ᓘᑲᓯᐅᑉ ᐊᒡᓚᖏᑦ 24
EAIB

ᓘᑲᓯᐅᑉ ᐊᒡᓚᖏᑦ 24

24
ᔩᓱᓯᐅᑉ ᒪᑭᓐᓂᖓ
ᒫᑎᐅᓯ 28:1-10; ᒫᑯᓯ 16:1-8; ᔪᐊᓇᓯ 20:1-10
1ᐅᓪᓚᕌᕐᔪᒃᑯᑦ ᐱᓇᓱᐊᕈᓯᐅᑉ ᓯᕗᓪᓕᖅᐹᖓᓂ, ᐊᕐᖕᓁᑦ ᐃᓗᕕᕐᖕᒧᐊᖅᐳᑦ, ᑎᐱᑦᓯᐊᕆᒃᓴᐅᑎᓂᒃ ᐊᑐᐃᓐᓇᕈᓚᐅᖅᑕᒥᖕᓂᒃ ᓇᒃᓴᕐᓗᑎᒃ. 2ᐃᓗᕕᐅᑉ ᒪᑐᖓ ᐅᔭᕌᓗᒃ ᐊᒃᓴᑲᖅᑎᑕᕕᓂᖅ ᑕᑯᕚᑦ, 3ᐃᓗᐊᓄᑦ ᐃᑎᕋᒥᒃ ᐊᑕᓂᐅᑉ ᔩᓱᓯᐅᑉ ᑎᒥᖓ ᑕᑯᓐᖏᓛᑦ. 4ᑕᕝᕙᓂ ᓇᓗᓕᐅᖅᑲᑎᓪᓗᒋᑦ, ᑕᑯᒋᑦ, ᓇᖏᖃᑎᖃᓕᖅᐳᑦ ᐊᖑᑏᖕᓂᒃ ᒪᕐᕉᖕᓂᒃ ᖃᐅᒪᔪᓂᒃ ᕿᓪᓕᖅᑐᓂᒃ ᐊᓐᓄᕌᓖᖕᓂᒃ. 5ᑲᑉᐱᐊᓱᖕᓂᕐᖕᒧᑦ ᓄᓇᒧᑦ ᐹᒻᒪᒃᐳᑦ, ᑖᒃᑯᓇᖓ ᐅᖃᐅᑦᔭᐅᕗᑦ, “ᓱᖕᒪᑦ ᒪᑭᓯᒪᔪᖅ ᑐᖁᖓᔪᓂ ᕿᓂᖅᐱᓯᐅᒃ? 6#ᒫᑎᐅᓯ 16:21; 17:22,23; 20:18,19; ᒫᑯᓯ 8:31; 9:31; 10:33,34; ᓘᑲᓯ 9:22; 18:31-33.ᑕᒫᓃᓐᖏᓚᖅ ᒪᑭᓯᒪᕗᖅ. ᐃᖅᑬᓕᕆᑦᓯ ᐅᖃᐅᑎᓚᐅᕐᖕᒪᓯ, ᒐᓕᓕᐊᒦᓪᓗᓂ ᓱᓕ, 7‘ᐃᓅᑉ ᐃᕐᖕᓂᖓ ᑐᓂᔭᐅᔭᕆᐊᖃᖅᐳᖅ ᐊᔪᖅᑐᓕᔪᓄᑦ, ᑭᑭᐊᒃᑐᖅᑕᐅᓗᓂᓗ, ᐅᓪᓗᐃᓪᓗ ᐱᖓᔪᐊᓐᓂ ᒪᑭᓛᕆᕗᖅ.’”
8ᐊᕐᖕᓁᑦ ᐃᖅᑬᓕᖅᐳᑦ ᐅᖃᐅᓯᖏᓐᓂᒃ, 9ᐃᓗᕕᕐᖕᒥᑦ ᐅᑎᕋᒥᒃ ᑕᒪᒃᑯᐊᓕᒫᑦ ᐅᖃᐅᓯᕆᕔᑦ 11ᓄᑦ ᐃᓕᓐᓂᐊᖅᑎᓄᑦ ᐊᓯᓕᒫᖏᓄᓪᓗ. 10ᐊᕐᖕᓁᑦ ᐅᑯᐊᖑᓚᐅᖅᐳᑦ ᒥᐊᕆ ᒫᒃᑕᓖᓂ, ᔪᐊᓇᓗ, ᒥᐊᕆᓗ ᔧᒥᓯᐅᑉ ᐊᓈᓇᖓ; ᐊᕐᖕᓇᓂᒃ ᐊᓯᒥᖕᓂᒃ ᐃᓚᖃᕐᓗᑎᒃ ᐅᓂᒃᑳᓚᐅᖅᐳᑦ ᐋᐴᓯᑕᓕᖕᓄᑦ; 11ᑖᒃᑯᐊ ᐅᖃᐅᓯᓐᖑᐊᑐᐃᓐᓇᐅᔪᕆᒃᓯᕗᑦ, ᐅᒃᐱᕈᓱᒐᑎᒃ ᑖᒃᑯᓂᖓ. 12ᐲᑦᑐᕉᓯᓕ ᓂᑯᕕᓪᓗᓂ ᐃᓗᕕᕐᖕᒧᑦ ᐅᓪᓚᒃᓯᕗᖅ, ᐃᓗᐊᓄᑦ ᐃᑦᓱᐊᕋᒥ, ᑕᑯᕗᖅ ᖃᓪᓗᓈᖅᑕᑦ ᐃᒻᒧᑎᕕᓃᑦ ᑖᒃᑯᐊᑐᐊᑦ ᑕᕝᕙᓃᑦᑐᑦ, ᐅᑎᕐᓗᓂᓗ, ᐃᓱᒪᒃᓴᖅᓯᐅᓕᖅᐳᖅ ᖃᓄᐊᓗᒃ ᑕᒪᒃᑯᐊ ᐱᓐᓂᕐᖕᒪᖔᑕ.
ᓄᓇᓕᖕᓄᑦ ᐃᒤᐊᓯᒧᑦ ᐱᓱᖃᑎᒌᒃᑐᑦ
ᒫᑯᓯ 16:12-13
13ᐅᓪᓗᒥ ᑍᑦᓱᒪᓂᑦᓮᓐᓇᖅ ᒪᕐᕉᒃ ᔩᓱᓯᐅᑉ ᒪᓕᒃᑎᖏᒃ ᐱᓱᓚᐅᖅᐴᒃ ᓄᓇᓕᖕᓄᑦ ᐃᒤᐊᓯᒧᑦ, ᐃᒻᒪᖄ 7ᒤᓕᒥᒃ ᐅᖓᓯᖕᓂᖃᖅᑐᒧᑦ ᔨᕉᓴᓕᒻᒥᑦ, 14ᑖᒃᑯᐊᒃ ᐅᖃᖃᑎᒌᒃᐴᒃ ᑕᒪᒃᑯᓂᖓ ᖃᓄᐃᓕᐅᕈᑕᐅᔪᓕᒫᓂᒃ. 15ᐅᖃᖃᑎᒌᒃᑎᓪᓗᒋᒃ ᓱᓕ, ᔩᓱᓯ ᓇᖕᒥᓂᖅ ᐅᐸᒍᑎᕗᖅ ᑖᒃᑯᖕᓄᖓ ᐱᓱᖃᑎᒋᓕᕐᓗᒋᒃ. 16ᑖᒃᑯᐊᒃ ᑖᑦᓱᒥᖓ ᐃᓕᑕᖅᓯᔪᓐᓇᖅᑎᑕᐅᓚᐅᓐᖏᓛᒃ. 17ᔩᓱᓯᐅᑉ ᐅᖃᐅᑎᕚᒃ, “ᓱᓇᒥᒃ ᐅᖃᖃᑎᒌᒍᑎᖃᖅᐱᓯᒃ ᐱᓱᒃᑎᓪᓗᓯᒃ?”
ᑖᒃᑯᐊᒃ ᓄᖅᑲᖅᐴᒃ, ᕿᒃᓵᒡᓗᑎᒃ. 18ᐂᑉᐸᖓᑕ ᑭᓕᐅᐹᓯᒥᒃ ᐊᑎᓕᐅᑉ, ᑭᐅᕚ, “ᐃᕝᕕᑐᐊᖅ ᔨᕉᓴᓕᒻᒧᐊᖅᓯᒪᔪᓂᑦ ᐅᓪᓗᓂ ᑕᒪᒃᑯᓇᓂ ᐱᔪᖃᓚᐅᖅᑐᒥᒃ ᖃᐅᔨᒪᖏᑦᑐᑑᕖᑦ?”
19ᔩᓱᓯᐅᑉ ᐊᐱᕆᕚ, “ᓱᓇᒥᒃ ᐱᔪᖃᓚᐅᕐᖕᒪᑦ?”
ᑖᒃᑯᐊᒃ ᐅᖃᖅᐴᒃ, “ᔩᓱᓯ ᓈᓴᕇᑎᒥᐅᖅ ᐱᓪᓗᒍ, ᑖᓐᓇ ᓇᓚᐅᑦᑍᔪᓚᐅᖅᐳᖅ ᐱᔪᓐᓇᕐᖕᓂᖃᕐᓗᓂ ᐱᓂᐊᕐᖕᓂᕐᖕᒥᒍᑦ ᐅᖃᐅᓯᕐᖕᒥᒍᓪᓗ ᒎᑎᐅᑉ ᐃᓄᐃᓪᓗ ᓵᖓᓂ. 20ᑐᓂᕐᕈᓯᖅᑎᑦᓯᔨᑦᑕ ᐊᖓᔪᖅᑳᖏᑦᑕ ᐊᐅᓚᑦᓯᔨᑦᑕᓗ ᐱᔭᐅᑎᓚᐅᖅᐹᑦ ᑐᖁᑕᐅᖁᓪᓗᒍ, ᑭᑭᐊᒃᑐᖅᑕᐅᓚᐅᖅᐳᖅ ᓴᓐᓂᖓᔪᓕᖕᒧᑦ. 21ᐅᕙᒍᓪᓕ ᓂᕆᐅᓚᐅᖅᐳᒍᑦ ᑖᑦᓱᒧᖓ ᐃᓴᕆᐊᓕᒥᐅᑦ ᐅᖁᒤᒃᓴᕈᓐᓃᖅᑎᑕᐅᓂᐊᕋᓱᒋᓪᓗᒋᑦ. ᑍᒪᓐᖓᓪᓕ ᒫᓐᓇ ᐅᓪᓗᑦ ᐱᖓᔪᒋᓕᖅᐹᑦ ᑍᒤᓕᐅᖅᑕᐅᓚᐅᖅᑎᓪᓗᒍ. 22ᐊᒻᒪᑦᑕᐅᖅ, ᐊᕐᖕᓁᑦ ᐃᓚᒋᔭᑦᑕ ᖁᐊᖅᓵᖅᑎᖅᑲᐅᕚᑎᒍᑦ, ᐅᓪᓛᖅ ᖃᐅᒻᒪᓕᖅᑎᓪᓗᒍ ᐃᓗᕕᕐᖕᒧᐊᕋᒥᒃ; 23ᑎᒥᖓᓂᒃ ᑕᑯᖅᑲᐅᖏᒻᒪᑕ; ᐅᑎᕋᒥᒃ ᐅᓂᒃᑳᖅᑲᐅᕗᑦ ᐂᖏᓕᒥᒃ ᑕᑯᑎᑕᐅᓂᕋᕐᓗᑎᒃ, ᐅᖃᐅᑦᔭᐅᓂᕋᕐᓗᑎᒡᓗ ᔩᓱᓯ ᒪᑭᓯᒪᓂᕋᖅᑕᐅᑎᓪᓗᒍ. 24ᐃᓚᒋᔭᑦᑕ ᐃᓚᖏᑦ ᐃᓗᕕᕐᖕᒧᐊᓚᐅᖅᐳᑦ ᑕᑯᓪᓗᑎᒃ ᐊᕐᖕᓁᑦ ᐅᓂᒃᑲᐅᓯᕆᖅᑲᐅᔭᖏᑎᑐᑦ ᑍᒫᓪᓗᐊᖅ, ᑭᓯᐊᓂᓕ ᔩᓱᓯᒥᒃ ᑕᑯᓇᑎᒃ.”
25ᔩᓱᓯᐅᑉ ᐅᖃᐅᑎᕚᒃ, “ᓯᓔᑦᑐᐊᓘᔪᓯᒃ, ᐅᒃᐱᕈᓱᓕᕈᓐᓇᖏᑦᑐᓯᒡᓗ ᓇᓚᐅᑍᔪᑦ ᐅᖃᐅᓯᕆᓯᒪᔭᖏᓐᓂᒃ! 26ᖃᐅᔨᒪᓐᖏᓚᓰᒃ ᙭ᔅᑑᓯ ᑍᒫᒃ ᐃᓗᖏᖅᓱᖅᑎᑕᐅᓂᒃᑯᑦ ᐃᓂᖁᓇᕐᖕᓂᕐᔪᐊᕐᖕᒧᑦ ᐱᑎᑕᐅᔪᒃᓴᐅᓂᖓᓃᒃ?” 27ᔩᓱᓯᐅᑉ ᓇᓗᓁᖅᓯᕕᒋᑦᓯᐊᖅᐹᒃ ᐱᒋᐊᕐᓗᓂ ᒨᓯᓯᐅᑉ ᐊᒡᓚᖏᓐᓂᑦ ᓇᓚᐅᑦᑍᔪᓪᓗ ᐊᒡᓚᖏᓐᓂᑦ ᐊᒡᓚᓕᒫᑦ ᓇᓗᓁᔭᖅᐰᑦ ᐃᒻᒥᓂᒃ ᐅᖃᐅᓯᖃᖅᓯᒪᔪᓕᒫᑦ.
28ᓄᓇᓕᖕᓄᑦ ᐅᐸᒃᑕᒥᖕᓄᑦ ᑎᑭᓕᕋᒥᒃ, ᔩᓱᓯ ᖄᖏᐅᑎᓂᐊᖅᑑᔮᓕᖅᐳᖅ, 29ᑖᒃᑯᐊᒃ ᓄᖅᑲᖁᔨᓕᖅᐴᒃ, ᐅᖃᐅᑎᓪᓗᒍ, “ᐅᕙᑦᑎᓐᓃᓚᐅᕆᑦ, ᐅᓐᓄᓕᓕᕐᖕᒪᑦ ᑖᖅᓯᕙᓪᓕᐊᓕᕐᓗᓂ.” ᔩᓱᓯᐅᑉ ᐃᒡᓗᒧᐊᖃᑎᒋᕚᒃ ᑖᒃᑯᓇᓃᓕᕐᓗᓂ. 30ᐃᖏᑉᐳᖅ ᓂᕆᖃᑎᒋᓂᐊᕐᓗᒋᒃ, ᓂᐊᖂᔭᖅ ᑎᒍᕚ, ᖁᔭᓕᓪᓗᓂ, ᐊᕕᒃᐹ, ᑖᒃᑯᖕᓄᖓ ᑐᓂᓪᓗᒍ. 31ᐃᔨᖏᒃ ᑕᕝᕙ ᑕᑯᑎᑕᐅᓕᖅᐴᒃ ᐃᓕᑕᕆᓪᓗᒍᓗ; ᔩᓱᓯᓕ ᑕᕝᕙᓐᖓᑦ ᑕᑯᒃᓴᐅᔪᓐᓃᖅᐳᖅ. 32ᑖᒃᑯᐊᒃ ᐃᒻᒥᖕᓄᑦ ᐅᖃᓕᖅᐴᒃ, “ᐆᓇᖅᓯᔪᐊᓘᖅᑲᐅᒐᓗᐊᖅᐳᒍᒃ ᐃᓗᑦᑎᖕᓂ ᐅᖃᓪᓚᒃᑎᓪᓗᒍ ᐊᖅᑯᑎᒃᑰᖅᑎᓪᓗᑕ, ᐊᒡᓚᖕᓂᒃ ᐅᖃᕐᕕᒋᖕᒪᑎᒃᑯᒃ ᓇᓗᓁᖅᓯᕕᒋᓪᓗᓄᒡᓗ.”
33ᑖᒃᑯᐊᒃ ᓇᖏᖅᓯᕘᒃ, ᑕᕝᕔᓐᓇᖅ ᔨᕉᓴᓕᒻᒧᑦ ᐅᑎᓕᕐᓗᑎᒃ; ᐃᓕᓐᓂᐊᖅᑎᑦ 11 ᐅᐸᒃᐰᑦ ᐃᓚᒋᔭᖏᓪᓗ ᑲᑎᒪᔪᑦ. 34ᑖᒃᑯᐊᒃ ᐅᖃᖅᐴᒃ, “ᐊᑕᓂᖅ ᐃᓛᒃ ᓱᓕᔪᒥᒃ ᒪᑭᓯᒪᕗᒃ, ᓮᒨᓂᒧᑦ ᓴᖅᑭᓚᐅᖅᑐᖅ!”
35ᑕᕝᕙ ᐊᖑᑏᒃ ᐅᓂᒃᑳᓕᖅᐴᒃ ᐊᖅᑯᑎᒥ ᖃᓄᐃᓐᓂᕆᖅᑲᐅᔭᒥᖕᓂᒃ, ᖃᓄᕐᓗ ᐊᑕᓂᕐᖕᒥᒃ ᐃᓕᑕᖅᓯᓂᕆᖅᑲᐅᔭᒥᖕᓂᒃ, ᓂᐊᖂᔭᒥᒃ ᐊᕕᒃᓯᓕᖅᑎᓪᓗᒍ.
ᔩᓱᓯᐅᑉ ᓴᖅᑭᓐᓂᖓ ᐃᓕᓐᓂᐊᖅᑎᒥᓄᑦ
ᒫᑎᐅᓯ 28:16-20; ᒫᑯᓯ 16:14-18; ᔪᐊᓇᓯ 20:19-23; ᐋᐴᓯᑕᓖᑦ 1:6-8
36ᑖᒃᑯᐊᒃ ᐅᓂᒃᑳᖅᑎᓪᓗᒋᒃ ᓱᓕ ᑕᒪᑐᒥᖓ, ᐊᑕᓂᖅ ᓇᖕᒥᓂᖅ ᐊᑯᓐᓂᖓᓐᓂ ᓇᖏᓕᖅᐳᖅ ᐅᖃᕐᓗᓂ, “ᓮᒪᓂᖃᕆᑦᓯ.” 37ᑖᒃᑯᐊᓕ ᖁᐊᖅᓵᖓᓕᖅᐳᑦ ᑲᑉᐱᐊᓱᒃᓗᑎᒃ, ᑑᕐᖓᕐᖕᒥᒃ ᑕᑯᓇᓱᒋᓪᓗᑎᒃ. 38ᔩᓱᓯᐅᑉ ᐅᖃᐅᑎᕔᑦ, “ᓱᖕᒪᑦ ᖁᐊᖅᓵᖓᕕᓯ ᓱᖕᒪᓪᓗ ᖁᓚᕐᖕᓂᖃᖅᐱᓰ ᐆᒻᒪᑎᑦᓯᓐᓂ? 39ᐊᒡᒐᒃᑲ ᑕᑯᓕᖅᓯᐅᒃ ᐃᑎᒐᒃᑲᓗ, ᐅᕙᖓᓪᓚᕆᐅᕗᖓ; ᐊᒃᑐᓕᖅᓯᓐᖓ, ᖃᐅᔨᓕᕆᑦᓯ ᐊᓂᕐᖕᓂᑐᐃᓐᓇᖅ ᐅᕕᓂᖃᕋᓂᓗ ᓴᐅᓂᖃᖏᒻᒪᑦ ᑕᑯᕗᓯᓕ ᐅᕕᓂᖃᕐᓗᖓᓗ ᓴᐅᓂᖃᕋᒪ.”
40ᑍᒫᒃ ᐅᖃᕇᕋᒥ, ᐊᒡᒐᒥᓂᒃ ᐃᑎᒐᒥᓂᒡᓗ ᕿᒥᕐᕈᑎᑉᐰᑦ. 41ᓱᓕ ᐅᒃᐱᕈᓱᖏᒻᒪᑕ ᖁᕕᐊᓱᓗᐊᕐᖕᓂᕐᖕᒧᑦ, ᑲᒪᓂᕐᖕᒧᓪᓗ; ᔩᓱᓯᐅᑉ ᐅᖃᐅᑎᕔᑦ, “ᐅᕙᓂ ᓂᕆᔭᒃᓴᖃᖅᐱᓰ?” 42ᐃᖃᓗᖕᒥᒃ ᐆᓯᒪᔪᒥᒃ ᑐᓂᓯᕕᒋᕚᑦ, 43ᑎᒍᓪᓗᒍ ᓂᕆᕚ ᑕᒃᑯᐊᓐᓂ.
44ᑕᕝᕙ ᐅᖃᐅᑎᕔᑦ, “ᑕᒪᒃᑯᓂᖓ ᑕᕝᕙ ᐅᖃᐅᑎᖃᑦᑕᓚᐅᖅᐸᑦᓯ ᓇᔪᕐᓗᓯ ᓱᓕ, ᑎᑎᕋᐅᓯᖃᖅᓯᒪᔪᓕᒫᑦ ᐅᕙᓐᓂᒃ ᒨᓯᓯᐅᑉ ᐱᖁᔭᖏᓐᓂ, ᓇᓚᐅᑦᑍᔪᓪᓗ ᐊᒡᓚᖏᓐᓂ ᐃᓐᖏᕈᑎᓂᓗ ᓇᓚᐅᑦᓯᔭᕆᐊᖃᓚᐅᕐᖕᒪᑕ.”
45ᑕᕝᕙ ᖃᐅᔨᑎᑉᐰᑦ ᐊᒡᓚᖕᓂᒃ ᑐᑭᓯᖁᓪᓗᒋᑦ, 46ᐅᖃᐅᑎᓪᓗᒋᑦ, “ᐃᒫᒃ ᑕᕝᕙ ᑎᑎᕋᖅᓯᒪᕗᖅ, ᙭ᔅᑑᓯ ᐋᓐᓂᐊᑎᑕᐅᔭᕆᐊᖃᖅᐳᖅ ᐅᓪᓗᐃᓪᓗ ᐱᖓᔪᐊᓐᓂ ᒪᑭᑦᓴᕆᐊᖃᖅᐳᖅ ᑐᖁᖓᔪᓂᑦ, 47ᓵᒋᐊᕐᖕᓂᕐᖕᒥᒃ ᐃᓱᒪᒋᔭᐅᔪᓐᓁᕐᖕᓂᕐᖕᒥᒡᓗ ᐊᔪᕐᖕᓂᕐᖕᒥᑦ ᐊᔪᕆᖅᑐᐃᔪᑕᐅᔭᖃᕆᐊᖃᖅᐳᖅ ᙭ᔅᑑᓯᐅᑉ ᐊᑎᖓᓂ ᐃᓅᖃᑎᒌᒡᔪᐊᓕᒫᓄᑦ, ᔨᕉᓴᓕᒻᒥᑦ ᐱᒋᐊᕐᓗᑎᒃ. 48ᐃᓕᑦᓯ ᑕᕝᕙ ᑕᒪᒃᑯᓂᖓ ᖃᐅᔨᓯᒪᔪᖁᑎᒋᕙᑦᓯ. 49#ᐋᐴᓯᑕᓖᑦ 1:4.ᑕᑯᒋᑦ, ᓇᖕᒥᓂᖅ ᑎᓕᓯᕕᒋᓂᐊᖅᐸᑦᓯ ᐊᑖᑕᒪ ᐊᖏᕈᑎᒋᓯᒪᔭᖓᓂᒃ; ᐃᓕᑦᓯᓕ ᔨᕉᓴᓕᒻᒥ ᐅᑕᖅᑭᔭᕆᐊᖃᖅᐳᓯ, ᐱᔪᓐᓇᕐᖕᓂᕐᖕᒥᒃ ᕿᓚᖕᒥᑦ ᑐᓂᓯᕕᐅᖏᓐᓂᑦᓯᓐᓂ.”
ᔩᓱᓯᐅᑉ ᕿᓚᓕᐊᕐᖕᓂᖓ
ᒫᑯᓯ 16:19-20; ᐋᐴᓯᑕᓖᑦ 1:9-11
50 # ᐋᐴᓯᑕᓖᑦ 1:9-11. ᐃᒡᓗᒐᓴᒡᔪᐊᓂᓪᓗ ᐊᐅᓪᓚᕈᑎᕔᑦ ᐱᑕᓂᒧᑦ ᑎᑭᓪᓗᑎᒃ, ᐃᓵᒡᕕᒋᓪᓗᒋᓪᓗ ᓮᒻᒪᖅᑎᑉᐰᑦ. 51ᓮᒻᒪᖅᑎᒌᑐᐊᕋᒥᒋᑦ, ᕿᒪᓕᖅᐰᑦ ᕿᓚᓕᐊᖅᑎᑕᐅᓕᕐᓗᓂᓗ. 52ᑖᒃᑯᐊᓗ ᔨᕉᓴᓕᒻᒧᑦ ᐅᑎᖅᐳᑦ ᖁᕕᐊᓱᒻᒪᕆᒡᓗᑎᒃ. 53ᑍᒪᓐᖓᓪ ᑐᒃᓯᐊᕐᕕᒡᔪᐊᒦᑉᐳᑦ ᒎᑎ ᓂᖅᑐᕐᓗᒍ.

Eastern Arctic Inuktitut Bible © Canadian Bible Society, 2021.

Dowiedz się więcej o ᐊᒡᓔᑦ ᐃᑦᔪᕐᖕᓁᑦᑐᑦ