамас нахъа лъураб пардавалда цере ругел нахучирахъал Гьаруница ракизе ккола кидаго бакътӀерхьул гӀужалда, ва рогьинегӀан гьениб канлъи свине биччазе бегьуларо. Гьеб буго нужееги хадусел гӀелазеги букӀине бугеб абадияб къанун. 4БацӀцӀадаб меседил нахучирахъалда тӀад ругел гӀиссинчирахъазда жаниб нах чӀезабизе ккола гьес кидаго БЕТӀЕРГЬАНАСДА цебе.

Хирияб чед

5ЛъикӀаб ролъги босун анцӀила кӀиго чед беже: щибаб чадие хӀалтӀизабе ефа цӀураб ханждал анцӀго бутӀа гьабун кӀиго бутӀа#24:5 ГӀага-шагарго 4 литра.. 6Гьел чадал лъе БЕТӀЕРГЬАНАСДА цере бацӀцӀадаб меседил столалда тӀад, анлъ-анлъ чед лъураб кӀиго си гьабун. 7Щибаб сиялда аскӀоб бацӀцӀадаб ладанги лъе, чадаздаса цӀадул къурбаналъул гӀадаб хирияб махӀ бахъинабизе – гьеб букӀина БЕТӀЕРГЬАНАСДА цебе лъолеб хирияб садакъалъун. 8Кидаго, щибаб шаматкъоялъ, БЕТӀЕРГЬАНАСДА цебе цӀияб чед лъезе ккола. Гьеб букӀина тӀолалго гӀизраилазул рахъалъ Диргун бугеб абадияб КъотӀиялъул гӀаламатлъун. 9Гьел чадал Гьаруниеги гьесул васазеги рукӀина, ва гьез гьел хирияб бакӀалда кваназе ккола, щайгурелъул гьеб буго кӀудияб хиралъи – БЕТӀЕРГЬАНАСУЛ хириял садакъабаздаса Гьаруниеги гьесул наслуялъеги абадиялъего кьураб бутӀа».

Аллагьасда тӀад кӀалъарасе гьабулеб жаза

10ГӀизраилазда гьоркьов вукӀана цо чи – гьесул эбел гӀизраилай, эмен мисрияв вукӀана. Цо нухалъ гӀизраилазул цоги чигун вагъизе ккана гьев. 11Ва гьеб бакӀалда БЕТӀЕРГЬАНАСУЛ цӀарги къабихӀ гьабун хьандезе лъугьана гӀизраилалъул вас. Гьебмехалъ гьев чи Мусахъе вачана. Гьесул эбелалда цӀар Шеломит букӀана, ва гьей Данил къавмалдаса Диврил яс кколаан. 12Гьев чи БЕТӀЕРГЬАНАСУЛ хӀукму лъазегӀан жанив тӀамуна.

13Цинги БЕТӀЕРГЬАНАС Мусада абуна:

14«Бичасул цӀар къабихӀ гьабурав гьев чи халкъалда гьоркьоса нахъе ваче; биччанте гьесул кӀал рагӀаравщинав чияс цин гьесул ботӀрода кверал лъезе ва тӀолабго жамагӀаталъ гьев ганчӀица чӀвазе. 15ГӀизраилил халкъалда абе: щивниги чи Аллагьасул цӀар къабихӀ гьабун кӀалъани, гьесие жаза букӀине буго. 16БЕТӀЕРГЬАНАСУЛ цӀар къабихӀ гьабурав чи чӀвазе ккола: биччанте гьединав чи тӀолабго жамагӀаталъ ганчӀица чӀвазе. Гьев щив ватаниги, гӀизраилав вукӀа, чияр халкъалъул чи вукӀа, Бичасул адаб рехун кӀалъарав чи чӀвазе ккола.

17Гьединго, лъицаниги чи чӀвани, гьевги чӀвазе ккола. 18Кинаб батаниги хӀайван чӀварав чияс гьеб бецӀизе ккола: гӀумруялъухъ гӀумру. 19Цогидав чи гӀажиз гьавурав чиясеги гьебго гьабизе ккола: 20бекараб бакӀалъухъ – бекараб бакӀ, бералъухъ – бер, гӀусалъухъ – гӀус. Кинаб гъая инсанас цогидасе гьабун батаниги гьединабго гьесиеги гьабизе ккола. 21ХӀайван чӀварас гьеб бецӀизе ккола, инсан чӀварав чӀвазе ккола. 22Нужее киназего цо къанун букӀине буго – гӀизраилазеги чияр халкъалъул чагӀазеги. Дун вуго БЕТӀЕРГЬАН, нужер Аллагь».

23Мусаца гьеб кинабго гӀизраилазда бицана ва Бичасул цӀар къабихӀ гьабун кӀалъарав чи халкъалда гьоркьоса довегӀанги вачун, ганчӀица чӀвана. ГӀизраилаз кинабго гьабуна БЕТӀЕРГЬАНАС Мусаде гьабураб амруялда рекъон.

Atualmente Selecionado:

Левит 24: АварАК

Destaque

Copiar