Mateo 2
2
Pī meꞌ aꞌa amban silanganin
1Inanakan si Isa si puweblo Betlehem si lahat Yahudiya masa si Herod sultanin. Gaꞌ tiggel, niyaꞌ meꞌ aꞌa tekka pī si puweblo Awrusalam amban lahat silangan. Meꞌ aꞌa inin inadjiꞌan weꞌ de meꞌ poteꞌanin. 2Pagtekkade laꞌi magtilew siye, paꞌinde, “Ingge nakanak baꞌahu inanakanin, iye ujud manjari sultan meꞌ Yahudihin? Peggeꞌ niyaꞌ takite kami poteꞌan paguwaꞌ laꞌi si silangan duk poteꞌan miyaꞌan tandaꞌ weꞌ inanakan ne iye duk pitu kami mudji iye.” 3Pagtakale weꞌ Sultan Herod inin, sasew teꞌed pikilannen duk sampay kēmon aꞌa si Awrusalamin sasew du isab. 4Dinaꞌak weꞌ sultanin magtipun kēmon meꞌ nakuraꞌ imamin duk meꞌ guru si saraꞌ āgamahin. Manjari tinilew siye weꞌ ne, paꞌinne, “Antag lahat panganakan pu Almasihin?” 5Paꞌinde, “Si puweblo Betlehem laꞌi si Yahudiya, peggeꞌ bakas tasulat weꞌ Nabi Mika dem kitab sa inin,
6‘O meꞌ aꞌa Betlehem luꞌu si lahat Yahudiya, bisan dikiꞌ lahatbin gaꞌi du kaꞌam diniyawaꞌan si matahan meꞌ nakuraꞌ Yahudihin, peggeꞌ billuꞌu paluwas du dambuwaꞌ nakuraꞌ mangantan meꞌ aꞌakun bangsa Israꞌilin.’ ”
7Pagtakale si Herod inin, pinasan weꞌ ne dinaꞌak pī meꞌ lella amban silangan miyaꞌan, bu binoꞌo siye weꞌ ne magbissā, siye-siye hadja. Tinilew siye weꞌ ne bang sumiyan pangitede paguwaꞌ poteꞌanin. Inakahan iye weꞌ de. 8Manjari dinaꞌak ne siye hap Betlehem weꞌ si Herod, paꞌinne, “Pī kaꞌam, pihahun bi teꞌed nakanakin. Bang takasuwaꞌbi ne nakanakin, akahanun bi ku duk ku isab tapī mudji iye.”
9-10Manjari, pagubus sultanin missā, lumengngan ne meꞌ aꞌa amban silangan miyaꞌan. Sābude maglengnganin, takitede balik poteꞌan bakas takitede si lahat silanganin. Pagkitede poteꞌanin sinna teꞌed siye manamal. Patuhut siye si poteꞌanin, ubus bu pahali poteꞌanin si atag palaꞌihan nakanakin. 11Ubus padiyalem siye si lumaꞌ miyaꞌan duk takitede nakanakin duk saꞌinen Mariyam. Pasujud siye duk pinudji weꞌ de nakanakin. Lukade pangisihanden duk urungande iye bulawan, kamanyan duk isellan bengngi inēnan mira.
12Ubus inin inakahan siye weꞌ Tuhanin diyalem taginepde, gaꞌi siye dinaꞌak balik pī pu si Herod. Manjari moleꞌ siye, nuhut lān seddili.
Lahi disi Yusup hap Misil
13Manjari paglumikut ne siye, paguwaꞌ malaꞌikat Tuhanin pu si Yusup diyalem taginepne, paꞌinne, “Iyuꞌ sōng daꞌak si Herod piniha nakanakin dinaꞌak pinapatey. Dongaꞌ kew, eddoꞌun nakanakin duk Mariyam, saꞌinen, bu lahi kaꞌam hap lahat Misil. Patennaꞌ kaꞌam laꞌi samantaꞌan gaꞌi pe kaꞌam daꞌakku tahalaꞌ billaꞌi.”
14Manjari dongaꞌ ne si Yusup, ineddoꞌ weꞌ ne nakanakin duk Mariyam bu tahalaꞌ ne siye hap lahat Misil sangem miyaꞌan. 15Patennaꞌ siye laꞌi sampay matey si Herod. Tuman ne lapal Tuhan tasulat Nabi Hosea dem kitabin, pinaꞌin, “Daꞌakku pitu anakkun amban lahat Misil.”
Pamapatey mākanakin
16Manjari pagkataꞌuhan si Herod weꞌ inakkalan hatiꞌ iye weꞌ meꞌ aꞌa amban silanganin, astel iye manamal. Daꞌakne pinapatey kēmon nakanak lella duwen tahun sampay pe kulang amban duwen tahun umulden laꞌi si lahat Betlehem duk si meꞌ kalahatan matapit si Betlehemin, peggeꞌ bakas inakahan iye weꞌ meꞌ aꞌa amban silanganin bang sumiyan paguwaꞌ poteꞌanin. Ubus pinapatey ne meꞌ mākanakin. 17Na, tuman bakas pinaꞌin Nabi Jeremiyahin, paꞌinne,
18“Niyaꞌ suwala takale si lahat Rama magmatey. Nāring teꞌed si Rakel sabab meꞌ anaknen. Gaꞌi iye ngatu pinahemokan peggeꞌ matey ne meꞌ anaknen.”
Moleꞌ balik disi Yusup
19Manjari pagubus ne matey si Herod, paguwaꞌ ne isab malaꞌikat Tuhanin pu si Yusup pataginep si iye laꞌi si lahat Misil. Paꞌin malaꞌikatin, 20“Dongaꞌ kew, eddoꞌun nakanakin duk Mariyam, saꞌinen, duk balik kaꞌam pī si lahat Israꞌil, peggeꞌ ubus ne matey meꞌ mabayaꞌ mapatey nakanakin.” 21Manjari dongaꞌ ne iye ngeddoꞌ nakanakin duk Mariyam, duk balik ne siye pī si lahat Israꞌil.
22Saguwaꞌ pagkale si Yusup weꞌ pagantiꞌ magsultan laꞌi si lahat Yahudiya anak si Herodin inēnan Alkilas, tinalew iye hap pī. Inakahan iye balik dem taginepne, dinaꞌak siye pī hap lahat Jalil. 23Hangkan hep pī siye laꞌi duk patennaꞌ siye si puweblo inēnan Nasaret. Na, tuman binissā meꞌ kanabihanin sabab Almasi, paꞌinde, “Inēnan iye aꞌa Nasaret.”
Atualmente Selecionado:
Mateo 2: yakV
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2019, Wycliffe Bible Translators, Inc. All rights reserved.