गलाती 6
6
सबको भलाइ अददु
1बिश्वासि भाइन हो, यदि कसइ मान्सले पाप अर्या भेट्यो भण्या, तमन जइलाइ पबित्र आत्माले अगुवाइ अरन्छ, तइले नम्रतापुर्वक तिननलाइ सुधार अर। तमन होशियार रअ, ताकि तमन लगइ पाप अद्दया परीक्षामि जन पण। 2हामले एक अर्खालाइ सहयोग अददु पणन्छ, हाम मध्ये जो लगइ समस्यामि हुन्छ, रे इसेरि हामले ख्रीष्टको कानुन पालन अददाउ।
3यदि कसइले सोचन्छ कि उ ठुलो हु तर उ साच्ची ठुलो हुनइन भण्या तइले आफइलाइ धोका दिन्छ। 4हरेक मान्सले आफ्नो कामको जाँच अरउ कि उ ठीक छ कि आथिन। यदि उइले असल अर्याछ भण्या उइले गर्व अद्द सकन्छ। तर उइले आफनो काम और मान्सनसित तुलना अददु हुनइन। 5क्याकि हाम हरेक आफ्नो-आफ्नो कामकीलाइ आफइ जिम्मेबार छौ।
6बचनको शिक्षा पाउन्या हरेकले आफसित भया कुरणी बचन सिकाउन्यासित बाँडचुँण अद्दु पणन्छ। 7आफइलाइ धोका जन दिय, कसइले लगइ परमेश्वरलाइ कभइ मुर्ख बनाउन सक्दइन, क्याकि मान्सले जी रोपन्छ तसइको कटनी अरन्छ। 8क्याकि जइले आफना पापमय स्वभाव अन्सार काम अरन्छ, तइ कुरणीले मृत्यु लेया उइले धेक्द्या हो। तर जइले पबित्र आत्माको इच्छा पुरा अरन्छ, तइले पबित्र आत्माले अनन्त जीवन दियाको धेक्द्या हो।
9भलाइ अद्द्या काममी हाम निरुत्साहित जन होउ, क्याकि यदि हामले कभइ हिम्मत हारेइन भण्या परमेश्वरले आफ्नो समयमि हामलाइ इनाम दिन्या हुन। 10तबइकिलाइ मौका पाए सम्म हामले सब मान्सनलाइ भलाइ अद्दु पणन्छ, बिसेस अरिबर बिश्वासि मान्सनलाइ।
अन्तिम चेतावनी रे सुभकामना
11हेर, म कति ठुला-ठुला अक्षरले आफनाइ हातले तमनलाइ लेख्दाछु। 12यहुदि मान्सनलाइ खुशी पड्डाइ तिननले तमनलाइ खतना अददाइ दबाब दिनाहान। तिननले यिसो अर भण्नाहान, ताकि मान्सनले येशू ख्रीष्ट क्रुसमि मर्या भणन्या कुरणीमि बिश्वास अरिबर मान्तर उद्दार पाइन्छ भणन्या प्रचार अर्यामी जन सताउन। 13क्याकि खतना अर्या मान्सनले लगइ मोशाको सब कानुन पालन अद्दाइन, तर तिननले तमरो खतना भया चाहानान ताकि तिनन बठेइ तमरो खतना भया हो भणबर तिननले और यहुदि मान्सनका अगाडी घमण्ड अद्द सकुन।
14मेरा बारेमि भणन्या हो भण्या, म हामरा प्रभु येशू ख्रीष्टको क्रुसमि मर्या कुरणी बाहेक और केइ कुरणीमि कभइ घमण्ड अद्द चाहानइन। क्याकि उनरो मृत्यु बठेइ म संसारका इच्छाको अधिनमी आथिन, रे आब ममि यइ संसारको कोइ सक्तिले सासन अद्द्या आथिन। 15न त खतनाको केइ महत्व छ, न त बेखतनाको, तर महत्वपूर्ण कुरणी भण्या पबित्र आत्माको काम बठेइ परमेश्वरले तमनलाइ नयाँ मान्स बनायो। 16यिन आज्ञापालन अद्द्या सब मान्सन प्रति परमेश्वर दयालु होउन, रे तिनन सान्ति पाउन सकुन। तिनन परमेश्वर बठेइ छानिया इस्राएल देशका मान्सन हुन।
17आब बठेइ कसइले मलाइ कष्ट जन देउ, क्याकि मेरा सरीरमि भया डामले म येशूको दास हु भणबर धेकाउन्छ।
18बिश्वासि भाइन हो, म प्रार्थना अद्दउ कि हामरा प्रभु येशू ख्रीष्टको अनुग्रह तमनसित होइरउ। आमेन।
Obecnie wybrane:
गलाती 6: DTYNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Dotyali (डोटेली) New Testament, by The Love Fellowship is licensed under Creative Commons Attribution-ShareAlike 4.0 License.