रोमि 2
2
परमेस्वरको धार्मिक न्याय
1ओदोङ भाअ्सिङ नाअ् सोचिखेना इन्सिका द्याङहेङ दुसिलि द्वाना, कालाउ नाअ् हाइ दोङ बाहाना पालि माद्वाना, हाइपालिपानु नाअ् जेदोङ काथाता बो गेलाइहेङ दुसिखेना इङकोता नाअ् बुङ दुसिका जेनाना। हाइपालिपानु जेदोङ कामको दुसि नाअ् बो गेलाइहेङ लागाइखेना, ओदोङ काम नाअ् बुङ पाखेना। 2जाइ-जाइ इसिका मारेम्का कामगेलाइ पाखे, ओबालाइहेङ परमेस्वर ठिकसो न्याय पाङ दोअ्का केलाइ गिनाखे। 3नाअ् इन्सिका काम पाकालाइहेङ दुसिखेना, कालाउ नाअ् बुङ ओदोङ काम पाखेना पानु, हाइ परमेस्वरको न्यायसो खाताङका दोअ्तेङ नाअ् थानिखेना? 4परमेस्वरको क्रिपा नासेहेङ पाप पालिसो लाअ्पावा कालाउ परमेस्वर भारि घुरिपावा दोअ्का थाहा निङतेङ, हाइ नाअ् वाको दाया, सहनसिलता कालाउ धैर्यताहेङ तुच्छ थानिखेना?
5कालाउ नेलाइ ताइको ह्रदयहोइ थाङ पातेङ पाप पालि लाअ्तेङ परमेस्वर भारि घुरिलि माभोसुन्हा। ओदोङ भाअ्सिङ जेलाउ परमेस्वर द्याङगेलाइको न्याय पाङ, कालाउ वा ताइको चेरचुङ तिङपातेङ नेलाइहेङ आझाइ थाङका दन्ड प्याङ। 6हाइपालिपानु परमेस्वर झाराङ द्याङहेङ वाको काम आन्सारको इनाम प्याङ। 7परमेस्वर इम्बालाइहेङ आनान्त जिबन प्याङ जाइ धर्य दोफाङ रेम्का काम पाखे, कालाउकि वा महिमा, इज्जत कालाउ आनान्त जिबन निनाको। 8कालाउ स्वार्थि कालाउ सत्येको पालन माकेम्का कालाउ दुस्ट काम पाका ह्रुता चाहि परमेस्वरको क्रोड कालाउ चेरचुङता परियाङ। 9कालाउ दुस्ट काम पाकालाइ झाराङ द्याङगेलाइ ह्रुता दुख कालाउ कस्ट आइ लागियाङ, लाम्फा यहुदिगेलाइता कालाउ न्हुसो गैर-यहुदिगेलाइता। 10कालाउ आसल काम पाका झाराङ द्याङगेलाइहेङ परमेस्वर महिमा, इज्जत कालाउ सान्ति प्याङ, लाम्फा यहुदिगेलाइहेङ कालाउ न्हुसो गैर-यहुदिगेलाइहेङ। 11परमेस्वर झाराङहेङ बाराबर न्याय पाखे।
12झाराङ जाइ-जाइ व्यवस्था मान्थुतेङ पाप पाका हि, इम्बालाइको न्याय परमेस्वर व्यवस्था माकोसिङ पाङ। कालाउ व्यवस्था जेङतेङ बुङ पाप पाकालाइको न्याय परमेस्वर व्यवस्था आन्सार दोङ पावा। 13हाइपालिपानु मोसाको व्यवस्था हिङतेङ खिनिङ द्याङगेलाइ परमेस्वरको आगाता धर्मि माजेङखे, कालाउ मोसाको व्यवस्था केम्कालाइ दोङ धर्मि जेनाङ। 14जेलाउ गैर-यहुदिगेलाइ दोफा मोसाको व्यवस्था दोङ मान्थु, कालाउ जेलाउ ओबालाइ व्यवस्था आन्सार कामगेलाइ पाखे पानु, ओबालाइ दोफा व्यवस्था मान्थुलाउ बुङ ताइको काम पाहासो तिङपाखे कि ओबालाइको मनता व्यवस्था हिखे। 15व्यवस्था गोइका काथागेलाइ ताइको मनता लेखेका हि दोअ्तेङ ओबालाइको चालचलनहोइ तिङपाखे, कालाउ ओबालाइको ताइकोङ बिबेकहोइ जेलाउ सेलाउ ओबालाइहेङ दुसिखे, कालाउ जेलाउ सेलाउ समरथन पाखे। 16या गोताङ काथागेलाइ ओदोङ दिना खिनिङ जेनावा, जेलाउ परमेस्वर येसु ख्रिस्ट पाहासो द्याङगेलाइको हृदयता म्होका काथागेलाइको न्याय जेनाङ। कालाउ या काथा का दोङ प्राचार पाका सुसमाचार आन्सार दोङ जेनाङ।
यहुदिगेलाइ कालाउ व्यवस्था
17कालाउ जेसापा नाअ् यहुदि हिघा दोअ्तेङ मोसाको व्यवस्थाता भर परिखेना कालाउ नेलाइ परमेस्वरको बिसेस द्याङगेलाइ हिसुना दोअ्तेङ घमन्ड पासुखेना, 18कालाउ नासेहेङ थाहा हि कि, परमेस्वर नाअ् हाइ पाका चाहिखेना कालाउ हाइ सहि हि नासेहेङ थाहा हि, हाइपालिपानु नाअ् मोसाको व्यवस्थासो सिक्स्या निङका हिना। 19कालाउ जेसापा नासेहेङ निसित हि, कि नाअ् कान्हाँ द्याङगेलाइहेङ परमेस्वरको दामा तिङपालि गोइखे, कालाउ नाअ् कितिकितिकाता हिका द्याङगेलाइको भाअ्सिङ फाइसालामका भाइका हिना, 20कालाउ मुर्ख द्याङगेलाइहेङ सुधार पासुखेना, आपरि पाक्कालाइहेङ सिक्स्या पिसुखेना, हाइपालिपानु नाअ् गिखेना कि, परमेस्वरको व्यवस्था नासेहेङ गोताङ बुद्दि कालाउ सत्ये प्याङ। 21एसाङ जेलाउ नाअ् बो द्याङगेलाइहेङ धिर्पासुखेना हाइ ताइमिङहेङ चाहि माधिरपासुखेना? बो गेलाइहेङ चाहि खुलि माएल दोअ्तेङ प्राचार पासुखेना, कालाउ हाइ ताइमिङ चाहि खुसुखेना? 22नाअ्, जाइ दोङ द्याङगेलाइहेङ कासिबिरि मापासु दोअ्सुखेना, कालाउ हाइ नाअ् ताइमिङ कासिबिरि पाखेना? कालाउ नाअ् ताइमिङ मुर्तिहेङ सिकाखेना, कालाउ नाअ् ताइमिङ मुन्दिरगेलाइ खुखेना? 23नासेहेङ परमेस्वर पिका व्यवस्थाता घमन्ड पाखेना, हाइ नेलाइ ओदोङ व्यवस्थाहेङ मामानितेङ परमेस्वरको आनादार पासुखेना? 24हाइपालिपानु धर्मसास्तरता लेखेका हि, “नाअ् यहुदिगेलाइको कारनसो दोङ, गैर-यहुदिगेलाइ परमेस्वरको आपामान पाका हि।”
25का या दोअ्ताङका, कि नाअ् व्यवस्था केम्नु खिनिङ, नाङको खाताना पाका फाइदा जेनावा। कालाउ जेसापा नाअ् व्यवस्था माकेम्नु, नाअ् खाताना पाका यहुदि बुङ खाताना मापाका गैर-यहुदि भाइका जेनाना। 26याको माने इदोइ कि परमेस्वर निसित दोङ गैर-यहुदिगेलाइको वास्ता पाखे। जेसापा इम्बालाइ व्यवस्थाता हिका आग्यागेलाइ केम्खे पानु, खाताना माजेङका गैर-यहुदिगेलाइ बुङ परमेस्वरको द्याङगेलाइ जेङलि द्वाङ। 27नेलाइ खाताना जेङका यहुदिगेलाइ खाताना माजेङका गैर-यहुदिगेलाइसो दुसिका थोहोराइयाङ, हाइपालिपानु नेलाइ मोसाको व्यवस्था निङतेङ कालाउ जिउता खाताना जेङतेङ बुङ व्यवस्थाहेङ माकेम्सुखेना। कालाउ जिउता खाताना माजेङलाउ बुङ गैर-यहुदिगेलाइ चाहि व्यवस्था केम्खे। 28एन्साङ दोङ नेलाइ यहुदि जेङतेङ जोलोमतेङ बुङ माकुनु नेलाइको खाताना जेङलाउ बुङ नेलाइ जातिङकोङ यहुदि माजेङस्वाना। 29जातिङको यहुदि उङको दोङ हि, जाइको सामान्दा परमेस्वर दोफा ठिक हि। कालाउ मोसाको व्यवस्था मानिलि खिनिङ जातिङको खाताना माको, भरु जातिङको खाताना दोअ्का परमेस्वरको आत्मा पाहासो हृदय परिबतन जेङलि दोङ हि। इसिका द्याङगेलाइ द्याङगेलाइसो माको भरु परमेस्वरसो बाखिन निङखे।
Atualmente Selecionado:
रोमि 2: DHINT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Dhimal New Testament, by The Love Fellowship is licensed under Creative Commons Attribution-ShareAlike 4.0 License.