Kem Lingón 147
147
1Hol dóyón tekuy Dwata.
Tey hyu gemnóm du ke sngal tekuy ebè kut Dwata yóm sngal dmóyón du.
Tey minggel gemnóm du, ne tey knóón ke sendóyón tekuy Dwata.
2Bud hefdà Dwata Jirusalim,
ne bud niten lu semfulék ebè benwu Israél yó kem tau deng tehe negef.
3Henyuhen nawa yó kem tau deng lebà nawa le,
bnausen yó kem halì le.
4Deng eles hendemen ke hilu kwen yó kem blotik nmoen,
ne yóm ket sotu bélê le, sal mdengen boluyen kul.
5Tey kegetahen yóm Dwata tekuy.
Ya tey kfasangen, laen dù gemsenged du.
Yóm ketngónen yóm kdéen, là gbekem hmingón du.
6Gel tnóbóng Dwata yó kem tau hulung heglaan,
okóm fen ndaen lem tonok yó kem tau gel mò sidek.
7Utómem bè sngalem yóm keslamatem bè Dwata.
Sngalem yóm kdóyónem du, hmungem bè yó kem gel kenbitem.
8Gbek hlobun Dwata bè klamangen longit,
ne hkulónen etalak tonok.
Htowoken yó kem bnes gu lem bulul lemnek.
9Gel wen hkenen yó kem ógóf lem bnes,
dalang se yó kem tnulón wak,
gotu le mni béléen mò tnukô le.
10Là beyen nawahen du kun yóm kudà alì kemgis,
dalang se yóm kgis tau, le hilu he bè ktonen kul.
11Okóm tey hligal bè yó kem tau wen klikò le du,
yó kem tau gentud nawa le yóm là konol yóm kbong nawahen kul.
12Hol dóyón ye Dwata, yu kem tau bè Jirusalim.
Hol dóyón ye Dwata se kuy, yu kem tau bè Bulul Sayun.
13Abay se deng gotu hbegelen yó kem bak tikeb benwu ye,
ne tey któbóngen yó kem tau menwu lemen.
14Deng heneken klamang benwu ye,
ne deng hegsengelen nawa ye bè yóm kehyu yóm tbas ye.
15Hwiten udélen talak tonok, ne tódô kendel gefet.
16Hkulónen snu etalak tonok, deng hol lómón ke nes bukay ktonem du,
ne lómón kohù ktonem du yóm amù deng baling ays etalak tonok.
17Hebtangen bulók kulón etalak tonok, lómón ktudaen botu lemnek.
Laen dù tau gembek hembala du yóm alì ksidek ketnawen.
18Ominen bud mudél ebélê le, tódô gotu mnò se yóm kdéen.
Ominen hemwit lenos, ne tódô baling él mlel se yóm ays.
19Deng hetngónen ke Jakub yóm udélen,
ne bè kem tau Israél gónón hetngón du
yó kem hlauhen ne yó kem dumu hloloen kul.
20Laen dù dumu tau bè kem dumu benwu gónón mò du nim ni.
Là kô tngón le du kul yó kem hlauhen.
Hol dóyón tekuy Dwata.
Atualmente Selecionado:
Kem Lingón 147: tbl
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
© 2007, Wycliffe Bible Translators, Inc. All rights reserved.
