Lv. 21
21
Metiñ ma fombô betuni a ényiñe jap
(Ez 44:20-25; Eza 52:11; Ml 3:3)
1Nti a nga jô Môze na: Kate bone b'Aron be ne betuni na: Ntuni a nji yiane ve émiene mvin a nnambane mbime môte wé. 2Vengevenge ve bôt be ne fo'o émbé: nyia, ésaa, mona fame wé, mona minga wé, monyañ, 3a kale jé é ngenan éndun é too nye bebé, éyoñ é ngenan te ke aluk; v'ane nguleya ve émiene mvin be kal éte. 4Ezezañ ya bôte bé, *ntuni a bili ésaé nteb'ôsu; ajô te a nji yiane ve émiene mvin amu nalé a ye samele nye. 5Eyoñ awu e né, betuni be nji yiane sôté éfase nlô nge tyeñe zel e mefefele mebaé y'anyu, nge tene mimbak e menyôle map. 6Ba ye bo étyi asu Zambe wob a bo te ndaman étyi ya jôé Zambe wop, amu mbe ba ve Nti mimvean mia di'ibane nduan, bidi bi Zambe wop: ajô te ba yiane bo étyi. 7Ba ye bo te lu'u minga ébamba nge nyô a maneya same, nalé fe ba ye bo te lu'u minga nnôm a te suu: amu *ntuni a n'étyi asu Zambe wé. #21:7 Same va a liti éto éndun é kôlôya be minga atane ya aluk. 8Môt y'Israél ase a ye semé étyi ya betuni amu mbe ba liti ma bidi mia ve Zambe wônan; ajô te *ntuni a ye bo étyi mfa'a wé amu me n'étyi, ma, Nti, me nga tobe Israél na a bo ayoñ e n'étyi. 9Nge ngone *ntuni ja samele ébien a mboon ébamba, a samele ésaa: ajô te ba ye di'i nye nduan.
10Ntuni nnen a ne évete betuni; a nga teléban étyi a ñwo'one mbone *môs a nga taté bisaé bié, a ne nguleya jaé mengômesan me n'étyi, ajô te a nji yiane tabe nsoé nlô, nge nyabe mengômesane mé. 11A ye bo te subu mbime bebé; nge ve émiene mvin to'o éyoñ ésaa nge nyia be wuya. 12A ye bo te kui atane ya vôme wom a n'étyi, nge ndaman étyi ya e ndaa Zambe wé: amu a nga teléban étyi a mbon ba wo'o ya Zambe wé. Ma me ne Nti. 13A ye lu'u v'éndune ngon. 14A ye bo te lu'u nkus nge minga be nga suu, nge minga ébamba nge nyô be maneya samele, ve a ye lu'u éndune ngone ya ayoñe dé. 15A za bi mvoñe bôt é ne te *mfuban ézezañe bôte ya ayoñe dé: amu ma me ne Nti a telé nye étyi.
16Ane Nti a nga kobô Môze a jô nye na: 17Kobô'ô Arone na: É miaé mi bôt mia zu, teke môt éziñ ya mvoñe jôé a bili éyem éziñe nyôl a ye bi nkañesane ya subu bebé ata'a metuna'a na a ve ma bidi biam. 18Teke ñyeyem éziñ wo ye nyoñeban ésaé éte: to'o ndindim, mfeñke abo, nyô jôé dé é bili éyem éziñ nge na abo, wo, jôm jia y'été é ne ayab a lôte ji évok. 19Nyô abo nge wo bi ne mbu'an; 20Nyô a ne akule mvus nge ôwuluwula, nyô a kone mis, nyô a kone mintyañ, nyô a kone mebata nyôl, nge nyô a ne *miak. 21Te ke wua ya mvoñe bôte *ntuni Aron a bili éyem éziñe nyôl a ye subu ata'a metuna'a bebé na a ve Nti mimvean mia di'ibane nduan; amu a bili éyem éziñ, nde a nji bi nkañesane ya bo bisaé *ntuni a yiane bo. 22A ne nguleya di metuna'a me ne ma mvean, nalé fe bidi bia dañ étyi a bi bi n'étyi. 23V'amu a ne ñyeyem, a ye bo te subu bebé éndelé é tyele e zañe *nda y'étyi, nge subu a kui ata'a metuna'a. A nji yiane ndaman étyi ya *nda jam é n'étyi amu me ne Nti a ma ma telé betuni étyi na be bo m'ésaé. 24Ane Môze a nga kalane Aron mejô mete, e bone bé a bone b'Israél bese.
Atualmente Selecionado:
Lv. 21: BDCB
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Bible en langue Bulu © L'Alliance Biblique du Cameroun, 2007, 2015.