Versículos Bíblicos Populares relacionados a Mga Taga-Roma 12

Compartilhar

Indi kamo magsunod sa mga pagginawi sang mga tawo sa sini nga kalibutan, kundi tugoti ninyo ang Dios sa pagbag-o sang inyo kaugalingon paagi sa bug-os nga pagbaylo sang inyo panghunahuna. Dayon mahibaluan ninyo ang kabubot-on sang Dios—kon ano ang maayo, ang iya nahamut-an, kag himpit.

Gani, mga utod, tungod sang daku nga kaluoy sang Dios sa aton, nagapakitluoy ako sa inyo. Ihalad ninyo ang inyo mga kaugalingon subong isa ka buhi nga halad sa Dios, nga natugyan sa pag-alagad sa iya kag iya nahamut-an. Amo ini ang matuod nga pagsimba nga dapat ninyo ihalad.

Kabay pa nga ang inyo paglaom maglipay sa inyo, batasa ninyo ang mga kabudlayan, kag magpangamuyo kamo sa tanan nga tion.

Indi kamo magpadaog sa malaut, kundi dag-a ang malaut paagi sa paghimo sing maayo.

Maghigugmaanay kamo sing mahirop subong mag-ulotod kay Cristo, kag magtinahuray kamo nga wala nagapang-alag-ag.

Kinahanglan ang paghigugma sinsero. Dumti ang malaut, kag magpadayon nga malig-on sa tanan nga butang nga maayo.

Himua ang masarangan ninyo sa pagkabuhi sing mahidaiton upod sa tanan nga mga tawo.

Mga abyan, indi gid kamo magtimalos, kundi itugyan ini sa kaakig sang Dios. Kay nagasiling ang Ginoo sa kasulatan, “Ako ang magatimalos kag magabalos.”

Magmapisan kamo kag indi magtinamad. Alagara ninyo ang Ginoo sa bug-os ninyo nga tagipusoon.

Kay tungod sang bugana nga bugay sang Dios nga ginhatag sa akon, nagasiling ako sa inyo tanan: Indi kamo magmatinaastaason sa inyo panghunahuna, kundi magpanghunahuna kamo sing nagakaigo, suno sa talaksan sang pagtuo nga ginhatag sang Dios sa tagsatagsa sa inyo.

Kon may maghimo sa inyo sing malaut, indi sia pagbalusi sing malaut, kundi tinguhai ang paghimo sing maayo sa atubang sang mga tawo.

Kabiga ninyo sing alalangay ang isa kag isa. Indi kamo magpabugal, kundi magpakig-abyan kamo sa mga kubos. Indi kamo maghunahuna nga kamo inyo mga maalam.

Sa baylo, subong sang ginasiling sang kasulatan: “Kon ang imo kaaway ginagutom, pakan-a sia, kon ginauhaw, hatagi sia sang sarang mainom, kay sa paghimo mo sini, magakahuya sia sang iya kaugalingon.”

Pangayua sa Dios nga iya bendisyunan ang mga nagahingabot sa inyo. Huo, pangayua ang iya pagbendisyon kag indi ang iya pagpakamalaut. Magkalipay kamo upod sa mga nagakalipay, kag maghibi upod sa mga nagahibi.

Magbulig kamo sa mga kinahanglanon sang inyo mga utod kag batuna sa inyo mga balay ang mga dumoluong.

Ang aton lawas may madamo nga mga bahin kag ini tanan nga mga bahin may nagakalainlain nga mga bulohaton. Sa amo man nga bagay, bisan nga madamo kita, isa lamang kita ka lawas sa aton paghiusa kay Cristo, kag kita tanan nagaalangot sa isa kag isa subong nagakalainlain nga mga bahin sang isa ka lawas.