Mari, Meadow IBT Non-Drama (NT)

Mari, Meadow IBT Drama (NT)

Библийым кусарыше институт, Хельсинки 2007

Авраам тукым Эргын, Давид тукым Эргын Иисус Христосын тукымвожшо: Авраам деч Исаак шочын, Исаак деч Иаков, Иаков деч Иуда ден иза-шольыж-влак шочыныт, Иуда деч Фарес ден Зара шочыныт – нунын авашт Фамарь улмаш, Фарес деч Есром шочын, Есром деч Арам, Арам деч Аминадав, Аминадав деч Наассон, Наассон деч Салмон, Салмон деч Вооз шочын – аваже Рахав лийын, Вооз деч Овид шочын – аваже Руфь улмаш, Овид деч Иессей шочын, Иессей деч Давид кугыжа шочын.
Давид кугыжа деч Соломон шочын – аваже Урийын ватыже лийын, Соломон деч Ровоам шочын, Ровоам деч Авий, Авий деч Аса, Аса деч Иосафат, Иосафат деч Иорам шочын, Иорам деч Озий, Озий деч Иоафам, Иоафам деч Ахаз, Ахаз деч Езекий шочын, Езекий деч Манассий, Манассий деч Амон, Амон деч Иосий, Иосий деч Иоаким шочын, Иоаким деч Иехоний да тудын шольыж-влак шочыныт. Тидыже калыкым Вавилоныш кусарыме годым лийын.
Вавилоныш наҥгаймеке, Иехоний деч Салафиил шочын, Салафиил деч Зоровавель, Зоровавель деч Авиуд, Авиуд деч Елиаким шочын, Елиаким деч Азор, Азор деч Садок, Садок деч Ахим, Ахим деч Елиуд шочын, Елиуд деч Елеазар, Елеазар деч Матфан, Матфан деч Иаков шочын, Иаков деч Иосиф, Мариян марийже, шочын, а Мария деч Христос манме Иисус шочын.
Тыге, Авраам деч тӱҥалын, Давид марте чылаже латныл йыжыҥ. Давид деч тӱҥалын, Вавилоныш кусарымешке латныл йыжыҥ. Вавилоныш кусарыме гыч тӱҥалын, Христос марте латныл йыжыҥ.
Иисус Христос теве кузе шочын. Тудын Мария Аваже Иосифлан сӧрымӧ улмаш. Ушнымышт деч ончыч Мариян Святой Шӱлыш деч нелеммыже пале лийын. Мариям марлан налшаш Иосиф, поро да чын ыштыше еҥ лийынат, ӱдырым намысыш пурташ огыл манын, шыпак шӧрлынеже улмаш. Но кунам тидын нерген шонкален, Господьын Суксыжо омешыже кончен да каласен: «Иосиф, Давид тукым эрге, тыланет сӧрымӧ Мариям шке декет налаш ит лӱд. Тудын кӧргыштӧ илышым налшыже Святой Шӱлыш деч улеш. Мария Эргым ышта, да тый Тудым Иисус манын лӱмдет, вет Тудо язык деч шке калыкшым утара».
Господьын пророк гоч ойлымыжо шукталтше манын, чыла тиде лийын. Пророк каласен:
«Теве, Ӱдыр нелемеш да Эргым ышта,
тудым Еммануил манын лӱмдаш тӱҥалыт».
Тиде лӱмжӧ «Мемнан дене Юмо» манме лиеш.
Иосиф мален кынелын, чылажымат Господьын Суксыжо ойлымо семын ыштен: тудлан сӧрымӧ Мариям шке декше налын, но Мария Икымше Шочшыжым, Эргым, ыштымешке, Тудым пален огыл. Эргым Иисус манын лӱмден.

Ouça Мф 1