(Evangelio según San Marcos) 10
10
Jesús nuwak idaimaitsui tibau
(Mt. 19.1-12; Lc. 16.18)
1Jesús Capernaumnumia jiinki Judea nugkanum jegaa, Jordagka amain katigkú. Nunikmatai aents aidau ataktú tuwagkajam jintinkagtutan nagkabau, ni tuke jintinkagtina dutiksag. 2Nuniai ujumak fariseo aidau Jesusan jegaantaju, wajintig tusa dekapsagtatus, nuwennush nuwenash idaimainashit tusag. 3Tama ni ayaak:
—¿Moisesash wajukatajum tujabiajuita?
4Tama dita aiinak:
—Moisesak papí nuwa idaiku najantai umikjum nuwemek idaisatajum tujabiuwai, tuidau.
5Tiagtai Jesús chichaak:
—Moisesak atum antumtikmainchau ainajum dui nu umiktinnak agajui. 6Tujash yama nagkamchaku najanbaunmag Apajuik aishmagkun nuwajai najanauwai. 7Dutikamu asag aishmag nuwenkug apajin, dukujin ukuak niina nuwejaig ijunmainai, 8nuniak nuwejai makichik iyash wegawai. Nunin asa jimagchauwai, makichki. 9Nuadui aatus Apajuí dutikamua nunak aentsuk datupaumainchau ainawai, tiuwai.
10Nunik jegá jegawag jintintaiji aidau nuna pachisag Jesusan inidau. 11Tusá iniam:
—Makichik aentskesh nuwen idaiyas tikich nuwajai nuwenkug, jeteken ekajeak nunimainai, 12nunisag nuwashkam aishin idaiyas tikich aentsnum nemakug, ekagmawai, tiuwai.
Jesús uchi ikautkamu
(Mt. 19.13-15; Lc. 18.15-17)
13Ujumak uchi aidaun Jesusan ikautuawajui, uwejin antinjukti tusag. Dutikiagtai ni jintintaiji aidau, uchin ikaunmaina nuna jiyaidau. 14Dutikiagtatman Jesús wainak kajek chichajak:
Idaisatajum, uchi aidauk minai minitnume, utujiakaigpajum, wagki Apajuí inama duka jujú uchi aina junin aina nudauwai, tiuwai. 15Dekas tajime: Aents aidau, uchi mina anentaimjutuina imanis anentaimjutuinachuk, Apajuí inamak amain ainatsui, tiuwai.
16Tusa Jesús uchi aidaunak minaaki juki, makí makichik uwejin buuknum achiak Apajuí pujutnum yumigtamsatnume, tiuwai.
Datsauch wiyakuch Jesusan iniasbau
(Mt. 19.16-26; Lc. 18.18-27)
17Jesús wetatus jiinai, makichik tupikaki tajuntau, nunik niina eemtin tikishmatug iniak: —Maestro pegkejah, ¿wajina dutikmainaitja pujut tuke atina nuna jukitasanush?, tau.
18Tama Jesús ayaak: —¿Wagka pegkejá tujutme? Makichkish pegkejak atsawai, imá makichik Apajuiya duke pegkejak. 19Chicham umiktin aina nu dekame: “Tsanijinawaipa, magkagtuawaipa, kasamkaipa, wainkamek tsanumkagtujaipa, wainka tsanujá jujukipa, apa dukujai eme anentsam diistá” tawa nu, tau.
20Tama ni ayaak:
—Maestroh, wika ashí nunak datsauch asanuk umikuitjai, tiuwai.
21Tutai Jesús wait anenmain diisui, nunik chichajak:
—Makichik umimain ajutjame: wetá, nunikam ashí amina ajutjamaina duka sujukam ujunauch aina nu susata. Nu dutikawamin nayaimpinum wajiigmik ajutjamtinai. Nu dutika ukuakum waitiakmesh atsanjam nemagtukta, tiuwai.
22Nu tama junik dekapjauwai, nunik wake besek weuwai shiig wiyakuch asa.
23Jesús ayampá ashí niimas jintintaiji aidaun chichajak:
—Shiig utugchatai wiyakuch aidau Apajuí inamtaijin wayata tabauk.
24Nuna tutai jintintaiji aidauk puyatkaju. Nuniagtai Jesús ataktú chichaak:
—Uchig aidauh, shiig utugchatai Apajuí inamtaijin wayata tabauk. 25Camellok aujá jiinish waigkag yupichu nagkaemamainai, tujash wiyakuch Apajuí inamtaijin wayata tabauk utugchatai, tau.
26Nuna antukag, nuní nagkaemas puyatkag, pempeentunisag iniininak:
—¿Yaki tujash uwemjaush amainaita?, tuidau.
27Tiagtai Jesús ditan diis chichajak:
—Aents diismak dutikmaitsui, tujash Apajuiyaig nuninchauwai, wagki Apajuik ashí wají aina nunak dutikmainai.
Mina nemagtuidauk ditanu ukukbaujin nagkaesau jukiagtinai tibau
(Mt. 19.27-30; Lc. 18.28-30)
28Pedro nagkama Jesusan chichajak:
—Nijah, Jutiik ashí iinu aina duka ukuinaku, ame nemagkauwaitji, tau.
29Tutai Jesús ayaak:
—Dekas tajime, makichik aentskesh mina nemagtak nuigtú yamajam chichaman etsejak jeen, yachi aidaun, umayí aidaun, dukujin, apajin, uchijí aidaun, nugke aidaunash ukukiu aidauk, 30yamai puja duish ciegka inagkeas jee aidaun, yachi aidaun, umayí aidaun, dukují aidaun, uchijí aidaun, nugke aidaun ukukbau aidaun inagkeas jukiagtinai waittsau ainakush, nunik atak atina nuish, pujut tuke atina nuna jukiagtinai. 31Tujash kuashat aents dekatkau atatus wakegaina nu ukunum juwakagtinai. Untsu iman atan anentaimtumachu aina nu dekatkauk agtinai.
Kampatuma juna Jesús ni mantamnatnuji etsegkamu
(Mt. 20.17-19; Lc. 18.31-34)
32Jerusalén wakatasa wegamunum, Jesusak eemak wegai ni jintintaiji aidauk puyatuidau nuniai tikich aidauk ishamaidau. Nuniagtai ataktú niina jintintaiji doce aina nuna yajuak akanki, niinash wají nagkaikittawa nu pachisa ujatan nagkabau. 33Nuniak: “Yamai Jerusalén wakatasa wegag juik Aentsmaga akiinauwa nuna achikag sacerdote apuji aidau nuigtú maestro chicham umiktinun jintinkagtin aidaunum sujukagtatui; dutikam dita mantamnati tusag judiochu aidaunum sujukagtatui. 34Dutikawagmatai dushi dushikinakua, usu usukinak, asuttanash asut awa awajainakua maawagtatui, tujash kampatum tsawanta jui nantaktatui”, tiuwai.
Juan, Jacobojai Jesusan segagbau
(Mt. 20.20-28)
35Zebedeo uchijí aidau Jacobo Juagjai, Jesusan jegaantag:
—Maestroh, ii segamtatag nuna wait aneas umigkagtukti tusa wakegaji, tuidau.
36Tiagtai ni iniak:
—¿Wajina dutikati tusagmea wakegagme?, tau.
37Tutai dita aiinak:
—Jutii jimajaitag nunuti ame inamtaijum imana nui, makichkia nu untsugmin ekenkum, tikichia nu menajui ekeemsatin atajum tukagtita, tuidau.
38Tiagtai Jesús ayaak:
—Atumek mina segatjum duka dekatsjume. ¿Atumesh wi waittsattag imaanikjumesh waitmainuk ainajum nuigtush wi jakattag nunisjumkek jamain ainajum?, tau.
39Tama dita chichainak:
—Ehé, nunimainaitji, tuidau.
Tiagtai Jesús ditan chichajak:
—Dekaskenmag wi waittsattag nunisjumek atumesh waittsatin ainagme, wi jakattag nunisjumek jakatin ainagme, 40tujash mina untsujui, mina menajui ekeemsatin atajum tusanuk tumaitsujime. Duka ya aidau ekeemsatnuji umigkamuita nudau ainawai.
41Nu tabaun tikich diez jintintaiji aina nu antukag, Juagkan Jacobojai kajegkajui. 42Nuniagtai Jesús ditan untsuká chichajak:
—Atumek dekagme, aents ju nugka juiya aentsun apuji aidauk aentsnak ditanua nunin emak inainawai, tuja nunú apu aina nuna aentsji aidaushkam aentsnak dita wakegamun inainawai. 43Tujash atum ainajum anuiyag nuninuk amaitsui; dekas apu atatus wakegauk atum ainajum anuiyag tikich aina nuna umijin amainai. 44Atum ainajum anuiya dekatkau atatus wakegauk, tikichi inake amainai. 45Wagki Aentsmaga akiinauwa duka umigtuktinme tusag taachui, tikich aidaun yaigtatus tauwai, ni mantamna kuashat aentsun uwemtikata tau asa, tiuwai.
Wainmachu Bartimeo wainmakbau
(Mt. 20.29-34; Lc. 18.35-43)
46Jericó jegawajui; nunik nuiya jiinki Jesusak ni jintintaiji aidaujai nuigtú kuashat aents aidaujai ashinai, wainmachu Bartimeo daagtin Timeo uchijí jintá yantam ekeemas, kuichkin segamak eketu. 47Nuniau Jesús nazaretnumia nagkaemawai tabaun antuk, untsumtan nagkamau, nuniak:
—¡Jesusah Davita uchijiyah, wait anenjugta! wajau.
48Imattai kuashat aents itatkati tusag jiyaidau; tujash nigka nuní senchi untsumak:
—¡Davita uchijiyah, minash wait anenjugta! wajau.
49Imattai Jesuschakam wajantú, nunik chichaak:
—Untsuktajum, tau.
Tutai wainmachun untsuinak:
—Shiig aneasta, untsugmawai wajaktá, tuidau.
50Tama niishkam tseke wajakí jaanchjinak nagkimá ukuak Jesús wajamunum jegantui. 51Nunikmatai Jesús iniak:
—¿Minash utugtukti tusamea wakegame?, tau.
Tama wainmachu ayaak:
—Maestroh wainmaktasan wakegajai, tau.
52Tutai Jesús:
—Wetá, ame dekaskeapi tabaugmin tsagajume, tiuwai.
Tusá tamawaik wainmakui, nunik Jesús wetai niishkam weuwai.
Obecnie wybrane:
(Evangelio según San Marcos) 10: AGR
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2020, Wycliffe Bible Translators, Inc.
