Ghalat 2
2
Pɔl bɛ nɛ bɛdhiiti bot ɛ lwoma
1Bhii tak, ye naazɛkpáa membu kam nɛ ena. Wɔ gwaa, mɛ baazɛsik pɛ Yeluzalɛm, bis nɛ Bhalnabas zɛnɔɔ Tit. 2Mɛ nasik penek ɛ étɛp ɛlooba nɛ sa Zɛɛb natel mɛ ɛ. Tin, bis naazɛboma edi yes bisɔ bɛmet é kwan, bis nɛ bot ɛ nadi ebeea dáa bot ɛ duu ɔ. Mɛ naagoola bɛ Mbɛɛ Bhaadal mɛ nadi egoola nɛ bot ɛ di ààbɛ bot ɛ mbyak eYuda ɔ. Etɛɛ náá, mɛ nabɛɛ ààdi ekwyɛl náá, mɛsa mɛ mɛ nazesa ɛ, nɛghu mɛsa mɛ aasa ɛ, di yii gwyes. 3Ghuna Tit, mot bis nɛ nɛ nadi egyee ɔ, nyɛ nabɛɛ mot mbyak eGhɛlɛk, mot ngɔt nabɛɛ ààbesal nyɛ náá, nyɛ ni ɛgoŋ. 4Bela náá, ye nabɛɛ nɛ bɛdhiiti bɔn ɛ nyɛɛg bis, bot ɛ mɛdhjaaz pɛ ɛko bhimis pɛ si nazeselaa pak'es étɛp ɛsaŋ ɛniigal nyɛ ɛghoŋ ɔ. Bot benɔk nasyela tɔ ɛdhuu ɛles ɛ, étɛp bɛ neebee dáa bis di ekɛ pɛka tɔ ekwom e tsi ɛ, nɛ dáa di náá bis moo ɛ́ mot ngɔt nɛ Yezu Klisto ɛ. Tin, bɛ nadi ekwyɛl náá, bis di ekwom e tsi. 5Tin, bis nabɛɛ ààkoobet-betak náá, ɛkwosak ɛ bot ɛ tak sael, etɛɛ náá, etsɛɛtsɛ e Mbɛɛ Bhaadal needi nɛ nen.
6Tin, yɛ kabɛ bot ɛ nadi ebeea dáa bot ɛ duu ɔ, yenek ààgwyak mam, etɛɛ náá, Zɛɛb ààsa mbɛk pak bot. Ekukuma benɔk nabɛɛ ààdi ebe mɛ nɛ bhel. 7Ghuna, bɛ naabee náá, Zɛɛb naadjɛ mɛ mɛsa mɛ ɛgoola Mbɛɛ Bhaadal pɛ daa bot ɛ nadi ààni ɛgoŋ ɔ, dhatyee nyɛ nabaadjɛ Pyɛɛd mɛsa mɛ ɛkɛgoola Mbɛɛ Bhaadal pɛ daa bot ɛ nani ɛgoŋ ɔ. 8Tin, dáa Zɛɛb sa náá, Pyɛɛd di mot lwoma étɛp bot ɛ mbyak eYuda ɔ, nyɛ nabaasa ɛ náá, mam di mot lwoma étɛp bot ɛ di ààbɛ bot ɛ mbyak eYuda ɔ. 9Dáa bɛ nabee enɛm nɛ embɛɛ e Zɛɛb kɔ lam ɛ, wɔ gwaa Zak, Pyɛɛd nɛ Zaŋ bot ɛ nadi dhatyee ɛgwiŋ ɛ sɛɛg zɛɛga bot ɛ mendjaala ɔ, zɛsɛɛb bis nɛ Bhalnabas mbɔ eghɛŋ, ye kwyɛl ɛlɛɛ náá, bɛ eemyaal. Bis ɛ́ nɛ ghwyil ɛkatɔ̂ pɛ kyee bot ɛ di ààbɛ bot ɛ mbyak eYuda ɔ, da bɔɔ ɛtɔ̂ pɛ kyee bot ɛ mbyak eYuda. 10Tin, bɛ nazoke nɛ nes ɛ náá, da bis ɛtaala ɛkwyee bɛdjel ɛ bot, ye nabɛɛ mɛ naasa yɛ nɛ lyem wat.
Pɔl bɛ nɛ Pyɛɛd pɛ ghaada Antiɔs
11Deenek, dáa Pyɛɛd nazyɛ pɛ Antiɔs ɛ, ye nabɛɛ mɛ naalii nɛ nɛ ɛbyoɛpe é mis mɛ bot, etɛɛ náá, nyɛ nadiɛ nɛ ndjɛ. 12Tin, ɛsok nɛ bɛdhiiti bot ɛ Zak nalwom ɔ kum, Pyɛɛd nadi edɛ lɔɔg wat bɛ nɛ bɔn ɛ nyɛɛg bot ɛ nadi ààbɛ bot ɛ mbyak eYuda ɔ. E di'enek, dáa bot ɛ tak nakakum ɛ, Pyɛɛd eezɛkyee bot ɛ bɛ nɛ bɛ nɔɔ nadi edɛ ɔ, é kaab bot ɛ nazeni ɛgoŋ ɔ. 13Bɛdhiiti eYuda zokazɛdu mbee mɛfulu ɛ Pyɛɛd, tin, wɔ gwaa ye baazɛsa náá, Bhalnabas zokabaazɛni tɔ mbee mɛsa e mɛdjhaaz pɛ ɛko bhimis pɛ si. 14Dáa mɛ nabee náá, bɛ nabɛɛ ààdi esa esonok ɛnyɔɛpe dáa etsɛɛtsɛ Mbɛɛ Bhaadal di elɛɛ ɛ, mɛ ɛ́ boozɛlii nɛ Pyɛɛd é mis mɛ bot náá: «Wɔy mot di mot mbyak eYuda ɔ, wɔ ɛpekɛ dáa mot di ààdi mot mbyak eYuda. “Haa” wɔ aakasa dáa étɛp ɛbesal bot ɛ di ààbɛ bot ɛ mbyak eYuda náá, bɛ du etsi eYuda?»
Tsik kɔ ɛsu ɛ ɛdum ɛ koŋ nɛ Yezu
15Bisɔ bak, bisɔ byel ɛ́ eYuda, bis tok bot ɛ mesyem, bot ɛ di ààbɛ bot ɛ mbyak eYuda ɔ. 16Tin, mena nɛ guka náá, mot ààdi mot epiki kɔ ɛsu ɛlooba etsi ɛ Moiiz, yɛ ɛ́ kɔ ɛsu ɛ ɛdum ɛ koŋ nɛ Yezu-Klisto. Bisɔ pe, bis naadum koŋ yes nɛ Yezu Klisto, etɛɛ náá, bis needi bot epiki kɔ ɛsu ɛ ɛdum ɛ koŋ ɛ Yezu Klisto, ààkabɛ kɔ ɛsu ɛ etsi ɛ Moiiz. Deenek, etɛɛ náá, mot aanàbela di epiki etɛɛ náá, nyɛ eelooba nɛ etɛp ee etsi ɛ Moiiz di elɛɛ ɛ. 17Tin, yɛ bɛ náá, mena ɛpesaŋ ɛdi ɛ bot ɛ epiki tɔ Yezu Klisto ɔɔ, da bot ɛ baadi bot ɛ mesyem ɔɔ, deenek ye kwyɛl ɛlɛɛ náá Yezu Klisto ɛ́ mot mɛsa mɛ mesyem e? Ààbɛ ye tok deenek! 18Yɛ bɛ náá, mɛ eebaasum esa ee mɛ nabwak ɛ, deenek, mam ɛmet ɛpelyaal náá mɛ ɛ́ mot di ààlooba nɛ etsi ɔ. 19É di'enek, dum nɛ etsi, mɛ naazegwyɛ yam tɔ etsi, étɛp mɛ needi nɛ tsik nɛ Zɛɛb. Mɛ moo ɛ tsela e mɛlaaba bis nɛ Yezu Klisto. 20Deenek, ye tok mam di nɛ tsik, yɛ ɛ́ Yezu Klisto ɛ di nɛ tsik tɔ lam. Etɛɛ náá, tsik mɛ kadi nɛ yɛ mos kɔ ɛko ɛ bɔs'ak, yɛ ɛ́ kɔ ɛsu ɛ ɛdum ɛ koŋ ɛlam nɛ mɔɔ Zɛɛb, mot nakwyɛl mɛ da djɛ tsik'ɛ étɛp mɛ neetsak ɔ. 21Mɛ ààpɛɛ enɛm nɛ embɛɛ ɛ Zɛɛb. Tin, yɛ bɛ náá, etsi e Moiiz ɛ di djɛ epiki tɔ mot ɔɔ, deenek, Yezu Klisto nagwyɛ ɛ gwyes.
Atualmente Selecionado:
Ghalat 2: bkw
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© (Active), Wycliffe Bible Translators, Inc. All rights reserved.